Lûk 7
7
Yesò bəâ wafàꞋ tǎt bèshujà Luêm kǒ
(Mat 8:5-13)
1Mbɨ̀Ꞌɨ̀ Yesò shu mèngà̧ maa ègème abua bòt tè mpàa la, tà ghà Kàpenàwuêm. 2Tǎt bèshujà Luêm kǒ wu a èbem àpfəè və, àbùꞋ a èkɔŋ tò a wua ngò̧ò̧nà te ntsìꞋi we pfəâ. 3AfɨꞋa tà zə mènəè Yesò è ghɨ̀ la, tà tu̧u̧ bɔɔjuŋ Bèjuê ko nê bɔ̀ gha ntɔ atò, tà kɨꞋɨ mbə àbùꞋ àzi. 4Bɔ ghà ndze a Yesò ntsèntè shù̧ù̧te atò nê, “Tǎt bèshujà waa wu wòt àa nyɨ̀Ꞌtâ nkûŋ nê à bɔ̂ ndɨ àa tɨŋe atò la. 5Tà taꞋa wua nkɔ̀ŋkà bòt ba. Tòà zìambɔŋ è kuule lob Mbɔ̧ɔ̧mà ŋa abua ya.” 6Ale, Yesò kùŋè àwɔb.
Tà kɨꞋɨ̀ tê tà me nyi àpfəè, tǎt bèshujà wu tsàà bèshu̧ bi ko, bɔ ghà shu abua tò nê, tǎt bèshujà wu è shu nê, “Lefɨ̀Ꞌ, ko mbɨ̀Ꞌɨ̀ à ye ngoꞋ, e mbakà kuꞋu wòt àa nyi a lob yaã la. 7È nka mě nkùꞋ we màa kɔꞋɔ a mbì lê a nkèm yaã la. Bê ndàꞋ èngà̧, ko wafàꞋ am naa peme. 8Mmɔ̌ mbɔŋ e ngu a èten bètǎt bèshujà ko, mè mbɔ̀ èbeko nè bèshujà a èten laã. Màa ngɨ̀ e shu abua waa nê ‘Ghǎ’, tà ghà, shu abua via nê ‘KɨꞋɨ’, tà kɨ̀Ꞌɨ̂, shu abua àbùꞋ am nê ‘Ghɨ àghɨ yaa’, tà bê ngɨ̀.”
9Mbɨ̀Ꞌɨ̀ Yesò zə èngǎ̧ tò wu la, a bê ntsè atò, tà shu abua banɔ̧̀ bu nkùŋà vi la nê, “Maa shua wɨ̧ nê, e mbakà ye wòt kǒ ka wuê ayɔɔ bòt Izəèlȩê tà bɔ ngɨŋa ntɨ̀ yaa mbê waa è bɔ ane yaã la.” 10Bèshu̧ tǎt bèshujà wu e kua akwèn ngà a lob tò me kɨꞋɨ, àbùꞋ atò yu a kweelè tè ndɔ̀Ꞌ.
Yesò yù̧ù̧me waã nempfə kǒ
11AdzìꞋ li me wù̧ù̧ne, Yesò bɔ̂ bɔkatè bi e me ghǎ àpfəè àko bɔ̀ɔ ntɔ nê Nên la. Bɔɔ̀ ngà ale, taꞋà ndzɔ̀ŋ bɔbȩ me kùŋè àwɔb. 12Bɔ kɨꞋɨ tê bɔ̀ wu àtsəkaã, bɔ bù̧ ndzɔ̀ŋ bɔbȩ è ŋeꞋe a mpfəà la. Mpfəà wu wu ndàꞋ wambâ̧ nempfə kǒ, taꞋa ndzɔ̀ŋ bɔbȩ wu alu̧ bɔ̂ tò ba bɔ dzə a èbem àpfəèà nɨ̧ yu la. 13Mbɨ̀Ꞌɨ̀ Yesò ye atò la, tèsȩte nempfə wu te ku atò. Tà shu abua tò nê, “Ka tsi ndɨ̀.”
