Yohana 13

Yesu kawakosa maguu wanafund̯iwe

1Jila ya *Pasaka iwa imaafika hafufi. Na Yesu ewa kamanya ya kwamba wakatiwe wa kunuka humu lumwenguni auje kwa Babajwe wiwa umaafika. Jeje ewa kawatsaka muno hawaḍe weokuwa wakwe humu lumwenguni, na kawayanga matsako mumpaka mwiso.

2Ipfofika mioro, Yesu na wanafund̯iwe wakaa chihako kuḍyani. Ela Shaat̯ani ewa kesakumungiza Yud̯a mat̯aro ya kumuḍawanya Yesu. Yud̯a ewa ni mwana jwa Simioni Isikariota. 3Yesu ewa kamanya ya kwamba kayawa kwa Muungu na anauja kwa Muungu. Na pia ewa kamanya ya kwamba Babajwe kamumpa mamulaka dzuu ya kula kintu. 4D̯ubva kanuka na hapfa wepfowakiḍya, kaivuya hi nkanzuye ya na dzuu kaiweka geri, kisa kadzifunga tauli chunoni. 5Kangiza madzi kijani na kaḍabva kuwakosa maguu hawa wanafund̯iwe na kuwafuta na hi tauli adzifungiyeyo. 6Kawakosa hawa wangine hat̯a akidzaakimufika Simioni Pet̯ero, Pet̯ero kamuuza Yesu kamwamba, “Ḅwana, unatsaka kunikosa maguu mimi?” 7Yesu kamwambukuya kamwamba, “Hi hii saasambi nichokuhendani nkukidzi, ela ḅaad̯aye kudzaimuka maanaye.” 8Ela Pet̯ero kamwambukuya kamwamba, “Nkuwezi kunikosa maguu kaḅisa!” Nae Yesu kamwamba, “Nikitsakukosa maguuyo, nkuwezi kuwa jwangu kawii.” 9D̯ubva Pet̯ero kamwamba, “Ḅasi ikiwa kwamba ni hivyo, nkudzonikose maguu t̯u, ela nikosa ne mikono ne kitswa pia!” 10Yesu kamwamba, “Muntu akisa kukoga mwii muzima nka haḍya ya kukoga kawii, lamud̯a akose haya maguu ḅasi. Nywinywi nyonse mu wasafi lamud̯a muntu mumodza t̯u kahi yenu.” 11Yesu ewa kamumanya huyu jwa kudzaamuḍawanye, ndiyo maana eyonena akyamba, “Nywinywi nyonse mu wasafi lamud̯a muntu mumodza t̯u kahi yenu.”

12Yesu epfowakosa maguu wanafund̯iwe hat̯a akyendaakisa, kahwaa hi nkanzuye kaivwaa, kisa kenda kakaa chihako pfapfaḍe epfokaa d̯ura. Kisa kawauza hawa wanafund̯iwe kawamba, “Dze, muimuka maana ya avi nihendeyevyo? 13Nywinywi munanihana mimi Mwaalimu na Ḅwana jwenu, si viwi ni sawa, na wala ntamukutsowea. 14D̯ubva ikiwa kwamba mimi Mwaalimu na Ḅwana jwenu nimukosa nywinywi maguu, ḅasi nanywi pia munamala kuhendeana dzevyo. 15Mimi nisakumuyanga nywinywi mufaano wa kuuḅa ili mupate kuhendeana dza hivi nimuhendeeyevyo. 16Hachi nyakumwambiani, muhumwa si mukuu kumuchia huyu ḅwana jwakwe, na wala *ntumi si mukuu kumuchia huyu amuhumiye. 17Na kwa kwamba haya haya ni mambo muyamanyiyeyo, d̯ubva yahendeni ili mupate kuvodhyegwa.

18Ninkinena hivi, sikwakunenani dzuu yenu nyonse hat̯a! Maanaye kula mumodza jwenu nimutsaniye nimumanya aivyo. Ela haya matsoro ni had̯i yat̯imiye. Yamba, ‘Huyu aḍiye chakuḍya pfamodza nami ndiye anipfyehukiiye.’ 19Nyakuyamwambiani haya haya mambo d̯ura yasidzahendeka, ili yadzepfohendeka muweze kuhikiza kwamba mimi ndimi huyu *Masiya. 20Hachi nyakumwambiani, yuḍejwonse adzeemupfokea ntumi jwangu, huyo kanipfokea mimi. Na yuḍejwonse anipfokeeye mimi, huyo kamupfokea huyuḍe anihumiye.”

