Romans 1

1Sakon si Paul un osaʼn mansimsimbi kan Jesu Kristu. Chilutukalak kan Apudyus un man-apostoles ya piliyeɏla sakon un mangibyegbyega si Bibiɏuʼn Chameg. 2Si awi un chaampun Jesus umaliyan utla pita ingkarin Apudyus un impaigilila Bibiɏuʼn Chameg kan cha propetala. 3Hachiʼn bibiɏuʼn chameg ked mipanggop si Alaklaʼn Jesu Kristu un Apu taku un lambyalin tagu. Ha kilatatagula, ked liyalak un osaʼn galak Ari David, 4ya ha kila-Apudyus Jesu Kristu, lipaila un siya Alak Apudyus si ummuliyala lataguwan gapu si pallakabyelin.#1:4 Ha piolaʼn uguchon si Greek, impailan Apudyus un siya mallakabyelin un Alak mipagapu si ummuliyala lataguwan chi Ispiritun Apudyus. 5Gapu kan Jesu Kristu, kilacheguwalak kan Apudyus ot chilutukalak un man-apostolesla, un umoy mangibyegbyega si mipanggop kan siya kan cha losan un tagu ta mamaticha. 6Ked hachi lipatiyanyu un mamati utlat Rome, ti chilutukan Apudyus chikayu un mamati kan Jesus ta mantagula.

7Ked hachi gapulaʼn maluɏatak kan chikayu losan un ay-ayaton Apudyus ya chilutukala un mantagula utlat.

Iluwaluk ta tuɏungan chikayu losan kan Ama takuʼn Apudyus ya Apu takuʼn Jesu Kristu, ya palin-awaoncha somsomokyu.

Ha Lanyamalan Paul Kan Apudyus

(1Co. 1:4; Eph. 1:15-23; Php. 1:3-11; Col. 1:3-14)

8Umula, manyamalak kan Apudyus gapu kan Jesu Kristu mipanggop kan chikayu losan, ti lanchilameg chi pammatiyu si kaili-ili. 9Ammun Apudyus un tuttuwaʼn imbyegbyegak, ti siya mansimbiyak si kiged chi kabyeeɏak un mangibyegbyega si Bibiɏuʼn Chameg mipanggop si Alakla. Ya ammula un lu malluwaluwak, pasigku chikayu ipati. 10Ha osaʼn pasigku iluwalu kan Apudyus, lu makwa, ipalubusla otyan un umaliyak utlat an-allunguson manggeggakay kan chikayu.

11Libyegak cha alla ti patungedku pion un itullong chikayu, ti awed chi uchum un itudtuchuk kan chikayu un lampeɏpu si Ispiritun Apudyus ta kumoscheɏ pammatiyu. 12Ha piok un ibyega, ked man-asisegeg taku ta kumoscheɏ pammati taku.

13Susulud, maawatanyu otyan cha allaya, inyeɏ-eɏgewku simsimmok un umali manggeggakay kan chikayu, ngim laal-alliwak. Ha mamiok un umaliyan ta tudtuchuwak cha uchum utlat taplu mamaticha bo un isun chi lantudtuchuwak kan cha uchum un Gentil si uchum un ili.

14Awed chi kalobbongak un mangwa ti siya impuɏang Apudyus kan sakon, amod gey kan cha Grego ya kakkaili, ulay bo cha lakaacheɏ willu achipun, ya cha mapotgen kan achipun. 15Ked hachi gapula un patungedku pion un umali ta ibyegbyegak chi Bibiɏuʼn Chameg kan chikayu utlat Rome.

Ha Pallakabyelin Chi Bibiɏuʼn Chameg

(1Co. 1:18, 24)

16Achipulak mabiin un mangibyeygbyega si Bibiɏuʼn Chameg, ti siya pallakabyelin Apudyus un malagu kan cha losan un mamati, ked umula kan cha Judio ya siya bo kan cha Gentil. 17Ti ha Bibiɏuʼn Chameg, siya mangibyega si mangkokopyan Apudyus un mangibilangala si taguʼn lalintog kan siya. Ya lappun uchum lu achi abus chi pammaticha. Ti siya liigili si ugudla, un kalala,

