Yohana 19

Yesu kahukumigwa kufwa

1Makisa Pilato kaamuru kwamba Yesu ahwajwe akabigwe na lucha. 2Hawa asikari waelekanya kiyemba cha miwa na wakimuvwika Yesu humu kitswani. Wakisa, wamuvwika lot̯a ḍya ranji ya zambarau. 3Waḍabva kumubaladhaiya wakimwamba, “Kwa naghea haju jwa Wayahud̯i?” Na wamubiga mapfi.

4Pilato kayawa huku nze kawii na kawamba hawa Wayahud̯i, “T̯asikiani, mimi nyakumuyehani huyu muntu kwenu, ili mupate kumanya ya kwamba mimi sikumuona na tsowa ḍya kuyagijwa.” 5Makisa Yesu kayawa na humuḍe kuzimu akiwa kavwaa hichi kiyemba cha miwa na hiḍi lot̯a ḍya zambarau. Na Pilato kawamba, “Haya, huyu muntu wenu huyo!” 6Hawa wakohani wakuu na wamia wa *Hekalu wepfomuona Yesu, waḅaa madzwi wamba, “Mupfatsike! Mupfatsike!” Ela Pilato kawamba, “Muhwaeni nywinywi mukamupfatsike, koro ami sikumuona na tsowa ahendeyeḍyo.” 7Nao hawa wantu wamwamba, “Swiswi huna *Sharia iyonakwamba, muntu akimukufuru Muungu ni had̯i ayagwe. Na huyu kakukufuruni, koro kakudzihanani kwamba jeje ni Mwana jwa Muungu.” 8Na Pilato epfosikia hivyo, kanjijwa ni oga zaid̯i. 9D̯ubva kanjia kawii na Yesu humuḍe kuzimu kisa kamuuza kamwamba, “Wewe kuyawa ku?” Ela Yesu nkakwambukuya chuuwo. 10Nae Pilato kamwamba, “Yani wewe nkuhaḍya ya kunena nami? Nkudzi kwamba mimi nina uwezo wa kukuyatsa huru ambu wa kukuhukumu upfatsikwe?” 11Yesu kamwamba, “Wewe nkundeewa na uwezo uḍewonse dzuu yangu t̯ambere nkukuupfegwa ni Muungu. Ela huyu aningiziye mikononi mwako ana nabvise nkuu kukuchia wewe.”

12Hangu hapfo, Pilato kaḍabva kulacha njia ya kumuyatsa Yesu huru. Ela hawa Wayahud̯i wagija kuḅaa madzwi wamba, “Wewe ukimuyatsa huru huyu muntu, nkukwaa ḅamu jwa *Kaisari! Koro kula eyenadzihana kwamba ni haju, kakumupfingani Kaisari.” 13Pilato epfosikia hivi waneneyevyo, kamuyavya Yesu huku nze. Kisa nae kayawa kakaa dzuu ya kiti chakwe cha hukumu, pfantu pfepfopfakihanwa Ngome ya Mawe. (Kieburania pfekihanwa Gabatha.) 14Hi iwa ni nsiku ya kudzit̯ayarisha kwa dzambo ḍya *Pasaka. Na iwa imaawa chima cha saa ntandahu za musikahi. Pilato kawamba hawa wantu, “T̯amuyoweni huyu haju jwenu!” 15Nao wamukelelea wamwamba, “Ntahut̯aki kumuona! Ntahut̯aki kumuona! Mupfatsike!” Pilato kawamba, “Ayu haju jwenu ndiye mwiyekutsakani apfatsikwe?” Hawa wakohani wakuu wamwambukuya wamwamba, “Swiswi ntahu haju yungine! Haju jwehu humanyiye ni Kaisari.” 16Makisa Pilato kamuyavya Yesu kwao ili akapfatsikwe. Ndookomu nao wanuka nae.

Kupfatsikwa kwa Yesu

17Yesu kautsukuya muhiwe wa mpatsa na wenda nae hat̯a wauyawa hu mudzi, mumpaka pfantu pfepfopfakihanwa Pfaa ḍya Kitswa. (Kieburania pfekihanwa Goligata.) 18Hapfo ndipfo apfatsikijwepfo. Kwiwa na wantu wangine wawii wapfatsikijweo pfamodza na Yesu. Mumodza ewa na ḍanda ya mukono kuyume na huyu yungine ewa na ḍanda ya mukono tsonso wa Yesu. 19Pilato kaweka kiḅao dzuu ya hu muhi wa mpatsa chorejwecho hidzaa: “Yesu Jwa Nazareti, Haju Jwa Wayahud̯i.” 20Hapfa pfa Yesu epfopfatsikwa pfewa si kuye no mudzi. Na hivi vyuuwo vyorejwevyo hapfa kiḅaoni dzuu, vyoregwa Kieburania, Kilatini na Kiyunani. Ndookomu wantu wenji wewa wanaweza kusoma hivi vyorejwevyo. 21Nao hawa wakohani wakuu wenda wamwamba Pilato, “Syore kwamba ni haju jwa Wayahud̯i, ela ora kwamba, jeje kadzihana haju jwa Wayahud̯i.” 22Ela Pilato kawamba, “Mimi nyoreyecho nisakuchora, ḅasi!”

