Yohana 4

Yesu kanena na muke Musamaria

1-3Hawa *Mafarisayo wasikia kwamba Yesu kakupatani wanafund̯i wenji kumuchia Yohana na kakuwat̯opyani. Yesu epfosikia hivi, kanuka ḍyimbo ḍya Yud̯aya kauja ḍyimbo ḍya Galilaya. Ela kunena hachi, Yesu mwenye nkekit̯opya wantu. Weowakit̯opya wantu wewa ni hawa wanafund̯iwe.

4Yesu epfoakichia, imuḅid̯i kuchia na ḍyimbo ḍya Samaria. 5Kenda hat̯a kafika mudzi mumodza wa Samaria wiwoukihanwa Sikari. Hu huu mudzi wiwa hafufi na hiḍe nkonde ya Yakobo eyomumpa mwanawe Yusufu. 6Hapfaḍe kwiwa hichi kisima chichokuwa cha Yakobo. Yesu epfofika hapfaḍe kisimani chima cha dzuwa ḍya musikahi, kakaa chihako geri ya hichi kisima kwa dzambo ḍya matsofu ya huju jwenendo enendeyejo.

7-8Yesu ewa ndiye jeje heket̯u kwa dzambo ḍya kwamba hawa wanafund̯iwe wewa wenda mudzini wakaguye chakuḍya. Kisa hapfaḍe kisimani kudza muke Musamaria kumegani madzi, na Yesu kamwamba, “Nimpa madzi ninwe.” 9Huyuḍe muke kamwambukuya kamwamba, “Wewe u Muyahud̯i nami ni Musamaria. Viiwadze kwamba uniyombe mimi madzi ya kunwa?” Huyu muke kanena hivi, koro Wayahud̯i na Wasamaria ntawekinjiiyana na kiḍechonse. 10Yesu kamwamba, “Wewe nkuidzi hi nt̯unu ya Muungu eyonapfa wantu, na wala nkudzi kwamba ayu eyekukuyombani madzi ni ga. Koro t̯ambere undemanya, undemuyomba jeje madzi nae andekupfa madzi yeyonapfa wantu maisha.” 11Ela huyu muke kamwambukuya Yesu kamwamba, “Ḅwana, wewe nku kija cha kumegea madzi, na hichi kisima chenda nsi! Aya madzi ya kupfa wantu maisha unayahwaa ku? 12Ambu unatsaka kunena kwamba wewe u mukuu kumuchia bibi jwehu Yakobo ahupfiye hichi hichi kisima? Wewe unaweza kuhupfa madzi mema kuchia ayaḍe ya Yakobo na wanawe na mifugoye wanweyeyo kuyawa kwa achi kisima achi?” 13Yesu kamwambukuya kamwamba, “Muntu akinwa haya madzi haya anagijwa ni nchiu kawii. 14Ela eyenanwa haya madzi niyonapfa wantu, nkagijwe ni nchiu kawii meshi. Haya madzi yanawa dza tsana iyokuvuhani kuzimuni mwakwe iyonamumpa maisha ya kuunga na yuungo.” 15D̯ubva huyu muke nae kamwamba, “Ḅwana, nimpa nami hayo hayo madzi ninwe, nitsekudzagijwa ni nchiu kawii ya kuniyeha hapfa kudzamega madzi.” 16Yesu kamwamba, “Enda ukamuhane mumeo mudze nyowii.” 17Huyu muke kamwamba, “Mimi si muyume.” Nae Yesu kamwamba, “Kunena hachi kaḅisa ukyamba nku muyume. 18Maanaye, wewe kwisakuwa na wayume watsano, na huyu wiyekuishini nae hi hii saasambi ni musiwo t̯u, wala si mumeo. Kwa hivyo hivi uneneyevyo ni hachi kaḅisa.”

