Lukas 8

Babinian-babinian nang manulungi Nabi Isa dalam palayanan Sidin.

8:1-3

1Kada lawas limbah nitu, Nabi Isa bakuliling ka kuta-kuta wan ka kampung-kampung gasan bacaramah wan mahabarakan habar baik manganai Karajaan Allah, iaitu nang kaya apa sakira urang kawa masuk ka dalam Karajaan Allah. Umpat jua bubuhan pangikut Sidin. 2Ada jua bibinian-bibinian nang sudah diwarasakan Sidin matan roh jahat. Ada Maryam, nang baasal matan kuta Magdalena. Dahulunya inya suah dirasuki ulih tujuh ruh jahat, lalu inya diwarasakan jua ulih Nabi Isa. Ada jua Yoana, bininya Khusa, nang tukang simpan duit raja Herodes. 3Ada jua Susana wan ada jua babinian-babinian lain. Samunyaan babinian-babinian nang itu umpat mambari'i ungkos-ungkos gasan palayanan rombongan Nabi Isa.

Kisah bahambur banih di ampat macam tanah.

8:4-8

4Wayah itu, urang-urang tatarusan badatangan matan banyak kuta handak mandatangi Nabi Isa. Pas urang-urangnya saling banyakan takumpulan, hanyar Sidin bamula bakisah.

5“Nah, ini nah ada satu kisah. Ada saikung patani nang mahambur banih di ladangnya#8:5 Mahambur banih adalah cara mananam banih pada jaman Nabi Isa.. Sapalih tagugur di tanah jalanan, lalu tajajak urang, wan dipatuki burung sampai lingis. 6Sapalih tagugur ka tanah nang babatu-batu. Banih nang itu tumbuh haja. Lalu layu lantaran tanahnya kadada banyunya. 7Sapalih tagugur di tanah di kumpai nang baduri. Tapi kumpainya nang manang. 8Sisanya digugurakan di tanah nang subur. Nah, tumbuh subur ai lalu babuah, saratus kali lipat daripada banih nang dihamburakan” ujar Nabi Isa manutup kisah tadi.

“Ingatakanlah pandiranku tadi tu nah” ujar Nabi Isa manambahi.

Nabi maungkai arti kisah banih nang dihambur.

8:9-15

9“Guru, umpat batakun, bulihlah? Apa garang maksud kisah pian tadi?” ujar sapalih pangikut Sidin nang kada tapi paham.

10“Bubuhan ikam dibari pangatahuan manganai rahasia-rahasia karajaan Allah. Tagal gasan nang lain, dilajari lawan kisah-kisah haja. Bubuhannya mandangar haja tapi kada paham sualnya Allah bakahandak supaya napa nang ditulis ulih Nabi Yasaya tajadi. Nang ditulisnya tu babunyi nang kaya ini nah,

‘Biar bubuhannya banyak malihat mujijat-mujijat,

bubuhannya kada cagaran paham napa nang tajadi.

Wan biar bubuhannya tatarusan mandangarakan ajaran,

bubuhannya kada cagaran paham jua’” ujar Nabi Isa manyahut tatakunan tadi.

11“Ini nah arti kisah tadi nah” ujar Nabi Isa manjalasakan.

“Banih nang dihamburakan tadi, itu Pirman Allah. 12Banih nang tagugur katanah jalanan tadi, itu urang nang mandangar Pirman Allah. Tagal lantaran Iblis nang datang marampas Pirman tadi matan hati urang tu, maka urang tadi kada parcaya wan kada disalamatakan matan hukuman dusa-dusanya. 13Banih nang tagugur di tanah nang babatu-batu tu, itu urang nang mandangar Pirman tadi wan himung banar manarimanya. Tagal nang kaya banih nang akarnya kada kawa tumbuh lagi, artinya inya parcaya satumat haja. Lantaran hidupnya sasain ngalih, lalu inya kada parcaya lagi. 14Banih nang tagugur di tanah nang bakumpai baduri tu, itu urang nang mandangar haja. Lalu nang kaya banih tu tumbuhnya kalah wan kumpai tadi, inya kalah lantaran inya mamantingakan hal-hal duniawi haja. Lalu inya kada taat lagi lawan Pirman Allah. 15Nah, lain lagi banih nang tagugur di tanah subur tu, ini urang nang mandangarakan Pirman tadi lalu maingatakannya tarus sampai bujur-bujur taat. Lalu nang kaya banih nang babuah, inya urang-urang nang bujur-bujur manarima wan maamalakannya.”

