Jɔ̌n 12

Bɔ zì mèwet ane Yesò a Betanì

(Mat 26:6-13; Mk 14:3-9)

1È li ntsìꞋi èli bentùa àlia èpǎ̧ Màntsea a ègwet a kùꞋ, Yesò kɨꞋɨ a Betanì, adzìꞋ yu Lazalɔ̀s wu tà li mpfə Yesò yù̧ù̧me atò la, nàa ntsèka la. 2Tà kɨꞋɨ ale bɔ laã èghɨjɨ abua tò, Màta me ghàbte, Lazalɔ̀s wu wòt kǒ ane bòt bu bɔ̂ tò ba etseke a si me jɨ èghɨjɨ la. 3ÀfɨꞋa mbɔŋ, Màlià nɨ andɔŋ mèwet kǒ nàa ntsòa èkab bɔ ghɨ ane nat kà bɔ fȩ̀ȩ̀tè la nɨŋ ndzɔ̀Ꞌɔ̀ èka Yesò mbɔ̂ nɨ nyemtetsə ti nɨŋ ndzò bùà. Àghaa ntsɔ̧̀ yu ane mèwet mu la a shɨꞋ lob mbɔŋ.

4Ka Judàs Iskaliòt, wakatè Yesò ko (e wu taà li fɨ̧ɨ̧ne a tò la) biitè nê 5“Bɔ yaã ngɨ̀ nà ka bɔ̀ ka fɨ̧ɨ̧ne mèwet maa eŋa èkab mbɔŋ abua bòt ntseb à? Wu mèwet bɔ fɨ̧̀ɨ̧̀nà ko bɔɔ ŋa ane àfaꞋa wòt faꞋa ane èngùꞋebȩ la.” #12:5 Ètsəê èkab waa ane ndɨ̧ Glɨ̂k wu bèdìnalì ènkɨ̀ yetat. Wu èkab betsiꞋa wòt fàꞋ ane èngùꞋebȩ la. 6Tàà mbììta ale è kà lem ngu nê, tàà ŋǎ èghɨ abua bòt ntseb, tà wua mbììta wuê èlɨ wu tà wu tsɔŋ la. Tà li ngu mpàŋa ambè èkab ale, me tsi è we ye kɔ̀ŋke la njɨ̀a vi.

7Tà làꞋ ale Yesò nê “Bɨ̀ ka tsi ŋǎ tò ngoꞋ, ntsiꞋ tà nɔ̀ŋe ànəê yaa tà ghɨ̀ la a èntɨ̧ɨ̧ vi ndɨ̀ wu tà lè wua nkwàꞋtà nê yea li e ghɨ̌ yùà àlia mâ pfə la. 8Bòt ntseb e wu bɨ tò ba àfɨ̀Ꞌ àgème, è me wu am è ka wu wu ne nɨ̧̀ àfɨ̀Ꞌ àgème.”

9ÀfɨꞋa ènɔ̧̂ Bèjuê bu a zə nê tà wu abot la, bɔ kɨꞋɨ̀. Me kɨꞋɨ ale bɔ̀ ka wua nkɨ̀Ꞌa nkaa a Yesò zia ndziꞋne, bɔ wua nkɨ̀Ꞌa eye a Lazalɔ̀s wu tà li mpfə Yesò yù̧ù̧me atò la. 10Ale, bètǎt bèntsìà mèpɨ̧̀ Mbɔ̧ɔ̧mà e me taŋke ebùŋe a Lazalɔ̀s mɨ̧̂, 11nkàà nê ànəa a ghɨ ane tò la, a ghɨ̂ Bèjuê nyaŋ e me sa wɔb ngà ndzìà èntɨ̧ɨ̧ wɔb ane Yesò.

