Jɔ̌n 11

Èvə Lazalɔ̀s

1Wòt kǒ èlen tò wu Lazalɔ̀s la li ntsèke tè nkwene àghɔ̧. Àpfəèa tò a li ngu a Betanì, è wù àdziꞋa bɔnyɨ tò Màlià bɔ̂ Màta àa ntsèka la. 2Màlià waa wu àvi wu tà li nɨ̀ mèwet àghaa ntsɔ̧̀ ndzɔ̀Ꞌɔ̀ èka Yesò ndɔ̀Ꞌ nɨ nyemtetsə ti nɨŋ ndzò la. Mbɨ̀Ꞌɨ̀ Lazalɔ̀s wanyɨ wɔb wua ngò̧ò̧nà la, 3Màlià bɔ̂ Màta e tsàà ntu̧ abua Yesò nê, “Tê, wòt wê wu à taꞋa wua nkɔ̀ŋkà la, nàà ngò̧ò̧nà.”

4ÀfɨꞋa Yesò zə la, tà nê, “Eyaa ntsě àghɔ̧ àa ghɨ̌ taa pfə la; a kɨ enyɨꞋte ènɨ̧ Mbɔ̧ɔ̧mà, mbɨ̀Ꞌɨ̀ bòt aa ye e wùꞋtè èlen Waã Mbɔ̧ɔ̧mà.” 5Yesò li ngua nkɔ̀ŋkà Màta bɔ̂ Màlià nè wanyɨ wɔb Lazalɔ̀s. 6Tà zə nê Lazalɔ̀s nàà ngò̧ò̧nà ale mbɔ̂ mè ntsèke èlibȩ bebe adzìꞋ yu tà wu la.

7Mbɨ̀Ꞌɨ̀ èli bu bebe e tse la, tà shu abua bɔkatè bi nê, “Bɨ̀ ghɨa bà mèe ngwènè a Jùdià.”

8Bɔkatè tò bu e shu abua tò nê, “Labȩ̀, Bèjuê aa wua nkɨ etemte awê wu kwàꞋ ane èli bìa, à mè me kɨ egha abot?”

9Yesò bɨ̀ɨ̀lè nê, “Ka mâ ye nê àliabȩ ebùꞋu a ntɔtetsɔ̌Ꞌ eghǎ dzə a nyèmtèsi a bɔ wu nyèm èghem ntsɔ̀b tebe à? Wòt tàa ngȩ̀ȩ̀nà nèngû̧ la nàà kà kwene a si, nkàà nê tà bɔ èkaꞋà, àbȩ a mè me fəə. 10Ka è wu wòt tàa ngȩ̀ȩ̀nà ètsəꞋ la, tà me kwene a si, nkàà nê tà bakà bɔ èkaꞋà.”

11Mbɨ̀Ꞌɨ̀ Yesò làꞋ mpàâ la, tà nê, “Shu̧ ya Lazalɔ̀s nàà ndia ka e mbɔ̂ gua nga e yô̧ atò.”

12Bɔkatè tò e shu abua tò nê “Tê, è wu nê tà lia li ko tà bele etàŋne.” 13Bɔɔ̀ shua ale, Yesò wua ndàꞋà ànəa èvə tò, ka bɔ bɔ̂ me mɨ̀ɨ̀te nê tà wua ndàꞋà wuê ànəa kèlɔ.

14ÀfɨꞋa mbɔŋ Yesò shu awɔb nkûŋ nê, “Lazalɔ̀s pfə, 15ka a bɔ̂ŋ na mâ ghɨ̂ è nka wu abot la, mbɨ̀Ꞌɨ̀ bɨa zǐ mèntɨ̧ɨ̧ mɨ̧ ane yaã. Bɨ̀ ghɨa bà gha ndzea tò.”

16Tɔmasì wu bɔ̀ɔ ntɔ atò ane wabenyì la, shu abua àbəꞋa bɔkatè ko bu nê, “Bɨ̀ ghɨa bà kùŋe a Tǎt wa mbɨ̀Ꞌɨ̀ epfə ba tò ba nɔ̂.”

