ទំនុកតម្កើង 112
112
ពររបស់មនុស្សសុចរិត
1ចូរសរសើរតម្កើងព្រះយេហូវ៉ា
មានពរហើយ អ្នកណាដែលកោតខ្លាច
ព្រះយេហូវ៉ា ហើយសប្បាយរីករាយជាខ្លាំង
នឹងបទបញ្ជារបស់ព្រះអង្គ។
2ពូជពង្សរបស់អ្នកនោះនឹងខ្លាំងពូកែនៅក្នុងស្រុក
ជំនាន់មនុស្សទៀងត្រង់នឹងបានពរ។
3ធនធាន និងទ្រព្យសម្បត្តិស្ថិតនៅក្នុងផ្ទះរបស់គេ
ហើយសេចក្ដីសុចរិតរបស់អ្នកនោះ
នៅជាប់ជាដរាប។
4មានពន្លឺភ្លឺឡើងក្នុងទីងងឹត
សម្រាប់មនុស្សទៀងត្រង់
ជាអ្នកមានចិត្តប្រណីសន្ដោស
មេត្តាករុណា និងសុចរិត។
5អ្នកណាដែលមានចិត្តទូលាយ ហើយឲ្យគេខ្ចី
អ្នកនោះប្រព្រឹត្តយ៉ាងល្អប្រពៃ
ជាអ្នកដែលធ្វើកិច្ចការរបស់ខ្លួនដោយយុត្តិធម៌។
6ដ្បិតមនុស្សសុចរិតមិនត្រូវរង្គើឡើយ
គេតែងនឹកចាំពីអ្នកនោះជារៀងរហូត។
7អ្នកនោះនឹងមិនខ្លាចដំណឹងអាក្រក់ឡើយ
គេមានចិត្តរឹងប៉ឹង
ដោយទុកចិត្តដល់ព្រះយេហូវ៉ា។
8ចិត្តគេនឹងន គេនឹងមិនភ័យខ្លាចអ្វីឡើយ
រហូតទាល់តែបានជ័យជម្នះ
លើខ្មាំងសត្រូវរបស់គេ។
9គេបានចែកចាយដោយចិត្តទូលាយ
គេបានឲ្យទៅមនុស្សក្រីក្រ
សេចក្ដីសុចរិតរបស់គេនៅជាប់ជាដរាប
គេនឹងបានខ្ពស់មុខ ទាំងមានកិត្តិយស។
10មនុស្សអាក្រក់ឃើញដូច្នេះ គេមានចិត្តខឹង
គេសង្កៀតធ្មេញ ហើយរលាយបាត់ទៅ
ចិត្តប្រាថ្នាចង់បានរបស់មនុស្សអាក្រក់
នឹងវិនាសសូន្យទៅ។
Currently Selected:
ទំនុកតម្កើង 112: គកស១៦
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies
