Lûk 19

Yesò bɔ̂ Zàkià

1Yesò kɨꞋɨ nyi Jèlikò me tsèa ngà. 2Tǎt bèfetà èkab taksì kǒ tà lè taꞋa bɔ èghɨ la wu àpfəè və, bɔ mè tɔ̀ atò nê Zàkià. 3Mbɨ̀Ꞌɨ̀ Yesò nàa ntsèà la, Zàkià me kɨ ye wòt tà wu wùà la, ka èlu̧ è ka wuê, ndɨ tà lè kaꞋa bɔ àtetsia, bòt e mè me yaã la. 4Ale, tà lùùlà ngà a mbì ènɔ̧̂ bòt bu, nkɔꞋ a ègwet àyɨt ako ntɨ̧ɨ̧ mbɨ̀Ꞌɨ̀ eye atò, ngu ndɨ Yesò nàa kɨꞋɨ ètsě abot la.

5Mbɨ̀Ꞌɨ̀ Yesò kɨꞋɨ tê ndzəèà abot la, tà lɨ̀ŋkè ègwet shu abua tò nê, “Zàkià, chu a si kwàla, nkàà nê maa lia a lob yê laane.” 6Tà shu ale, Zàkià bê ntèmnê nchu a si nɨ atò nɨŋ nga a lob zi ane mèngùꞋte.

7Bòt bu bàgème bɔ wu abot la, bɔ bùꞋ me lèmte shùa nê, “Tà gha eli a lob wòt mènəè kàbɔ̀ŋ?”

8Zàkià lɔꞋ a si nê, Lefɨ̀Ꞌ, yute ànəê ya e kɨ eshu la. “Maa ŋa àbâ èghɨ bɔ̧ abua bòt ntseb, ebɔ evəèə ètsəkab ègème mâ nəêꞋ nɨ abua wòt la ngò̧ tekwì.”

9Yesò shu abua tò nê, “Mâ kɨꞋɨ a lob yê laane etsì àwê bɨ bòt bê a èbem kàbɔ̀ŋ wɨ̧. Ngu nê, àwɔ̀ Zàkià, à tsiꞋi ngule wòt àndǎ̧ tǎt wa Abàlàghâm mɨ̧̂. 10Aa ale nkàà nê, Waã Wòt kɨꞋa ekɨ bòt bu bɔ nyɔ la, etsì àwɔb a èbem kàbɔ̀ŋ wɔb.”

Èngà̧teme adù̧ àkwȩkab

(Mat 25:14-30)

11Mbɨ̀Ꞌɨ̀ bòt bu bɔ wu abot la, bɔ bela ndzəèa èngǎ̧ Yesò la, tà mè ntsìꞋi shu awɔb èngà̧teme. È li me wu àfɨꞋa mbɔŋ bɔ tsiꞋa nkɨ nyi a Jèlusalèm, bòt bu e tsiꞋa mɨ̀ɨ̀tà nê Mbɔ̧ɔ̧mà tsiꞋa nkɨ epùùle ayaã mbɨ̀Ꞌɨ̀ Fɔ̧̀. 12Yesò shu awɔb nê, “ÈtsəꞋ e li ndɔ̀Ꞌ ntsi, wòt nɨ̧ kǒ lɔ̀Ꞌ me taŋke e ghǎ àlaꞋ a endɨ̌ ako bɔɔ yɔꞋɔ atò ane fɔ̧̀ ka tàa bɔ kua àpfəè. 13Tà tsiꞋa mànga, tà tɔ bɔfàꞋ bi èghem, ŋa wòt ègème èfəꞋə èkab nɨ̧ lemɔꞋ, lemɔꞋ. Mbɔ̂ ngɨ̀ ale shu abua yɔb nê, ‘Bɨ̀ zi ane èwen tè è ngǎ nkuà.’

14“Bòt àlaꞋ a wòt ngaa e li bɔ̀ ka wua nkɔ̀ŋkà atò, ale bɔ tsàà bɔntu̧ akwèn atò nê, ‘Baà kà kɨ nê mbê waa wu fɔ̧̀ wa.’

15“Ka tà ghà bɔ yɔꞋɔ atò ane fɔ̧̀. Tà kuà àpfəè ntɔ bɔfàꞋ bi bu tà li ŋà èkab wu abua yɔb la nê, bɔ̀ kɨꞋɨ yè ye àbȩ̀ bɔ tsiꞋi ale mbɔŋ ane èkab wu la.

16“WafàꞋ mbì kɔꞋ nê, ‘Tê, mâ bɔ tèfəꞋte èkab nɨ̧ èghem ane àbȩ̀ èfəꞋ lu lemɔꞋ, à li ŋa abua am la.’

17“Ŋut wu shu abua wafàꞋ ngaa nê, ‘À ghɨ ntsɔ̧̀, à wu wafàꞋ ntsɔ̧̀! Ndɨ̀ wu à baãaãte àdziꞋ èkab wàa ntsɔ̧̀ la, maa tsia awê àtsəa èpfəè nɨ̧ èghem.’

18“WafàꞋ kǒ lɔ̀Ꞌɔ a si shu abua tò nê, ‘Tê, mâ bɔ tèfəꞋte èkab nɨ̧ tetà̧â̧ ane àbȩ̀ lu à li ŋǎ abua am la.’

19“Ŋut wu mè ntsìꞋi shu abua wafàꞋ ngaa nê, ‘Maa tsia awê àtsəa èpfəè nɨ̧ betà̧â̧.’

20“Wekǒ nè wafàꞋ lɔ̀Ꞌɔ a si shu abua tò nê, ‘Tê, ye èkab wê wu e ndi nkùtê a èbem àdziꞋa ndǐ ndò̧ la. 21E ndi ngua mbɔ̀a awê, na à wu wòt kèkweelè la. Àà nɨ̀a àghɨa kà nɔ̀ŋè, mè fùꞋà àdziꞋa kà liꞋ.’

22“Ŋut wu shu abua wafàꞋ ngaa nê, ‘À wu wafàꞋ kàbɔ̀ŋ. Màa nɨ èngà̧ e dzəâ ètsəê wê la, ka nɨ saꞋa awê adù̧. À li nko nê, e ngu wòt kèkweelè, màa nɨ̀a àdziꞋa kà nɔ̀ŋè, mè fùꞋà àdziꞋa ka liꞋ la, 23ale, è ghǎ ghɨ̂ à kà nɨ èkab am e ghǎ zǐ a lob èkab, mbɨ̀Ꞌɨ̀ è nkua e mbɔ àbȩ̀ à?’

24“Tà shu abua bòt bu bɔ wu abot la nê, ‘Bɨ̀ nɨ èkab wu abua tò la ŋa abua wafàꞋ wu nè tèfəꞋte èkab èghem la’.

25“Bɔ tu̧ nê, ‘Tê, tà bɔ tèfəꞋte èkab èghem tè ndɔ̀Ꞌ.’

26“TsiꞋ è shu awɨ̧ nê, ‘Wòt tà bɔ àghɨ la, bɔɔ kwèꞋne aa taꞋa yaãaã, ka è me wu wu kà bɔ àghɨ la, ko bɔɔ paa kàyaã wu tà bɔ la enɨ. 27Ka è me wu bɔmbù̧ bɔ̧ bu bɔ̀ le kaꞋa wua nkɨ̀a nê e ngu fɔ̧̀ wɔb la, bɨ̀ səèŋnè àwɔb nɨŋ nkɨ̀Ꞌɨ̂ nkɨ̧̀ɨ̧̀me a mbì laã.’ ”

Yesò nyi a Jèlusalèm mbɨ̀Ꞌɨ̀ Fɔ̧̀ nɨ̧

(Mat 21:1-11; Mk 11:1-11; Jn 12:12-19)

28Mbɨ̀Ꞌɨ̀ Yesò shu èngà̧ waa tè ndɔ̀Ꞌ la, tà pààtè bòt bu bɔ wu bɔ̂ tò ba la me ghǎ a mbì lɔb, àpfəèa nɨ̧a Jèlusalèm. 29Mbɨ̀Ꞌɨ̀ tà kɨꞋɨ tê dzə a ngèt Befagè bɔ̂ Betanì a ngèt èbȩ Olìf la, tà tsàà bɔkatè bi babe nê bɔ̀ gha a mbì. 30Shu abua yɔb nê, “Bɨ̀ ghǎ àpfəè zia a mbì lɨ̧ la ko bɨa bê ye a jàkâ kǒ bɔ sèlè, wòt bakà li mè kɔꞋɔ a ègwet tò la. Bɨ̀ yaa nɨŋ nkɨ̀Ꞌɨ̂ a si ŋàa. 31Wòt bììte awɨ̧ àghɨa bɨ yaa nɨ gha ghɨ̀ la, bɨ̀ nê ‘Lefɨ̀Ꞌ laꞋnê yea nkɨà wùà.’ ”

32Ale, bɔ gha ndze àghɨa àgème wuê mbɨ̀Ꞌɨ̀ Yesò shu la. 33Mbɨ̀Ꞌɨ̀ bɔ gha tê me yàà wajàkâ wu la, bòt bu bɔ bɔ la e biite awɔb nê, “Ghǎ ghɨ̂ bɨ me yàa atò à?”

34Bɔ nê, “Tǎt wa laꞋnê bà nɨŋ nkɨ̀Ꞌɨ̂ abua zi.”

35Mbɔ̂ nɨŋ ngà ŋa abua Yesò, nɨ ndǐ tɔb ndzèènè a kɔ̧̀ tò, ŋèꞋe a Yesò ntsia ègwet. 36Mbɨ̀Ꞌɨ̀ Yesò è tsekè a ègwet wajàkâ wu tè me ghǎ la, bòt esàŋkè ndǐ tɔb alu̧.

37Tà kɨꞋɨ tê tà me nyi a Jèlusalèm, àdzìꞋ yu èlu̧ e bùꞋ me chu a mbɨ̧̀ èbȩ Olìf la, ènɔ̧̂ bɔkatè tò bu e bùꞋ me ŋȩa ngùꞋtà a Mbɔ̧ɔ̧mà ane èghɨꞋne èghɨ bu ègème tà ghɨ̌ bɔ ye la. 38“TsiꞋ Mbɔ̧ɔ̧mà lɔ̀ɔ̀le a fɔ̧̀ wu nkɨ̀Ꞌa ane èlen tò la; Àlàŋkè a wu a kèfɔ̧̀ Mbɔ̧ɔ̧mà, mèngùꞋte wu abua Mbɔ̧ɔ̧mà wu a ègwet la.”

39Bèfalèsiì ko bɔ wu ane ènɔ̧̂ bòt bu la, e shu abua Yesò nê, “NyɨꞋtà, ŋȩ bɔkatè bê nê bɔ̀ buŋ.”

40Yesò bɨ̀ɨ̀lè nê, “Ane nkûŋ, tsiꞋ è shu awɨ̧ nê bɔ bua, ko àti yaa aa me ŋȩȩ.”

Yesò dɨ̂ ambo bòt àpfəèà nɨ̧ a Jèlusalèm

41Mbɨ̀Ꞌɨ̀ Yesò kɨꞋɨ tê me dzə àpfəèà nɨ̧ a Jèlusalèm la, tà lɔ̀kè àvi ndzè àpfəa mbɔŋ, mbùù èdɨ̂ ambo bòt àpfəè və. 42Nê è me wu laane waa ale bɨ nchɨɨme nko ndɨ betsiꞋa wòt ghɨ̀ ka mbɔ àlàŋkè la; ka mbɨ̀Ꞌɨ̀ àa si àfɨ̀Ꞌ yaa la betsiꞋa bɨ̀ ka bɔ yùà. 43Àfɨ̀Ꞌ aa li me wu bɔmbù̧ bɨ̧ e kuule àkaã nkààle awɨ̧ a èbèm, tè àdziꞋa bɨa dzəâ la a ka wuê. 44Mbɔ̂ ngɨ̀ ale nyi a èbèm àpfəè yu, ndììmè bòt bàgème bɔɔ a èbèm la, mè mbùù lobtsə tègème tè ngà ndzəè ane ètetsi. Èghɨ baa aa li ghɨ̌ a èlɨ waa, nkàà nê bɨ le kaꞋa nɨ àli yu Mbɔ̧ɔ̧mà le kɨꞋɨ etsì àwɨ̧ a èbem kàbɔ̀ŋ wɨ̧ la mbɨ̀Ꞌɨ̀ àghɨ ako.

Yesò ghà a lob nɨ̧ Mbɔ̧ɔ̧mà

(Mat 21:12-17; Mk 11:15-19; Jn 2:13-22)

45Yesò ghɨ̀ ale, nyi a èbem lob nɨ̧ Mbɔ̧ɔ̧mà fəè bòt bu fɨ̧̀ɨ̧̀nà èghɨ la. 46Mè shu awɔb nê, “Àkate a Mbɔ̧ɔ̧mà a laꞋnê, ‘Lob yaã wu lob bɔ̀ɔ me tsàꞋtè am a èbèm la’, ka bɨ nɨŋ ngɨ̀ è tsiꞋi àdziꞋa bètsɔŋ aa nkɨ̀Ꞌa ndò̧ò̧tà la.”

47Yesò li ngua nyɨ̀Ꞌta àli àgème a èbem lob nɨ̧ Mbɔ̧ɔ̧mà. Bètǎt bèntsìà mèpɨ̧̀ Mbɔ̧ɔ̧mà nê bènyɨꞋtà mbɨ̧te Musì nè bèfɔ̧̀ e me kɨ bùŋe atò. 48Ka bɔ ka ko ndɨ bɔ̀ɔ ghɨ̌ la, nkàà nê bòt bàgème è le wua njùtâ mènəè tà shua la, tè wòt kà wua nkɨ̀a nê èngà̧ wemɔꞋ è tsè ka ye zə.

Currently Selected:

Lûk 19: mnf

Highlight

Copy