Mahendo 8
8
1-3Ae Sauli katsakizwa ni hiḍi hendo ḍya kumuyaga Sit̯efano.
Sauli kaḍikuntisa d̯ina hiḍi tsanganiko
Wantu weonamuhila Muungu, wenda wamuzika Sit̯efano, na wamwiiya muno. Iyo nsiku, tsanganiko ḍya Yerusalemi, ḍiḍabva kukuntiswa d̯ina nkuu. Sauli kagija kuḍema kuḍinanga hiḍi tsanganiko. Kenda nyumba kwa nyumba, akiwaḅaa mafururyo na kuwayavya nze hawa wahikiza, hangu wake hat̯a wayume na kuwangiza gerenzani. Hawa wahikiziyeo wonse wat̯amisaa ḍanda zonse za Yud̯aya na Samaria, lamud̯a hawa *ntumi.
Maagu mema yasumwiijwa Samaria
4Hawa wahikiza wat̯amisaiyeo, wenda kula pfantu wakisumwiiya hichi chuuwo. 5Filipo kenda mudzi wa Samaria na kawasumwiiya hawa wantu dzuu ya *Masiya. 6Hivi vit̯aro vya wantu wamupfindiiya urembo. Wonse wamusikiiya na waona haya mafara makuu ahendeyeyo. 7Mpepfo nzuka ziwayawa wantu wenji huku zikiḅaa madzwi. Wantu wenji wahinamfiyeo na virema, nao wapfozwa. 8Ndookomu kwiwa tsekea nkuu mudzini Samaria.
9Humuḍe mudzini kwiwa muntu eyeakihanwa Simioni, eyeakimakisa wantu wa Samaria na tsawiwe kwa muḍa. Kadzihwaa kuwa muntu jwa maana, 10na kula mumodza, hangu mukuu hat̯a muchuchu wekimupfindiiya muno. Wamba, “Huyu ndiye nguvu ya Muungu iyonahanwa, ‘Nguvu Nkuu.’ ” 11Kamakisa wantu na tsawiwe kwa kit̯emo kiyeya mumpaka kula muntu ekikaa na kumupfindiiya muno. 12Ela wepfohikiza nsumwiizi za Filipo dzuu ya *Maagu Mema ya Uhaju wa Muungu na sari ḍya Yesu *Kirist̯o, wat̯opyegwa hangu wake hat̯a wayume. 13Simioni mwenye nae kahikiza. Epfot̯opyegwa ekigijana na Filipo kula pfantu na kamakiswa ni vihambwiizo na mafara makuu yahendejweyo ni Filipo.
14Hawa ntumi weokuwa Yerusalemi wepfosikia kwamba wantu wa Samaria wahikiza chuuwo cha Muungu, wamuhuma Pet̯ero na Yohana kwao. 15Wepfofika, wawayombea hawa wahikiziyeo ili wamupfokeye Ruhu Mudheru. 16Koro Ruhu Mudheru ewa nkadzasukia hat̯a mumodza jwa hawa wahikiziyeo. Wewa wat̯opyegwa t̯u kwa sari ḍya Ḅwana Yesu. 17Makisa Pet̯ero na Yohana wawapfaza mikono hawa wahikiza, nao wamupfokea Ruhu Mudheru.
18Simioni ewa kaona ya kwamba hawa wahikiza wepfopfazwa mikono ni hawa ntumi, wamupfokea Ruhu Mudheru. D̯ubva ekitsaka kuwapfa fwedha Pet̯ero na Yohana, 19na kawamba, “Nimpani nami hizi nguvu, ili yuḍejwonse nidzeyemupfaza mikono amupfokeye Ruhu Mudheru.” 20Kenge Pet̯ero kamwambukuya kamwamba, “Awe na fwedhazo namunjie mananzini, kwa kut̯ara ya kwamba unaweza kuiguya t̯ola ya Muungu na fwedha. 21Nku fungu wala hachi kwa hi hii kazi, kwa dzambo ḍya kwamba mojowo si murongaaro usoni kwa Muungu. 22D̯ubva, pfyehuza mamazo nzuka, na umuyombe Ḅwana, akuyatsie kwa kuwa na mat̯aro dzayohayo. 23Koro nikuona una wivu mwinji muno, na kuhenda mufungwa jwa nabvise!” 24Simioni kambukuya kamba, “Namuyomba muniyombeye kwa Ḅwana, ili nitsefikwa ni hat̯a dzambo modza, ḍya haya mwambiiyeyo kwamba yananifika.”