Yesò wu wòt tàa njù̧ù̧ma bòt mè ngɨ̀à bòt e pema la

17Yesò ghà tê tà wu abot, tà zə nê àpfəꞋta Lazalɔ̀s a tseke a èbem èsî ane èlibȩ bekwì. 18E lɔ̀Ꞌɔ Betanì eghǎ Jèlusalèm li ngu mbɔ̀ŋè bèmȩl babe. 19Ale, àbəꞋa Bèjuê nyaŋ a lɔꞋɔ abàꞋ və nkɨ̀Ꞌɨ̂ mbɨ̀Ꞌɨ̀ ezi mèntɨ̧ɨ̧ Màta bɔ̂ Màlià ane ànəa èvə wanyɨ wɔb. 20ÀfɨꞋa Màta zə nê Yesò nàà nkɨ̀Ꞌa la, tà lɔ̀Ꞌɔ a si nga nkwene ane tò. Tà me ghǎ ale Màlià tseke a lob.

21Màta ghà ale shu abua Yesò nê, “Tê, àa ghɨ̀ ale ngu adzìꞋ yaa ko wanɔ̧ bakà pfə. 22Ka wuê àfɨ̀Ꞌ yaa, mâ ko nê à shua wuê nê Mbɔ̧ɔ̧mà ghɨ̌ kǎ ànəê leꞋ, ko taa ghɨ̌.”

23Yesò shu abua tò nê, “Wanyɨ wè nàà mèe yu̧u̧me.”

24Màta shu abua tò nê, “Mâ koê nê taa li mèe lɔ̀Ꞌɔ a si ane àli yu bèmpfəà bèa yu̧u̧me la.”

25Yesò shu abua tò nê, “E ngu wòt tàa njù̧ù̧ma bòt ngɨa bɔ pema la. Wòt màà mpfəà ko tà bele yû̧ na tà zìà èntɨ̧ɨ̧ vi ane yaã la, 26wòt ègème tà wu yû̧ mè ndzì èntɨ̧ɨ̧ vi ane yaã la ka wu li tsi epfə. À bɨ̧ɨ̧ne ànəa e shua la à?”

27Tà bɨ̀ɨ̀lè nê, “Oò Tè, mâ bɨ̧ɨ̧ne, nê à wu Waã Mbɔ̧ɔ̧mà, à wu Fɔ̧̀ wu tà li ndzɔꞋ etsàà la, ye wu tà bɔ ndɨ tàa kɨꞋa sitsǎꞋ la.”

Yesò dɨ̀

28Màta è làꞋa ànəê yaa ale, ngà ntɔ wanyɨ vi Màlià a ntsèm shu abua tò nê, “NyɨꞋtà wa è kɨꞋɨ, tàa ntɔ awê.” 29Màlià zə ale, mbê nkȩ ndɔꞋ a si nga ekwene ane tò. 30Tàà nga àfɨꞋa mbɔŋ ale, Yesò ka zîꞋ nkɨ̀Ꞌɨ̂ tê dzə a èbem àpfəa mbɔŋ, tà bele àdzìꞋ yu Màta ghɨ̂ nkɨ̀Ꞌɨ̂ nkwene ane tò la. 31ÀfɨꞋa Bèjuê bu bɔ wua lob ndzìà èntɨ̧ɨ̧ Màlià la e me ye tà kȩ̂ a si me ghǎ àbȩ la, bɔ lɔꞋte a si mbà̧aã kwene tò, ntsìꞋa nta nê, tà mè nga tseke àtsəasì me dɨ̌.

32Mbɨ̀Ꞌɨ̀ Màlià ghà tê ndzə àdziꞋa Yesò wu la, ndzea tò la, tà ŋèꞋe avi ndebe a si a tèkate tò nê, “Tê, àà ghɨ̌ ale ngu àdzìꞋ yaa ko wanɔ̧ bakà pfə.”