Yesò nyi a Jèlusalèm mbɨ̀Ꞌɨ̀ fɔ̧̀ nɨ̧

(Mat 21:1-11; Mk 11:1-11; Lk 19:28-40)

12ÈtsəꞋ e li ntsi taꞋa ènɔ̧̂ bòt bu aà kɨꞋɨ àdziꞋa èpà̧ wu la, e zə nê Yesò nàà nkɨ̀Ꞌa Jèlusalèm. 13Ale, bɔ nɨ ètsə maŋ ngà alu̧ ekwene ane tò. Me ghǎ ŋȩ̀a shua nê “MèngùꞋte wu abua Mbɔ̧ɔ̧mà; Mbɔ̧ɔ̧mà lɔ̀ɔ̀le a wòt wu nkɨ̀Ꞌa ane èlen tò la; Mbɔ̧ɔ̧mà lɔ̀ɔ̀la Fɔ̧̀ bòt Izəèlȩê.” 14Yesò ghɨ̀ ale, ndzè wajàkâ kǒ nkɔꞋ ntsèke a ègwet wuê mbɨ̀Ꞌɨ̀ bɔ shɨ a èbem Àkata Mbɔ̧ɔ̧mà la nê,

15“Bòt Zayɔ̀n, bɨ ka mbɔ̀a; bɨ̀ ye,

Fɔ̧̀ wɨ̧ nàà nkɨ̀Ꞌa,

tà tseke a ègwet wajàkâ.”

16Ànəê yaa aà ngɨ̀à ale bɔkatè Yesò e ka zîꞋ nko lə ayùà. Mbɔ̧ɔ̧mà tseke tê tà li tà yu̧u̧me atò ane èwuu èlɨ̀ ko e bê ntsea waa waa la, ka bɔ bɔ̂ nkù̧ù̧te nê àghɨa bɔ ghɨ ane tò la wu ànəa Àkata Mbɔ̧ɔ̧mà a shu ane èlen tò la.

17-18Àghɨa a li ngɨ̀ ka bòt e me dzəa nga ekwene ane tò la wu nê, bɔ li ndzaŋe ezə ànəa kà ye àfəa yu tà li ngɨ ane Lazalɔ̀s la. Bɔ li ndzə nkàà nê bòt bu bɔ li ngu bɔ̂ Yesò ba àfɨꞋa Lazalɔ̀s li mpfə, tà kɨ̀Ꞌɨ̂ ntɔ atò a èbem èsî njù̧ù̧me atò la, e li ndzaŋe wua ntsɔ̀tà ànəa mbɔŋ abua waa waa. Eyaa wu àghɨa a li ngɨ̀ ka bòt e me taa nga eye a Yesò la. 19Bèfalèsiì e ye ale nê, “Àghɨa ko bàa mèe ko ghɨ̀ la a te ntsě. Ye ndɨ àlaꞋ àgème a tsiꞋa nkuŋa wuê atò la.”

Bòt Glɨ̂k ko e kɨꞋɨ̀ me kɨa Yesò

20Bòt Glɨ̂k ko e li ngu àyɔb ayɔɔ bòt bu bɔ kɔꞋ ngà a Jèlusalèm àdziꞋa èpǎ̧ wu ewùꞋte a Mbɔ̧ɔ̧mà la. 21Ale, bɔ kɨꞋɨ abua Filìb wu tà dzəa Bèsedà a Galìlî la, shua abua tò nê, “Tê, baa nkɨ eye a Yesò.” 22Bɔ làꞋ ale Filìb ghà shua Andùlù bɔ̂ tò efɔte ngà shu a Yesò.

23Yesò shu abua yɔb nê “AfɨꞋa Mbɔ̧ɔ̧mà nàa nyɨꞋte ènɨ̧ Waã Wòt la a kuêꞋ. 24Ane nkûŋ, tsiꞋ è shu awɨ̧ nê bɔ bakà nyɔꞋɔ kèmbèm ntsəè a si tè kea tuu, kèmbèm fu kea fì, ko kea tèꞋà wuê kemɔꞋ. Mbə kè tu kèmbèm fu kè fia ka ke shɨꞋ ndzì tèbèmtsə nyaŋ. 25Wòt tàa nkɔ̀ŋkà mèntsèke mi la, naa saãaã mùà. È wu ewe tàa ka kɔ̀ŋke mèntsèke mi a sitsǎꞋ ŋàa la, ko taa li bɔ mèmpème kàlìà. 26Wòt me kɨ ewu wafàꞋ am, tà bɔ̌ ndɨ tàa me kùŋè am la mbɨ̀Ꞌɨ̀ àdziꞋa màa və la, ŋut wu àzi abot mɨ̧̂. Wòt me fàꞋa abua am ko Tǎt am naa me ŋa kènuke abua tò.”