Nabi Isa manjalasakan kabanaran Sidin harus dipadahakan ka urang.

8:16-18

16Nabi Isa bakisah pulang,

"Kadada pang urang nang malikit lampu lalu ditukupinya pakai balanai atawa diandaknya kabawah ranjang. Lampu tu musti diandaknya di wadah nang tinggi nyaman urang nang masuk ka rumah kawa malihat cahayanya nang tarang. 17Nang kaya itu jua, Aku bacaramah mamakai kisah. Nang wayahini artinya dirahasiaakan, tagal kaina samunyaan cagaran jalas katahuan. Nang wayahini kada jalas, kaina cagaran jalas. 18Lantaran itu, dangarakan baik-baik caramahKu! Urang nang hakun manarima ajaranKu, Allah pacang manambahi kamampuan inya supaya magin bapaham. Tagal urang nang kada hakun manarima ajaranKu, biar inya baisi pikiran amun inya paham sadikit, Allah cagar maambil kamampuannya gasan mamahaminya."

Nabi Isa manjalasakan siapa-siapa nang dianggap kulawarga Sidin.

8:19-21

19Imbah itu, datang ai uma lawan dangsanak Nabi Isa handak badapat lawan Sidin. Sakalinya kada kawa masuk ka rumah tu nah, lantaran banyak banar urang bakakajalan.

20Tagal di situ ada saikung urang nang mamadahakan, “Junjungan, itu nah ada uma lawan dangsanak Pian di luar. Handak badapat Pian jar.”

21Lalu Nabi Isa manyahut, “Samunyaan urang nang mandangar wan manaati Firman Allah, itu pang nang Kuanggap kaya kulawargaKu.”

Nabi Isa maranaiakan angin ribut.

8:22-25

22Wayah itu, Sidin wan pangikut-pangikut Sidin babuatan ka dalam sabuah parahu.

Lalu ujar Sidin, “Ayu kita manyubarangi danau.”

Lalu tulakan ai bubuhannya. 23Parahatan balayar, Sidin taguring. Bakakajutan datang angin ribut. Parahunya kamasukan banyu sampai parak tinggalam. 24Bubuhan pangikut Sidin manggarak Sidin.

“Guru bamatian kita ini nah(means 'hampir tajadi')!” ujar bubuhannya.

Badiri ai Nabi Isa.

“Angin, baranai pang ikam!” ujar Sidin manyuruh angin ribut tadi.

Imbah Nabi Isa baucap nang kaya itu, baranai ai angin ribut tu. Lawan banyu kada bagalombang lagi.

25“Mustinya bubuhan ikam baiman lawan Aku” ujar Sidin.

“Umaailah, hibat banar Sidin ni. Sidin manyuruh angin ribut baranai. Lalu, angin ributnya maasi lawan Sidin! Langsung baranai haja!" ujar bubuhannya batakun-takun pina katakutanan wan takajut.

Nabi Isa manyuruh ruh-ruh jahat bajauh.

8:26-39

26Kada lawas imbah itu, sampai ai bubuhannya kasubarang danau Galilea di banua urang Gerasa. 27Pas Nabi Isa turun ka tanah, Sidin didatangi saikung lalakian nang kasarungan ruh-ruh jahat. Urang tu datang matan kuta. Inya sudah lawas batilanjang. Lawan pulang inya kada hakun guring di rumah. Inya guring di guha pakuburan haja.#8:27 Wayah jaman itu, biasanya kuburannya babentuk guha.