33ÀfɨꞋa Yesò ye atò ndɨ̀à la, mè ndzəâ ndɨ Bèjuê bu bɔ̂ tò ba e yaã nkɨ̀Ꞌɨ̂ nɔ̂ la, e dɨ̀a yɔb mɨ̧̌ la, a sɔ̀ɔ̀bè èntɨ̧ɨ̧ tò, tèsȩtsə te ku atò kwàꞋ ànyaꞋne. 34Tà bììte awɔb nê, “Bɨ tua tò a ka adzìꞋ à?”

Bɔ shu abua tò nê, “Tê, kɨꞋɨ ndze abot.”

35Yesò dɨ̀.

36Bèjuê e ye nê, bɨ̀ ye ndɨ èntɨ̧ɨ̧ tò aa wu ane Lazalɔ̀s kwàꞋ ànyaꞋne la.

37Ka àbəèꞋa yɔb ako a nê, “Tò waa tà li ngàꞋa àghɨ a wòt àghɨ àleme la nàà kàꞋà wu eko kele mbê waa mbɨ̀Ꞌɨ̀ tà pfə?”

Yesò yù̧ù̧me a Lazalɔ̀s

38Tèsȩtsə te mè nku a Yesò kwàꞋ ànyaꞋne tè tà gha àtsəasì yu. Àtsəasì yu li ngu mbəèꞋ bɔ bɨŋe èti nɔ̀ŋe a ètsəê la. 39Yesò nê, “Bɨ̀ tsì èti làa.”

Tà shu ale, Màta, wanyɨ mbê wu tà pfə la mè shu abua tò nê, “Tê, àghaa kàbɔ̀ŋ aà anè a bùꞋ te me kɔꞋɔ nkàà nê mbɨ̀Ꞌɨ̀ tà pfə la wu èlibȩ bekwì.”

40Yesò shu abua tò nê, “Mâ yaã è nka shu abua yê nê, à zìà èntɨ̧ɨ̧ wê ane Mbɔ̧ɔ̧mà ko àa ye mètàŋ tò?” 41Ale, bɔ bɨŋè èti lu ntsì, Yesò lɔ̀ke àvi ndȩ̀ ègwet nê, “Tê, mâ taꞋa kɔ̀ŋke ndɨ̀ wu à yute èngǎ̧ am la. 42Mâ ko nê àa njùta èngǎ̧ am àfɨ̀Ꞌ àgème, ka e tsiꞋa shua anè nkàà bòt baa bɔ tɨ̧ɨ̧te a si ŋàa la, mbɨ̀Ꞌɨ̀ bɔɔ ko nkûŋ, nkûŋ nê, àwɔ̀ ka à li tsàà am la.”

43Mbɨ̀Ꞌɨ̀ Yesò tsàꞋte Mbɔ̧ɔ̧mà a èlɨ waa la, tà ŋȩ̂ ane àtɔŋ nɨ̧ nê, “Lazalɔ̀s, dzəa àbȩ!” 44Mpfəà wu lɔ̀Ꞌɔ a si ndzəè, nè èbu bi bɔ̂ èka bi bɔ kuule ane edziꞋi ndǐ, mbɔ̂ ndèbe èsi tò ane àdziꞋa ndǐ la. Yesò shu abua yɔb nê, “Bɨ̀ tsi ndǐ tu a mbɨ̧̀ tò la tà me ghǎ.”

Bɔ taŋkè ebùŋe a Yesò

(Mat 26:1-5; Mk 14:1-2; Lk 22:1-2)

45Mbɨ̀Ꞌɨ̀ Bèjuê bu bɔ nkuŋa Màlià ngà la, e ye àghɨa Yesò ghɨ̀ la, àbəèꞋa yɔb nyaŋ a zì èntɨ̧ɨ̧ wɔb ane to. 46Ka àbəèꞋa yɔb ako a ghà ne abua Bèfalèsiì, shu àghɨa Yesò ghɨ̀ la. 47Ale, bètǎt bèntsìà mèpɨ̧̀ Mbɔ̧ɔ̧mà, nè Bèfalèsiì e tɔ èfete bɔɔjuŋ.