14Mbɔ̂ nkɔꞋɔ a mbì, mbà̧à̧te àkwàŋkè yu bɔ nɔ̀ŋa mpfəà wu a èbèm la, bòt bu bɔ ŋeꞋe mpfəà wu la bɔ tɨ̧̂. Yesò shu nê, “Waã kèsà, mâ shu awê nê, lɔꞋɔ a si.” 15Tà shu a èlɨ ngaa ale, wòt wu tà pfə la bê ndɔ̀Ꞌ, ntsèke a si, mbùꞋ me làꞋa. Yesò bà̧à̧ àbu atò, ŋa abua nyɨ̌ tò.
16Kèbɔɔ ke baãaã awɔb bàgème, bɔ kɔ̧ ngùꞋtè a Mbɔ̧ɔ̧mà nê, “TaꞋà ndàꞋàtɔŋ Mbɔ̧ɔ̧mà è saꞋa a kètsìà wa. Mbɔ̧ɔ̧mà è kɨꞋɨ̀ etɨŋe bòt bi.” 17Yesò ghɨ̀ ale, àndǎ ànəê ya a gha àlaꞋ a Bèjuê àgème nè èlaꞋ ko bu a ngèt la.
Bɔntu̧ Jɔ̌n ndzìà èdzî
(Mat 11:2-19)
18Bɔkatè Jɔ̌n e li shu atò mènəè maa ègème. Tà tɔ babe ane yɔb 19ntu̧ awɔb abua Yesò Lefɨ̀Ꞌ nê, “À wu wòt wu nga kɨꞋɨ la, kò bà me chɨ̀Ꞌɨ wòt kǒ tsa à?”
20Mbɨ̀Ꞌɨ̀ bɔ kɨꞋɨ tê nkwene ane Yesò la, bɔ shu abua tò nê, “Jɔ̌n ndzìà èdzî tu̧u̧ awa nê bà kɨꞋɨ mbììte àwê nê, ‘À wu wòt wu nga kɨꞋɨ la, kò bà me chɨ̀Ꞌɨ wòt kǒ tsa à?’ ”
21ÀfɨꞋa mbɔŋ Yesò bə èwuu èghɔ̧ nyaŋ, mè fəè fote kàbɔ̀ŋ ane bòt, ngɨ̀à bòt àghɨ àleme e yea èdziꞋ. 22Tà bɨ̀ɨ̀lè èngǎ̧ bɔkatè Jɔ̌n bu nê, “Bɨ̀ kua akwèn ngà shu a Jɔ̌n àghɨa bɨ zə la nè àyea bɨ ye la: Bòt àghɨ àleme e ye èdziꞋ, bòt èka bɔb e ŋɔꞋte la, e lɔꞋ tè ntsiꞋa ngȩ̀ȩ̀nà ndɨŋndɨ̀ŋ, bòt àghɔ̧atsɔꞋɔ e pem, mbûꞋtsə te zə èdziꞋ, bèmpfəà be yu̧u̧mè, bɔ mè tsɔ̀tè Ntu̧ Ntsɔ̧̀ Mbɔ̧ɔ̧mà abua bòt ngoꞋ. 23Ntsɔ̧̀ wu wòt wu tàa ka màkè àghɨa è ngu yùà la.”
Yesò shu mènəè Jɔ̌n ndzìà èdzî abua banɔ̧̀
24Mbɨ̀Ꞌɨ̀ bɔntu̧ Jɔ̌n bu e ghà la, Yesò bùꞋ me laꞋa ànəa Jɔ̌n abua ènɔ̧̂ bòt bu shua nê, “Bɨ li me nkùŋe a Jɔ̌n e gha àbâ àlaꞋ àyuube ale, mɨ̀ɨ̀tè nê bɨ gha eye ghà à? Bɨ li ngua nga eye àtsəa èfəèꞋ àfeme àa mpàà maꞋa àbâ abà la à? 25Tè a bakà wu ale, ko bɨ li ngua nga àbȩ eye ghà à? Bɨ li ngua nga eye wòt bɔ wèe atò ane ndìte ntsɔ̧̀ la à? Bɨ ko nê, bòt bɔ wèè àwɔb ane ndìte ntsɔ̧̀ la bɔɔ ntsèka ne èbem ntɔꞋtsə. 26Bɨ li nchɨɨmè ngua nga àbȩ abàꞋa ghà à? Eghǎ eye a ndàꞋàtɔŋ Mbɔ̧ɔ̧mà? Oò kwat! Bɨ li ndze wòt mènəè tò è tsě me ndàꞋàtɔŋ la. 27Jɔ̌n waa wu wòt wu Àkata Mbɔ̧ɔ̧mà à shu nê,
‘Ye wantu̧ am mâ tsǎ atò a mbì lɨ̧
taa kɨꞋɨ enèète alu̧ abua yɨ̧ la.’
