1 Maccabées 12
12
Joonatan nì Room yab fātìi pɔ̄ntì bi-pèéŋu
1Joonatan ká yii ŋyunti ŋun poon bi bée ŋān̄. Niinee ní u lēē binib ki tú Room, bí cùú pɔ̀ntī mpèé ŋun nìn bí bi nì Room yab kansikinee. 2U nìn ŋmàn̄ kugbɔŋu ki tú bi cūnnì Sipaarta nì laaba mun.
3Ituunee nìn búntì Room, ní ki bàn̄ ki kɔ́ bisaŋkiliibi kitil diikun. Bi nìn bí yii: «Usaraaŋakpil Joonatan nì Juuda yab timbundi di túnní-ti tí dāan̄ kí sòoǹ kí fàtīí pɔ̀ntī kubɔɔtiiu pèéŋu ŋun bí ni-kansikinee, ní ni nì bi ń ŋá ubaanti.» 4Bisaŋkiliibi kitilee nìn ŋmàn̄ kugbɔŋu bí cáá tīī ntimu mun kɔkɔ poon bi làá còom̀ kí jītée. Kugbɔŋu poon an ŋmàn̄ yii bí wúń ituunee pu áli í fàtīí gítí Juuda tiŋkin nì ŋgbansɔŋfi.
5Kugbɔŋu kun Joonatan nìn ŋmàn̄ ki tīī Sipaarta yabee sèé: 6<Man usaraaŋakpil Joonatan nì Juuda timbundi tindaŋkpilib nì bisaraaŋaliibi nì Juuda yab bin kíǹee di jáaḿ ti-nabiyaamu Sipaarta yab. 7An yúntì ni-bɔtiu Areeyioosi ŋmàn̄ kugbɔŋu ki tīiń ti-saraaŋakpiliu Ooniyasi. U nìn lī yii ti sá ni-nabiyaamu ní. Ní kugbɔŋu kun u nìn ŋmàn̄ee nìn lafun dàkà míǹ. 8Ooniyasi nìn fōō un ni nìn túnnée nì tinyookpaandi ní. U nìn fōō kugbɔŋu kun nìn sòoǹ kubɔɔtiiu nì mpèé puee ki kíí ki ŋá míǹ. 9Circir gbɔnti tin ti cááyee tútúǹ-ti tí nīn bí mmɔntiimin, ní tiba kaa bàà páb́-ti tí ŋá mpèé gbanti. 10Nì míǹ kɔkɔee, ti là kí dī anyɔɔbun nee pu kí yàntī kunabitiiu nì kubɔɔtiiu kun bí ti-kansikinee ń mɔ̀tīí kɔ́ tɔbin tiŋan. Taa là kí kpántí binicambi ni-cee. Di sá yii an yúntì doooo ni nín túnní ntuun ti-ceeyee. 11Ti pée téetí ni-pu ní múlmul ti-jiŋaakpaambi poon, nì iyunti in ti ŋáań saraabee, nì ti yaa bíi mèé Unimbɔtee. Tiŋman an ŋān̄ ki kítì unil ń nīn téetí u-nabiyaamu pu. 12An mɔ̄ǹ-ti ni nín nyáń diyindee pu. 13Timbi jandi púee, ti kɔ́ agìń tikpil poon ki jáń tijáti tikpil, di sá yii bibɔtiibi bin māntìi tú-tee jáń nì ti. 14Tijáti gbanti poonee, taa là kí kɔ́ǹ ni nì ti-bɔɔbi bin kíǹ ti nì bi ŋá mpèéyee digìńdi. 15Di sá timbi máká Unimbɔti pu ní yii ú jòoń-ti. Úǹ di nyántì-ti ti-nannanliibi ŋaan, ní ki yāntì icoo kɔ́-bi.
16«An pu ní ti lēē Antiyookuusi jipɔɔn Numeeniyusi, nì Jasɔn jipɔɔn Antiipateer, ki dū-bi ki tú Room yab cee, bí fàtīí pɔ̀ntī mpèé ŋun nìn bí ti-kansikinee ní kí yàntī tí ŋá ubaanti. 17Ti gíti tīī ti-tuuŋyi mara í cù ni-cee. I máaǹ kí jāam̀-ni, ní kí dū kugbɔŋu kun ti ŋmàn̄ kí dàkà yii ti là kubɔɔtiiu kun bí ti-kansikinee ń mɔ̀tīí píkée. 18An puee ti gbàam̄-ni yii ní kíí-ti tibɔti gbanti pu.»
