Matthew 10
10
Ha Lanchutukan Jesus Kan Cha Lasawaɏan Si Chuwaʼn Apostolesla
(Mrk. 3:13-19; 6:7-13; Luk. 6:12-16; 9:1-6)
1Lagamput ka hachi, ilayagen Jesus cha lasawaɏan si chuwaʼn disipulusla ot illidchela chicha si kalobbongan un mameɏyaw kan cha aɏan ya mangagas kan cha losan un kalasin cha sakit ya sigeb chi long-eg. 2Allaya cha ngachen cha lasawaɏan si chuwaʼn apostoles Jesus. Ha umula si Simon un ngadloncha Peter ya si Andrew un suludla ya cha James kan John un alak Zebedee. 3Cha Philip kan Bartolome, Thomas ya si Matthew un manchachagup si bugis ya si James un alak Alphaeus, ya si Thaddaeus, 4Simon un mangisasakkit si ilila, ya si Judas Iscariot un langiyibit kan Jesus.
Imbuun Jesus Cha Lasawaɏan Si Chuwaʼn Apostolesla
5Oli pun imbuun Jesus cha lasawaɏan si chuwaʼn apostolesla ot bililinla chicha, “Achi kayu umoy si ilin cha Gentil ya ulay cha ilin cha Samaritans. 6Ngim ingkayu kan cha choga takuʼn galak Israel ti isucha keɏliluʼn lataɏak. 7Kacha ayanyu iweɏagawegyu Bibiɏuʼn Chameg, ‘Chanchali Mampangatan Apudyus.’ 8Palin-awaonyu cha lasakit, taguwonyu cha latoy, papeɏkasonyu cha lakuteɏ, peɏyawonyu cha aɏan. Gapu ta lappun imbyayedyu si ilawatyu ked achi kayu bo mampabyayed lu tumuɏung kayu. 9Achi kayu mangiyawit si pilak willu byalituk. 10Ya achi kayu mangiyawit si sambyeg si mambiyasiyanyu willu mansukatanyuʼn silup willu sancheɏ willu sekud. Ti lobbonglan mapakalan cha mangkawachi.
11“Ked lu gumatong kayu si iliʼn ayanyu, singtonyu lu silu lumbong un mammangili kan chikayu ked inggew kayu inggalà umoyon kayu. 12Lu lumlok kayu si osaʼn byeɏoy, ibyegayuʼn, ‘Si Apudyus chi mangtod si lin-awa kan chikayu.’ 13Ked lu pionchaʼn mammangili kan chikayu, si Apudyus chi ustuʼn mangatod si lin-awa kan chicha. Ngim lu issanchaʼn mammangili kan chikayu, mangulin kan chikayu lin-awan ibinchisyun Apudyus kan chicha. 14Ngim lu awed byeɏoy willu iliʼn achipun chikayu mangiliyon ya achipun chumngeɏ kan chikayu, telanyu ked pukpukanyu tapuk si ikiyu ked ummoyon kayu ta mangammuwancha un kigedcha si machusaancha. 15Tuttuwa allaʼn ibyegak kan chikayu, lu chumtong chi eɏgew un manguisan Apudyus si cha tagu, singkumaɏu chusan cha hachiʼn umili lu ha chusan cha iSodom ya iGomorrah.”#10:15 Genesis 19:24-28
Cha Ligligat Un Umali
(Mat. 24:1-14; Mrk. 13:1-13; Luk. 12:11-12; 21:12-17)
16Ot intuɏuy Jesus un kalala, “Somsomkonyu cha alla. Ibuunku chikayu kan cha lawwing un tagu un isuyu keɏlilu un umoy si inggewan cha atap un asu. Ked masapuyʼn lasilib kayu un isun chi uɏog ya laamu kayu un isun chi kalapati. 17Man-alled kayu ti allat cha malokma kan chikayu ked ichiɏum chikayu si korti ya mambyautcha kan chikayu si sinagogacha. 18Gapu kan sakon, mipasangu kayu si sangwalan cha gubillachuɏ ya cha Ari ta ibyegayu Bibiɏuʼn Chameg kan chicha ya cha losan un Gentil. 19Lu ichiɏumcha chikayu, achi kayu machalagen mipanggop si ibyegayu willu in-ilonyuʼn man-ugud, ti mipakaammu kan chikayu chi ibyegayu si hachiʼn timpu. 20Ti chakampun un mampeɏpu kan chikayu chi uguchonyu, ngim ha Ispiritun Amayu chi guminga-ginga kan chikayu.
