Lukas 6

Gulungan Parisi manuduh bubuhan pangikut Nabi Isa lantaran dianggap malanggar aturan hari Sabat.

6:1-5

1Wayah hari Sabat #4:3 hari Sabat: Manurut aturan agama wayah itu, urang kada bulih bagawi. Tagal ada babarapa nang manapsirakan manganai napa nang dianggap gawian., Nabi Isa lagi bajalan di ladang gandum. Bubuhan pangikutnya umpat jua. Tagal lantaran bubuhannya lapar, maka diputiknya ai bigi gandum, digusuknya lawan tangan, lalu dimakan isinya. 2Sakalinya ada jua pamuka-pamuka agama matan aliran Parisi di situ.

Lalu bubuhan Parisi baucap lawan pangikut-pangikut Nabi Isa, “Kanapa bubuhan ikam ni malanggar aturan-aturan hukum Nabi Musa? Kada bulih pang bagawian pada hari Sabat, nang kaya mamutik gandum ni nah, kada bulih!”

3Lalu Nabi Isa manyahut, “Mustinya bubuhan pian maingat lagi manganai napa nang dilakuakan Nabi Daud lawan kakawalannya wayah bubuhannya lagi lapar!”

4“Kemah suci Allah dimasukinya, ruti diambilnya lalu dimakannya, wan dibagi-bagaiakannya ka kakawalannya. Padahal cuma imam-imam haja nang bulih makan ruti nang itu. 5Aku, nang datang matan surga#5:24 aku, nang datang matan surga: Lihati Lukas 5:24., nang bahak manantuakan napa nang bulih digawi wayah hari Sabat” ujar Nabi Isa manjalasakan.

Nabi Isa mawagasakan urang nang tangan kanannya kada kawa digarakakan.

6:6-11

6Wayah hari Sabat nang lain, Nabi Isa masuk ka rumah ibadah mambari caramah. Di situ ada saikung urang nang tangan kanannya kada kawa digarakakan. 7Ada jua guru-guru agama wan pamuka-pamuka agama aliran parisi nang handak mancari-cari kasalahan Nabi Isa sakira Sidin kawa disalahakan. Maka bubuhannya mahawasi tarus kalu ai Sidin mawagasakan urang garing wayah hari Sabat.#6:7 Manurut hukum Nabi Musa, urang kada bulih bagawi wayah hari Sabat. Mawagasakan urang dianggap gawian ulih bubuhan tadi. Bila Nabi Isa mawagasakan urang pada hari Sabat, itu dianggap ulih bubuhannnya malanggar hukum Nabi Musa. 8Tagal Nabi Isa sudah tahu pikiran bubuhannya.

Lalu Nabi Isa baucap ka urang nang tangannya lumpuh, “Ayu nah, badiri ka tangah sini nah ikam sakira sabarataan urang kawa malihat.”

Lalu badiri ai inya.

9“Nah, nang mana nang bulih dilakuakan wayah hari Sabat, artinya balaku baikkah atawa balaku jahatkah, manyalamatakan urangkah atawa mamatiꞌi urangkah?” ujar Sidin batakun ka guru-guru agama tadi.

Guru-guru agama tadi kadada nang manyahutnya. 10Lalu Nabi Isa malihat sakulilingan ka sabarataan urang nang ada di situ.

“Surung pang tangan ikam tu nah!” Sidin baucap ka urang nang tangan kanannya kada kawa digarakakan.

Lalu disurungnya ai. Langsung wagas tangannya. 11Malihat nang itu mambarangat ai hati musuh-musuh Nabi Isa lantaran bubuhannya maanggap kajadian nang itu malanggar aturan hari Sabat.

“Kita apai lah urang nang ini?” ujar musuh-musuh Nabi Isa barunding handak mamatiꞌi Sidin.

Nabi Isa mamilih dua balas urang rasul.

6:12-16

12Imbah itu, Nabi Isa naik ka bukit gasan badoa. Di situ Sidin badoa samalaman balantak ka subuh. 13Baisukannya Sidin mangiau bubuhan pangikut-pangikut Sidin. Di antara bubuhannya, dipilih Sidin dua balas urang nang disambat Sidin rasul. Bubuhannya nang dipilih tu bangaran: 14

Simun, nang dingarani Sidin Pitrus,

Andrias ading Simun,

Yakub,

Yahya,

Pilipus,

Bartulumius, 15

Matius,

Tumas,

Yakub bin Alpius,

Simun nang suah umpat mambibasakan juriat Nabi Ibrahim matan panjajahan Romawi, 16

Yudas bin Yakub,

wan Yudas Iskariut nang kaputingannya bahianat lawan Nabi Isa.