Yesò làꞋ ànəa èvə li

27Yesò nê, “Èntɨ̧ɨ̧ am aà mbɨ̀a àfɨ̀Ꞌ yaa. È ngu anè laꞋnê ghà à? ‘Tè betsiꞋa e nê Tǎt am tsì am a èbem ngoꞋ yaa?’ ChaꞋ è nka shu ale a, nkàà nê e ndi nkɨ̀Ꞌɨ̂ a sitsǎꞋ ŋàa mbɨ̀Ꞌɨ̀ eye ngoꞋ yaa. 28Lefɨ̀Ꞌ lɔ̀kè èlen lê ntsaa ègwet.”

Tà làꞋ ale, àtɔŋ a tse a ègwet nê, “Mâ lɔ̀kè èlen laã tè ndɔ̀Ꞌ mè mbèle elɔ̀ke.” 29Ènɔ̧̂ bòt bu e tɨ̧ɨ̧ abot la e zə àtɔŋ yu ale nê wu èfâŋ e gwele la. Èbeko e nê, wu wantu̧ Mbɔ̧ɔ̧mà tà làꞋa abua tò la.

30Yesò bɨ̀ɨ̀lè nê, “Àtɔŋ yaa à ka laꞋa ambo yaã, a làꞋa ambo yɨ̧. 31Eyaa wu àfɨꞋa Mbɔ̧ɔ̧mà nàa saꞋa ngɔ̀ŋ yaa la. Eyaa mè ngu àfɨꞋa Mbɔ̧ɔ̧mà nàa tsɔꞋɔ wòt wu tà wua àtsəa ngɔ̀ŋ yaa la emàꞋa àbȩ la. 32È me wu am, ko àfɨꞋa bɔ lɔ̀kè am a si ntsaa ègwet la maa ghɨ̌ bòt bàgème aa kɨꞋɨ abua am.” 33Tàà ndàꞋ àyaa ale ngua nyɨ̀Ꞌta èwuu èvə lu yèa pfə lùà la.

34Ale, ènɔ̧̂ bòt bu e bɨ̀ɨ̀lè èngǎ̧ tò nê, “Ba ko aya nê, Àkata Mbɔ̧ɔ̧mà a laꞋnê Fɔ̧̀ wu Mbɔ̧ɔ̧mà li ndzɔꞋ etsàà la naa li ewu ane àlia nè àlia. Ale, à ghɨ̀ na ka nê bɔɔ lɔ̀kè Waã Wòt a si etsoŋa ègwet à? Waã Wòt nàa ně ngu wà à?”

35Yesò bɨ̀ɨ̀lè nê “ÈkaꞋà e bele nè nɨ̧̀ ane ketem àfɨ̀Ꞌ àko. Bɨ̀ me ghȩȩne àfɨ̀Ꞌ yaa èkaꞋà è bele la, mbɨ̀Ꞌɨ̀ ka ndzěm kwene ane yɨ̧. Wòt nàa ngɨ̀ tà me ghȩ̀ȩ̀ne a èbem ndzěm tà kà ko àdziꞋa ye ghà la. 36Bɨ̀ zǐ èntɨ̧ɨ̧ wɨ̧ ane wòt wu tàa ngɨ̀à èkaꞋà e wua la, àfɨ̀Ꞌ yaa bɨ̀ wu ne tò la, mbɨ̀Ꞌɨ̀ etsiꞋi bòt bɔ̀ɔ ntsèka a èbem èkaꞋà la.” Yesò laꞋà èngà̧ waa abua bòt ale, ndɔ̀Ꞌ abot ngà ndò̧ò̧tè àwɔb.