21“Si hachiʼn timpu, man-asiibit cha mansusulud ta mapatoy chi suludcha, ya ulay bo cha man-aama ya man-iila. Ked sasangngaon cha aalak cha amacha ya ilacha ked ipaotoycha bo chicha. 22Ked lawingon chikayu kan cha losan un tagu gapu kan sakon. Ngim lu silu mangipapati si pammatila kan sakon inggalà alungusla, chicha matatagu ing-inggala. 23Lu paligatan chikayu si osaʼn ili, ingkayu si osa boʼn ili. Ha ibyegak kan chikayu tuttuwa, achipunyu magamput chi kawachiyu si losan un iliʼd Israel, ked mangulilak, Sakon un Alak chi Tagu si awi.”
24Oli pun lan-alig si Jesus un kalala, “Lappun iswila un langatngatu lu ha mistulula ya lappun bubùulon si langatngatu lu ha ap-apula. 25Ked maplok otyan chi iswila lu mambyalin isun chi mistulula, ya kamatla otyan bo si bubùulon lu mambyalin isun chi ap-apula. Lu sakon un miyalig un singkuwa si byeɏoy, kalancha un sakon si Beelzebul, giluɏa kayu bo, achi amod chi kalancha kan chikayuʼn kabyeɏoyla.”
Ha Ustuʼn Umogyatan
26“Achi kayu umogyat kan cha katchiʼn tagu, Ti losan un mitataɏu si sala mitokweɏ lu sumin-eɏgew, ked losan un lailimod si sala lumtaw lu chumtong chi timpula. 27Ha ibyegak kan chikayu si manggikbot, ibyegayu si padcha ya lu silu inyagasaasku kan chikayu, ipakuyyu si tuktuk cha byebbyeɏoy. 28Achi kayu umogyat kan cha mangtoy kan chikayu, ti abus chi long-egyu si otoyoncha, achipuncha makaotoy si kalichodwayu. Ngim abus si Apudyus si umogyatanyu ti makwaʼn yam-alola long-eg ya kalichodwa ud impiyeɏlu. 29Somsomkonyu chi man-aayyuwan Apudyus kan chikayu. Tansu abus ngilan chi chuwaʼn tilin. Ngim lappun matoy ulay ossaan lu achipun Apudyus un Amayu ipalubus. 30Giluɏa bo kan chikayuʼn tagu! Ti ulay cha buukyu ammula bilangla. 31Ked achi kayu umogyat, lapotpotog kayu kan Apudyus lu cha achu un tilin!”
Ha Mangitakcheɏ Kan Jesus Ya Mangisulib Kan Siya
(Mrk. 8:38; Luk. 12:8-9)
32Intuɏuy Jesus un kalala, “Lu silu mangitakcheɏ kan sakon si sangwalan cha tagu, takcheɏak bo siya si sangwalan Amak ud langit. 33Ngim lu silu mangisulib kan sakon si sangwalan cha tagu, isula bo un isulibku bo siya si sangwalan Amak ud langit.”
Si Jesus Chi Gapun Chi Mansisilaan Cha Tagu
(Luk. 12:49-53; 14:26-27; 9:24)
34Ot kalala bo, “Achiyu kalan un siyad ummaliyak chi inyak palin-awaon cha tagu utla pita. Chakampun! Ngim ummaliyak ta inyak gumulu. 35Ya ummaliyak ta inyak mambibillusuɏon cha man-aama ya cha man-iila, ya cha mangkakatuganga. 36Ha kabusuɏn chi tagu ked ha mismuʼn paminyala.
37“Lu silu chakchakeɏ man-aayatla kan cha amala kan ilala ya ulay cha aalakla lu ha man-aayatla kan sakon, achipun lumbong un mibilang un disipulusku. 38Ya lu silu achipunla maalusan bukuchon chi krusla ked litun-ud kan sakon, achipun bo lumbong un mandisipulusku.#10:38 Si somsomok Matthew, ha mamukud si krusla siya mantuɏuy un sumuɏut kan Jesus ulay siya matoyala, 39Lu silu mangipotog si biyegla, mataɏakla mit laing. Ngim lu silu mangkasutala biyegla gapu kan sakon, ochesala mataguwala si ing-inggala.”
Ha In-lon Apudyus Un Mangunggula Si Tagu
(Mrk. 9:41)
40Ot intuɏuy Jesus kalan un, “Lu silu mamachuung kan chikayu, sakon chi pilachuungla. Ked lu silu mamachuung kan sakon, ha langibuun kan sakon chi pilachuungla. 41Ya lu silu mamachuung si propeta gapu ta siya ked propeta, magunggulaan si isun chi gunggulan chi propeta. Ya lu silu mamachuung si lalintog un tagu gapu si kilalintogla, magunggulaan bo si isun chi gunggulan chi lalintog un tagu. 42Ya lu silu mampailum si mantunglin un chelum si ulay kabyabyaan un disipulusku, gapu ta disipulusku siya, sigulachuʼn magunggulaan.”
Currently Selected:
Matthew 10: HUA
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. in cooperation with Translators Association of the Philippines
