Matayo 7

Namutsehukumu wenzenu

Luka 6:37-42

1Yesu kagija kuyongweeza amaale kamba, “Namutsewahukumu wenzenu ili nanywi mutsekudzahukumigwa. 2Koro viviḍe mwivyonawahukumu wenzenu, ndivyo mudzevyohukumigwa nanywi. Hikiḍe kipimo mwichonapimia nacho wenzenu, ndicho mudzechopimijwa nacho.

3Unaonadze kifusi chicho dzitsoni mwa mwenziwo, na hali humu dzitsoni mwako kuna kipfalepfale kizima? 4Ambu unawezadze kumwamba mwenziwo, ‘T̯aḅee nguzi nikuyavye hicho kifusi hicho,’ na hali humu dzitsoni mwako wewe mwenye kuna kipfalepfale kizima? 5Wewe mumbiimbii! Yavya nguzi hichi kipfalepfale chicho humu dzitsoni mwako, ndipfo unapata kuona urembo, na unakiyavya hichi kifusi chicho humu dzitsoni mwa huyu mwenziwo. 6Namutsehwaa kintu kidheru mukiwapfe wantu wasikwaa wadheru. Koro mukihenda hivi ni sawa na kuhwaa kintu kidheru mukiwapfe machughe, na zidzechohenda ni kumugarukia zimuume na kumuḅaa-ḅaa. Ambu inawa sawa na kuhwaa lulu muiwafat̯ulie nguyuwe, na hali wadzechohenda ni kuiranga-ranga ḅasi.”

Yombani nanywi munapfegwa

Luka 11:9-13

7Yesu kawayongweeza wanafund̯iwe kawamba, “Yombani nanywi munapfegwa. Lachani nanywi munaona, gongani nanywi munafungwiijwa muḍyango. 8Koro kula ayombeye anapfegwa, alachie anaona, na agongeye muḍyango anafungwiijwa. 9Ni ga kahi yenu, jwa kwamba mwanawe akimuyomba mukahe, ae anamumpa iwe? 10Ambu mwanawe akimuyomba nswi, ae akamumpa nyoka? 11Haya, ikiwa kwamba nywinywi mwiwo wazuka t̯u, mumanya kuwapfa wana wenu vija vyema vyema, ehe fat̯i Baba jwenu jwa yuwinguni anawahendea wema chima ga, awaḍe weonamuyomba?

12Wahendeyeni wangine dza hiviḍe mwivyonatsaka wakimuhendea nywinywi. Koro haya haya ndiyo haya maana kindindi ya hizi *Sharia zonse za Musa na mayongweezo ya hawa manabii wangine.”

Inganyo ḍya njia mbii

Luka 13:22-27

13Yesu kagija kuyongweeza kamba, “Unjieni Uhaju wa Mbingu kuchiiya na kwa hu muḍyango mutseke. Koro hu muḍyango mupfampu ne njia mpampu, vinapfiika wantu mohoni na ndiyo ya wantu wenji weyonachiiya nayo. 14Ela hu muḍyango wiwonapfiika wantu kuntu kwa maisha ya kuunga na yuungo ni mutseke, ne njiaye ni nseke na ni nyumu. Ni wantu wachuchu muno weonaiona hiyo hiyo njia na wakaiuḅa.”

Muhi mwema unahambujwa na matundaye

Luka 6:43-45

15Yesu kagija kuyongweeza kamba, “Dzit̯unzeni na manabii wa nsuwe weonadzihendeza wantu wampowe, na hali katsi ni wazuka dza mahiyeye. 16Hawa manabii wa nsuwe munawahambuya na mahendo yao, dza hiviḍe vya muhi wivyonauhambuya na matundaye. Koro muryela ntauwezi kuvyaa zabibu na wala munga ntauwezi kuvyaa matunda ya mutini. 17Dza vivyo, kula muhi mwema unavyaa matunda mema, na kula muhi muzuka unavyaa matunda mazuka. 18Koro muhi mwema ntauvyae matunda mazuka, na wala muhi muzuka ntauvyae matunda mema. 19Kula muhi usiovyaa matunda mema unakentwa ukafat̯ulwa mohoni. 20Ndookomu manabii wa nsuwe munawahambuya na mahendo yao.

21Si kula eyenanihana, ‘Ḅwana, Ḅwana,’ kwamba anaunjia Uhaju wa Mbinguni. Ela wadzeounjia ni hawaḍe weonahenda miro ya Baba jwangu eye mbinguni. 22Nsiku ya hukumu ikifika, wenji wadzanyamba, ‘Ḅwana, dzaambia ntahukusumwiiya maagu ya kuyawa kwa Muungu kwa sariḍyo? Na hat̯a ntahukuyavya mpepfo nzuka na kuhenda mafara ya kumakisa kwa sariḍyo?’ 23Ela mimi nidzawamba, ‘Hat̯a simudzi nywinywi. Ninukiani hapfa nywinywi wantu wazuka nywi!’ ”

Yesu kayavya inganyo ḍya wambaka wawii

Luka 6:47-49

24Yesu kagija kuyongweeza kamba, “D̯ubva kula adzeevisikiiya vyuuwo vyangu na akivigija, anawa dza muntu karo ambakiye nyumbaye dzuu ya mwamba. 25Mvuya ikakanyika, matsana yadzaa na hat̯a yaḍabva kuhika-hika, na hi nyumba ibigwa ni vut̯o kali. Ela kwa kwamba imbakwa dzuu ya mwamba, hi nyumba ntaikugwa. 26Ela kula adzeevisikiiya vyuuwo vyangu na akitsavigija, huyo anawa dza muntu ḍyura ambakiye nyumbaye nsangani. 27Mvuya ikakanyika, matsana yadzaa hat̯a yaḍabva kuhika-hika, na hi nyumba ibigwa ni vut̯o kali. Na kwa kwamba imbakwa nsangani, hi nyumba iheremuka na kisindo chikuu muno!”

28Yesu epfokwisa kunena haya haya mambo, wantu wonse weowakimusikiiya wamaka muno kwa namuna ayongweezeyevyo. 29Koro nkakuyongweeza dza hiviḍe vya hawa waalimu wao wa Sharia wevyowakiyongweeza. Jeje kayongweeza dza muntu eye na mamulaka.

Currently Selected:

Matayo 7: pkb

Highlight

Copy