Micha 4
4
Yr ARGLWYDD yn Teyrnasu mewn Heddwch
Es. 2:1–4
1Yn y dyddiau diwethaf bydd mynydd tŷ'r ARGLWYDD
wedi ei osod ar ben y mynyddoedd
ac yn uwch na'r bryniau.
Dylifa'r bobloedd ato,
2a daw cenhedloedd lawer, a dweud,
“Dewch, esgynnwn i fynydd yr ARGLWYDD,
i deml Duw Jacob,
er mwyn iddo ddysgu inni ei ffyrdd
ac i ninnau rodio yn ei lwybrau.”
Oherwydd o Seion y daw'r gyfraith,
a gair yr ARGLWYDD o Jerwsalem.
3Bydd ef yn barnu rhwng cenhedloedd,
ac yn torri'r ddadl i bobloedd cryfion o bell;
byddant hwy'n curo'u cleddyfau'n geibiau,
a'u gwaywffyn yn grymanau.
Ni chyfyd cenedl gleddyf yn erbyn cenedl,
ac ni ddysgant ryfel mwyach;
4a bydd pob un yn eistedd dan ei winwydden
a than ei ffigysbren, heb neb i'w ddychryn.
Oherwydd genau ARGLWYDD y Lluoedd a lefarodd.
5Rhodia pob un o'r cenhedloedd yn enw ei duw,
ac fe rodiwn ninnau yn enw'r ARGLWYDD ein Duw dros byth.
Adferiad Israel
6“Yn y dydd hwnnw,” medd yr ARGLWYDD,
“fe gasglaf y cloff,
a chynnull y rhai a wasgarwyd
a'r rhai a gosbais;
7a gwnaf weddill o'r cloff,
a chenedl gref o'r gwasgaredig,
a theyrnasa'r ARGLWYDD drostynt ym Mynydd Seion
yn awr a hyd byth.
8A thithau, tŵr y ddiadell, mynydd merch Seion,
i ti y daw, ie, y daw y llywodraeth a fu,
y frenhiniaeth i ferch Jerwsalem.”
Ymryson Arall â'r Gau Broffwydi
9“Pam yn awr yr wyt yn llefain yn uchel?
Onid oes gennyt frenin?
A yw dy gynghorwyr wedi darfod,
nes bod poenau, fel gwewyr gwraig yn esgor, wedi cydio ynot?”
10“Gwinga a gwaedda, ferch Seion,
fel gwraig yn esgor,
oherwydd yn awr byddi'n mynd o'r ddinas
ac yn byw yn y maes agored;
byddi'n mynd i Fabilon.
Yno fe'th waredir;
yno bydd yr ARGLWYDD yn dy achub
o law d'elynion.”
11“Yn awr y mae llawer o genhedloedd
wedi ymgasglu yn dy erbyn,
ac yn dweud, ‘Haloger hi,
a chaed ein llygaid weld eu dymuniad ar Seion.’
12Ond nid ydynt hwy'n gwybod meddyliau'r ARGLWYDD,
nac yn deall ei fwriad,
oherwydd y mae ef wedi eu casglu fel ysgubau i'r llawr dyrnu.
13Cod i ddyrnu, ferch Seion,
oherwydd gwnaf dy gorn o haearn
a'th garnau o bres,
ac fe fethri bobloedd lawer;
yn ddiofryd i'r ARGLWYDD y gwneir eu helw,
a'u cyfoeth i Arglwydd yr holl ddaear.”
Currently Selected:
Micha 4: BCNDA
Highlight
Share
Copy
Want to have your highlights saved across all your devices? Sign up or sign in
© Cymdeithas y Beibl 2004
© British and Foreign Bible Society 2004