Mahendo 17

Nsumwiizi za Paulo ziyeha fuḍyo Tesalonike

1Wagija kwenda na charo chao wachia na Amfipoli na Apolonia hat̯a wafika Tesalonike, kwipfokuwa na *sunagogi ḍya Wayahud̯i. 2Paulo kenda humuḍe sunagogini dza abarat̯iyevyo kuhenda. Kwa nsiku ntahu za *Sabato kaḍaat̯iana na hawa wantu, akitumia haya matsoro madheru. 3Kawaimusya haya matsoro na kawayanga tswee ya kwamba iwa imumala *Kirist̯o kuoneswa tsungu, na kufufuka kuyawa kwa wafu. Kawamba, “Huyu Yesu niyekumusumwiiyani dzuuye, ndiye huyu *Masiya.” 4Wangine wao wahikiza vyuuwo vya Paulo na wadziunga nae ae na Sila. Vivyo, na kit̯aro chikuu cha Wayunani weonamuyomba Muungu, pfamodza na wake wayongozi wenji nao wadziunga nao.

5Kenge Wayahud̯i wangine wanjijwa ni wivu na wahwaa wantu weonahenda mazuka, weonazinga humu majiani hat̯a wahenda kit̯aro. Wenda waungiza fuḍyo mudzi muzima. Waibiga hi nyumba ya Yasoni wakit̯ara ya kwamba wanamudhumburya Paulo na Sila na kuwayavya kwa hawa wantu. 6Ela wakitsawaona, wamuḅaa fururyo Yasoni na wandugu wangine hat̯a kwa wakuu wa mudzi na waḅaa madzwi wamba, “Hawa wantu wajumuya fuḍyo kula pfantu! Nevihivi wamaakudza nomu mudzini mwehu. 7Na Yasoni kakuwawekani nyumbani mwakwe. Wonse wakuzivunzani sharia za *Kaisari, wakyamba kuna haju yungine eyenahanwa Yesu.” 8Hivi vyuuwo viwahendeza hawa wakuu wa mudzi na hi t̯ut̯a ya wantu wareja. 9Hawa wakuu wamuhendeza Yasoni na hawa wangine waipfa dhamana ya kuwahendeza wayatswe, makisa wawayatsa wagonzowa.

Paulo kajumwiijwa fuḍyo Beroya

10Ipfofika siku t̯u, hawa wandugu wamugonzoza Paulo na Sila kwenda Beroya. Wepfofika, wenda sunagogini mwa Wayahud̯i. 11Hawa Wayahud̯i wa Beroya wewa t̯ayari kuwasikiiya kuliko hawa wantu wa Tesalonike. Wakisikiiya hichi chuuwo na hamu nyinji, na kula nsiku wekiyayowa haya matsoro waone ya kwamba haya ya Paulo eyoakiwambia nza hachi ambu hat̯a. 12Wenji wa hawa Wayahud̯i wahikiza. Na Wayunani wenji, wake majabva na wayume, nao pia wahikiza. 13Ela hawa Wayahud̯i wa Tesalonike wepfosikia ya kwamba Paulo kasumwiiya chuuwo cha Muungu na Beroya nako, wenda wajumuya fuḍyo nkuu kahi ya hawa wantu. 14Iyo saa hawa ndugu wamugonzoza Paulo hat̯a geri ya ḅahari, ela Sila na Timoteo wahafa Beroya. 15Hawa wantu weowakimusindikiza Paulo wenda nae hat̯a Atene. Makisa wauja Beroya na ḍaamisa ya Paulo ya kumutsaka Sila na Timoteo warebve wende wakagijane nae.