28Ane nkûŋ, tsiꞋ è shu awɨ̧ nê bɔ bakà li tè me bi wòt kǒ tà tsèa Jɔ̌n la, ka wòt tà wu tandiakwèn a Kèfɔ̧̀ Mbɔ̧ɔ̧mà la, è tsě a Jɔ̌n.”
29Mbɨ̀Ꞌɨ̀ bɔ zə àghɨa Yesò è shu la, bòt nyaŋ fɔ̀ɔ̀le nè bèmbaãaã taksì e bɨ̧ɨ̧ne nê alu̧ Mbɔ̧ɔ̧mà wu alu̧ nkûŋ, nkàà nê bɔ li ndzaŋe bɨ̧ɨ̧ne èngǎ̧ Jɔ̌n mɨ̧̂ tè tà zì àwɔb a èdzî. 30Ka Bèfalèsiì nè bènyɨꞋtà mbɨ̧te Musì bɔ tu̧u̧ àghɨa Mbɔ̧ɔ̧mà taŋkè abua yɔb la, nkàà nê bɔ li ntû̧ ebɨ̧ɨ̧ne Jɔ̌n naa zì àwɔb a èdzî mɨ̧̂.
31“Tè màa chɨɨme e fɨ̀Ꞌne bòt laane wa ane ghà, bɔ wu mbɨ̀Ꞌɨ̀ ghà à? 32Bɔɔ anè ngu mbɨ̀Ꞌɨ̀ bɔtechɨɨle bɔ tseke àdziꞋa èwen me ŋȩa ntɔ bèshu̧ bɔb shua nê,
‘Ba li ntɔ bafɨ̀, bɨ tu̧ ebene,
ba kɔ̧ èvə, bɨ̀ ka dɨ̂.’
33Jɔ̌n li nkɨ̀Ꞌɨ̂ me tseke ndzìtsə, tà kà meè ngua nua mèlùꞋ, bɔ nê, ‘Tà bɔ fo kàbɔ̀ŋ.’ 34Waã Wòt kɨ̀Ꞌɨ̂ me jɨ èghɨjɨ mè nua mèlùꞋ, bɔ nê, ‘Bɨ yea mbê waa! Tà wu mpfəà èghɨjɨ, mè ngu àbaala mèlùꞋ, mè ngu shu̧ bòt bɔ̀ɔ nɨa mèkab taksì la, nè bòt kàbɔ̀ŋ!’ 35A batè ngu ale, ka bòt bu bɔ̀ɔ mbɨ̧̀ɨ̧̀na alu̧ Mbɔ̧ɔ̧mà la, e nyɨꞋtè nê èyǐ Mbɔ̧ɔ̧mà aà və nkûŋ nkûŋ.”
Yesò ghà a lob Simùn wòt Falèsiì
36Wòt Falèsiì ko lè kaꞋa Yesò nê tà kɨꞋɨ njɨ̀ èghɨjɨ a lob zi. Yesò ghà a lob tò ntsèke a si a mànjɨa èghɨjɨ bu. 37Àvi kǒ tàa ntsèka a èbem àpfəa mbɔŋ ngu ghȩ̀ȩ̀nè ghȩȩne la, è zə nê Yesò wu a lob wòt Falèsiì wu njɨ̀a èghɨjɨ. Ale, tà nɨ mèwet àghaa ntsɔ̧̀ a èbem atǒꞋ nɨŋ nkɨ̀Ꞌɨ̂, 38ntɨ̧ɨ̧ àdziꞋa Yesò wù la, me dɨ̌, mèsi tò me chua shùa èka tò. Tà ŋɔ̀Ꞌne a si ndzòò èka tò bu ane nyemtetsə ti, èsènè ndɔ̀Ꞌ ndzɔꞋ ane mèwet mu.