Mbììte nê, “Bà wu anè e ghɨ̀ na à? Mbê waa nàà ngɨ̀à tèwuute ènəê kà ye fɨ̀Ꞌ kwàꞋ ànyaꞋne. 48Ba wu anè sa atò tà me ghɨa nɨa ngà wuê ne mbì ko wòt ègème naa zǐ èntɨ̧ɨ̧ vi ane tò. Ngɨ̀ ale, ko bòt Luêm aa kɨꞋɨ tsòkè lob nɨ̧ Mbɔ̧ɔ̧mà ya e mě eliime àlaꞋ aya.”

49Ka wòt kǒ ane yɔb, èlen tò wu Kefàs tà bɔ̂ ngu àtsəa bèntsìà mèpɨ̧̀ Mbɔ̧ɔ̧mà a èngùꞋ mbɔŋ la shu abua yɔb nê, “Bɨa nè ngu bòt kà ko àghɨ. 50Bɨ bakà ko nê, a bɔ̂ŋ nê wòt wemɔ̀Ꞌ pfə àtsəa bòt tè ntsè ndɨ àlaꞋ àgème àa leme la?”

51Kefàs nàà ndàꞋ ale, è kà lem ngu mèmɨ̀ɨ̀te tò, ka ndɨ̀ wu tà wu àtsəa bèntsìà mèpɨ̧̀ Mbɔ̧ɔ̧mà a èngùꞋu mbɔŋ la, Mbɔ̧ɔ̧mà ghɨ̀ tà shu ànəa àa li ete la, nê, Yesò naa li pfə àtsəa bòt àlaꞋ a mbɔŋ. 52Ka tà kà lem ngua nga epfə wuê àtsəa bòt àlaꞋ a mbɔŋ. Tà wua nga epfə mbɨ̀Ꞌɨ̀ efete bɔ̧ Mbɔ̧ɔ̧mà bu bɔ taatè me tseke a èdziꞋ èdzìꞋ la, bɔɔ tsiꞋi mbɨ̀Ꞌɨ̀ wòt wemɔ̀Ꞌ. 53Ale, ebuꞋu ane àlia ngaa me ghà ne mbì, bɔɔjuŋ bu e me taŋke ndɨ bɔ̀ɔ ebuŋe Yesò la.

54Àyea mbɔŋ a ghɨ̀, Yesò kà wua ntsia ngȩȩne ayɔɔ Bèjuê ane ndɨ bɔ̀ɔ ye atò la. Tà lɔꞋɔ abot ntsiꞋi ghǎ Eflèm, è wù adzìꞋ ako a ngèt àbâ àlaꞋ àyuube la bɔ̂ bɔkatè bi etseke a èbem àpfəèa mbɔŋ.

55Bɔɔ ngɨa àfɨ̀Ꞌ yaa ale, àlia Bèjuê àa njɨ̀a èpǎ̧ Màntsea a ègwet wɔb la, a tsiꞋa nkùꞋà. Ale, bòt nyaŋ e lɔꞋɔ a èdzìꞋ èdzìꞋ nkɔꞋ nga a Jèlusalèm, e shùù ènyit mbɨ̀Ꞌɨ̀ ekùꞋu e mbì Mbɔ̧ɔ̧mà a mànjɨa èpǎ̧ wu. 56Bɔ bù̧ù̧te a èbem lob nɨ̧ Mbɔ̧ɔ̧mà yu ale me lȩ̀a Yesò, mè me biite a kètsìà wɔb nê, “Bɨa mɨ̀ɨ̀ta naà? Tè bɨ ye nê, betsiꞋa tà kà kɨꞋɨ a èpà̧ waa?” 57Bɔɔ ngɨ̀à ale, bètǎt bèntsìà mèpɨ̧̀ Mbɔ̧ɔ̧mà nè Bèfalèsiì e yaŋe shu nê, wòt koê àdziꞋa tà wù la, ŋut ghɨ̀ bɔ koê, mbɨ̀Ꞌɨ̀ ebaãaã tò.

Currently Selected:

Jɔ̌n 11: mnf

Highlight

Copy