Luke 2

Ha Liyalakan Jesus

(Mat. 1:18-25)

1Si hachiʼn timpu, illintog Emperador Augustus ud Rome un masapuɏʼn mampalista cha losan un tagu si mampangatala, si ilin cha aappucha. 2Hachi ummulaʼn lampalistaan cha tagu timpun chi lan-gubillachuɏan Quirinius ud Syria. 3Ked kacha osa ummoy lampalista si ilin chi aappula.

4Ot si Joseph un iNazareth, si ili ud Galilee, ummoy lampalista ud Bethlehem un ili ud Judea ti siya liyalakan Ari David un apula. 5Inyawitla si Mary un libyegaʼn asaw-ola ta mampalista bo. Ked si Mary umalakon. 6Si inggewancha ud Bethlehem, gummatong chi timpu un umalakala. 7Ngim lappun kuwetuʼn inggewancha si hachiʼn byeɏoy un chachaggusan. Ot ummoycha si igew cha ayam ot hachi ummalakala si panguɏuʼn leɏaki. Kilagoyala siya ot illiggala si atutung ti lappun kuwetu un inggewancha si hachiʼn byeɏoy un chachaggusan.

Cha Man-aayyuwan Ya Cha Angheles

8Si hachiʼn labi awed cha man-aayyuwan si igid chi ili ud Bethlehem un man-aachug kan cha keɏlilucha. 9Ot kakma lampaila osaʼn anghel Apudyus kan chicha ot lalilangancha si kilabiɏun Apudyus un leɏpuʼd langit ot amod chi ogyatcha, 10ngim kalan chi anghel kan chicha, “Achi kayu umogyat. Ti ummaliyak un mangibyega kan chikayu si bibiɏuʼn chameg un mangtod si amod un galas kan cha losan un tagu. 11Si salaʼn labi, si ilin David ud Bethlehem, liyalak chi Malagu kan cha tagu. Siya si Kristu un Apu!#2:11 Ha Mesias si ugud cha Judio, ked man-isu si Kristu si ugud un useɏon chi Grego. Ha piolaʼn uguchon siya chilutukan Apudyus un manturay. 12Allaya maligammuwanyu un katuttuwaan chi imbyegak: Ochesanyu alak un lakagoyan ya liyobog si atutung.”

13Ot kakma lampaila cha achu-achun anghel ud langit ot lichogacha si ummulaʼn anghel, ot chilaychayawcha si Apudyus, un kalancha,

14“Machaychayaw si Apudyus ud langit. Pabiɏuwola somsomok cha

losan un tagu utla pita un mampagalas kan siya.”

15Ummoyon pun cha angheles langulin ud langit, lan-uugud cha man-aayyuwan un kalancha, “Intakuʼd Bethlehem itullong chi hachiʼn lakwa un impakaammun Apudyus kan chitaku.” 16Langkamkammuchaʼn ummoy ot inchesancha cha Mary kan Joseph ya hachiʼn alak un liyobog si atutung. 17Lailacha pu alak, impatagammucha losan un imbyegan chi anghel mipanggop kan siya. 18Ot laschaaw cha losan un langngeɏ si imbyegan cha man-aayyuwan kan chicha. 19Ngim si Mary, inlulugla si somsomokla losan cha allaya ot simsimsimmokla chicha. 20Ot langulin cha hachiʼn man-aayyuwan si peppeyeg un chilaychayawcha si Apudyus gapu si losan un ladngeɏcha ya intullongcha, ti tuttuwaʼn lakwa losan chi imbyegan chi anghel kan chicha.

Ha Langingachelancha Kan Jesus

21Si mikawaɏuʼn eɏgew chi alak, timpun chi masogyatala ot lingachalancha siyà Jesus ti siya imbyegan chi anghel si chaampun ilala mangibugiyan kan siya.

Ha Langiyoyancha Kan Jesus Si Templo

22-24Chillumtong pu timpu un malungpaɏan cha Mary kan Joseph si lintog un inggilin Moses mipanggop si machuɏsan chi byebyai un lagamput ummalak. Ot ummoycha si templo ud Jerusalem un manchatun kan Apudyus si chuwaʼn kalapati willu chuwaʼn ubbu ti siya liigili si lintog. Inyawitcha bo si Jesus ta umoycha ipeɏang siya kan Apudyus ti siya bo liigili si lintog Apudyus un kalala, “Ha panguɏuʼn alak un leɏaki ked masapuɏʼn ipeɏang kan Apudyus.”#2:22-24 v. 22-24, Leviticus 12:6-8; Exodus 13:2, 12

25Si hachiʼn timpu, inggew chi osaʼn memeɏong-eg ud Jerusalem un mangngachen Simeon un uuwayola hachiʼn Malagu kan cha chogalaʼn galak Israel. Lalintog un tagu siya ti tuttuwaola lintog Apudyus. Awed chi Ispiritun Apudyus kan siya, 26Ot impakaammula kan Simeon un achipun matoy inggala mitullongla Kristu, un ingkarin Apudyus un umali. 27Ot impuyutla si Simeon si templo. Ot hachi bo timpu un illok cha Joseph si Jesus si templo ta matungpeɏ chi lintog mipanggop si liyalakala. 28Intullong pun Simeon chi alak, ilaklila siya ot lanyaman kan Apudyus, un kalala,

29“Apu, makwaʼn ipalubuslu un matoyak si sala ti mallin-awa somsomokku ti intullongku Malagu.

