Mark 5

Ha Leɏakiʼn Laaɏan Ud Gerasenes

(Mat. 8:28-34; Luk. 8:26-39)

1Gummatongcha si chomang chi byeybyey ud Galilee, un sakupon chi Gerasenes.#5:1 Ha ngachen chi allaʼn ili un liigili si manuscript ked Gadarenes willu Gergesenes. 2Lummogsed pun si Jesus si byangka, liyabot kan siya osaʼn leɏakiʼn laaɏan un lampeɏpu si loblobon. 3Ha allaʼn laaɏan ked illiinggew si loblobon ked lappun makabyaɏud kan siya ulay lu pusas. 4Pin-a lapusasan chi imala ya ikila ngim pin-ala pilogpogsat ya liyamyam-an chi byaɏud chi ikila. Lappun makasapeɏ un makaipugod kan siya. 5Eɏgewola ya labiyola malliklikwos si loblobon ya bibbilig un pumalakuy ya pin-ala sugaton chi long-egla si byetu.

6Intapla pun si Jesus, lalodchak un liyabot ot lampalintuming si sangwalan Jesus. 7-8Ot kalan Jesus si aɏan un inggew si leɏaki, “Wissedka si allaʼn tagu!” Ot impakuy chi leɏakiʼn gumminga, “Simma piom un koon kan sakon, Jesus un Alak chi Kangatuwan un Apudyus? Kacheguwam sakon si ngachen Apudyus ta achim sakon paligatan!”

9Oli pun ilimus Jesus kan siya, “Simma ngachenlu?”

Summongbyat chi leɏakiʼn laaɏan, “ ‘Palos’ ti kalibulibu kami!”#5:9 Legion - grupu cha army cha Roman, libu un lawwik un Roman armies. 10Ot langkadkachegucha kan Jesus ta achipuncha mapeɏyaw si hachiʼn ili.

11Inggew cha sinsusubsub un achu-achuʼn byeɏok si tagudtud un adchaliyan si hachiʼn ili. 12Ot langkadkachegu cha aɏan kan Jesus un kalancha, “Ibuunlu chikami kan cha anchiyan byeɏok ta chicha inggewanmi.” 13Inteun Jesus cha aɏan un umoy. Tilelancha leɏaki ot lilumlokcha kan cha byeɏok. Ot lanchokchokaschaʼn lummayug si angit ot laamincha laalud si byeybyey. Ha bilang cha byeɏok ked umoy un chuwaʼn libu.

14Cha hachiʼn man-aachug kan cha byeɏok ked ummawidcha ta umoycha ibyega kan cha tagu si ili ya byebbyeɏoy un lampalikwos. Ot ummoy cha tagu intullong chi lakwa. 15Gummatongcha pun si inggewan Jesus, illilacha hachiʼn leɏakiʼn tilelan cha achuʼn aɏan. Ummaammuy un lansilup ya bummaɏu somsomokla. Ot ummogyatcha. 16Cha hachiʼn langitullong, imbyegacha kan cha tagu lakwa si hachiʼn leɏaki ya cha byeɏok. 17Ot langkadkachegu cha tagu kan Jesus ta telala hachiʼn ilicha.

18Alla pun un umoy si Jesus mallugen si byangka, langkadkachegu hachiʼn leɏaki un tilelan cha aɏan ta mitun-ud kan siya. 19Achipun Jesus inteun un mitun-ud siya. Ngim kalala, “Ingkan uwayu ta ibyegam kan cha agim chi killingwan Apudyus kan sika ya in-ilolaʼn kummachegu kan sika.” 20Ummoyon chi hachiʼn leɏaki ot ummoyla imbyegbyega killingwan Jesus kan siya kan cha simpuɏuʼn ili un sakupon chi Decapolis. Ot laschaaw cha losan un taguʼn langngeɏ si imbyegala.

