Mahendo 10

Nzozi ya Koronelio

1Hukuḍe Kaisaria, kwiwa muntu mumodza eyeakihanwa Koronelio. Jeje ewa ni mura jwa kit̯aro cha asikari wa Kirumi kihanijwecho, “Kit̯aro cha Ut̯aliano.” 2Ewa muntu muchuuwo. Jeje na sindowe wonse wewa wantu weowakimuhila Muungu. Kahenda menji ya kuwasaiḍia Wayahud̯i masikini na kut̯wa ekimuyomba Muungu. 3Ndookomu nsiku modza, chima cha saa kenda#10:3 Saa kenda za musikahi ziwa ni saa za mayombo. za musikahi, Koronelio kaona nzozi. Humu nzozini, kamuona tswee malaika jwa Muungu kamudzia na kumuḍankuwa sari kamwamba, “Koronelio!” 4Ae kamud̯eḍea huyu malaika akiwa na oga na kamuuza kamwamba, “Kunaa Ḅwana?” Huyu malaika kamwambukuya kamwamba, “Muungu kapfokea mayombo yako na mvuugiyazo kwa masikini. Na huku ndiko kwambukuyakwe. 5D̯ubva huma wantu Yopa, wende wakamuhane muntu mumodza eyenahanwa Simioni Pet̯ero. 6Kakukaani dza mugeni nyumbani mwa muelekanya nchingo mumodza eyenahanwa Simioni. Nyumbaye ya geri ya ḅahari.” 7Makisa huyu malaika eyeakinena nae kagonzowa. Ndookomu Koronelio kahana wahumisiwe wawii na asikari muchuuwo, eyekuwa mumodza jwa hawaḍe wamuhumikiiyeo jeje mwenye. 8Kawambia haya yonse yahendekeeyo, makisa kawahuma Yopa.

Nzozi ya Pet̯ero

9Hat̯a chamukoche, hawaḍe wantu wohahu wewa wa charoni amaale. Wepfofika hafufi na Yopa, Pet̯ero ewa kapfaa d̯arini#10:9 Huku d̯arini kwiwa ni huku paani dzuu. dzuu, chima cha saa ntandahu za musikahi akayombe. 10Kagijwa ni nzaa na ekitsaka kintu cha kuḍya. Hichi chakuḍya chipfochikimbikwa Pet̯ero kaona nzozi. 11Humu nzozini, kaona mbingu zipfenuka na kaona kintu chichochikisuka nsi kikaiyecho dza nguo nkuu igijijweyo na mitse mine, ikiwa kususwani hat̯a hapfa epfokuwa. 12Humu mwa hi nguo kaona kula aina ya muḍondo: wa maguu mane, weonahambaa na nyuni weonaguuka. 13Kasikia idzwi ḍikimwamba, “Pet̯ero! Nuka wima. Tsinza hawa waḍondo uḍye!” 14Ela Pet̯ero kamba, “Hat̯a Ḅwana! Sidzat̯at̯a meshi kiḍechonse chicho kichafu ambu kisichomala kuḍigwa.” 15Pet̯ero kaḍisikia hiḍi idzwi kawii ḍikimwamba, “Kiḍechonse cha Muungu adhereseecho, nkudzokihwae dza kintu kisichomala kuḍigwa.” 16Hivi vihendeka myeedha mihahu. Makisa hichi kintu kihwajwa yuwinguni dzuu iyo saa.

17Pet̯ero epfokuwa kumamat̯ani amaale maana ya hi nzozi aoneyeyo, hawaḍe wantu wahumijweo ni Koronelio, wewa wauza na wambijwa nyumba ya Simioni aiyo na wewa wasumama hapfaḍe muḍyangoni. 18Wahana na wauza wamba, “Humu humu nyumbani kuna mugeni eyenahanwa Simioni Pet̯ero?”