19Nae huyu muke kamwamba Yesu, “Ḅwana, nyakuonani kwamba wewe u *nabii. 20Wabibi zehu wekiyomba hapfa hapfa murimani,#4:20 Hu murima wikihanwa Gerizimu. Hawa Wasamaria wewa wambaka hat̯a Hekalu hapfa murimani idzeyoikinangwa-nangwa ni Wayahud̯i. ela nywinywi Wayahud̯i munakwamba Yerusalemi ndiko kwa wantu kwa kumuyomba Muungu.” 21Yesu kamwambukuya kamwamba, “Hikiza nivyokukwambiani! Ngera zakudzani ambapfo ntamukudzamuyomba Baba hapfa murimani wala mudzini Yerusalemi. 22Nywinywi Wasamaria ntamumudzi huyu mwiyenamuyomba. Ela swiswi Wayahud̯i, huyu hwiyenamuyomba humumanya, koro mupfonyo unakudza kuchiiya na kwa Wayahud̯i. 23Ngera zakudzani, na hat̯a zisakufika, ambapfo hawaḍe weonamuyomba Muungu ḍugha, wanamuyomba Ruhuni na hachini.#4:23 Ambu: hawaḍe weonamuyomba Muungu ḍugha, wanayongojwa ni huyu Ruhu kumuyomba Muungu dza aivyo. Koro wantu weonamuyomba Muungu dza hivi, ndiwo wakwe eonatsaka. 24Muungu ni Ruhu. Na hawaḍe weonamuyomba, ni had̯i wamuyombe Ruhuni na hachini.”

25Huyu muke kamwamba Yesu, “Nimanya ya kwamba huyu *Masiya (eyenahanwa *Kirist̯o) njwakudza. Na adzepfokudza, anahuimusya kula kintu.” 26Yesu kamwamba, “Ḅasi mimi niyekunenani nawe ndimi huyu Masiya.”

27Iyo saa, hawa wanafund̯i wa Yesu wakumpuya kuyawa hukuḍe mudzini. Wepfomuona Yesu kakunenani na muke Musamaria wamaka muno. Ela ntaku hat̯a mumodza jwao amuuziye maana eyoakihenda hivihiviḍe. Na wala ntawakumuuza kwamba ae na huyu muke wekinena kintu ga.

28Makisa huyuḍe muke kauweka geri hu mut̯ungiwe, kauja hukuḍe mudzini kenda kawamba hawa wantu, 29“T̯anzoni mumuyowe huyu muntu anyambiiye kula kintu changu nichohenda. Anaweza kuwa kwamba ndiye ayu Masiya?” 30D̯ubva mudzi muzima ukuka kwendamuyowa Yesu.

31Huyu muke epfokuwa amaale ka humuḍe mudzini, hawa wanafund̯i huku wekimusosobva Yesu nangaa angize riziki kanwani. 32Ela jeje kawamba, “Mimi nina chakuḍya ambacho nywinywi ntamukidzi.” 33Ndookomu hawa wanafund̯i wepfosikia hivi vya Yesu aneneyevyo, waḍabva kuuzana wao na wao wakyamba, “Munamba kuna muntu amuyeheeye chakuḍya?” 34Yesu kawambukuya kawamba, “Mimi chakuḍya changu ni kuhenda miro ya huyu anihumiye na niise hi kazi animpiyeyo kuhenda. 35Nywinywi munakwamba, ‘Kusaa myezi mine haya mavuno yawe t̯ayari.’ Ela t̯anuyani matso muyayowe haya makonde! Haya mavuno yesakufika na yakuindani kuvunwa t̯u. 36Na hawa wavunai wamaakuipfwani kwa kazi yao weyokuhendani. Wechokuvunani ni hawaḍe wantu weokuhikizani, wadzeopfokea maisha ya kuunga na yuungo. Ndookomu hangu huyu eyenaima hat̯a eyenavuna, wonse wadzatsaika pfamodza. 37Kuna muneno wiwonakwamba, ‘Muntu yungine anaima na yungine akadza akavuna.’ Na mukiviyowa ni ḍugha. 38Koro mimi nimuhuma mukavune musipfoima. Wangine wesakuihenda hi kazi na nywinywi mwakuvunani kuyawana na hweka ḍyao.”