Bèjuê e tu̧u̧ ezǐ èntɨ̧ɨ̧ wɔb ane Yesò

37Yesò batè ngɨ̀ tèwuute ènəê kà ye fɨ̀Ꞌ ayɔɔ bòt baa ale, ka bɔ̀ ka lem ndzì èntɨ̧ɨ̧ wɔb ane tò. 38A li ngu anè mbɨ̀Ꞌɨ̀ ànəa ndàꞋàtɔŋ Mbɔ̧ɔ̧mà Àsayà li shu la aa wu nkûŋ, nê,

“Tê, wa bɨ̧ɨ̧ne ntu̧ yu ba tsɔ̀tè la à?

Wòt wu Mbɔ̧ɔ̧mà nyɨꞋte mètàŋ mi abua tò la wu wà à?”

39Àghɨa ko a li mè ngɨ̀ ka bòt bu è ka zi mèntɨ̧ɨ̧ mɔb ane Yesò la wu nê Àsayà li mè shu nê,

40“Mbɔ̧ɔ̧mà liime àghɨ ayɔb,

mè ngɨ̀ bɔ ka wua nkoa èdziꞋ,

mbɨ̀Ꞌɨ̀ ka bɔ gha ghɨ̌ nɨ̀ àghɨ ayɔb ndze,

mè nɨ ètû̧ bɔb ndzə,

ndɔ̀Ꞌ nko ane mèntɨ̧ɨ̧ mɔb,

ngèble awɔb nkɨ̀Ꞌɨ̂ maa bə awɔb.”

41Àsayà me shu ayaa ale ngu ndɨ tà ye ènɨ̧ Yesò ka ndàꞋ ànəa tò la.

42A li mbàte ngu anè ale, ka bɔɔjuŋ nyaŋ ayɔɔ Bèjuê bu e bɔ̂ ndzì èntɨ̧ɨ̧ wɔb ane Yesò ka ndɨ̀ wu bɔ̀ɔ mbɔ̀a Bèfalèsiì la, bɔ̀ ka nɨ ètsəê wɔb elàꞋa bòt aa zə, mbɨ̀Ꞌɨ̀ ka bɔ fəè àwɔb a èbem lob Mbɔ̧ɔ̧mà yɔb. 43Bɔ me ghɨ ale ngu ndɨ bɔ̀ɔ nkɨà mèngùꞋte è dzə abua wɔ̀bȩ̂ la tè ntsè è me è dzə abua Mbɔ̧ɔ̧mà la.

44ÀfɨꞋa mbɔŋ Yesò ŋȩ nê, “Wòt tà zǐ èntɨ̧ɨ̧ vi ane yaã la ka zia wuê ane yaã, tà wua ndzìà fɔɔle ane wòt wu tà tsàà am la. 45Wòt tà ye am la ko nê ye ye wòt wu tà tsàà am la mɨ̧̂. 46Mâ kɨꞋɨ a ngɔ̀ŋ ŋaa mbɨ̀Ꞌɨ̀ wòt tàa ngɨ̀à èkaꞋà e beꞋa la, mbɨ̀Ꞌɨ̀ wòt ègème tà zi èntɨ̧ɨ̧ vi ane yaã la ka tsi tseke a èbem ndzěm a.

47“Wòt zəa mèngǎ̧ mɔ̧ mbakà ghɨ mbɨ̀Ꞌɨ̀ nàa shua la ko è nka saꞋa tò a, nkàà nê e ndi è nka wua nkɨ̀Ꞌa saꞋa bòt ngɔ̀ŋ, e ndi ngua nkɨ̀Ꞌa ŋa wɔb mèmpème. 48Àghɨ aa və àa li saꞋa waa waa tà tu̧ am, mè ntu̧ ànəa mâ shu la. Mèngǎ̧ mâ làꞋà la ka nàa li esaꞋa ŋut àlia ngɔ̀ŋ nàa li elìà la. 49Aa ale nkàà nê è nka laꞋà mènəè è dzəâ àtsəa am la; Tǎt am wu tà tsàà am la ka tà shu am ànəa màa me làꞋa ntsɔ̀tà la. 50Mâ ko mɨ̧̂ nê èngǎ̧ wu tà li nê è me làꞋà la aa ŋǎ mèmpème kàlìà. Ale, ànəa e ndàꞋà la wu wuê ànəa Tǎt am è shu nê è ndaꞋa la.”

Currently Selected:

Jɔ̌n 12: mnf

Highlight

Copy