Paulo kasumwiiya wantu wa Atene

16Paulo epfoakimuinda Sila na Timoteo hukuḍe Atene, mojowe umunangika epfoona namuna ya hu mudzi udzaiyevyo masanamu ya miungu. 17Ndookomu kaḍaat̯iana na hawa Wayahud̯i na hawa wantu wa vyeet̯i vingine weonamuyomba Muungu, humuḍe sunagogini na wantu waḍewonse weowakyenda hapfaḍe gasani. 18Waalimu wangine weonahanwa *Waepikuro na *Wasitoiko nao pia waḍaat̯iana nae. Wangine wamba, “Ḍyakunenani, aḍi karachacha aḍi?” Wangine wamba, “Kaa dza kwamba kakunenani dzuu ya miungu migeni.” Wanena dza hivi kwa dzambo ḍya kwamba Paulo ekisumwiiya dzuu ya Yesu na ufufuo.#17:18 Weet̯ara ya kwamba kakunenani dzuu ya miungu ingine. 19Ndookomu wamuhwaa Paulo, wenda nae kwa gasa iyonahanwa gasa ya Arepago, na wamwamba, “Hunatsaka uhwambiye haya mayongweezo mapfya wiyoukisumwiiya. 20Haya mambo yangine hwiyonakusikia ukanena, ni mageni kwehu. D̯ubva hundetsaka uhuimusye maanaye.” 21Koro wantu wa Atene na wageni weowakikaa hukuḍe, wewa wantu watsakiyeo kusumwiiyana na kusikiiya mambo mapfya kut̯wa. 22Ndookomu Paulo kasumama usoni ya gasa ya Arepago na kamba, “Wantu wa Atene! Kwa kula namuna, nimuona mu wantu mutsakiyeo ḍini muno. 23Koro nipfonikyenenda nomu mudzini mwenu ninkiyowa huku kuntu mwikonayomba, niona na *madhabahu yorejweyo hivi vyuuwo hivi: ‘Kwa Muungu Asimanyikana.’ D̯ubva huyu mwiyenamuyomba pfasipfo kumumanya, ndiye huyu Muungu niyekumusumwiiyani. 24Huyu Muungu, aumbiye lumwengu na kula chicho kuzimuye, ni Ḅwana jwa yuwingu na nsi. Nkanakaa mahekaluni yambakijweyo ni wantu. 25Na wala nka haḍya ya kiḍechonse cha wantu wechonamumpa kwa kumuhendea kazi. Koro ndiye eyenapfa wantu wonse maisha na nsoho za kupfaza na kususya na kingine kiḍechonse. 26Kuyawana na muntu mumodza, kaumba vyeet̯i vyonse na kawahendeza waishi lumwengu yuzima. Jeje mwenye katsana d̯ura hizi ngera na huku kuntu wadzekokaa. 27Kahenda hivi ili kwamba vyeet̯i wamulache, na wakimulacha pfangine wanapata kumuona. Hat̯a vivyo Muungu nka kwa kuye na yuḍejwonse kahi yehu. 28Dza vya muntu mumodza aneneyevyo akyamba, ‘Ndiye eyenahuhendeza huishi, hudzinuye na kuwa na maisha hapfa lumwenguni.’ Ni dza hivi vya hawa wantu wenu wa meya waneneyevyo wakyamba, ‘Naswi pia hu wanawe.’ 29Kwa dzambo ḍya kwamba hu wana wa Muungu, nahutsehwaiya ya kwamba Muungu ana yuumbo jwa dhahaḅu, fwedha ambu iwe, juelekanyijwejo na ubyeka wa wanaad̯amu. 30Ngera za wantu wasizomumanya, Muungu kawayatsia. Ela sasa kakuamuruni wantu wonse, kula pfantu, wapfyehuze myendo yao mizuka. 31Koro kesakutsana nsiku ya kujuhukumu lumwengu jwonse na hachi kuchiiya na kwa muntu amutsaniye. Hivi kaviyanga kwa kula muntu epfomufufuya huyu muntu kuyawa wafuni!”

32Wepfomusikia Paulo akihadza mambo ya kufufuka kwa wafu, wangine wamubaladhaiya, ela wangine wao wamba, “Hunatsaka uhusumwiiye haya mambo kawii.” 33Ndookomu Paulo kanuka hapfa gasani. 34Wantu wangine wagijana nae na wahikiza. Kahi yao kwiwapfo Dioniso, eyekuwa muntu jwa gasa ya Arepago, na muke eyenahanwa Damari na wantu wangine.

Currently Selected:

Mahendo 17: pkb

Highlight

Copy