Luke 8

Cha Byebyaiʼn Litun-ud Kan Jesus

1Lapalos pun, ummoy si Jesus si cha kaili-ili un lambyegbyega si Bibiɏuʼn Chameg mipanggop si Mampangatan Apudyus. Kilabuɏogla lasawaɏan si chuwaʼn disipulusla, 2litun-ud bo uchum un byebyaiʼn pileɏyaw Jesus cha aɏan un inggew kan chicha ya pilalin-awala cha sakitcha. Si Mary Magdalene chi osaʼn pileɏyaw Jesus cha pituʼn aɏan kan siya. 3Ked inggew bo si Joanna, un asawan Cuza un pangat cha mambyebyentayon Ari Herod si salikuwala. Ya si Susanna ya achu boʼn byebyai un tummuɏung kan Jesus ya disipulusla.

Pangngalig Chi Lanwagaweg

(Mat. 13:1-9; Mrk. 4:1-9)

4Ummoy cha amod un tagu kan Jesus un lampeɏpu si kaili-ili. Lauppuncha ot lan-alig un kalala, 5“Inggew chi osaʼn taguʼn ummoy lanwagaweg si bukeɏ. Si lanwagawagelad chi bukeɏ si umala, liweɏsi cha uchum si chaɏan ot ummoy cha tagu gilusgussan ya ummoy cha sissiwit tiluktukan. 6Cha uchum un bukeɏ, liweɏsicha si kabyetbyetuwan un akit chi pitala, ot lasalimitcha. Ummilit pun, lakyawcha ti mammaga pitala. 7Cha uchum un bukeɏ, liweɏsicha si lassi-lassi ot summimitcha. Ngim chummakeɏ pun cha lasi laaɏungcha. 8Ngim liwagaweg cha uchum un bukeɏ si mallogway un pita. Chummakeɏcha ot lamunga cha si singgagasut.” Ot kalan Jesus, “Chongɏonyu ya somsomkonyu pion chi inyaligku un uguchon.”

Ha Panggop Chi Pangngalig

(Mat. 13:10-17; Mrk. 4:10-12)

9Oli pun ilimus cha disipulus Jesus lu silu pion chi inyaliglaʼn uguchon. 10Kalala, “Impatagammuk kan chikayu chi palimod chi Mampangatan Apudyus. Ngim cha uchum un tagu, iyaligkun mantudtuchu kan chicha. Ti ulay itutullongcha, achipuncha maila ya ulay chochongɏoncha, achipuncha maawatan.”

Impakaawat Jesus Chi Pion Chi Pangngalig Chi Lanwagaweg Un Uguchon

(Mat. 13:18-23; Mrk. 4:13-20)

11Intuɏuy Jesus un lan-ugud, kalala, “Allaya pion chi inyaligkuʼn uguchon. Ha miyaligen chi bukeɏ, ugud Apudyus. 12Cha bukeɏ un liweɏsi si chaɏan, chicha cha taguʼn lanchongeɏ si ugud Apudyus, ngim ummoy Satalas kilaan chi chingngeɏcha ta achipuncha mamati ya matagu. 13Cha bukeɏ un liweɏsi si kabyetbyetuwan, chicha cha taguʼn lanchongeɏ si ugud Apudyus ot latetteɏokcha un langawat. Ngim achipun lummamut chi ugud Apudyus si somsomokcha ti sin-akitan chi lamatiyancha. Chillumtong pun chi masuklutancha, inyageycha. 14Cha bukeɏ un liweɏsi si lassi-lassi, chicha cha taguʼn lanchongeɏ si ugud Apudyus ngim laaɏung chi chingngeɏcha gapu si chalegcha si mataguwancha ya pionchaʼn bumaklang ya pioncha ganggalas chi lubung. Hachi mangalliw si somsomokcha kan Apudyus ked achipun chumakeɏ pammaticha. 15Cha bukeɏ un liwagaweg si mallogway un pita, chicha cha taguʼn lanchongeɏ si ugud Apudyus ot illiggacha si somsomokcha ot tiluttuwacha. Ot chummakeɏ pammaticha inggala lamunga si sin-adchu.”

