Genesis 8

Hay Natdu'an di Danum

1Ya ninomnom Apo Dios da Noah ya an amin nan wah nan pupul, at impatuyupnay tuyup ta way aton nan danum an ma'bah 2ta nun'atdu' nan a'obo'obob, ya inugawna nan udan an nalpud daya. 3Ya mun'ul'ullay an na'bah nan danum hi lemay bulan. 4Hidin miyapulu ta pituh algaw hi miyapitun bulan ya nipattu' heden pupul hinan Duntug an Ararat. 5Ya nitultuluy an ma'bah nan danum ta engganah miyapuluh bulan. At hidin hopap di algaw di miyapulun bulan ya mattig mahkay di tulid nan aduntuduntug.#8:5 Henen algaw ya nipaddung hi January 1 hinan calendar tu'u.

Nan Gayang ya nan Balug

6Ya naluh di napat hi algaw ya imbughul Noah din tawah nan pupul. 7At impatayapna nan gayang ta timmayap an numbinangngadan ta nangamung un namaganan tun luta. 8Ya impatayapna goh nan balug ta panginnilaanah un namaganan di luta. 9Mu mi'id ah namaganan hi pun'ohpana, at numbangngad hinan pupul. Ya dempap Noah, at ipahigupna. 10Ya innaynayundan nihinah nan pupul hi pituy algaw ya unna ipidwan ipatayap nan balug. 11Ya wan ma'ahom ya numbangngad nan balug, ya ihnay hembatnan tubun di ayiw an olibo. At inilan Noah mahkay an na'uy an mamaganan di luta. 12Mu nihihinnada ni' hinan pupul hi pituy algaw, ya impatayapna goh nan balug, mu agguy mahkay numbangbangngad.

13Hidin onom di gahut ta ohay tawon Noah eden hopap di algaw hi hopap di bulan ya imbughulna nan tawan di pupul ta muntiggatiggaw, ya tinnignan namaganan di luta. 14At heden duwampulu ta pituy algaw hi miyadwan bulan ya namaganan mahkay an amin di luta.

15Ya inalin Apo Dios ay Noah di, 16“Pumitaw ayun ahawam, ya nan imbabaluyyu, ya nan a'ahawada. 17Ya pi'lahunom an amin nan nun'apaya'an, ya nan a'animal, ya an amin nan umadap ta munholagda ta dummo'olda goh hitun luta.” 18Ya pimmitaw mahkay da Noah an himbaluy, ya nan imbabaluyda, ya nan a'ahawada. 19Ya umat goh hi an amin hinan a'animal, ya nan umadap, ya nan nun'apaya'an an pimmitawdan numpunhina"ama.

20At nun'ammah Noah hi pun'onngan ay Apo Dios, at inummal hi me'nong an animal ya nan me'nong an hamuti, at ene'nongnan Apo Dios. 21Ya inabulut Apo Dios nan ene'nong da Noah, at inalinah nomnomnay, “Dumalat nan tatagu ya adi' mahkay ipidpidwan idutan tun luta an ta"on hi nappuhiy nomnomda an mete"ah a'ungada, ya adi' mahkay ipidpidwan ubahon nan matagun umat hinan inat'u.

22At minaynayun ay di awadan tun luta

ya mitutuluy goh di punhabalan ya pumbot'an di tatagu,

ya waday tungnin ya mun'ohab.

Ya umat goh an mitutuluy di tiyalgaw ya lawang,

ya ta"on di helong ya patal.”

Currently Selected:

Genesis 8: NHAD

Highlight

Copy