Romans 4

Ha Miyaligen Abraham

(Gal. 3:16-29; 4:21-31)

1Somsomkon taku mipanggop kan Abraham un singgalak kan chitakuʼn Judio. Himma impailan Apudyus kan siya un mampalintog si tagu? 2Lu ibilang Apudyus si Abraham un bibiɏuʼn tagu gapu si bibiɏu un killingwala, makwaʼn isayawla otyan. Ngim gapu ta lakabyasuɏ, achipun makwa un isayawla si sangwalan Apudyus. 3Ti ha liigili un ugud Apudyus, kalala, “Pilatin Abraham si Apudyus, ked hachi langibilangala kan siya un lalintog.”#4:3 Genesis 15:6

4Lu mangkawachi tagu, ha tangchenla ked chakampun un mibilang un atodla kan siya, ngim illabbula. 5Ngim ha taguʼn mantegod si pammatila chakampun si killingwala, ngim mamati kan Apudyus un mangibilang si lakabyasuɏ un lalintog, bigbigon Apudyus chi pammatin chi tagu taplu maibilang un lalintog. 6Ulay si Ari David si awi, kamatchi kalala si langibyeg-ala un pian chi taguʼn imbilang Apudyus lalintog gapu si pammatila, chakampun un gapu si killingwalaʼn bibiɏu. Ha inggilin David, kalala,

7“Pian chi taguʼn pilakawan Apudyus cha lawwing un killingwacha,

ya kilaanla machusaan chi byasuɏla!

8Pian chi taguʼn laliwatan Apudyus chi byasuɏla!”#4:8 v. 7-8, Psalm 32:1-2

9Ha pian un ilugud David ked para abus kan chitakuʼn Judio un lasogyatan? Lai! Ti pati bo cha Gentil un achipun lasogyatan. Ti imbyegbyega taku un ha langibilangan Apudyus kan Abraham lalintog, ked gapu si pammatila. 10Kam-amma lakwaan cha alla? Ha lakwa kamman si chaampunla masogyatan willu si lagamputala? Si chaampunla mampasogyatan, chakampun si lagamputala.#4:10 Malipud si lamatiyan Abraham si ingkarin Apudyus kan siya inggala si lasogyatala, lasawaɏan si opat tawon chi lummaus. 11Ot impasogyat Apudyus siya, ta siya mampaloklok un imbilang Apudyus siya un lalintog si pammatila si chaampunla masogyatan. Ked lambyalin si Abraham pallaka-aman cha losan un mamati ulay achipuncha masogyatan, ked ibilang Apudyus chicha un lalintog. 12Ya siya bo pallaka-aman cha losan un lasogyatan, chakampun un gapu ta lasogyatancha, ngim gapu ta suysuɏutoncha pammatin Abraham si chaampunla mampasogyatan.

Cha Lamati Kan Apudyus, Chicha Mangawat Si Ingkarila

13Ingkarin Apudyus kan Abraham ya cha galakla un mallaksuncha lubung. Killingwala alla, chakampun un gapu si lalungpaɏan Abraham si lintog, ngim gapu ta lamati ked imbilang Apudyus siya lalintog. 14Ta lu cha lalungpeɏ si lintog chi ustu un mangawat si ingkarin Apudyus, lappun simbin chi pammati taku ya lappun potog chi ingkarila. 15Ti ha lintog siya mambyeseɏan un chusaon Apudyus chitaku ti silupling taku. Ngim lu lappun lintog, lappun bo silupling taku.

16Ked ha ingkarin Apudyus ked matungpeɏn abus chi tagu un mamati ta maibyaseɏ si kachegula kan cha losan un galak Abraham. Chakampun un para kan cha malungpeɏ si lintog abus, ngim cha mamati un isun chi pammatin Abraham. Ti siya laispirituan un ama taku losan. 17Ked liigili si ugud Apudyus un kalala, “Lambyalilok sika pallaka-aman cha tagu si kaili-ili si allaʼn lubung.”#4:17 Genesis 17:5 Lakwa cha alla gapu ta pumapati si Abraham kan Apudyus un siya malagu kasin kan cha latoy ya siya bo langwa kan cha byaleg un lappun, un imbyegala abus ot lakwa cha hachiʼn lappun.

18Ulay lu achipun Abraham lilamlama un makwacha ingkarin Apudyus gapu ta lagamputcha leɏakay ya labyeyeg un lappun alakcha, pilatila imbyegan Apudyus kan siya. Ot siya singgalak kan cha achu-achuʼn tagu si kaili-ili, un ha kaachucha, isun chi kilaachun cha bituwon ud langit, un siya kalan chi liigili un ugud Apudyus.#4:18 Genesis 15:5 19Ked achipun kummapsut chi pammatin Abraham un koon Apudyus cha ingkarila ulay lu patunged leɏakay un lappun lamlamala un maidchen si alak, ti si hachiʼn timpu umoy un singgasut chi tawonla ya si Sarah un asawala ked byasig. 20Ngim ulay kamatchi achipun lanchuwachuwa somsomok Abraham mipanggop si hachiʼn ingkarin Apudyus kan siya, ngim laam-amod kummoscheɏ pammatila un lanyaman kan Apudyus si lanchayawala kan siya, 21ti sigulachuwola un koon Apudyus cha losan un ingkarila. 22Ked gapu si pammatin Abraham, “Siya mangibilangan Apudyus kan siya lalintog.” 23Ha hachiʼn ugud un kalala, “Imbilang Apudyus si Abraham lalintog,” chakampun un liigili para kan Abraham abus, 24ti liigili un para bo kan chitaku losan, ti siya maligulachuwala un ibilang bò Apudyus chitaku lalintog lu mamati taku kan siya un lalagu kasin kan Apu takuʼn Jesus si latoyala. 25Ti si Jesu Kristu, siya inchuyan Apudyus un mapatoy ta mamayedla kan cha byasuɏ taku, ot kasinla siya tilagu ta miibilang taku lalintog.#4:25 Isaiah 53:4-5

Currently Selected:

Romans 4: HUA

Highlight

Copy