Achipun Makwaʼn Malakkobyen Chi Silaw

(Mrk. 4:21-25)

16Kasin lan-alig si Jesus un kalala, “Lappun tagù tonggela silaw ked lilakkobyela si chungchung willu iggala si guweb chi katli. Ngim ipatayla si ustuʼn papattayan ta mampadcha lu lumlok cha tagu. 17Ti lappun litataɏu un achipun mitokweɏ ya losan un achipun matagammuwan si sala, gumatong chi timpu un mipakaammu. 18Ammanyu chochongɏon chi ibyegak, ti ha manchongeɏ si itudtuchuk, machogchog-an chi man-aawatla. Ngim ha taguʼn achipun manchongeɏ, ulay akit un awed kan siya, miyabus makaan.”

Cha Ibilang Jesus Un Ilala Ya Susuludla

(Mat. 12:46-50; Mrk. 3:31-35)

19Oli pun gummatong chi ilan Jesus ya susuludla, ngim achipuncha makaachali kan Jesus ti amod cha taguʼn lauppun. 20Ot imbyegan chi osaʼn tagu kan Jesus, “Awed cha ilam ya cha susuludlu ud lasin, pionchaʼn itullong sika.” 21Ot kalan Jesus kan chicha, “Lu silu manchongeɏ si ugud Apudyus ya tumuttuwa, chicha ibilangkuʼn ilak ya susuludku.”

Ha Lampagingkan Jesus Si Byali Ya Challuyun

(Mat. 8:23-27; Mrk. 4:35-41)

22Si osaʼn eɏgew, lambyangka cha Jesus ya disipulusla, ot kalala kan chicha, “Intaku si chomang chi allaʼn byeybyey.” Ot lummibbyatcha. 23Ummoyo-oyoncha pun, lasuyop si Jesus. Maeg ga gummatong chi lapigsan byali ot laluptuppiyak chi challuyun si byangka, ot laplaplu byangka si chelum inggala allà akit un milutobcha. 24Bilangon cha disipulus si Jesus un kalancha, “Apu, Apu, allaʼn milutob taku.”

Bummangon si Jesus ot pilagilokla byali ya challuyun, ot lakagilok ot lummin-awa taɏun. 25Ot kalan Jesus kan cha disipulusla, “Chimma pammatiyu?”

Ngim laschaawcha ya ummogyatcha ot lan-asi-imuscha, “Himmaga taguʼn alla, ulay chi byali ya challuyun ked tuttuwaoncha siya!”

Ha Lameɏyawan Jesus Si Aɏan

(Mat. 8:28-34; Mrk. 5:1-20)

26Intuɏuy Jesus ya cha disipuluslaʼn lambyangka un ummoy si sakupon chi Gerasenes, un liidmang si byeybyey ud Galilee.#8:26 Ha ngachen chi allaʼn ili si uchum un manuscript ked Gadarenes willu Gergesenes. 27Ot lummawacha pun si byangka, liyabot kan Jesus chi osaʼn leɏakiʼn iGerasenes un leɏapang. Labyeyeg chi lanlulussayala ya achipun chummuung si byeɏoycha, ti loblobon chi iinggewala. 28Intullongla pun si Jesus, laagaeg ot lampalintuming si sangwalan Jesus ot impakuylaʼn, “Jesus, un Alak chi Kangatuwan un Apudyus! Simma koom kan sakon? Kacheguwam sakon, achim sakon paligatan.” 29Katchi imbyegala ti pileɏyaw Jesus cha aɏan un inggew kan siya. Kalayun un paligatan cha aɏan, ulay lu byaɏuchoncha imala ya ikila si pusas, pogsatola ked intodchak cha aɏan si kapit chi lugeɏʼn lappun tagu si inggew.

30Ilimus Jesus kan siya, “Simma ngachenlu?”

Summongbyat chi leɏapang, “Palos ti achu kami.” Ti achu-achu cha aɏan un illinggew kan siya. 31Ot langkadkachegucha kan Jesus ta achipunla ibuun chicha si bitu un lappun pegpeg chi kachaɏomla un machusaancha.

32Si cheegcha, inggew cha achu-achun byeɏok un sinsusubsub si tagudtud. Ot langkadkachegu cha aɏan kan Jesus un ibuunla chichaʼn lumlok kan cha hachiʼn byeɏok. Ot inteunla chichaʼn umoy. 33Lummawa cha aɏan si leɏaki ot lilumlokcha kan cha byeɏok. Ot sintotodchak cha byeɏok lummayug si angit ot laamincha laalud si byeybyey.