Nabi Isa bacaramah wan mawagasakan urang-urang sakit.

6:17-19

17Imbah itu, Nabi Isa turun matan bukit baimbai lawan pangikut-pangikut Sidin lalu bamandak wan badiri di tanah lapang. Di situ tu sudah banyak bakumpulan pangikut-pangikut Sidin nang lain. Ada nang datangan matan saluruh banua Yudea, kuta Yarusalim; wan ada jua matan kuta Tirus dan Sidun nang ada di pinggir pantai. 18Bubuhannya tadi datangan handak mandangarakan caramah Sidin wan ada jua nang handak minta diwagasakan panyakitnya. Nang kasarungan ruh-ruh jahat gin ampih kasarungan. 19Samunyaan urang handak manjapai awak Sidin sualnya di awak Sidin ada kuasa nang kaluar nang kawa mawagasakan wan mawarasakan urang.

Urang banyak handak mandangar caramah wan diwagasakan ulih Nabi Isa.

6:20-42

20Wayah itu, Nabi Isa manjanaki pangikut-pangikut Sidin, lalu baucap,

“Bahimunglah bubuhan ikam nang miskin#6:20 miskin: Kata 'miskin' di sini bisa baarti bubuhan pangikut Nabi Isa nang sudah maninggalakan harta-harta bubuhannya gasan maumpati Nabi Isa (lihati Lukas 5:11; 18:28)., lantaran bubuhan ikam sudah manjadi anggota karajaan Allah. 21Bahimunglah bubuhan ikam nang lapar, karna bubuhan ikam cagar dikanyangakan. #6:21 lapar: Kata ‘lapar’ di sini bisa baarti lapar tahadap makanan atawa bisa baarti urang nang bubur-bujur handak mangabdi lawan Allah atawa kadua-duannya. Kaina dalam karajaan Allah cagar ada aruh ganal. Lihati Lukas 13:28-29; 22:16, 30. Bahimunglah bubuhan ikam nang manangis lantaran bubuhan ikam cagaran tatawa. 22Bahimunglah wan basuka haja bubuhan ikam nang dimuari, ditolak, dihina, wan difitnah lantaran bubuhan ikam maumpati Aku, nang datang matan surga, 23sualnya pahalanya ganal banar gasan bubuhan ikam di surga kaina. Bubuhan nabi bahari gin diulah nang kaya itu jua. Lantaran itu, bubuhannya dapat pahala matan Allah. 24Cilakalah bubuhan ikam nang sugih, sualnya ikam sudah marasaakan nyaman wayahini. Kaina tinggal mahadang cilakanya haja lagi. 25Cilakalah bubuhan ikam nang wayahini kakanyangan, kaina ikam cagar kalaparan. Cilakalah bubuhan ikam nang wayahini tatawa. Kaina ikam cagar basadih wan manangis. 26Cilakalah bubuhan ikam amun hakun diambung urang tarus. Urang-urang bahari nang bapiragah jadi nabi gin diambung jua. Imbah itu bubuhannya dihukum Allah.

27Tapi kupadahilah, sayangi samuaan urang tamasuk musuh-musuh ikam. Babuat baiklah lawan urang nang muar lawan ikam. 28Mintalah lawan Allah sakira urang nang manyumpahi ikam mandapat barakah. Dua'akan nang baik-baik gasan samunyaan urang tamasuk urang nang manjahati ikam. 29Amun ada urang nang manapak pipi ikam gasan manyupani ikam, unjuki jua pipi nang subalahnya pulang. Amun jubah bubuhan ikam diambil urang, biarakan ha inya maambil baju ikam jua. 30Bariꞌi haja urang nang maminta lawan bubuhan ikam! Jangan maminta bulikakan ampun ikam nang sudah diambil urang. 31Kaya apa sakira urang-urang babuat baik lawan ikam? Nah, lakuakan jua nang kaya itu ka urang lain. 32Satiap urang ada haja nang sayang lawan inya. Ada jua nang kada sayang lawan inya. Amun bubuhan ikam cuma sayang wan urang nang sayang lawan bubuhan ikam, kada jadi bapahala! Urang-urang nang badusa gin sayang jua lawan urang-urang nang sayang lawan bubuhannya. 33Amun bubuhan ikam babuat baik cuma lawan urang-urang nang babuat baik lawan ikam, kada bapahala jua. Urang nang badusa gin babuat baik jua lawan urang nang babuat baik lawan inya. 34Amun bubuhan ikam mainjami cuma ka urang nang kawa mambulikakannya haja, kada bapahala jua. Urang badusa gin mainjami nang kaya itu jua.