39Wòt Falèsiì wu ye, ndèmtè nê, “Mbê waa ghɨ̀ ale, ngu ngule ndàꞋàtɔŋ Mbɔ̧ɔ̧mà, mbə tà ko àghɨa àvi waa mbà̧à̧ta tò la wu yùà la. Ko tà ko èwuu kàbɔ̀ŋ tàa ngɨ̀à la.”
40Tàà ndàꞋ ale, Yesò ko ànəa tà lèmtà shua la, shu abua tò nê, “Simùn, mâ bɔ èngà̧ màa nkɨ̀a nê bà mùa la.” Simùn bɨ̀ɨ̀lè nê,
“Oò, a nyɨꞋtà, shu è ndzə.”
41Yesò nê, “Bòt ko babe e li mbɔ̌ njû wòt tàa fɨ̧̀ɨ̧̀nà èkab la. Ane bòt baa babe la, wemɔ̀Ꞌ è bɔ bètɔsì ènkɨ̀ yetà̧â̧, wekǒ bɔ bètɔsì èghem yetà̧â̧. 42Ka wòt kǒ ane yɔb tà bɔ èkab ètsə njû zi la ka wuê. Ale, fɨ̧̀ɨ̧̀nà èkab wu sà njû tɔb tu.” Yesò làꞋ ale mbììte a Simùn nê, “Wàà ane yɔb nàa kɔ̀ŋke fɨ̧̀ɨ̧̀nà èkab wu te tsě wekǒ à?”
43Simùn bɨ̀ɨ̀lè nê, “Maà mɨ̀ɨ̀tà nê, wu wòt wu tà sà njû nyaŋ tò la.”
Tà shu nê, “À bɨ̀ɨ̀le ntsɔ̧̀.”
44Ale, Yesò ghèble avi ndɨ̀ŋkè àvi wu mbɔ̂ shu abua Simùn nê, “À ye àvi wàa? Mâ ghɨ̀ nkɨ̀Ꞌɨ̂ a lob yê, à kà shu bòt bê nê bɔ̀ ŋa mèleb è shùù èka bɔ̧. Ka àvi waa shùù èka bɔ̧ ane mèsi mi ndɔ̀Ꞌ ndzòò ane nyemtetsə ti. 45Mâ kɨꞋɨ̀ a lob yê, à kà taꞋa am esèe am. Ka àvi waa bèle ka kaãaã a màsène èka bɔ̧ e bùꞋu àfɨꞋa mâ ghɨ̀ nkɨ̀Ꞌɨ̂ la. 46À ghɨ̂ à kà ŋa mèwet maa nɨ yɔꞋɔ àtsə am, ka tà bɔ̀ɔ̀lè èka bɔ̧ nè mèwet àghaa ntsɔ̧̀. 47Maa shua awê nê, ngɨŋa èkɔŋ tà nyɨꞋte la, è nyɨꞋtè nê, Mbɔ̧ɔ̧mà e waꞋa ènyaꞋne kàbɔ̀ŋ tò. Ka waa waa tà ye nê ye bakà ghɨ a kàbɔ̀ŋ ko nyaŋ Mbɔ̧ɔ̧mà nàa waꞋa la, nàà nyɨ̀Ꞌta wuê adziꞋi èkɔŋ.”
48Yesò làꞋ ale, è shu abua àvi mbɔŋ nê, “Mâ waꞋa kàbɔ̀ŋ wê.”
49Bòt bɔ̂ tò ba e wua njɨ̀a èghɨjɨ nɔ̂ la, bɔ̀ bùꞋ me lèmte nê, “Eyaa wu wàà, tàa ngwaꞋà kàbɔ̀ŋ anè la à?”
50Ka Yesò, shu abua àvi wu nê, “Ghȩ̀ȩ̀ne ntsɔ̧̀, à peme ndɔ̀ kàbɔ̀ŋ wê ndɨ̀ wu à zǐ èntɨ̧ɨ̧ wê ane yaã la.”
Currently Selected:
Lûk 7: mnf
Highlight
Share
Copy
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