19Pet̯ero ewa kakuḍemani amaale kuimuka maana ya hi nzozi, Ruhu Mudheru epfomwamba, “T̯ayowa! Kuna wantu wahahu weokukulachani. 20D̯ubva, dzielekanye usuke huko nsii. Na nkudzoḍaḍamae kugijana nao mwende pfamodza koro ndimi niwahumiye.” 21Ndookomu Pet̯ero kasuka hukuḍe nsi na kawambia hawaḍe wantu, “Huyu muntu mwiyekulachani, ndimi. Muniḍabvat̯ia?” 22Wao wamwambukuya wamwamba, “Mura Koronelio kahuhuma kwako. Jeje ni muntu mwema eyenamuyomba Muungu, na Wayahud̯i wonse wanamuhila muno. Kambijwa ni malaika jwa Muungu akuhane nyumbani kwakwe, akakusikiiye haya udzeyomwambia.” 23D̯ubva Pet̯ero kawakaraḅisha hawaḍe wantu wayae pfapfaḍe. Chamukoche Pet̯ero kagijana na wandugu wangine wa Yopa, wanjia charoni pfamodza na hawaḍe wantu wahumijweo. 24Nsiku ya pfii yakwe wafika Kaisaria, wekowakiindwa ni Koronelio na wantu wa sindoni mwakwe pfamodza na waḅamuzwe ahaniyeo. 25Pet̯ero epfoakinjia humu nyumbani, Koronelio kamut̯angera, kenama na kamuvunzia nkuhi. 26Ela Pet̯ero kamunuya kamwamba, “Sumama wima, koro hat̯a nami ni mwanaad̯amu dzawe.” 27Pet̯ero kagija kunena na Koronelio epfoakinjia humu nyumbani, endeekoakiona wantu wenji wat̯ut̯aiyeo. 28Kawamba, “Nywinywi wenye mumanya tswee kwamba ni sera kwa Muyahud̯i kunjiiyana na wantu wa vyeet̯i vingine. Ela Muungu kaniyanga kwamba nitsemuhwaa muntu yuḍejwonse dza muntu asiyedhereswa ambu dza muntu asiyemala kunjiiyana na Wayahud̯i. 29Ndiyo maana mwipfonihumia wantu, sikudziza kudza. D̯ubva, nyakumuuzani, munihania?” 30Koronelio kamwambukuya kamba, “Nsiku ntahu zichiiyezo niwa kuyombani humu nyumbani mwangu, saa dzezi, saa kenda za musikahi. Iyo saa kut̯upuka muntu avwaiye nguo nkundu tswee. Kasumama usoni yangu 31na kanyamba, ‘Koronelio, Muungu kasikia mayombo yako, na kapfokea mvuugiyazo kwa masikini. 32Huma muntu Yopa akamukuhanie muntu eyenahanwa Simioni Pet̯ero. Kakukaani nyumbani mwa muelekanya nchingo eyenahanwa Simioni, eyenaishi geri ya ḅahari.’ 33Nami nikuhumia muntu mweedha mumodza. Nawe kuhenda urembo kudza. D̯ubva Muungu anaswi hwonse hapfa. Hwakuindani kupfindiiya kiḍechonse cha Ḅwana akupfiyecho uhwambiye.”

Vyuuwo vya Pet̯ero

34Pet̯ero kaḅaa kanwa kamba, “Sasa nihambuya kwamba ni ḍugha kwamba Muungu anawahwaa wantu wonse kuwa ḍa. 35Muntu jwa kyeet̯i kiḍechonse eyenamuhila Muungu na kuhenda yeyo ya hachi Muungu anamupfokea. 36Hii ndiyo ḍaamisa ya Muungu apfiikiiyeyo wantu wa Isiraeli, akisumwiiya *Maagu Mema ya naghea kuchiiya kwa Yesu *Kirist̯o, eye Ḅwana jwa wantu wonse. 37Nywinywi wenye mumanya hiḍi dzambo kuu ḍihendekeyeḍyo nsi yonse ya Wayahud̯i, ḍikiḍabva na Galilaya, ḅaad̯a ya Yohana kusumwiiya kwamba wantu wapfyehuze mama na wat̯opyegwe. 38Musikia dzuu ya Yesu jwa Nazareti, na namuna ya Muungu amutsaniyevyo kwa kumumpa Ruhu Mudheru na uwezo. Kwa dzambo ḍya kwamba Muungu ewa nae, Yesu kenda kula pfantu akihenda mambo mema na kupfonya wantu wonse wa Shaat̯ani angiziyeo mikononi. 39Swiswi hu mashaahiḍi wa mambo yonse ahendeyeyo Yerusalemi na ḍanda zingine za nsi ya Wayahud̯i. Wamuyaga kwa kumupfatsika muhini mwa mpatsa. 40Ela nsiku ya hahu Muungu kamufufuya kuyawa wafuni. Na kamuhendeza at̯upuke, 41si kwa wantu wonse, ela kwehu t̯u swiswi hwiwo mashaahiḍi wa Muungu eotsana hangu d̯ura. Swiswi huḍiyeo na kunwa pfamodza nae epfofufuka kuyawa wafuni. 42Na kahwaamuru huwasumwiiye wantu haya Maagu Mema na huwayange kwamba ndiye huyu jwa Muungu atsaniyee kuwa muhukumu jwa wafu na weo mojo. 43Manabii wonse wanena dzuuye, kwamba kula muntu amuserefat̯iye anayatsijwa nabviseze kwa nguvu za sariḍye.”

Koronelio na wantuwe wamupfokea Ruhu Mudheru

44Pet̯ero epfoakinena amaale, Ruhu Mudheru kawasukia hawaḍe wonse weowakimusikiiya. 45Hawaḍe wahikiza wa Kiyahud̯i wadziyeo pfamodza na Pet̯ero kuyawa Yopa wamaka, wepfoona kwamba hat̯a wantu wa vyeet̯i vingine nao, Muungu kawapfa t̯ola ya Ruhu Mudheru. 46Koro wawasikia wakwakunenani na lugha garagara wakimushad̯a Muungu. D̯ubva Pet̯ero kamba, 47“Wantu hawa wamupfokea Ruhu Mudheru dza viviḍe humupfokeeyevyo swiswi. D̯ubva, kuna yuḍejwonse jwa kuwavingira kut̯opyegwa na madzi?” 48Makisa kaamuru wat̯opyegwe kwa sari ḍya Yesu Kirist̯o. Kisa wamuyomba akae nao kwa nsiku kachuchu.

Currently Selected:

Mahendo 10: pkb

Highlight

Copy