Jɔ̌n 10

Yesò, ngule mbaabà njɨ̀

1Yesò nê, “Ane nkûŋ, tsiꞋ è shua wɨ̧ nê, wòt tà pààte ètsəê àkààla njɨ̀, nkɔꞋɔ a mbɨ̧̀ àkaã ka nyi a èbèm la wu tsɔŋ tàa nchùa àtsəa àghèb la. 2È me wu wòt tà tsě ane ètsələèꞋ ka nyî la è wu mbaabà njɨ̀te mbɔŋ. 3Tàa me kɨꞋɨ, wòt wu tàa mbààba ètsələèꞋ àkààla njɨ̀ tu la, tsɔꞋɔ ètsələèꞋ abua tò. Njɨ̀te mbɔŋ te ko àtɔŋ tò, tà mè me tɔ njɨ̀ ti ane tèlen tɔb, nɨa wɔb nɨa nga àbȩ. 4Tàa ngɨ̀ tà nɨ ti ne njɨ̀ tu tègème tè tà dzə àbȩ, tà me ghȩ̀ȩ̀ne a mbì lɔb ngà, te me kùŋe atò nkàà nê te ko àtɔŋ tò. 5BetsiꞋa tè ka kuŋe a gɨ̧̀, tèa ngɨ̀ te me lùùla tò lùùla, nkàà nê te bakà ko àtɔŋ tò.” 6Yesò làꞋa ane èngà̧teme ale, bɔ̀ ka lem nko ànəa tà shua la.

7Ale, Yesò mè shu abua yɔb nê, “Ane nkûŋ, tsiꞋ è shua wɨ̧ nê, e ngu mbɨ̀Ꞌɨ̀ ètsəê àkààla njɨ̀tsə. 8Bòt bu bɔ li nkɨ̀Ꞌɨ̂ a mbì laã la, wu bètsɔŋ nè bè chua àtsəa àghèb, ka njɨ̀ tu te ka yute àtɔŋ yɔb. 9E ngu ètsəê àkàt. Wòt tse ane yaã ka nyî, ko tàà peme, wuê mbɨ̀Ꞌɨ̀ njɨ̀ nàa ndzəa a èbem àkàt nga àbȩ nkwèla èfəêꞋ mè nkɨ̀Ꞌa nyia la. 10Tsɔŋ nàa ngɨ̀ tà wua nkɨ̀Ꞌa wuê mbɨ̀Ꞌɨ̀ etsɔ, ebùŋe, tsòke. E ndɨ nkɨ̀Ꞌɨ̂ mbɨ̀Ꞌɨ̀ e ghɨ̌ bòt aa bɔ mèmpème, mbɔ̂ ngu ebɔ mùà nènkèm.

11“E ngu ngule mbaabà njɨ̀. Ngule mbaabà njɨ̀ nàà ŋǎ àtsəa zi ane njɨ̀te mbɔŋ. 12Ka è me wu wɔ̀fàꞋ wu, bɔ ŋa atò èkab ka tà me baabe njɨ̀tsə la, tà kà wu ngule mbaabà njɨ̀, njɨ̀ tu ka wuê è te tò. Tàa ngɨ̀ tà ye anyà̧ kǒ mbɨ̀Ꞌɨ̀ ngwìnyà̧ nkɨ̀Ꞌa la, tà saame njɨ̀ tu ndùùlà. Tà lùùlà ale anyà̧ wu kɨꞋɨ, tà bà̧aã yekǒ, ngɨ̀ àbəèꞋ a taatè. 13Wɔ̀fàꞋ nàa ngɨ̀ tà me lùùla ale è wu ndɨ̀ wu, èntɨ̧ɨ̧ tò e tsě ane njɨ̀te mbɔŋ nkàà na bɔ ŋa èkab ka tà me baabe la.