28-29Rancak sudah ruh-ruh jahat tadi maulah urang tu mahamuk. Maka gasan manjaganya sakira kada mahamuk lagi, tangan lawan batisnya dipasung lawan rantai. Tagal biar dipasung lawan rantai, rantainya gin kawa dipagatnya. Lalu inya dibawai ruh-ruh jahat ka wadah-wadah nang sunyi. Imbah mandatangi Nabi Isa, inya langsung basujut di hadapan Sidin.

"Bajauh ikam!" ujar Nabi Isa manyuruh ruh-ruh jahat tadi bajauh.

“Nabi Isa! Anak Nang di Atas, nang diutus Allah nang Mahatinggi! Handak baapa pian lawan ulun? Tolong pang jangan disiksa ulun!” ujar urang nang kasarungan tadi sambil basuara nyaring.

30“Ngaran ikam siapa garang?” ujar Nabi Isa batakun.

“Kami banyak!” ujar urang tu manyahut.

Inya baucap nang kaya itu lantaran banyak banar ruh-ruh jahat nang sudah manyarunginya.

31“Junjungan, tuluuuung! Kami jangan diusir ka naraka! 32Ijinakan kami masuk ka babi-babi nang itu!” ujar ruh-ruh jahat tadi bakali-kali mamohon ka Nabi Isa.

Kada jauh matan situ, banyak babi nang lagi makanan di pinggiran bukit.

“Ayu ja. Bubuhan ikam marasuki ka awak babi-babi nang itu nah” ujar Nabi Isa mambulihakan.

33Langsung ai ruh-ruh jahat tadi kaluaran, lalu langsung ai babi-babi nang banyak tu dirasukinya. Bukahan ai babi-babi tu, lalu tajunan tumatan pinggir tabing ka dalam danau. Mati lamasan ai babi-babi tu.

34Imbah malihat kajadian tadi, bubuhan tukang jaga babi bagagas bukahan ka kuta wan ka kampung-kampung nang parak sambil mahabarakan kajadian nang itu. 35Urang-urang nang hanyar mandangar kajadian nitu datangan handak malihat jua napa nang tajadi. Wayah badapat lawan Nabi Isa, bubuhannya malihat urang nang bakas kasarungan tadi tu, sudah babaju wan sudah waras. Inya lagi baduduk parak batis Nabi Isa. Maka takutan ai bubuhan nang hanyar datang tadi, sualnya bubuhannya hanyar haja tahu manganai kuasa Nabi Isa. 36Urang-urang nang manyaksiakan kajadian nang itu mangisahakan ka urang-urang lain di situ kaya apa urang tadi bisa waras. 37Lalu samunyaan panduduk di banua Gerasa itu maminta banar sakira Nabi Isa bajauh matan banua nang itu sualnya bubuhannya takutan banar lawan kuasa Nabi Isa.

Imbah itu, Nabi Isa handak babuat ka dalam parahu wan handak bulik ka subarang danau.

38Lalu, urang nang hanyar waras tadi mandatangi Nabi Isa lalu baucap, “Ulun handak umpat lawan Pian. Kamana haja! Kawalah?”

39“Bulik haja gin ikam! Kisahakan samunyaan nang Allah parbuat lawan ikam!” ujar Nabi Isa manyahut.

Maka tulak ai urang tadi ka saluruh kuta, lalu dikisahakannya napa nang dilakuakan Nabi Isa lawan inya.

Nabi Isa mawagasakan babinian nang pandarahan tarus, lalu mahidupakan pulang saikung anak babinian.

8:40-56

40Imbah Nabi Isa babulik ka subarang danau Galilea, urang himung banar manyambut Sidin. Sualnya bubuhannya rahatan mahadang-hadang kadatangan Sidin. 41Di situ ada saikung lalakian nang bangaran Yairus nang mahadangi jua. Sidin tu kapala rumah ibadah.

