Zechariah 13
13
Nan Paddungnay A'ulahan di Bahol
1Inalin goh Apo Dios an na'abbagbagtuy, “Mawaday bumuhu' an paddungnay obob an pun'ulahanyun holag David ya an amin nan numpunhitud Jerusalem hi baholda. 2At ubaho' an amin nan bulul ad Jerusalem ta mapogpog an mi'id ah munnomnom ay dida. Ya pogpogo' goh nan annabin an propeta an waday abalinanda an nalpuh nan nappuhin spirituh tun luta. 3Ya gulat ta waday manginaynayun an mangeng'engoh hinan aton nan immannung an propeta ya alyon da amana ay inanay mahapul an mapatoy ti bimmalbali an alyonay un hay inalin Apo Dios di gunna ibaag, mu bo'on ti langkak nan imbagana. At da amana ay inanay manudlu' an mamatoy ay hiya.”#13:3 Miyunnudandah nan Deut. 13:6-9.
4Ya inalin goh Apo Dios an henen gutud ya nan hinohhan agguy immannung an propeta ya bumainda. Ya adida ipahiyay nipa'en'enap ay dida, ya adida ilubung di lubung nan immannung an propeta an way dutdutna.#13:4 Hiyaat un hiyah ne inlubung da Elijah (II Ki. 1:8) ay John an Mumbonyag (Mat. 3:4). 5Ya hay hapitondaat tuwali ya alyonday, “Bo'ona' propeta an unna' mumpayaw an nete"ah din a'unga' ta enggana!” 6Ya gulat ta way munhanhan ay hiyan alyonay, “Anaad hana nan beklat hi odolmu?”#13:6 Nan agguy immannung an propeta ya tinudlu'day odolda ta mumpabadangdah nan bululda (I Ki. 18:28; Lev. 18:28; 21:5; Deut. 14:1; Jer. 16:6; 41:5; 48:37). Mu gapu ta pahiwon nan tataguy agguy immannung an propeta eden timpu at ihaut nan natudlu' an propeta. ya hay pambalna ya alyonay, “Nahugatana' hi abung nan liligwa'.”#13:6 Gapu ta pahiwon nan tataguy agguy immannung an propetan den timpu at ihaut nan natudlu' an propetay natudlu'anda ta olom ya adida patayon dida.
Hay Pamatayandah nan Paddungnay Mumpahtul
7Ya inalin goh Apo Dios an nidugah di abalinanay,
“He"a an paddungnay hanggap'u ya mala"uy'a ta paligatom nan pumpahtulo' an nan pi'yib'ibba'!#13:7 Nan mumpahtul ya hi Jesu Kristu an nan Alin Pento' Apo Dios.
Ya guniham, at mun'iwa'atda nan paddungnay kalnilu
ti himungo' an mummoltah nan tatagu'#13:7 Mat. 26:31; Mk. 14:27.
8ta mapogpog ya mapatoy di nahuluk hi ingkatluh nan tataguh nan babluy,
mu waday ingkatluh ma'angang.
9Ya paddungnay iyuy'uh nan apuy danen himpampun an ingkatlu ta hibugo' dida
an umatdah nan silver ya balitu' an mamahmahan.
At abuluto' nan iluwaluda,
ya alyo' di, Diday tatagu'!
ya alyonday, Ha"in di Diosda!”
Currently Selected:
Zechariah 13: NHAD
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