Yesu kat̯aḅiri kwamba Yud̯a njwakumuḍawanya

21Ḅaad̯a ya haya, Yesu mojo umutsowa raha. Kawamba hawa wanafund̯iwe, “Hachi nyakumwambiani, mumodza jwenu njwakuniḍawanya!” 22Hawa wanafund̯i waḍabva kuyowana-yowana, koro wewa waḍanganika kwamba Yesu ewa kakumunenani ga. 23Mumodza jwa hawa wanafund̯i, huyu jwa Yesu amutsakiye muno, ewa kakaa hafufi na Yesu wepfowakiḍya. 24D̯ubva Simioni Pet̯ero kamubigia nkumbi ili amuuze Yesu kwamba kakumunenani ga. 25Nae huyu mwanafund̯i kadzikuntia hafufi zaid̯i na Yesu kisa kamuuza kamwamba, “Ḅwana, ayu wiyekunenani kwamba anakuḍawanya ni ga?” 26Yesu kambukuya kamba, “Mimi nat̯opya mukahe humu ḅaakulini, na huyuḍe nidzeyeumumpa ḅasi ni huyo huyo.” Na epfot̯opya hu mukahe akisa, kaumumpa Yud̯a mwana jwa Simioni Isikariota. 27Na pfapfo, Yud̯a epfouhwaa hu mukahe Shaat̯ani kamunjia. Yesu nae kamwamba, “Yud̯a, hiḍi wiḍyokutsakani kuhenda, rebva uḍihende haraka.” 28Hawa weowakiḍya pfamodza na Yesu wonse ntawakuimuka maana ya hivi vyuuwo aneneyevyo. 29Ela kwa dzambo ḍya kwamba Yud̯a ewa ndiye huyu mut̯unza nkandi jwao, wangine wao wat̯ara ya kwamba Yesu ewa kamwamba ende akaguye vija vye nsikunkuu. Na wangine wat̯ara ya kwamba kamwamba endeakawapfe kintu masikini. 30Yud̯a epfopfegwa huḍe mukahe t̯u nkakukaa kawii, kagonzowa. Na epfonuka, kiza kiwa kimaanjia.

Yesu kat̯aḅiri kwamba Pet̯ero njwakumukana

31Yud̯a epfonuka t̯u, Yesu kamba, “Ngera yangu mimi *Mwana jwa Ad̯amu ya kumanyikana ukuu wangu imaafika. Na kuchiiya na kwangu mimi, Muungu anamanyikana namuna aivyo mukuu. 32Na ikiwa kwamba Muungu anamanyikana namuna aivyo mukuu kuchiiya na kwangu, nae ananimpa kumanyikana ukuu wangu si hat̯a kae. 33Wanangu watsakwa, mimi si muḍa muyeya kawii wa kukaa nanywi. Mudzanilacha ela ntamukudzaniona. Na viviḍe nivyowambia hawa wakuu wenu wa Kiyahud̯i, nanywi nyakuvimwambiani, kwamba, ‘Huku nikokwendani, nywinywi ntamuwezi kuniuḅa.’ 34D̯ubva nyakumumpani amuri mpya: Tsakanani dza hivi vyangu nimutsakiyevyo nywinywi. 35Na mukitsakana nywinywi na nywinywi, kula muntu anamanya ya kwamba nywinywi mu wanafund̯i wangu.”

36Simioni Pet̯ero kamuuza kamwamba, “Ḅwana, munamba kwekeya ku?” Yesu kamwambukuya kamwamba, “Hi hii saasambi, huku nikokwendani wewe nkuwezi kuniuḅa hwende pfamodza, ela ḅaad̯aye kudzaniuḅa.” 37Pet̯ero kamuuza kamwamba, “Ḅwana, kwa dzambo ga nitseweza kukuuḅa hi hii saasambi? Nya t̯ayari hat̯a kufwa kwa dzambo ḍyako.” 38Yesu kamwamba, “Wewe haswa kwa t̯ayari kuyayavya maishayo kwa dzambo ḍyangu? Hachi nyakukwambiani, nkuku asidzawika unanikana myeedha mihahu kwamba nkunidzi.”

Currently Selected:

Yohana 13: pkb

Highlight

Copy