14“E ngu ngule mbaabà njɨ̀, mâ ko njɨ̀ taã, njɨ̀ taã te mè nkǒ am, 15wuê mbɨ̀Ꞌɨ̀ mâ ko a Tǎt am Mbɔ̧ɔ̧mà, tà mè nkǒ am la. Ale, mâ bɨ̧ɨ̧ne eŋa àtsə am ane njɨ̀ taã. 16Mâ bɔ njɨ̀te ko kà zìꞋ ngu a èbem àlaã yàa. Mâ bɔ ndɨ màa fete tùà mɨ̧̂ la. Tea zə àtɔŋ am ekɨꞋɨ, àlaã njɨ̀ yu aa tsiꞋi yeamɔꞋ e mě bɔ a mbaabà wemɔ̀Ꞌ. 17Ale, Tǎt am Mbɔ̧ɔ̧mà nàà nkɔ̀ŋkè am nkàà nê, mâ bɨ̧ɨ̧ne eŋa àtsə am epfə, ka elɔ̀Ꞌɔ e mě yu̧u̧me. 18Wòt kǒ tàa bùŋè am kà e shu nê à wu ale la ntsě. Mâ ŋa àtsə am ane mɔ̧ nè mènkɔ̀ŋke. Mâ bɔ mètàŋ ndɨ betsiꞋa e ŋà àtsəa am mpfə la, mè mbɔ̀ mètàŋ ndɨ betsiꞋa e nju̧u̧mè la. Eyaa wu àghɨa Tǎt am Mbɔ̧ɔ̧mà laꞋnê e ngɨa la.”

19Mbɨ̀Ꞌɨ̀ Yesò làꞋa mèngà̧ maa la, Bèjuê e mè ntsìꞋi a mètsəê tsa tsa, 20tè àbəèꞋ àyɔb nyaŋ a nê, “Tà bɔ fo kàbɔ̀ŋ ane zi, mè mbe.” Bɔ ghɨ̀ na ka me yute ànəa tà shua la à?

21Ka èbeko e nê, “Eyaa ntsě mèngǎ̧ wòt tà bɔ fo kàbɔ̀ŋ la. BetsiꞋa fo kàbɔ̀ŋ ghàꞋa àghɨ a wòt?”

Bèjuê e tû̧ eyute èngǎ̧ Yesò

22È le wu àfɨ̀Ꞌ yu bɔ̀ɔ njɨ̀a èpà̧ wu bɔ̀ɔ nɨa nkù̧ù̧ta àfɨꞋa bɔ li ndzì lob nɨ̧ Mbɔ̧ɔ̧mà a tèkitebu tò, è wu àfɨꞋa èdziꞋ àa fìa a Jèlusalèm la. 23ÀfɨꞋa mbɔŋ Yesò wu a èbem lob nɨ̧ Mbɔ̧ɔ̧mà, ngȩȩna a èbem àdzìꞋa ko bɔ̀ɔ ntɔ nê ètsələèꞋ fɔ̧̀ Sàlemun la. 24Mbɨ̀Ꞌɨ̀ tàa ngȩ̀ȩ̀nà la, Bèjuê ko e kɨꞋɨ̀ mbu̧u̧te a ngèt tò mbììte atò nê, “Àa nɔ̀ŋe awa ane lèmàkè te gha edzəâ a ka àfɨ̀Ꞌ à? À wu Fɔ̧̀ wu Mbɔ̧ɔ̧mà li ndzɔꞋ etsàà la, à nèètè shua wa.”

25Yesò bɨ̀ɨ̀lè nê, “Mâ shua wɨ̧ ka bɨ̀ ka wua nkɨ ebɨ̧ɨ̧ne. Èghɨ baa màa ngɨa ane èlen Tǎt am la, eà nyɨ̀Ꞌta àghɨa e ngu yùà la, 26ka bɨ̀ ka bɨ̧ɨ̧ne nkàà nê bɨ ntsě ayɔɔ njɨ̀ taã mbɨ̀Ꞌɨ̀ àa la. 27Njɨ̀ taã teà ndzəa ànəa màa shua la, e mè ndâ nko awɔb, te mè me kùŋè am. 28Maà ŋǎ wɔb wu bɔ̀ɔ nkuŋà am la mèmpème kàlìà, tè bɔ ka wu li eleme, wòt kà mèe nguê tàa fàà àwɔb a tèkitebu taã la. 29Tǎt am wu tà ŋa awɔb abua am la, è tsě wòt ègème, tè wòt kà wuê betsiꞋa tà fàà tua a tèkitebu tò la. 30Ba Tǎt am e wu àghɨ yeamɔꞋ.”