Pammati Lakaalan Chi Sakit Chi Byebyai Ya Lataguwan Chi Byebyeɏasang

(Mat. 9:18-26; Luk. 8:40-56)

21Kasin cha Jesus langulin si chomang chi hachiʼn byeybyey. Si inggewala si teɏanteg, lachagup cha achuʼn tagu kan siya. 22Gummatong bo osaʼn pangat chi sinagoga un mangngachen Jairus. Intullongla pun si Jesus, lampalintuming si ikiyala. 23Ot langkadkachegun kalala, “Mamattoyon chi alakkuʼn byebyai. Kewam ta umalim u appachen siya ta makaan chi sakitla ya matagu.” 24Ot litun-ud si Jesus kan siya.

Ot litun-ud bo cha amod un tagu kan siya ya langgunggulodcha si cheegla.

25Inggew bo osaʼn byebyai un labyeyeg chi sakitlaʼn mambuɏubuɏus, umoy un lasawaɏan si chuwaʼn tawon. 26Lapaligatan un pin-a lampaagas kan cha achuʼn chuktuɏ ked laamin lagastus cha kukkuwala, achipun ummulloy ngim laam-amod chi sakitla. 27Chingngeɏla pun chi mipanggop kan Jesus, ummoy lichoga kan cha achuʼn tagu si ochogen Jesus ot ilappachela silupla. 28Ti ha somsomokla kalala, “Samela gey lu maappachek chi silupla, lumin-awaak.”

29Kakma latatyok chi mambuɏubuɏus un chaɏala ot lagiklala un lummin-awa long-egla. 30Kakman bo Jesus lagikla un lummawa kilabyelinla. Lantuwili kan cha tagu ot ilimusla, “Silu langapped si silupku?”

31Kalan cha disipulusla, “Ilam kabbod cha taguʼn manggunggulod si cheeglu, kalam pay laing un silu langapped kan sakon?”

32Ngim lanlangɏanga si Jesus ta itullongla lu silu langwa. 33Gapu ta ammun chi hachiʼn byebyai lakwa kan siya, ummachali un mamaypayogpog si ogyatla ot lampalintuming si sangwalanla. Ot imbyegala katuttuwaan. 34Kalan Jesus si byebyai, “Alakku, gapu si pammatim kan sakon lummin-awaka. Ammam umoyon. Achipun kasin umuli sakitlu.”

35Si hachiʼn man-ugu-uguchen Jesus, gummatong cha uchum un bubùulon Jairus un lampeɏpuʼd uwacha. Kalancha kan Jairus, “Latoy chi alaklu, ked patakuggey taktakon chi mistulu?”

36Ngim ilatunguɏn Jesus chi imbyegacha ot kalala kan Jairus, “Achika manchaleg. Basta mamatika.”

37Achipun Jesus inteun un awed mitun-ud kan siya, malaksig cha Peter ya cha James kan John un mansulud. 38Gummatong cha pun si byeɏoy chi pangat chi sinagoga, illilan Jesus un sin-iibincha ya lappun kapuutan cha tagu. 39Lilumlok si Jesus ot kalala kan chicha, “Pakayuggey sin-iibin ya lappun kapuutanyu? Achipun latoy chi byebyeɏasang ngim masusuyop abus.”

40Ot liyokyokcha siya. Oli pun pileɏawala chicha, ot ilayagela ama ya ilan chi byebyeɏasang, ya cha inyawitla boʼn disipulusla ot lilumlok cha si inggewan chi byebyeɏasang. 41Iloglela iman chi byebyeɏasang ot kalala, “Talitha cum!” Piolaʼn uguchon “Byebyeɏasang, bumangonka!” 42Ot labyalangon chi byebyeɏasang ot malidchaɏan.

Patungedcha laschaaw si lakwa. 43Amman Jesus bililin chicha ta achicha ibyegbyega allaʼn lakwa, ot imbyegala boʼn pakalancha siya.

Currently Selected:

Mark 5: HUA

Highlight

Copy