Genesis 11

Nan Ata'nang an Binattud Babel

1Hidin hopapna ya un ohay hapit hi pun'i'innawatan di tatagu. 2Ya heden umayandah appit di buhu'an di algaw ya inah'upanda han nundotal an lutan ad Shinar,#11:2 Ad Babylon. at hidiy bimmabluyanda.

3Ya nunhahapitdan inaliday, “Malammung tu'u ta munduwin tu'uh mapeleng ta hay iyamma tu'u ya nan naduwin, ya linita tu'u ta way mida"it.” Ya ente"adan mun'amma ta bo'on hay batu unu panag an way apulnay usalonda. 4Ya inalida goh di, “Maphod hi un tu'u ipaphod heten babluy, at mun'amma tu'uh ata'nang an binattu ta nangamung umatam ad daya, ya manu ay aton tu'u ta mundongol di aat tu'u ta adi tu'u munhihiyan.”

5Mu tinnig Apo Dios nan babluy ya nan ata'nang an binattun iyam'ammada. 6Ya inalinay, “Nan tatagu ya na'ohhada, ya un ohay hapitda. At ten ente"adan nun'ammah umat hitu at undan adida abalinan an aton di penhoddah ma'at. At udum di algaw ya ini ya atondan amin di pohdondah ma'at! 7At umuy tu'u ta lummanon tu'uy hapitda ta numbino'ob'on ta adida mun'i'innawatan.” 8At inwa'at Apo Dios didah tun alutaluta, at agguy natuluy nan pangipaphodandah nan babluy. 9At hiyah ne dimmalat hi nangadnanah Babel#11:9 Unu Babylon. Hay pohdonan ibaga ya gulu. ti ginulun Apo Dios di hapitda ta numbino'ob'on. At inwa'atna didah tun alutaluta.

Nan Holag Shem

(I Chron. 1:17-27)

10Ya hiyatuy napatad hi holag Shem. Ya naluh di duway tawon hi nalbongan tun luta ya nuntawon hi Shem hi hinggahut, ya nunholag ta hi Arphaxad. 11Ya nete"ah nitungawan Arphaxad ta nangamung lemay gahut di tawon Shem ya gun nawaday udumnah holagnan linala'i ya binabai.

12Ya hidin nuntawon hi Arphaxad hi tulumpulu ta lema ya nunholag ta hi Shelah. 13Ya nete"ah nitungawan Selah ta nangamung naluh di opat di gahut ya han tuluy tawon Arphaxad ya gun nawaday udumnah holagnan linala'i ya binabai.

14Ya hidin nuntawon hi Shelah hi tulumpulu ya nunholag ta hi Eber. 15Ya nete"ah nitungawan Eber ya opat di gahut ya tuluy tawon Shelah ya gun nawaday udumnah holagnan linala'i ya binabai.

16Ya hidin nuntawon hi Eber hi tulumpulu ta opat ya nunholag ta hi Peleg.#11:16 Bahaom nan footnote di Gen. 10:25 ta innilaom di pohdon nan ngadana an ibaga. 17Ya nituluy an ni'taguh opat di gahut ya han tulumpuluy tawona, ya gun nawaday udumnah imbabaluynan linala'i ya binabai.

18Ya unat goh nuntawon hi Peleg hi tulumpulu ya nunholag ta hi Reu. 19Ya nituluy an ni'tagu ta nangamung duway gahut ya han hiyam di tawona, ya gun nawaday udumnah imbabaluynan linala'i ya binabai.

20Ya unat goh nuntawon hi Reu hi tulumpulu ta duwa ya nunholag ta hi Serug. 21Ya nituluy an ni'tagu ta nangamung duway gahut ya han pituy tawona, ya gun nawaday udumnah imbabaluynan linala'i ya binabai.

22Ya unat goh nuntawon hi Serug hi tulumpulu ya nunholag ta hi Nahor. 23Ya nituluy an ni'tagu ta nangamung duway gahut di tawona, ya gun nawaday linala'i ya binabain imbabaluyna.

24Ya unat goh nuntawon hi Nahor hi duwampulu ta hiyam ya nunholag ta hi Terah. 25Ya nituluy an ni'tagu ta nangamung hinggahut ya han himpulu ta hiyam di tawona, ya gun nawaday linala'i ya binabaih imbabaluyna.

26Ya unat goh napituy tawon Terah ya nunholag ta da Abram, ya hi Nahor, ya hi Haran.

Nan Holag Terah

27Ya hiyatuy holag Terah. Nunholag hi Terah ta hi Abram,#11:27 Mid mapto' ya nitungaw hidin 2166 B.C. ya hi Nahor, ya hi Haran an ad holag ay Lot. 28Ya nahhun an natoy hi Haran ya un hi amana an hi Terah hidih nan nitungawanah ad Ur hidid Babylon. 29Ya da Abram ay Nahor ya nangahawadan hin'agi, at inahawan Abram hi Sarai, ya hi Nahor ay Milkah an hina' Haran. Ya wada goh di holag Haran an da Milkah ay Iskah. 30Mu hi Sarai ya bahig.

31Ya unat goh nakak da Terah ad Ur hinan babluy ad Babylon ta umuydad Canaan ya initnudna da Abram an imbaluyna, ya nan ap'apunan hi Lot an hina' Haran, ya hi Sarai an inapuna. Ya palpaliwan ya immatamdad Haran, ya hidiy nunhituwanda, 32ya nunhitudah di ta nangamung natoy hi Terah hidin nuntawon hi duway gahut ya han lema.

Currently Selected:

Genesis 11: NHAD

Highlight

Copy