31Tà làꞋ ale, Bèjuê bu e mè ngwȩ̀ȩ̀te àti nê bɔ kɨ enɨ etemte atò. 32Yesò shu abua yɔb nê, “Mâ taꞋa ghɨ̌ efaꞋa ntsɔ̧̀ e dzəâ abua Tǎt am la, bɨ ye. Bɨ kɨ ebùŋè am ane ayea ŋa ane ebe mbɔŋ à?”

33Bèjuê bu e bɨ̀ɨ̀lè nê, “Bà ka kɨ ebùŋè àwê ane àfaꞋa ntsɔ̧̀ à ghɨ̀ la. Ba kɨ ebùŋè awê nkàà nê àà fɨ̀Ꞌnà wê ane Mbɔ̧ɔ̧mà. Àwɔ̀ à wu wɔ̀bȩ̂ la, àà shua nê, ye wu Mbɔ̧ɔ̧mà.”

34Yesò bɨ̀ɨ̀lè nê, “Bɔ shɨ a èbem Àkata Mbɔ̧ɔ̧mà àyɨ̧ nê Mbɔ̧ɔ̧mà laꞋnê, ‘Bɨ wu mbɨ̀Ꞌɨ̀ mmɔ̌ Mbɔ̧ɔ̧mà.’ 35Mbɔ̧ɔ̧mà li ndàꞋ àyaa ane bòt bu tà li ndzì èngǎ̧ vi a tèkitebu tɔb la. Ba bɔ nko nê, ànəa Àkata Mbɔ̧ɔ̧mà a shua la wu nkûŋ ane àlia nè àlia. 36BetsiꞋa bɨ shu nê wòt wu Mbɔ̧ɔ̧mà lȩ̀ ntsaa a sitsǎꞋ ŋaà la nàà fɨ̀Ꞌnà àvi ane Mbɔ̧ɔ̧mà na mâ laꞋnê e ngu Waã tò la à? 37Èghɨ bàa e ngɨ̀à la, è bakà wu ebe edzə abua Tǎt am Mbɔ̧ɔ̧mà la, bɨ̀ ka bɨ̧ɨ̧ne ànəa e shua la, 38mbə è ngua ngɨ̀a wuê èghɨ e dzə abua tò la, bɨ bɨ̧ɨ̧ne ànəa e shua la nkàà èghɨ bàa e ngɨa la. Bɨ̀ ghɨ ale mbɨ̀Ꞌɨ̀ eko, aa mèe nyi a ètsə bɨ̧ nê, ba Tǎt am e tsəꞋne te mbê tsìꞋi mbɨ̀Ꞌɨ̀ àghɨ yeamɔꞋ.” 39Bɔ zə ale, mè ndzì èbu nê bɔ kɨ baãaã tò, ka tà bê mbə ndùùlà.

40Yesò ghɨ̀ ale, ndɔ̀Ꞌ abot, ngwènè agua èdzî Jodàn, nga adzìꞋ yu Jɔ̌n li ngua ndzìà bòt a èdzî la, ntsèke abot. 41Tà tseke ale, bòt nyaŋ e kuŋe atò nkɨ̀Ꞌɨ̂ me laꞋa a kètsìà wɔb shua nê, “Jɔ̌n li tà ka ghɨ ngɨŋa ànəê, ka ànəê àgème tà li ndàꞋ ane èlen mbê waa la wu nkûŋ.” 42ÀfɨꞋa mbɔŋ bòt nyaŋ abot və e zì mèntɨ̧ɨ̧ mɔb ane Yesò.

Currently Selected:

Jɔ̌n 10: mnf

Highlight

Copy