Nahum 3

Hay Amoltaan nan iNineveh

1Ya ha"in an hi Nahum ya alyo' goh di,

“Mahmo' nan tatagud Nineveh an pumatopatoy ya ma'allayah

ti awniat pumpoloh nan udum an tataguy inadangyanyu!

2Ya mahmo' ayu goh ti awniat waday donglonyuh humanupek,

ya nan ahikakaludukud an kalesan punluganan di mi'gubat ya nan gumanitu' an kabayu

an didanay umalin mangubat ay da'yu!

3Ya mungwilit nan numpuntakay hinan kabayu,

ya umanelat nan hanggapda ya nan pahulda,

at do'olda ahan di mun'a'atoy an mun'ahalibdudan nan tatagun maluh!#3:3 Hay inting'in nan Alin hi Shalmaneser III (859-824 B.C.) ya tinu"utu"ulna nan do'ol an ulun di nun'aputulan an tatagun tiniliwna ta umatdah nan ata'nang an binattu, ya impihinanah luwal di siudad di buhulna ta pa'atiggonda. Ya nan udum an a'alid Assyria ya nundidittumonday odol di nun'a'atoy hinan pantaw di allup di buhulda ta umatdah nan mitungu an mibantag hi gettaw di abung.

4Ya manu ay ma'at hanah nan iNineveh ti nipaddungdah nan puta an do'ol di balbaliyana.

Umat hinay inat nan iNineveh ti do'ol di tataguh udum an babluy an binalbaliyanda

ta niddumdan dida an ni'dayaw hinan bululda.

5At hi Apo Dios an nidugah di abalinana ya alyonan da'yuy,

Ha"in ya numbalina' hi buhulyu an iNineveh,

at moltao' da'yu.

Paddungnay pumbolado' da'yu ta panigtitigan da'yuh nan tataguh nan abablubabluy ta mabainan ayu.#3:5 Hay ugalin nan nangabak hidin penghana an ta"on un malgom an nasyon di awadanda ya pumboladonday nun'atiliw ta mabainandah nan dalan an miyuy hi adagwin babluy. Ya gapu ta umat hinay inat nan i'Assyria at hiyah ne goh di aton Apo Dios ay dida.

6Pumbalino' da'yuh na'allugit an paddungnay pumpekla'a' da'yuh nan lugit

ta panigtigan da'yuh nan tatagu.

7At an amin di mannig enen babluy ya pahiwonda an alyonday,

Ninganuy mahkay nan iNineveh!

At hiya dan un way mammo' ay dida?”

8Ya ha"in an hi Nahum ya alyo' di,

“Da'yun iNineveh ya unyu dan alyon hi un da'yuy on'onaynan malenggop

ya un nan tatagud Thebes#3:8 Hiyay kapitulyuh nan ohan lugal ad Egypt, ya inabak nan i'Assyria heten siudad hidin 663 B.C. an ohan siudad ad Egypt?

Hay baliwda ya nan Wangwang an Nile an paddungnay hiyay allupda.

9Ya hinakupna goh ad Ethiopia#3:9 Unu ad Cush. ta middum ad Egypt,

at nidugah di abalinana,

ya nan tatagud Put#3:9 Mid mapto' ya ad Somalia. ya ad Libya di bumadang ay dida.

10Mu hinakup di udum an babluy ad Thebes,

at niwa'at din tataguh nan udum an babluy, ya nun'ibaludda dida.

Ya nun'iyuy din buhulda nan ung'ungungngah nan akalakalata, ya numpatoyda.

Ya numbangkilinganda din a'ap'apud Thebes,#3:10 Hay impitudo' nan Alin hi Ashurbanipal (669-627 B.C.) hi aat nan ohan a'ap'apun tiniliwna ya inalinay, “Impibuung'uh bagangna nan bangkeleng di ahu, ya impa'unig'u hiyah it'ittang an abung di ahu ta hiyay ihinana, ya henen ihinana ya impipatang'uh nan pantaw di allupdah appit hi buhu'an di algaw ta tigon nan maluh.”

ya imbibinnutday mangngal ay dida.

11Umat hitu goh damdamay ma'at ay da'yun iNineveh an waday umalin mangubat ay da'yu,

at mid poto' di punnomnomanyu an paddungnay un ayu nabutong

ti ta"on un ayu mipo"oy mu adi ayu damdama mabaliwan!

12Ya ta"on un din nun'ihamad an ihanianyu ya mun'apa"i

an umatdah nan ayiw an ma'alih fig an wa ay ta nalum di bungana ya un pun'iwogot ya nun'a'agah.

13Ya nan tindaluyu ya mid ologda an ayda binabai an agguyda immenghan mananggah nan buhulyu!

Ya mun'apa"i nan pantaw,

at nalakah humgopan nan buhulyu ti noghob.#3:13 Inah'upandad ugwan nan napa"i an siudad ad Nineveh, ya mattig an un noghob.

14At agayu akkay tuwali ta idadaanyuy do'ol hi danum ta way inumonyuh nan pangubatandan da'yu!

Ya ihamadyu nan ihanianyu,

ya pilingonyu nan uklit ta way iyammayuh nan napa"in allupyu!

15Mu ta"on hi ngadan di atonyun mundadaan ya ta"on hi un atnay ado'olyu

ya mun'atoy ayuh gubat unu apuy#3:15 Nan angunuh an alid Nineveh an nan Alin hi Sin-Shar-Ishkun ya noghob hinan palasyuna. damdama ta ma'ubah ayu,

at da'yuy umat hinan nitanom an ma'ubah ti pun'a'an di dudun.

16Manu ti umatdah ado'ol di bittuan di adadangyan hitun babluyyu,

mu taynan da'yu an umatda goh hinan dudun an pun'a'andan amin di nitanom ya unda taynan.

17Ya manuman ti do'ol nan a'ap'apuyu

an umatdah nan dudun an wa ay ta lawang ya ma'a'amungda.

Mu wa ay ta pinumtang ya numpangalayawdan amin

an mid poto' di numpangayanda.#3:17 Hidin nalpahan di napa"ian ad Nineveh hidin 612 B.C. ya mid nanginnilah awadana ti nagab'unan hi panag, mu na'ah'upan mahkay hidin 1845 A.D.

18At he"an alid Assyria,#3:18 Unu nan Alin hi Sin-Shar-Ishkun. wa ay ta ma'at hatu ya mi'id mahkay din u'upihyalmu,

at nan tatagu ya nun'iwa'atdah nan aduntuduntug ti mi'id ah mangipapto' ay dida.

19At da'yun i'Assyria ya paddungnay mun'ahugatan ayu,

ya adi ma'agahan an hiyay iyatoyyu.#3:19 Nan do'ol an nun'apa"in siudad hidin penghana ya palpaliwan ya impaphodda goh ta ninaynayun. Mu mid ah nangipadah an nangipaphod hinan siudad ad Nineveh, hiyaat un nagab'unan hi panag.

At nan mangngol hinan ma'ma'at ay da'yu ya umamlongda

ti dumalat nan nidugah an pangipaligligatanyun dida.”

Currently Selected:

Nahum 3: NHAD

Highlight

Copy