35Tapi jangan nang kaya itu lah! Sayangi musuh-musuh bubuhan ikam. Babuat baiklah lawan bubuhannya. Injami haja bubuhannya. Kada usah baharap dibulikakan. Kaina tu ganal pahala bubuhan ikam. Amun ikam balaku nang kaya itu tadi, itu pang nang mambuktiakan kalu ikam sudah balaku kaya Nang Di Atas. Sualnya Nang Di Atas tu baik jua lawan samunyaan urang tamasuk nang jahat wan nang kada manyukuri pambarian-Nya. 36Abah surgawi katuju manulungi urang. Maka bubuhan ikam musti katuju jua manulungi urang nang kaya Abah nang di atas. 37Jangan maniwas urang sakira bubuhan ikam kada ditiwas urang jua! Jangan mahakimi urang sakira bubuhan ikam kada dihakimi urang jua! Ampuni haja! Kaina gin ikam diampuni jua. 38Bariꞌi! Kaina ikam gin dibariꞌi jua. Bariꞌi nang baik. Ikam gin cagaran dibariꞌi nang baik jua. Sabujurannya bubuhan ikam cagar baulihi pambarian nang banyak banar nang sudah ditakar bajubung gasan ikam. Sualnya takaran nang ikam pakai gasan urang cagar dipakai jua gasan ikam.

39Urang picak kada kawa manuntun urang picak! Kaina kaduduanya bisa tabarusuk ka dalam luang.” 40“Kadada pang murid nang tapintar pada gurunya. Tagal amun inya cangkal tuntung balajar, kawa ai sama pintarnya kaya gurunya. 41Kanapa ikam malihat sahimpil kayu di mata dangsanak ikam, tagal balokan di mata ikam saurang, kada ikam lihat? 42Mana kawa ikam baucap lawan dangsanak ikam, ‘Dangsanakku, maraha aku mangaluarakan sahimpil kayu tu di mata ikam’, sadangkan di mata ikam saurang ada balokan nang kada ikam lihat? Ui, urang-urang nang bapiragah alim, kaluarakan dahulu balokan nang ada di mata ikam saurang! Hanyar ikam kawa jalas malihat wan kawa mangaluarakan sahimpil kayu nang ada di mata dangsanak ikam” ujar Nabi Isa manutup caramah.#6:42 Nilai carita tadi: urang kada bulih mangaritik urang lain sualnya bahanu kasalahan inya bisa taganal pada kasalahan urang lain. Lawan pulang inya gin rancak kada sadar wan kasalahannya saurang.

Caramah Nabi Isa: Kalakuan urang manggambarakan pikiran wan hati urang.

6:43-45

43Nabi Isa bakisah pulang, “Kadada puhun nang baik nang mahasilakan buah nang kada baik. Kaya itu jua, kadada puhun nang kada baik nang mahasilakan buah nang baik. 44Sualnya satiap puhun dipinandui matan buahnya. Puhun rukam kada babuah limau. Lawan pulang, kumpai baduri kada babuah tomat. 45Urang nang baik mangaluarakan hal-hal nang baik matan hatinya nang baik. Urang nang jahat mangaluarakan hal-hal nang jahat matan hatinya nang jahat. Sualnya napa nang diucapakan urang kaluar matan hatinya.”

Nabi Isa manjalasakan kanapa urang musti maasi ajaran Sidin.

6:46-49

46“Kanapa maka bubuhan ikam mangiau Aku ‘Junjungan’ tagal kada maasi lawan Aku? 47Urang nang datang, mandangar wan maasi pandiranku, inya kaya urang nang 48baulah rumah. Urang tu manabuk dalam-dalam sampai ka batu, lalu pundasi rumah diulah di atas batu sakira nahap. Bilanya banyu baꞌah ganal datang lalu mahantam rumahnya, rumah nang itu kada rabah sualnya pundasinya nahap banar. 49Sadangkan, urang nang mandangar pandiranKu tagal kada maasi, inya kaya urang nang baulah rumah di atas tanah nang kada bapundasi. Bilanya banyu baꞌah ganal datang, lalu ai rumah tu tahambur barataan.”

Currently Selected:

Lukas 6: BJN

Highlight

Copy