25Wepfokwisa kuyavya ushuhuḍa dzuu ya Yesu Kirist̯o na kusumwiiya maagu ya Ḅwana, Pet̯ero na Yohana wauja Yerusalemi. Wepfowakiuja wenda na kusumwiiya Maagu Mema midzi minji ya Wasamaria.
Filipo kamut̯opya Muithiopia
26Makisa malaika jwa Ḅwana kanena na Filipo kamwamba, “Dzielekanye, wende nsini hat̯a njia ya yuwandani iyawiyeyo Yerusalemi kwenda Gaza.” 27Ndookomu Filipo kadzielekanya, kachia. Iiḍe saa kwiwa muntu mukuu Muithiopia, eyekuwa kuujani nyumbani. Huyu ewa muntu at̯umijwe, muntu mukuu jwa kut̯unza nkandi ya malikia jwa Ithiopia. Ewa kayawa Yerusalemi kumuyombani Muungu, na ekiuja akiwa dzuu ya gari ḍyakwe ḍya kunuhwa. 28Humu njiani, kakaa humuḍe garini huku akiwa kudzisomeani chuo cha *nabii Isaya. 29D̯ubva Ruhu Mudheru kamwambia Filipo, “Enda hafufi na hiḍiḍe gari ukagijane naḍyo.” 30Filipo kaḍid̯aramia hafufi hiḍiḍe gari na kenda kamusikia huyuḍe muntu kakusomani chuo cha nabii Isaya. D̯ubva kamuuza kamwamba, “Amevihivi kwakuimukani maana ya haya wiyokusomani?” 31Huyuḍe muntu kamwambukuya kamba, “Nawezadze kuimuka, ninkitsaawa na muntu jwa kunipfenwiiya?” Na kamuyomba Filipo apfae hapfaḍe garini dzuu, akae nae. 32Hichi kiḍinku cha haya matsoro echoakisoma chamba hidzaa:
“Ewa dza mbuzi ya hako iyokupfiikwani kutsinzwani.
Ewa dza mwanambuzi jwa hako asiyeiya akwakupfeejwani d̯abasa ḍyakwe,
na wala nkakwambukuya chuuwo.
33Kagizwa yutswa na kunyimwa hachiye.
Na ntaku yuḍejwonse adzeyeweza kunena dzuu ya kivyaziche,
kwa kwamba maishaye ya hapfa lumwenguni yasiya.”
34Huyu mukuu jwa Kiithiopia kamuuza Filipo kamwamba, “T̯anyambia, ayu nabii ekinena dzuu ya ga? Ekidzinenea jeje ambu ekinena dzuu ya muntu yungine?” 35D̯ubva Filipo epfoḅaa kanwa kunena, kaḍabva na chichiḍe kiḍinku cha matsoro na kamusumwiiya Maagu Mema dzuu ya Yesu. 36Wepfokuwa charoni amaale, wenda wakumpwiiya pfantu pfepfo na kibwola cha madzi. Na huyuḍe mukuu kamba, “Hayano madzi. Ni kintu ga cha kunit̯iidhya nitset̯opyegwa?”#8:36 Matsoro yangine ya Kiyunani yana kiḍinku cha 37 chambiyecho: Filipo kamwambukuya kamwamba, “Ukihikiza na mojo wako wonse unaweza kut̯opyegwa.” Ndookomu huyuḍe muntu kamba, “Nihikiza ya kwamba Yesu Kirist̯o ni Mwana jwa Muungu.”
38Makisa huyu mukuu kaamuru hiḍi gari ḍisumamiswe, na wowii wasuka humu madzini, na Filipo kamut̯opya. 39Wepfoyawa nomu madzini, Ruhu jwa Ḅwana kamuhwaa Filipo. Huyuḍe mukuu nkakumuona kawii, ela kagija charoche akiwa na tsekea. 40Filipo kadza kadziona ka Azoto. Na kenda akichia na midzi yonse na kusumwiiya Maagu Mema, hat̯a kafika Kaisaria.
Currently Selected:
Mahendo 8: pkb
Highlight
Share
Copy
Want to have your highlights saved across all your devices? Sign up or sign in
© 2004, Bible Translation and Literacy