39Wasamaria wenji kuyawa huḍe mudzi wa Sikari, wamuhikiza Yesu kwa dzambo ḍya hivi vya huyu muke awambiiyevyo. Ewa kawamba, “Kanyambia kula kintu changu nichohenda.” 40D̯ubva hawa wantu wepfoyawa humuḍe mudzini, wakidza wakimuona Yesu, wamuyomba akae nao. Ndookomu nae kakaa nao kwa nsiku mbii. 41Na Wasamaria wangine wenji wahikiza kwa dzambo ḍya kusikia hivi vya Yesu aneneyevyo. 42Kisa wamwamba huyu muke, “Sasa, ntahukuhikiza t̯u kwa dzambo ḍya hivi uhwambiiyevyo wewe, ela huhikiza kwa dzambo ḍya kwamba, swiswi wenye humusikia akwakunenani. Naswi sasa hwisakumanya hakika kwamba jeje ndiye huyu Mupfonya jwa lumwengu.”

Yesu kapfonya mwana jwa mukuu mumodza

43Hiziḍe nsiku zombii akuḅaliyezo kukaa mudzi wa Sikari zipfosia, Yesu kagonzowa kenda ḍyimbo ḍya Galilaya. 44Yesu jeje mwenye ewa kanena kwamba nabii nkapfegwe hila mudzini kwao. 45Ela epfokwenda Galilaya, hawa wantu wamukaraḅisha urembo. Wamukaraḅisha urembo kwa dzambo ḍya kwamba, wewa waona haya mafara ya kumakisa ahendeyeyo hukuḍe Yerusalemi, wepfokwenda kwe jila ya *Pasaka.

46Kisa Yesu kenda hat̯a kafika mudzi wa Kana wiwo ḍyimbo ḍya Galilaya, hukuḍe ekoperuya madzi yakiwa mvinyo. Na hukuḍe Kaperinaumi, kwiwa na mukuu mumodza eyekuwa na mwana mujwazi. 47Epfosikia kwamba Yesu kamauja Galilaya kuyawa ḍyimbo ḍya Yud̯aya, kamuḍaabvat̯a hat̯a mudzi wa Kana. Epfokwenda, kamuyomba Yesu agijane nae wende Kaperinaumi endeakamupfoze huyu muuraniwe eyekuwa d̯uru ḍya mwiso. 48Nae Yesu kamwamba, “Nywinywi musidzahendejwa mafara ya kumakisa ntamuwezi kuhikiza!” 49Ae huyuḍe mukuu kamurai Yesu kamwamba, “E ad̯o Ḅwana, nzoo hwende mwanangu asidzahuna nsoho.” 50D̯ubva Yesu kamwamba, “Uja nyumbani, huyu mwanao anaishi.” Huyuḍe muntu kahikiza hivi vyuuwo vya Yesu amwambiiyevyo, nae kanuka kaḍabva kugala nyumbani. 51Humu njiani, kat̯ongana na wahumisiwe wamwambiiyeo kwamba, huyu mwanawe kapfowa nka untu. 52Nae kawauza kawamba, “Ayu mwana kaḍabva kudzisikia urembo hangu chima cha saa nyenga?” Nao wamwambukuya wamwamba, “Kaḍabva kudzisikia urembo hangu dzana. Ipfofika dzuwa ḍya musikahi, chima cha saa mfungahe, hi kanat̯a imuyatsa.” 53Babajwe huyu mwana kahambuya ya kwamba, huyu mwana ewa kapfowa iiḍe saa ya Yesu amwambiiyeyo kwamba huyu mwanawe anaishi. Ndookomu jeje na nyumbaye yonse wamuhikiza Yesu. 54Hu wiwa ni mweedha wa pfii wa Yesu kunuka na Yud̯aya ende Galilaya na ahende mafara ya kumakisa dzayahaya.

Currently Selected:

Yohana 4: pkb

Highlight

Copy