“Guru, tulungi pang ulun! Anak ulun garing bangat, parak mati. Tulung!” ujarnya sambil basujut di hadapan Nabi Isa.

42Anak babinian nang saikungannya matan Yairus tu baumur kurang labih dua walas tahun. Rahatan Nabi Isa baampah ka wadah urang tadi, Sidin dikajali ulih urang-urang banyak.

43Di situ ada saikung babinian nang sudah dua walas tahun maarit pandarahan paranakannya tarus-manarus. Sudah habis banyak hartanya lantaran inya baubat ka mana-mana. Tagal kadada saikung-ikung tabib nang kawa mawagasakannya. 44Diparakinya Nabi Isa matan balakang. Dijapainya rumbai jubah Sidin. Langsung ampih pandarahannya.

45Lalu Nabi Isa baucap, “Siapa garang nang manjapai Aku ni?”

“Guru, sing banyakan urang bakajal-kajal di higa Pian. Kanapa maka sampai Pian batakun nang kaya itu?” ujar Pitrus manyahut lantaran saikung-ikung kadada nang maakuinya.

46“Aku sudah tahu ada saikung urang nang manjapai rumbai jubahKu sualnya Aku ni marasa ada kuasa kaluar matan awakKu" ujar Nabi Isa manyahut.

47Wayah babinian tu sadar amun kalakuannya sudah katahuan, diparakinya ai Nabi Isa sambil manggatar. Langsung basujut ka hadapan Sidin. Lalu bakisah ai inya ka samunyaan urang kanapa maka inya manjapai rumbai jubah Sidin. Dikisahakannya jua amun inya langsung wagas wayah itu jua.

48“Ui anak ku, ikam wagas lantaran ikam baiman ka Aku. Tulak ja ikam lawan hati nang lapang bahagia" ujar Nabi Isa baucap lawan babinian tadi.

49Wayah Nabi Isa masih bapandir, ada urang nang datang matan rumah Jairus.

“Anak ikam sudah maninggal. Ikam kada usah manga-ngalihi Guru gin!” ujar urang tadi ka Jairus.

50Pandirannya tadi didangar ulih Nabi Isa.

“Kada usah takutan! Baiman ja ka Aku. Anak ikam cagaran waras!” ujar Sidin ka Yairus.

51Lalu, Nabi Isa baimbai ai wan Yairus ka rumahnya. Imbah sampai di rumah Yairus, Nabi Isa manangati urang umpat masuk kacuali Pitrus, Yahya, Yakub, Yairus wan uma anaknya tu haja. 52Samunyaan urang nang di luar rumah tu rahatan manangisi wan maratapi anak nitu.

“Kada usah ditangisi gin. Anak nitu kada mati. Inya guring haja," ujar Nabi Isa baucap ka urang banyak tadi.

53Sapalih urang di situ, ada nang mananawaakan Sidin sualnya urang-urang tadi tahu anak babinian tu sudah mati. 54Lalu Nabi Isa masuk ka rumah lalu mamingkuti tangan anak bibinian tu.

“Nak! Bapuat ikam!” ujar Nabi Isa baucap ka anak babinian tadi. #8:54 Kata 'bapuat' dalam bahasa Banjar Hulu nang artinya sama lawan ‘babangun’ dalam bahasa Banjar Kuala.

55Lalu, anak bibinian tu hidup pulang. Lalu, babangun ai anak tu. Imbah itu, Nabi Isa manyuruh mambari makan. 56Kuitan anak nang itu jadi tahiran-hiran.

“Bahinipan haja. Kada usah dikisahakan gin ka urang-urang sual kajadian nang ini” ujar Nabi Isa manangati bubuhannya.

Currently Selected:

Lukas 8: BJN

Highlight

Copy