Matìù 9

Yesò bəâ wòt kǒ àbâ ènyit tò a pfə la

(Mk 2:1-12; Lk 5:17-26)

1Yesò ghɨ̀ ale, nyi a èbem ànkànuꞋ ntù̧u̧ èlemè ngwènè àpfəa yɔb. 2ÀfɨꞋa mbɔŋ, bòt ko e ŋeꞋè wòt àbâ ènyit tò a pfə la a ègwet àkwàŋkè nɨŋ nkɨ̀Ꞌɨ̂ abua tò. Yesò ye ndɨ bòt ngaa e bɔ ntɨ̀ ane zi la, shu abua mbê ngaa nê, “Waã am, à ka ngwàꞋ ndo̧o̧na, mâ waꞋa a kàbɔ̀ŋ wê.”

3Yesò làꞋ ale, bènyɨꞋtà mbɨ̧te Musì ko e me lèmte a kètsìà wɔb shua nê, “Mbê waa nàà fɨ̀Ꞌnà àvi ane Mbɔ̧ɔ̧mà.”

4Yesò bê nko àghɨa bɔ mɨ̀ɨ̀tà la, mbììte awɔb nê, “Ghǎ ghɨ̀ ka bɨ me mɨ̀ɨ̀te kàbɔ̀ŋ a mèntɨ̧ɨ̧ mɨ̧ à? 5Àyea ŋa àa njùa à, e shu nê ‘Mâ waꞋa kàbɔ̀ŋ wê’, kò wuê nê ‘Lɔ̀Ꞌɔ a si me ghȩ̀ȩ̀ne à?’ 6Ka e nɨ enyɨꞋte awɨ̧ nê Waã Wòt bɔ àtɔŋ a sitsǎꞋ à màngwaꞋa kàbɔ̀ŋ.” Tà shu abua wòt wu àbâ ènyit tò a pfə la nê, “Lɔ̀Ꞌɔ a si ŋèꞋe àkwàŋkè àyê me ghǎ àpfəè.” 7Ŋut bê ndɔ̀Ꞌ a si me ghǎ àpfəè. 8Mbɨ̀Ꞌɨ̀ ènɔ̧̂ bòt bu e ye ale la, kèbɔɔ ke baãaã wɔb, bɔ tsiꞋi me wùꞋte a Mbɔ̧ɔ̧mà wu tà ŋa èwuu àtɔŋ yàa abua wɔ̀bȩ̂ la.

Yesò nɨa Màtìù ane wakatè vi

(Mk 2:13-17; Lk 5:27-32)

9Yesò lɔ̀Ꞌɔ̀ abot tà me ghà nembì, tà ye wòt mànɨa èkab taksì kǒ èlen tò wu Màtìù la àdzìꞋa àfàꞋ àzi. Yesò shu abua tò nê, “KɨꞋɨ nkùŋè am.” Tà bê ndɔ̀Ꞌ a si nkùŋè atò.

10Mbɨ̀Ꞌɨ̀ Yesò tsekè me jɨ èghɨ a lob Matìù la, bòt nyaŋ bɔ̀ɔ nɨ̀a èkab taksì la nè bòt kàbɔ̀ŋ e kɨꞋɨ̀ ntsèke a si bɔ̂ Yesò ba nè bɔkatè tò me jɨ èghɨjɨ. 11Mbɨ̀Ꞌɨ̀ Bèfalèsiì e ye ndɨ tà jɨa èghɨjɨ bɔ̂ bòt baa la, bɔ biitè bɔkatè tò nê, “NyɨꞋtà wɨ̧ è ghɨ̀ na ka me jɨ bɔ̂ bòt bɔ̀ɔ nɨa mèkab taksì la, nè bòt kàbɔ̀ŋ ko à?”

12Yesò zə ale, mbɨ̀ɨ̀lè nê, “Bòt kekweelè aà kà kɨ ngàŋ. Bèngɔ̧̀ ka bɔ̀ɔ nkɨà ngàŋ la. 13Bɨ̀ ghǎ nkɨ lə èngà̧ waa e shua la, ‘Maà nkɨà wuê bèmǎnkua tèsȩ, è nka kɨa banyà̧ bɔ kɨ̧ɨ̧me la.’ È nka kɨꞋa etɔ bòt bɔ mɨɨtè nê bɔ tɨ̧ɨ̧ ndɨŋndɨ̀ŋ la, e nkɨ̀Ꞌa etɔ bòt kàbɔ̀ŋ.”