23Hawa asikari wepfomupfatsika Yesu wakyendawakisa, wazigawana hizi nguoze. Wazigawa mafungu mane, na kula asikari kapata fungu modza. Waihwaa na hi nkanzuye, iyokuwa ntai musono na pfaḍepfonse. Yonse iwa ni nguo modza kwa modza. 24D̯ubva hawa asikari wambana, “Hi nkanzu nahutseiḅaa. Nahuibigie kura, na huyuḍe jwa kuipata inawa nzakwe.” Haya yahendeka kut̯imiza haya matsoro yambiyeyo,

“Wazigawana hizi nguo zangu

na nkanzu yangu waibigia kura.”

Na hivi ndivyo vya hawa asikari wahendeyevyo ḍugha.

25Hafufi na hu muhi wa mpatsa wa Yesu apfatsikijweo, kusumama mamajwe, t̯ut̯ujwe, pfamodza na Maria mukaza Kileopa na Maria Magid̯alena. 26Yesu epfomuona mamajwe kasumama hafufi na huyu mwanafund̯i jwakwe amutsakiye, kamwamba, “Maama, sasa huyo ndiye mwanao.” 27Kisa kamwamba na huyu mwanafund̯i, “Huyo sasa ni mamajo.” Na hangu hihiiḍe nsiku, huyuḍe mwanafund̯i kamuhwaa mamajwe Yesu kenda nae kwakwe.

Kufwa kwa Yesu

28Yesu ewa kamanya ya kwamba kaziye iwa isiya. Na ili kwamba aweze kut̯imiza hivi vya haya matsoro yaneneyevyo, kamba, “Nyakusikiani nchiu.” 29Pfapfaḍe kwiwa na kija chichokuwa na mvinyo t̯ipu ibushaiyeyo. Ndookomu hawa asikari wat̯opya yavuyavu humu mwa hi mvinyo, kisa waḍilingila na yuhi jwa muhisopo na waḍimugijia Yesu anwe. 30Yesu epfonwa hi mvinyo akisa, kamba, “Ḍisiya!” Kisa kagisa kitswa mutsangani na kahuna nsoho.

31Hi hii nsiku iwa ni nsiku ya kudzit̯ayarisha kwa dzambo ḍya *Sabato. Na hi hii Sabato iwa ya kivyakwe, maanaye iwa injiiyana na Pasaka. Kwa hivyo hawa wayongozi wa Wayahud̯i, ntawekitsaka hi mii ya hawa wapfatsikijweo ikae pfapfaḍe mumpaka nsiku ya Sabato. Ndookomu wamwendea Pilato wamuyomba kwamba, hawaḍe wapfatsikijweo, wavunzwe-vunzwe maguu wapate kufwa haraka ne mii yao ipate kunujwa. 32Nao hawa asikari wawendea nguzi hawa wantu wowii wapfatsikijweo pfamodza na Yesu na wawavunza haya maguu yao. 33Ela wepfomwendea Yesu, wamuona kamaafwa, ndookomu ntawakumuvunza maguu. 34Ishinu mumodza jwa hawa asikari, kamusimika fumo ḍya mbavu na pfapfo kayawa mwazi na madzi. 35Hu huu ni ushuhuḍa wa muntu ayaoneye na matso yakwakuhendekani. Nae kamanya ya kwamba haya eyokunenani nza hachi. Kakuyamushuhuḍiani ili nanywi mupate kuhikiza. 36Haya mambo yahendeka ili kut̯imiye haya matsoro yambiyeyo, “Ntaku hat̯a mufufa wakwe mumodza udzeovunzwa.” 37Na kungine haya matsoro yamba, “Wadzamuyowa huyu wamusimikiye.”

Kuzikwa kwa Yesu

38Kwiwa muntu mumodza jwa kuyawa mudzi wa Arimataya eyeakihanwa Yusufu. Jeje ewa mwanafund̯i jwa Yesu na siri kwa dzambo ḍya kuwashooga wakuu wa Kiyahud̯i. Ela Yesu epfofwa, Yusufu kendakamuyomba Pilato ruhusa ya kuuhwaa hu mwii wa Yesu akauzike. D̯ubva Pilato epfomuruhusu, Yusufu kendakauhwaa hu mwii. 39Nekod̯emo nae, huyu eyemwendea Yesu nasiku, kenda na zaid̯i ya kilo miyongo mihahu za manunkanto yelekanyijweyo na manemane na muharagesa. 40Hawa wantu wowii, wauhwaa hu mwii wa Yesu waulingila sand̯a iyokuwa na haya manunkanto koro iwa ni adha ya Kiyahud̯i. 41Hafufi na hapfaḍe pfa Yesu apfatsikijwepfo, kwiwa na nkonde iyokuwa na mbeera#19:41 Myeedha minji Wayahud̯i wekizika wafu wao mpangoni. Hizi hizi mpango wekizit̯ukura myambani. mpya isiyodzatumika. 42D̯ubva kwa kwamba iwa ni nsiku ya kudzit̯ayarisha kwa dzambo ḍye Sabato na hiḍe mbeera iwa ndiyo iyo hafufi, Yusufu na Nekod̯emo wenda wamuzika Yesu hapfahapfaḍe.

Currently Selected:

Yohana 19: pkb

Highlight

Copy