Yohana 20

Kufufuka kwa Yesu

1Nsiku ya d̯ura ya ḍyuma, magura mapfema, kwipfokuwa amaale ni kiza kiza, Maria Magid̯alena kenda hukuḍe mbeerani. Epfokwenda, kaḍiona hiḍiḍe iwe ḍiḍyowekwa hapfa pfa kunjiiya humu mbeerani, ḍiperujwa-perujwa ḍinujwa. 2Nae kaukuya na maguu, kenda kwa Simioni Pet̯ero na huyuḍe mwanafund̯i jwa Yesu eyemutsaka muno, na kawamba, “Wauhwaa hu mwii wa Ḅwana na humuḍe mbeerani, na wala ntahudzi kwamba waupfiika ku!”

3D̯ubva Pet̯ero na huyuḍe mwanafund̯i yungine wanuka kwenda hukuḍe mbeerani. 4Wowii wekid̯arama, ela huyu mwanafund̯i yungine, kad̯arama mbio kumuchia Pet̯ero na kafika d̯ura hukuḍe mbeerani. 5Epfofika, kat̯ulama katsungia humuḍe kuzimu, kaiona hi sand̯a, ela nkakunjia. 6Simioni Pet̯ero epfofika, jeje kanjia humuḍe kuzimu na kaiona hi sand̯a 7pfamodza na hikiḍe kit̯ambaa cha Yesu echolingilwa humu kitswani. Hiki kit̯ambaa kiwa kikutswa-kutswa chaa pfakwe. 8Makisa huyuḍe mwanafund̯i eyefika hapfaḍe mbeerani d̯ura, nae kanjia humuḍe kuzimu, kaona na kahikiza haya yahendekeeyo. 9Koro amaale wewa ntawadzaimuka hivi vya haya matsoro yambiyevyo kwamba, ni had̯i Yesu afufuke kuyawa kwa wafu. 10Makisa hawa wanafund̯i wanuka wauja madzumbani kwao.

Yesu kamut̯upukia Maria Magid̯alena

11Maria ewa kasumama hapfaḍe mbeerani akiwa kuiyani. Na huku akiwa kuiyani, kat̯ulama katsungia humuḍe kuzimu. 12Epfotsungia, kaona malaika wawii wavwaiyeo nguo nyeupe pee. Wewa wakaa chihako hapfaḍe pfo mwii wa Yesu wipfokuwa. Mumodza kakaa na huku kwikokuwa hi kitswa na huyu yungine kakaa na huku kwikokuwa haya maguu. 13Hawa malaika wamuuza Maria wamwamba, “Munamba unaiya unaa?” Nae kawambukuya kawamba, “Wauhwaa hu mwii wa Ḅwana jwangu na wala sidzi kwamba waupfiika ku!”

14Maria epfonena hivi akisa, kaperuka kayowa nyuma na kamuona Yesu kasumama. Ela nkakumuhambuya kwamba ni Yesu. 15Yesu kamuuza kamwamba, “Unaiya unaa? Munamba kwakumulachani ga?” Maria ekit̯ara ya kwamba huyu eyeakinena nae ewa ni huyu muhenda kazi jwa humuḍe nkondeni. Nae kamwamba, “Ikiwa kwamba ndiwe uuhwaiye hu mwiiwe, t̯afadhali nyambia hukuḍe uupfiikiyeko nyende nikauhwae.” 16Yesu kamwamba, “Maria!” Nae Maria kamuperukia na kanena nae Kieburania kamwamba, “Raḅoni!” (Yani Mwaalimu wangu.) 17Yesu kamwamba, “Sinigije, koro mimi sidzapfaa kwenda kwa Baba. Ela enda kwa hawa wandugu zangu ukawambe ya kwamba, nyakwendani kwa Baba, eye Baba jwenu pia, nyakwendani kwa Muungu jwangu eye Muungu jwenu pia.”

18Makisa Maria Magid̯alena kenda kawamba hawa wanafund̯i, “Mimi nimuona Ḅwana!” Na kawasumwiiya hayaḍe yonse ambiijweyo ni Ḅwana.

Yesu kawat̯upukia wanafund̯iwe

19Hihiiḍe nsiku ya d̯ura ya ḍyuma na mioro, wanafund̯i wa Yesu wewa watsanganika pfantu pfamodza. Hi miḍyango yonse ya hapfa wepfokuwa iwa ifungwa-fungwa kwa dzambo ḍya kuwashooga wakuu wa Wayahud̯i. Ḅwikira, Yesu kasumama kahi yao na kawamba, “Naghea iwe nanywi.” 20Epfonena hivi akisa, kawayanga hi mikonoye na hizi mbavuze. Nao hawa wanafund̯i watsekea muno kwa dzambo ḍya kumuona Ḅwana. 21Kisa Yesu kawambia kawii, “Naghea iwe nanywi. Mimi nyakumuhumani nywinywi lumwenguni dza vya Baba evyonihuma mimi.” 22Makisa kawapfuziizia nsoho na kawamba, “Pfokeani Ruhu Mudheru! 23Mukimuyatsia nabvise muntu yuḍejwonse, huyo kayatsijwa. Mukitsamuyatsia muntu nabvise, huyo nkayatsijwe.”

Yesu kamut̯upukia Tomasi na wenziwe

24Yesu epfowat̯upukia wanafund̯iwe, mumodza jwao eyeakihanwa Tomasi (na pia ekihanwa Mwana Mpatsa), ewa nkapfo. 25Epfodhumbuka, hawa wenziwe wamwamba, “Humuona Ḅwana.” Ela Tomasi kawamba, “Nisidzamuona Yesu mimi mwenye siwezi kuhikiza meshi! Siwezi kuhikiza mumpaka niziyowe hizi mad̯a ze mishumari humu mikononi mwakwe na nizipfapfase na mukono wangu mimi mwenye! Na siwezi kuhikiza mumpaka ningize mukono humu mbavuni asimikijweko na nishuhuḍie mwenye!”

26Ipfofika hiḍe nsiku ya ḍyuma ingine, hawa wanafund̯i wewa watsanganika pfamodza kawii. Na hi hii buwa Tomasi nae ewa yupfo. Hi miḍyango iwa ifungwa-fungwa, ela ḅwikira, Yesu kasumama kahi yao na kawamba, “Naghea iwe nanywi.” 27Makisa kamwamba Tomasi, “Ngiza ḍowe hapfa uiyowe hi mikono yangu. Yeha mukono unipfapfase humu mbavuni. Yatsa huko kutsahikiza kwako. Hikiza!” 28Nae Tomasi kamwamba, “Wewe u Ḅwana jwangu na Muungu jwangu!” 29Yesu kamwamba, “Wewe kuhikiza kwa dzambo ḍya kwamba kuniona. Heri hawaḍe wahikiziyeo pfasipfo kuniona.”

Lengo ḍya hichi chuo

30Yesu kahenda mambo yangine menji ya kumakisa epfokuwa pfamodza na wanafund̯iwe yasiyokworegwa humu chuoni. 31Ela haya yorejweyo, yoregwa ili mupate kuhikiza kwamba Yesu ni Mwana jwa Muungu na ndiye huyu *Masiya. Yoregwa ili kwamba, kwa kumuhikiza jeje muweze kuwa na maisha ya kuunga na yuungo.

Currently Selected:

Yohana 20: pkb

Highlight

Copy