Èngà̧ ane ànəa màntseka kà jɨ àghɨ

(Mk 2:13-17; Lk 5:27-32)

14ÀfɨꞋa ngaa bɔkatè Jɔ̌n e kɨꞋɨ̀ mbììte a Yesò nê, “Nàa ngɨ̀ è wua àfɨ̀Ꞌ àko baa Bèfalèsiì e me tseke ka jɨ àghɨ mbɨ̀Ꞌɨ̀ etsàꞋte a Mbɔ̧ɔ̧mà, ghǎ ghɨ̀ ka bɔkatè bê è ka wua ntsèka kà jɨ àghɨ à?”

15Yesò shu abua yɔb nê, “Tê betsiꞋa bègɨ̧̌ ndzɔꞋɔ etɔ̧ɔ̧ èbu bɔb àfɨꞋa lu̧ ndzà bèlè bɔ̂ tò ba la à? Àfɨ̀Ꞌ aa ghɨ̌ nkùꞋ bɔ tsì lu̧ ndzà yu ayɔɔ yɔb, e ye wu àfɨꞋa bɔ̀ɔ me tseke kà jɨ àghɨ la.

16“Wòt nàà kà lɔ̀Ꞌ àlia nɨ̀ àdziꞋa ndǐ fi ntèmte ndǐ èlènè la, nkàà nê ye fi yu naa tseke tê sààlà ndzəè, èləꞋ mbɔŋ e mè mpàa fàŋ tê ntsè ndɨ e ghɨ̂ ngu la. 17Wòt kà meè ngua ndɔ̀Ꞌ àlia ndzìà mèlùꞋ fi a èbem àtetuꞋ a gùbnyà̧ a lènè la. #9:17 Bèjuê e li ngua nɨa gubtenyà̧ ngɨ̀à ètetuꞋ bɔb. Tà ghɨ̀ ale, ko àtetuꞋ a gùbnyà̧ yu aa gwele, mèlùꞋ mu naa tsəète, àtetuꞋ yu aa bɨɨ. Bɔ̀ɔ ndzìà mèlùꞋ fi wuê a èbem àtetuꞋ gùbnyà̧ à fi, mbɨ̀Ꞌɨ̀ mèlùꞋ mu nè àtetuꞋ yu aa wu ntsɔ̧̀.”

Waã wɔ̀jûŋ kǒ nè àvi kǒ tà li mbà̧à̧te ndǐ Yesò la

(Mk 5:21-43; Lk 8:40-56)

18Mbɨ̀Ꞌɨ̀ Yesò nàa ndàꞋà la, wajûŋ kǒ ayɔɔ Bèjuê kɨ̀Ꞌɨ̂ ŋɔ̀Ꞌne a si a mbì tò nê, “Waã am bê mbèla mpfəà pfə, ka à kɨ̀Ꞌâ ŋɔ̀ŋè àbu àyê àtsəa tò ko taa yu̧u̧me.” 19Ale, Yesò mbê ndɔ̀Ꞌ a si nɨ̀ bɔkatè bi nkùŋa tò.

20Mbɨ̀Ꞌɨ̀ bɔ̀ɔ ngà la, àvi kǒ mbàŋ dzə ane tò ane èngùꞋ èghem ntsɔ̀b yebe la, kɨꞋɨ̀ mbà̧à̧te àtsəa ndǐ tò. 21Ngu nê tà shua a èntɨ̧ɨ̧ vi nê, “E ngu anè nyaꞋà mbà̧à̧te wuê àtsəa ndǐ tò ko maa peme.”

22Yesò ghèble avi ndzè atò mbɔ̂ nê “Waã am, ka ngwàꞋ ndo̧o̧na, èntɨ̧ɨ̧ wu à zi ane yaã la, e ghɨ̂ à pem.” KwàꞋ àfɨꞋa mbɔŋ àvi wu bê nkwèèlê.