“Ha taguʼn mibilang lalintog kan Apudyus ked gapu si pammatila,

ya makatagu kan siya si ing-inggala.”#1:17 Ha piolaʼn uguchon si Greek, ha lalintog un tagu awed biyegla un mallalayun gapu si pammatila Habakkuk 2:4 and Galatia 3:11

Ha Kilalawwing Cha Losan Un Tagu

(Act. 14:17; 17:24-31)

18Lipakaammu un amod chi sangan Apudyus kan cha losan un malagbyasuɏ un achipun mamati ya cha pin-a mangmangwa si lawwing. Ha lawwing un pin-acha killingwa, siya mamallod si mamatiyancha si katuttuwaan un mipanggop kan Apudyus. 19Ked maaawwatancha un chuchussaon Apudyus chicha ti imbyegala kan chicha cha losan un maammuwan mipanggop kan Apudyus, ti illaweg Apudyus. 20Ulay lu achipun maila si Apudyus, mamàila kila-Apudyusla ya pallakabyelinla un lappun kigedla. Lalipud si langwaala si lubung, mampapattak chi mipanggop kan siya ti cha losan un killingwala siya mangitullongan si mipanggop kan siya. Ked lappun mallasun cha tagu si achipuncha mamatiyan kan siya.

21Ngim ulay ammun chi tagu mipanggop kan Apudyus, achipuncha chayawon siya un Apudyus, ya achipuncha manyaman kan siya. Ngim sabyali cha simsimmokcha un lappun simbila ya gummikbot chi somsomokcha. 22Ha kalancha lalaingcha, ngim lambyalincha laog-oggogen. 23Ti issanchaʼn chayawon chi tuttuwaʼn Apudyus un matattagu si ing-inggala, ked siyad man-apudyuscha un chaychayawoncha cha killingwan chi imacha un silantatagu uchum, silansissiwit, silan-ayam ya silan-uɏog.

24Ked gapu si hachi, liwayaan Apudyus chicha un mangwa si byaɏanglaʼn lawwing un pion chi long-egcha, ot amiloncha koon cha lawwing un manguseɏancha si long-egcha. 25Lan-awichencha katutttuwaan mipanggop kan Apudyus ked lamaticha si tilutuli. Ked silukatancha si tuntulli cha katuttuwaan un mipanggop kan Siya. Ti siyad chayawoncha ya mansimbiyancha cha killingwan Apudyus. Ngim abus otyan si Apudyus chi chaychayawoncha si ing-inggala! Amen.

26Ked hachi gapulaʼn liwayaan Apudyus chichaʼn pin-a mangwa si lawwing ya kabibiin un pipion chi long-egcha. Ked ulay cha uchum un byebyai chakampun un hachiʼn lainsiguchen cha kooncha ngim chicha mantitillalung un mangwa si kabibiin un achipun otyan makwa. 27Ked ulay cha uchum boʼn leɏaki, chakampun un byebyai asaw-oncha ngim chichaʼn leɏaki mantitillalung. Ked kiisaw ya kabibiin cha pin-acha koon. Ked machuchusacha gapu kan cha lawwing un pin-acha killingwa.

28Ked gapu ta achipuncha potgon si Apudyus, bilaybyay-ala chicha si lawwing un somsomokcha, ta kooncha cha byaɏangla un achipuncha otyan koon. 29Ked amiloncha koon cha lawwing ti maagumcha ya lawingoncha cha biɏuncha, maaposcha, kapapatoycha, ya man-asisubogcha ya losancha man-asisilib. 30Ya man-asilikudcha, lawingoncha si Apudyus, ya am-amisoncha cha asintatagucha. Mamaspasweɏcha ya lasayawcha, ya am-amchoncha mangwa si lawwing. Ya achipuncha tuttuwaon cha langiyalak kan chicha. 31Lappun biincha. Achipuncha tungpaɏon cha ingkaricha, ya lappun sayakawcha willu chegucha kan cha uchum un tagu. 32Cha katchiʼn tagu, ulay lu ammucha un chuchussaon Apudyus si ing-inggala cha losan un mangwa si kakammatchi, ipapattutcha koon. Ya bibiɏuwoncha bo cha uchum un mangwa si kakammatchi.

Currently Selected:

Romans 1: HUA

Highlight

Copy