Acts 20

Ha Langulilan Cha Paul Ud Macedonia Ya Achaia

1Lagamput pu hachiʼn gulu, chilagup Paul cha mamati ot silegegla chicha. Ot imbyegalaʼn umoyon ot ummoy ud Macedonia. 2Ummoy kan cha ili-ili ot silegegla cha mamati si achuʼn imbyegbyegala, ot ummoy ud Achaia un ngadloncha bo Greece. 3Illinggew udchi si tiɏuʼn buɏan. Alla oyyan umoy mallugen si bapur un umoy ud Syria si laammuwala pin-an cha Judio siya man-uumaɏan otoyon. Ot simsimmoklan mangulin malliglig ud Macedonia. 4Kadwala cha Sopatro un alak Pyrrhus un iBerea, Aristarchus ya Secundus un iThessalonica, Gaius un iDerbe, Timothy, Tychicus ya Trophimus un iyAsia. 5Ummun-ula cha kadwala ot iluway chikami ud Troas. 6Lagamput pu pisyasta un mangalancha si tilapay un lappun mampaboteɏ, lanlugen kami si bapur malipud Philippi ta tun-uchonmi chicha. Lummaus pu limaʼn eɏgew, lichuum kami kan cha kadwami ud Troas. Ot illinggew kami si pituʼn eɏgew udchi.

Ha Alungus Chi Langgaggakayan Paul Ud Troas

7Si umulaʼn eɏgew chi Chuminggu, lachagup kami losan un mamati ta mangan kami si tilapay un malomsomkanmi si latoyan Jesus. Lagamput pun, lantudtuchu si Paul kan cha tagu inggala gawan labi, ti kalala lu umoyon si mabigatala. 8Achu silaw si langingngatuʼn kuwetu un lammimitinganmi. 9Inggew chi bumaru un mangngachen Eutychus un ummaammuy si binta. Labyeyeg pu lan-ugu-uguchen Paul, lanchukchukmog inggala leeɏot chi suyopla ot laodcheg lampeɏpu si mikatluʼn sag-on chi byeɏoy. Achangoyon cha pun siya, latoy. 10Lan-osog si Paul ot lukbubyela ya kiloskosla siya un kalala, “Achi kayu machalagen, ti latattagu.” 11Oli pun langulin ud ngatu ot bilisakla tilapay ot killanmi. Ot intuɏuyla lakaug-uggud kan chicha inggala si summilè ilit, ot ummoyon kami. 12Illiyoycha hachiʼn bumaru ud uwacha ked amod chi tileɏokcha ti latagu.

Ha Ummoyan Paul Ud Miletus

13Ummula kami ummoy lanlugen si bapur un umoy ud Assos un malagasanmi kan Paul. Siya imbyegala kan chikami ti malidchaɏan un umoy udchi. 14Lan-oochas kami pun ud Assos, lakalugen kan chikami ked ummoy kami ud Mitylene. 15Labigat pun, lanlugen kami udchi ot lichuum kami ud chomangon Chios. Kasin pun labigat, ummillong kami ud Samos. Ot kasin bo labigat, gummatong kami ud Miletus. 16Simsimmok Paul un achipun kami manchegas ud Ephesus ta achi kami mataktak udchi probinsiyan chi Asia, ti makamu si Paul un gumatong ud Jerusalem, ta lu makwa, maabutala eɏgew chi Pentecost.

Ha Lantudtuchuwan Paul Kan Cha Pallakayon Ud Ephesus

17Si inggewanmi ud Miletus, impaayeg Paul cha pallakayon cha mamati ud Ephesus. 18Gummatongcha pun, kalala kan chicha, “Ammuyu mambibiyegku si inggewak kan chikayu malipud si chamu un ummaliyak utla probinsiyan chi Asia. 19Lansimsimbiyak kan Apu Jesus un si papakumbyabya. Lantodtodtod bo cha luwak un maas-asusu somsomokku gapu si lampapaligat cha Judio kan sakon, lan-uumaɏancha otoyon sakon. 20Ammuyu bo un ilaminku imbyegbyega cha bumaɏuwanyu ya lantudtuchuwak kan chikayu si kaachuwan cha tagu ya ulay si byebbyeɏoyyu. 21Imbyegbyegak un ustu-ustu kan cha Judio ya cha Gentil un masapuɏʼn mambyabyawicha kan cha byasbyasuɏcha ya mansagungcha kan Apudyus ya mamaticha kan Apu Jesus.

22“Ked si sala, inyak ud Jerusalem ti siya imbilin chi Ispiritun Apudyus kan sakon, ked lappun ammuk lu silu makwa kan sakon utlat. 23Ha ammuk abus ked mabyaɏuchak ya mapaligatalak si kacha siudad un ayak, siya impatigammun chi Ispiritun Apudyus kan sakon. 24Ngim ulay lu matoyak, ti lappun bilang chi biyegku, piok un gamgamputok losan cha kawachin impakwan Apu Jesus kan sakon, un mangibyegbyega si bibiɏuʼn chameg mipanggop si kachegun Apudyus kan chitaku.

25“Chikayu illiinggewak si langibyegbyeg-ak si mipanggop si Mampangatan Apudyus, ked si sala ammuk un achipun taku man-asitullong kasin. 26Ked ibyegbyegak kan chikayu si salaʼn eɏgew, lu awed misila kan Apudyus machusa, chakampun un byasuɏk. 27Ti ilaminku imbyegbyega kan chikayu cha losan un pion Apudyus.

28“Ammanyu allechen cha long-egyu ya cha losan un taguʼn impaayyuwan chi Ispiritun Apudyus kan chikayu, ti siya biyangyu un pangpangucha. Ayyuwalanyun ustu cha tagun Apudyus, ti silakala chicha si chaɏan chi mismuʼn Alakla. 29Ammuk un lu umoyolak, umali cha tuntullin mimistulu manyam-an kan chikayu, un isucha laatap un asu, ked lappun kacheguwancha. 30Awed bo cha uchum kan chikayu un mamati un asi mantudtuchu si tilutuli taplu awisola cha mamati un mitun-ud kan chicha. 31Ked man-alled kayu. Somsomkonyu un bilegbyeg-ak chikayu losan si tiɏuʼn tawon un illinggewak kan chikayu, ileɏgew ya lilabin malluluwaak gapu si kacheguk kan chikayu.

32“Si sala ipuɏangku chikayu kan Apudyus ya ingkarila un kacheguwala chikayu. Siya mallakabyalin un mampakoscheɏ si pammatiyu ya mangatod si binchisyun un ingkarila kan cha losan un pileɏkasla un tagula. 33Kan sakon, lappun langkochewak si pilak, buɏawan willu silup ulay silu kan chikayu. 34Ammuyu mismu un lummabbuwak ta siya idchok si kasapuɏak ya cha kasapuɏan cha kakadwak. 35Siya pasigku killingwa ta awed mantuɏachenyu, ti masapuɏʼn mampangog takuʼn mangkawachi ta awed maituɏung taku kan cha makasapuɏ. Somsomkon taku imbyegan Apu Jesus un kalala, ‘Laganggalas chi mangatod lu mangkochew.’ ”

36Lagamput pun Paul imbyega cha alla, lampalintuming cha losan ot lalluwalu si Paul. 37Ot sin-iibincha un mangoskos ya mangikis kan siya. 38Manchachauycha si imbyegala un achipuncha kasin man-asitullong. Ot litun-udcha kan siya inggala si igew chi bapur.

Currently Selected:

Acts 20: HUA

Highlight

Copy