23Mbɨ̀Ꞌɨ̀ Yesò ghà tê nyi a lob wajûŋ wu ndzě bòt èvə ntɔ bafɨ̀, nè ènɔ̧̂ bòt ndɨ̀à ànyaꞋne la, 24tà shu abua yɔb nê, “Bɨ̀ dzəꞋta; waàvi wàa bakà pfə, tà lìa li.” Tà shu ale, bɔ taꞋa tsoꞋo atò. 25Mbɨ̀Ꞌɨ̀ bɔ tsàà ènɔ̧̂ bòt bu àbȩ la, tà nyi a lob mbà̧à̧ waàvi wu ane àbu tò, tà lɔ̀Ꞌ a si. 26Àndǎ ànəê yaa a ghà èdzìꞋ ègème àlaꞋ və.

Yesò bəâ bòt àghɨ àleme ko babe

27Yesò lɔ̀Ꞌɔ abot tà me ghà nembì, bòt àghɨ àleme ko babe e me kùŋè atò ŋȩ̂ shua nê, “Waã fɔ̧̀ Dàbid, ku tèsȩ ta.”

28Mbɨ̀Ꞌɨ̀ tà ghà te nyi a lob la, bòt àghɨ àleme bu e kɨꞋɨ̀ tà bììte wɔb nê, “Tê bɨ bɨ̧ɨ̧nè nê betsiꞋa e nko mbəè àwɨ̧?”

Bɔ nê “Oò a Tè.”

29Tà bà̧à̧te àghɨ ayɔb yu shu nê, “TsiꞋ à wu mbɨꞋɨ̀ bɨ kɨà la.” 30Àghɨ a yɔb yu a bê ngàꞋtê. Yesò ghɨ̀ ale, mbɔ̂ səèŋkè ètû̧ bɔb nê bɔ̀ ka shu wòt àghɨa a ghɨ̀ la. 31Ka bòt bu e ghà ale ntsà àndǎ tò adzìꞋ àgème a èbem àlaꞋ və.

Yesò bəâ mbûꞋ kǒ

32Mbɨ̀Ꞌɨ̀ bòt baa e lɔ̀Ꞌɔ abot me ghà la, bòt ko e nɨ wòt kǒ fo kàbɔ̀ŋ ghɨ̂ tà tsìꞋi mbûꞋ la nɨŋ nkɨ̀Ꞌɨ̂ abua Yesò. 33Mbɨ̀Ꞌɨ̀ tà fəè fo kàbɔ̀ŋ yu la, mbûꞋ yu bùꞋ me làꞋa. Ànəa mbɔŋ a ntsè wòt ègème. Bɔ tsiꞋi me shu nê, “Ba te bakà ye èwuu ànəê yaa a Izəèlȩê.”

34Ka Bèfalèsiì e me shu nê “Wu fɔ̧̀ fote kàbɔ̀ŋ ka tàa ŋǎ tò mètàŋ tà nɨa fəèà fote kàbɔ̀ŋ ko la.”

Yesò kù tèsȩte bòt

35Yesò li ngua ngȩ̀ȩ̀nà a èpfəè ènɨ̧ bu nè bɔbɔ èpfəè nyɨ̀Ꞌta a lobte Mbɔ̧ɔ̧mà tɔb, mè ntsɔ̀tà Ntu̧ Ntsɔ̧̀ Kèfɔ̧̀ Mbɔ̧ɔ̧mà, ndɔ̀Ꞌ mbəèa èghɔ̧ nè èlɔ̀Ꞌ ègème. 36Tà ghɨ̀ tà ye ènɔ̧̂ bòt, tà kù tèsȩ tɔb nkàà nê, mènəè li ntsè àwɔb, bɔ sàŋè mbɨ̀Ꞌɨ̀ njɨ̀te kà ye a mbaabà. 37Ale, tà shu abua bɔkatè bi nê, “Èghɨjɨ e lu̧ a èbem mbȩ ka bòt bɔ̀ɔ fùꞋù la e me koo. 38È wu ale, bɨ shu̧u̧te a Tǎt mbȩ nê tà tsàa bòt màfuꞋa a mbȩ zi.”

Currently Selected:

Matìù 9: mnf

Highlight

Copy