Ti tilungpeɏm chi ingkarim kan sakon un bubùulom.

30Ti intullongku siya un Malagu kan cha tagu,

31un siya inyalam si sangwalan cha losan un tagu.

32Siya mansilaw kan cha somsomok cha Gentil ta ammuwon cha piom un ipakwa.

Gapu kan siya, machaychayaw cha tagum un galak Israel.”#2:32 Isaiah 42:6, 49:6, 52:10

33Laschaaw cha sin-alak kan Jesus si imbyegan Simeon mipanggop kan siya. 34Ot bilinchisyulan Simeon chicha ot kalala kan Mary un ilan Jesus, “Ha allaʼn alaklu, chilutukan Apudyus siya ked gapu si suysuɏula machusa cha achu un galak Israel, ngim achu bo cha matagu. Gapu ta achipun cha tuttuwaon siya un imbuun Apudyus, achu cha taguʼn mallawing kan siya. 35Ked hachi in-ilon cha lalimod un lawwik un somsomokchaʼn mipakaammu. Ked sika un ilala, manchachauyka, un isun chi machuut chi pusum gapu si makwa kan siya.”

36Inggew bo si hachi osaʼn propeta un byakbyakot un mangngachen Anna. Alak Penwel siya, un galak Aser. Si Anna, pituʼn tawon chi langasaw-ala, 37ot labyaɏu inggala si waɏumpuɏu ya opat chi tawonla. Illinggew si Anna si templo, eɏgewola kan lablabiyolaʼn manchaychayaw kan Apudyus ya malluwaluwalu kan siya ya sin-udchuman mallaun siya. 38Si hachiʼn uras, ilabotla cha Jesus ot lanyaman kan Apudyus. Ilugudla mipanggop kan Jesus kan cha losan un taguʼn man-uuway si hachiʼn manwayawayaan Apudyus kan cha galak Israel.

Langulilancha Ud Nazareth

39Gilamput pun cha Joseph kan Mary killingwa cha losan un bilin si lintog Apudyus, langulinchaʼd Nazareth un ili ud Galilee. 40Ot chummakeɏ alak si hachi ya lataingan chi somsomokla. Ya amod bo laingla ya ilam-amod Apudyus bilinchisyulan siya.

Ha Langchasancha Kan Jesus Si Templo

41Tilawon, un cha sin-alak kan Jesus pin-acha umoy ud Jerusalem makapiyasta si Piyastan chi Lallausan. 42Lantawon pun si Jesus si lasawaɏan si chuwa, lakaoy kan cha amala kan ilala lakapiyasta. 43Lagamput pun chi piyasta, ummoyon cha amala kan ilala langulin ud ilicha. Ngim achipuncha ammu un latelan chi alakchaʼn Jesus ud Jerusalem, 44ti kalancha pun lu lakabuɏog siya kan cha kakadwacha. Ot lasin eɏgew chi lalidtidchaɏalancha ot ilim-imuscha siya kan cha bubuɏuncha ya agicha. 45Ngim lappun inchesancha kan siya ot langulinchaʼd Jerusalem ta umoycha sington. 46Si mikatluʼn eɏgewla, inchesancha siya un lakaam-ammung kan cha mimistulun cha Judio si templo, un manchochongngeɏ ya makaim-imus kan chicha. 47Losan un lanchochongngeɏ kan siya laschaawcha si kilalainglaʼn malongbyat si losan un ilimuscha kan siya. 48Laschaaw bo cha amala kan ilala si intullongcha siya, ot kalan ilala, “Alakku, amod chi chalegmi kan amam un langlangngit kan sika. Puggey koon chi katchi kan chikami?”

49Ngim summongbyat si Jesus, “Payuggey sakon singsington? Ha achipunyu ammu un masapuɏʼn awechak si byeɏoy Amak.” 50Ngim achipuncha laawatan chi ilugud Jesus.

51Hachi ked, litun-ud si Jesus kan chichaʼn langulin ud Nazareth, ot tummuttuwa kan cha losan un pakwacha. Si ilala simsimsimmokla losan un laklakwa. 52Ot si Jesus chummakeɏ ya lummailaing ot laam-amod lagalasan si Apudyus ya cha tagu kan siya.

Currently Selected:

Luke 2: HUA

Highlight

Copy