19Kugbɔŋu kun Areeyioosi nìn ŋmàn̄ dooooyee ki tīiń Ooniyasee sèé: 20«Man Areeyioosi, Sipaarta yab bɔtiu jáaḿ usaraaŋakpil Ooniyasi. 21Ti ká kugbɔŋu kubɔ Sipaarta yab nì Juuda yab pu. Kugbɔŋuee poonee, an ŋmàn̄ yii anibul alee sá nnabiyaamu, ní bi-liitilee nyánní Abraam dicaŋkun. 22Kɔŋkɔnnee ti nín béè mimmee, ti gbàam̄-ni yii ní ŋmàń kí tùkù-ti tí béé an yaa bútì-ni. 23Timbi jandi púee, ti ŋūǹ kí ŋmà kí tùkù-ni tin bí nee: <Ní dū ti-picaŋkpunti nì ti-gaajawanti kí yíiń ni-yati, ní ti mun làá ŋá míǹ mbaantiim. An pu ní ti kpáafì binib bin ti túnní ni-ceeyee yii bí tùkù-ni nlandɔkɔ ŋun ti cáá ni-puee.>»
Deemeetriyusi uliliiti janjaliibi sáǹ Joonatan nimbiin
24Joonatan gbìl̄ yii Deemeetriyusi janjakpilib fàtīi gítiń nì dijanjakitikpaandi din wīikíǹ dipeepeekaalee kí dāá jáǹ-u. 25Niinee Joonatan yíkì Jeerusaleem ki nín túŋkí-bi Amaati tiŋkin. Di sá yii waa là kí pɔ̄-bi mpaan bí kɔ́ u-tiŋkin. 26U nìn dū bicɔŋkiliibi ki tú bi-janjanaapaal pu. Bíǹ nìn fātìi gítìń ki tùkū-u yii binannanliibi bíi bɔ́ntí kí dāá túuǹ-bi kunyeeu kí jáǹ-bi. 27Ŋwìiń jéetèe ní Joonatan bí u-yab yii bí taa gèeǹ kí nīn wāĺ. An sá bí bɔ́ntí kí já kujaau kunyeeuee kɔkɔ ní. U nìn dū bijanjaliibi ki yóoǹ ki māntìi tú dijanjanaapaal. 28Binannanliibi nín gbìl̄ yii Joonatan nì u-janjaliibi bɔ́ntì kí já kujaauee ní tifaandi kɔ́-bi. Bi-wunti nìn gbáà ní kpàkpa ní bi kpāā kpāā ŋŋmi dijanjanaapaal pu ki yíkìi kátì. 29Kutaa nín wúntèe ní Joonatan nì u-janjaliibi nín béè yii bi búntì. Di sá yii bíǹ nìn gbíntìi wāĺ ŋŋmi nín fòol̄ dijanjanaapaal puee ní. 30Joonatan nìn kùl̄ ki bīiǹ bi-boon, ama waa nìn ŋúń ki cúú-bi, kun puee bi nìn dūtì Eeleeteer mɔɔl ki dóò.
31Niinee ní Joonatan fātì ki dūu nyīntì Bilaalibub timbundi diba pu, bi yíì-dì yii Sabaadee yab. U nìn jáń ki pɔ́ɔkiǹ-bi, ní ki yōoǹ bi-gaajawanti. 32U ŋá míǹ ki dóòyee ní bi yíkì niin ki nín cá Damaasi, ki cōom̀ ki jítì kitiŋee kɔkɔ pu. 33Siimɔn úǹ nìn yíkì ki cōom̀ ki tin gbātì Asikeelɔn tiŋki nì ntimu mun bi máń agun ki tú mu pìlīǹ-kèe. U nyáń niinee ní ki kíĺ Joopee tiŋki watil pú ki jáń ki fōō-kì. 34Di sá yii u nìn gbìl̄ yii niin yab nìn là kí dū kitiŋ gbanti kí ŋá Deemeetriyusi janjaliibi ŋaan ní. U nìn dū bijanjaliibi ki kāaǹ niin bí nīn cí.
Joonatan máń digundi ki tú Jeerusaleem
35Joonatan nìn fātìi gítìń Jeerusaleem. U nìn kóoǹ bitindaŋkpilib ki kpáfì. U nì bi nìn sòon̄ ní bi lēē yii bi làá mā agun kí tū ntimu mun bí Juudeeyee. 36U nìn lēē mun yii bi làá kūtì Jeerusaleem guŋŋi ŋfɔkɔn, ní kí mā diguŋkpaandi kí pìtī kitiŋ pɔ̀ti pu laakin bi máń digundi ki túee nì laakin kíǹee kansikin. U nìn là kí kàkatī Deemeetriyusi janjaliibi bin bí niinee, kí pìin̄-bi nsan bí taa dā tibaaa, kí taa nyāfì tiba mun. 37Binib nìn kpáfì kí fàtīí mā Jeerusaleem gundi. Di sá yii digundi jandi din bí ŋwìiń nyalaŋki pú ki cá ditantakalinee nìn lítì. Bi nìn fātìi ŋáŋkì Jeerusaleem tincaliiki kin bi yíì Safeenatee mun. 38Siimɔn úǹ nìn fātìi máń digundi ki tú Adida tiŋki kin bí ajoon taapuee. U nìn máń digundi ki dóò ní ki cóoǹ punuubi, ki ŋá tikpàlkaal.
Joonatan kɔ́ binannanliibi ŋaan
39Triifɔn nìn là kí kpòotī Siiriikpaan tiŋki, ní kí kpántí ubɔti. An puee ní u cúú ubɔti Antiyookuusi. 40Ama u nìn fàŋkí yii Joonatan ń taa pìin̄-u nsan kí dāá já nì u. An puee ní Triifɔn nyàab̄ nsàmbiyaamu mun pu u làá dī kí cúú-u kí kpɔ̀ee. Niinee ní u kíĺ nsan ki nín cá Beeti-Seeyan. 41Joonatan mun nìn nín cá Beeti-Seeyan ki yōoǹ u-janjamɔmmɔntiibi kutukub imuŋku ili ki túkuń-u. 42Triifɔn nín ká yii Joonatan dɔ́miń nì dijanjakitikpaandee, ní u yāntì kaa ti cúú-u mpɔn. 43Ama u nìn fōō-u nì tinyookpaandi, ní ki pú-u tiwampɔkaal. U nìn dū-u ki dàkā u-bɔɔbi, ní ki tīī u-janjaliibi mara yii bí nīn tɔ́-u kii bi nín tɔ́ úǹ u-ba puee. 44Boonee ní u bí Joonatan yii: «Ba pu ní a pú dijanjakitil nee digìńdi míǹ? Kujaau kubɔ mun kaa bí ti-kansikinaa! 45Yàntī a-janjaliibi ń nīn kùǹ. Lēē binikaaŋkaabi yéè bí gbíntí a-cee, kí táá-mi tí cù Pitooleemayiisi. M làá dū kitiŋ gbanti nì ntimu mun bi máń agun ki túee mubɔ nì mu-janjakitiŋ nì mu-kàliŋkpilib kí ŋá a-ŋaan. An pu gba ní m baasii dɔ́miń Beeti-Seeyan doo. M yaa ŋá míǹ ki dóòyee ní ḿ nīn gítí m-dumpu.»
46Joonatan nìn fōō tin Triifɔn nìn sòon̄ee ki kíí, ní ki ŋá kii u nín lī puee: U nìn yāntì u-janjaliibi nín gítí Juudee. 47U nìn pée kíǹ u-ba bijanjaliibi kutukub bita ja ní. U nìn dū kutukub bili ki kāaǹ Galiilee ní ki yāntì kutuku un kíǹee nóó-u. 48Ama ŋyunti ŋun Joonatan kɔ́ Pitooleemayiisee ní bi dū kitiŋ punyɔmmu ki pīiǹ. Bi nìn cúú-u ní ki dū ntàataajimu ki kūū bin táá-u ki kɔ́ee. 49Niinee Triifɔn tú bijanjaliibi bin còom̄ ataa puee nì bitanjakaliibi Galiilee, nì Jisirayeel tantakalin bí cùú kpɔ̀ Joonatan janjaliibi kɔkɔ. 50Bíǹ nìn gbìl̄ yii bi cúú usaraaŋakpil ki kūū bin nìn céeǹ-uee kɔkɔ. Nì míǹ kɔkɔee, bi nìn tīī tɔb kunyannyaau ní ki bɔ́ntì kí cùú já kujaau. 51Bin nìn bíi jì-bee nìn ká yii bi bɔ́ntì kí já kí fīī bi-ba. Niinee ní bíǹ fātì ki nín gítí. 52Juuda yab janjaliibi kɔkɔ nìn fātìi gítìń Juudee tiŋkin nì laafiya. Bi nìn súń Joonatan nì u-yab pu, ní ki nìn fāŋkì tikpil. Isirayeel yab kɔkɔ súń bi-kpool tikpil. 53Binib bin kóò ki māntìi tú Juuda yabee nìn pée kíǹ ki nyàab̀ kí kúntí-bi ní. Binib gbanti nìn lì yii: «Juuda yab kaa ti cáá ukpil, kaa ti cáá un làá tūtuǹ-bee. Tí cù kí jáǹ-bi kí kpɔ̀-bi. Ti yaa ŋá mimmee, ubɔ kaa làá ti téetí bi-pu kitiŋ pu.»
Currently Selected:
1 Maccabées 12: BASSARDC
Highlight
Share
Copy
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.