Romans 6

Ha Makakatoy Kan Jesu Kristu Siya Bo Makatagu Kan Siya

(2Co. 5:14; Gal. 2:19-21; 3:26-27; Col. 2:11--3:11)

1Tuttuwaʼn amod chi kachegun Apudyus kan chitaku. Ked himma mibyega taku? Ha ituɏutuɏuy taku un mangwa si byasuɏ ta machogchog-an chi kachegun Apudyus kan chitaku? 2Achipun makwa! Ti lagamput taku lalattoy lu mipanggop si byasuɏ, ked achipun makwaʼn ituɏutuɏuy taku pin-a mangmangwa si byasuɏ. 3Ti ammu taku un chitakuʼn labunyagen kan Kristu, lipati taku bo lakakatoy si latoyala.#6:3 Itullongyu 1 Cor. 12:13; Galatians 3:27 4Ked ha lampabunyagen taku, lipati taku kan Jesu Kristu si latoyala ya lilobolala, taplu maatod kan chitaku baruʼn biyeg un isun chi ummuliyan Jesu Kristu lataguwan gapu si pallakabyelin Ama takuʼn Apudyus.

5Ta lu lipati taku kan Jesu Kristu si latoyala, sigulachu boʼn lipati taku kan siya si ummuliyala lataguwan. 6Ked ammu taku un ha chachaan un kilatatagu taku, siya lipati un lailansa si krus ta siya manyam-an si kilabyelin chi byasuɏ si long-eg taku ya achipun chitaku mammusassu si byasuɏ. 7Ta lu matoy chi tagu, mawayawayaan si kilabyelin chi byasuɏ.

8Ked gapu ta lipati taku lakakatoy kan Jesu Kristu, mamati taku un makatagu taku bo kan siya si ing-inggala. 9Ked ammu taku un latagu kasin si Kristu ked achipun makwa un kasin matoy, ti lappun kilabyelin chi otoy kan Siya. 10Ked gapu ta latoy si Kristu, lappun kilabyelin chi byasuɏ kan siya. Ngim si sala latagu, ked matatagu siya si ing-inggala si michayawan Apudyus. 11Ked chitaku bo, masapuɏʼn ibilang taku long-eg taku lalattoy si kilabyelin chi byasuɏ. Ngim matatagu taku kan Apudyus gapu si litimpuyugen taku kan Jesu Kristu.

12Ked achi taku ipalubus un byasuɏ mangituray si long-eg taku, taplu achipun taku koon cha lawwing un pion chi long-eg taku. 13Ya achi taku ipalubus chi ulay siluʼn petin chi long-eg taku un mauseɏ un mangwa si lawwing. Ngim ipuɏang taku long-eg taku kan Apudyus un isun chi latagu si baruʼn biyeg. Ked useɏon taku petin chi long-eg taku un mangwa kan cha lalintog un panggop. 14Achi taku ipalubus un ha byasuɏ mangituray kan chitaku, ti ha kachegun Apudyus chi mangituray kan chitaku si sala, chakampun un lintog chi manturay.

Ha Patiyon Taku Siya Simmusassu Kan Chitaku

(Rom. 8:1-17)

15Himma piolaʼn ibyega cha alla? Ha ituɏuy takuʼn pin-a mangwa si byasuɏ, gapu ta chakampun un lintog chi mangituray kan chitaku, ngim kachegun Apudyus? Achipun makwa hachi! 16Ha achipunyu ammu un musassu chikayu si mangidchenyu si long-egyu? Ked lu byasuɏ mangidchen taku, ha mambyalagela matoy taku. Ngim lu si Apudyus chi mangidchen taku si long-eg taku, siya simmusassu kan chitaku, ked ibilangla chitaku lalintog. 17Ked manyaman taku kan Apudyus! Ti si chamu, isun chi musassu chitaku si byasuɏ. Ngim si sala, tuttuwaʼn ipapati taku un mamotog si katuttuwaan un litudtuchu kan chitaku. 18Ked si sala, lawayawayaan kayu si byasuɏ ya lambyalilon Apudyus chikayu musassun chi kilalintog.

19Siyad useɏok chi maawatanyu un ug-uggud taplu lalaka un maawatanyu. Si sin-eɏgew, inteunyu long-egyu un lammusassun cha losan un lawwing ya kakiisawan un pin-an chi long-eg koon. Ked si sala, katchi otyan cha koonyu un mangiteun si long-egyu un mammusassun chi kilalintog ti pummeɏkas.

20Si sin-eɏgew musassu chikayu si byasuɏ, ked lappun somsomokyu un mangwa si lalintog un makwa. 21Ked himma gunggulayu un pin-a langwa si kamatchi un siya mabiilanyu si sala? Ti ha mambyalagela cha kamatchi, matoyan ya misilaan kan Apudyus si ing-inggala. 22Ngim si sala lawayawayaan kayu si kilamusassuyu si byasuɏ, ked lambyalin kayu musassun Apudyus. Ked ha magunggulayu, pilapeɏkasla chikayu ked ha mambyalagela biyeg un mallalayun. 23Ti ha byayed chi byasuɏ ked otoy. Ngim ha biyeg un mallalayun idchon Apudyus un sagutla gapu si litimpuyugen taku kan Apu takuʼn Jesu Kristu.

Currently Selected:

Romans 6: HUA

Highlight

Copy