34Intullong pun cha man-aachug kan cha byeɏok chi lakwa, ummawidcha ot ummoycha imbyega kan cha tagu si ili ya tattaɏun. 35Ot ummoy cha tagu intullong chi lakwa. Gummatongcha pun si inggewan Jesus, inchesancha hachiʼn leɏaki un tilelan cha achun aɏan. Ummaammuy si sangwalan Jesus un lansilup ya bummaɏu somsomokla ot lakaogyatcha. 36Cha hachiʼn langitullong imbyegacha kan cha tagu in-ilon Jesus un lameɏyaw kan cha aɏan si leɏakiʼn leɏapang. 37Ot langkadkachegu cha tagu kan Jesus ta telala hachiʼn ilicha ti amod chi ilogyatcha. Ot lambyangkacha Jesus ummoyon.

38Ot langkadkachegu hachiʼn leɏakiʼn lakaan chi lapangla ta mitun-ud kan siya, ngim pilaoyon Jesus un kalala, 39“Ingkan uwayu ked ibyegam kan cha losan chi killingwan Apudyus kan sika.” Ummoyon chi hachiʼn leɏaki ot ummoyla imbyegbyega killingwan Jesus kan siya kan cha ili-ili.

Pilalin-awan Jesus Chi Byebyai Ya Tilagula Byebyeɏasang

(Mat. 9:18-26; Mrk. 5:21-43)

40Langulin pun si Jesus si chomang chi byeybyey, lagalas cha amod un taguʼn lamachuung kan siya ti iluuwaycha. 41Oli pun gummatong chi osaʼn pangat chi osaʼn sinagoga un mangngachen Jairus. Ot ummoy lampalintuming si ikiyan Jesus ot langkadkachegu ta umoy ud byeɏoycha, 42ti mamattoyon chi os-osaan un alaklaʼn byebyai, un mantawon si simpuɏu ya chuwa.

Ot litun-ud si Jesus, litun-ud bo cha amod un tagu kan siya ot ilalibungbungancha. 43Inggew chi osaʼn byebyai un labyeyeg chi sakitlaʼn mambuɏubuɏus si lasawaɏan si chuwaʼn tawon. Gilastula losan cha kukkuwala si lampaagasalan chuktuɏ, ngim lappun makaagas kan siya. 44Ot ummoy si ochogen Jesus ot ilappachela pegpeg chi silupla, ot kakma latatyok chi mambuɏubuɏus un chaɏala. 45Ilimus Jesus, “Silu langapped kan sakon?” Ngim lappun achi langisulib, ot kalan Peter, “Apu, ilam kabbo cha taguʼn manggunggulod kan sika.”

46Ngim kalan Jesus, “Awed langigagaɏa langapped kan sakon, ti lagiklak un lauseɏ kilabyelinku.” 47Laawatan pun chi hachiʼn byebyai un laammuwan Jesus chi kingwala, ummoy un mamaypayogpog si ogyatla ot lampalintuming si sangwalan Jesus. Si sangwalan cha tagu, imbyegala chi panggoplaʼn langapped kan Jesus ya in-ilolaʼn kakma lummin-awa. 48Kalan Jesus kan siya, “Alakku, gapu si pammatim kan sakon lummin-awaka. Ammam umoyon ti lummin-awaka.”

49Si hachiʼn mangibyegbyeg-an Jesus, gummatong chi osaʼn bubùulon Jairus un lampeɏpuʼd uwacha, kalala kan Jairus, “Latoy chi alaklu, ked patakuggey taktakon chi mistulu.”

50Ngim chingngeɏn pun Jesus chi lakwa, kalala kan Jairus, “Achika manchaleg, mamatika ot matagu alaklu.”

51Gummatongcha pun si byeɏoycha, achipun Jesus inteun un awed mitun-ud kan siya, malaksig kan cha Peter, James kan John un mansulud ya ama kan ilan chi alak. 52Losan cha taguʼn inggew, sin-iibincha ya silalangchucha. Ngim kalan Jesus kan chicha, “Achi kayu man-ibin, ti achipun latoy chi alak. Lasusuyop abus.”

53Ot liyokyokcha si Jesus, ti ammuchaʼn lalattoy chi alak. 54Ot iloglen Jesus chi iman chi alak ot kalala, “Alak, bumangonka.” 55Langulin chi angosla ot kakma bummangon, ot imbyegan Jesus un pakalancha siya. 56Laschaaw cha amala kan ilala, ngim bililin Jesus chicha ta achipuncha ibyegbyega lakwa.

Currently Selected:

Luke 8: HUA

Highlight

Copy