ÀfaꞋa 6

Bèntɨŋà basà̧à̧mbe

1Àfɨ̀Ꞌ àko a tsè, bɔkatè Yesò e me kwèꞋne, àyɔ̀ŋ a dzə a kètsìà Bèjuê bu bèa ndàꞋà wuê ndɨ̧ Glɨ̂k la, nè Bèjuê bu è wù bèlèkɔꞋasi la. Èbu bèa ndàꞋà wuê ndɨ̧ Glɨ̂k la e me tsoo nê, bɔ̀ɔ ngɨ̀ bɔ̀ me ghàbtè èghɨ àli àgème bɔ̀ ka ŋa be bènempfə bɔb. 2Mbɨ̀Ꞌɨ̀ èngà̧ waa e dzəè a si la, bɔntu̧ bu èghem ntsɔ̀b babe la, e tɔ bɔkatè Yesò bu bàgème adzìꞋ yeamɔꞋ, shu abua yɔb nê, “E ntsě ànəa ntsɔ̧̀ nê bà sa àfàꞋa màndaꞋa èngǎ̧ Mbɔ̧ɔ̧mà me zə wuê ànəa màngabta èghɨ. 3È wu ale, bɔnyɨ ba, bɨ lȩ̀ bòt basà̧à̧mbe a kètsìà wɨ̧ bɨ ko nê bòt aa ndaꞋa ntsɔ̧̀ ane tèlen tɔb, Fo Mbɔ̧ɔ̧mà mè ndù̧u̧ a mèntɨ̧ɨ̧ mɔb, bɔ mè mbɔ èyì la, bà zi ànəa yaa a tèkitebu tɔb. 4Bɨ ghɨ̀ ale, ko bàambɔŋ aà nga tsiꞋi baãaã wuê àfaꞋa màntsaꞋta a Mbɔ̧ɔ̧mà nè màndaꞋa èngǎ̧ tò.”

5Bɔ làꞋ ale bòt Yesò bu bàgème e kɔ̀ŋkè ànəê yu bɔntu̧ tò bu e shu la. Bɔ lȩ̀ a Stifèn wu tà li ntaꞋa zǐ èntɨ̧ɨ̧ vi ane Yesò, Fo Kèfə mè ntaꞋa wu ane tò la, mè ndȩ̀ a Filìb bɔ̂ Plòkolùs nè Nikanɔ̀, bɔ̂ Timɔ̀n, nè Pàmenàs, ndɔ̀Ꞌ nè Nikòlâs, wòt Antìɔ̀k, tà kubtè ntsìꞋi wòt Juê la. 6Bɔ làa ale nkɔ̀ke àwɔb a mbì bɔntu̧ bu, bɔ nɔ̀ŋè èbu bɔb adù̧ yɔb, ntsàꞋte a Mbɔ̧ɔ̧mà àtsə ayɔb.

7Ale, èngǎ̧ Mbɔ̧ɔ̧mà e me paa nga a èdziꞋ èdziꞋ. Bɔkatè Yesò e mè ntaꞋa kwèꞋne a Jèlusalèm tè bèntsìà mèpɨ̧̀ Mbɔ̧ɔ̧mà nyaŋ e zə ndzì mèntɨ̧ɨ̧ mɔb ane Yesò mɨ̧̂.

Bɔ baãaã a Stifèn

8Stifèn li ngu wòt Mbɔ̧ɔ̧mà tàꞋa lɔ̀ɔ̀le atò mè ntàꞋa ŋa atò mètàŋ tà nɨŋ ngɨ̀ tèwuute ènəê kà ye fɨ̀Ꞌ bɔ̂ ngɨŋa ènəê nɨŋ nyɨ̀Ꞌte mètàŋ Mbɔ̧ɔ̧mà a kètsìà bòt la. 9Tàà ngɨ̀ ale, ka bòt ko e bɔ̂ me làꞋa, ntu̧a mènəè mu tà ghɨ̀à la. Bòt ngaa li ngu bòt lob Mbɔ̧ɔ̧mà yu bɔ li ngua ntɔ nê wu lob Mbɔ̧ɔ̧mà bòt bu bɔ li ngu èbùꞋ ka ndɔ̀Ꞌ ndzə a ngoꞋ la. ÀbəèꞋ àyɔb a li ngu Bèjuê be dzəèa èpfəè Silenè nè Àlèkzandìà la. Bɔ̀ɔ waa nè beko be dzə àlaꞋ a Sìlisìà nè àlaꞋ a Esìà la, e li mbùꞋ me kàànè bɔ̂ Stifèn ba. 10Fo Mbɔ̧ɔ̧mà li ŋǎ a Stifèn èyì, tè tà ghɨ̀ tà laꞋa, bòt bu è ka tsi nkoê ntsɔ̀Ꞌɔ èngǎ̧ tò.

11Mbɨ̀Ꞌɨ̀ àa ale la, bɔ tsiꞋi gha ne kwèn shu abua bòt ko nê bɔ̀ fɨte nê bɔ zə ndɨ Stifèn nàa ndaꞋa kàbɔ̀ŋ adù̧ Musì bɔ̂ Mbɔ̧ɔ̧mà la.

12Ale, mèfà̧ mbɔŋ sɔ̀ɔ̀bè mèntɨ̧ɨ̧ banɔ̧̀ bɔ̂ bɔɔjuŋ nè bènyɨꞋtà mbɨ̧te Musì bɔ ghà mbà̧aã a Stifèn nɨa tò nga a mbì bòt lob èsaꞋa. 13Mbɨ̀Ꞌɨ̀ bɔ ghà te ngu a lob èsaꞋa yu la, bɔ nɨ bòt ko nê bɔ̀ kɨꞋɨ ndzì mènəè àtsəa tò. Bòt ngaa e kɨꞋɨ nê, “Mbê waa bê nge tàa ntsèka ndàꞋà mènəè kàbɔ̀ŋ adù̧ lob nɨ̧ Mbɔ̧ɔ̧mà yu Jèlusalèm bàa ntsàꞋtà tò a èbèm la, mè nè mbɨ̧ tu Mbɔ̧ɔ̧mà ghɨ̂ Musì tsaa abua ya la. 14Ba li ndzə tà me shu nê Yesò wòt Nazàlet naa li tsòkè lob nɨ̧ Mbɔ̧ɔ̧mà a Jèlusalèm, e mě kubte mènəè mu Musì li ntsaa abua ya la.”

15AfɨꞋa mbɔŋ, bòt bu a lob èsaꞋa yu la, e tsitè àghɨ a yɔb ane Stifèn me ko, èsi tò e kubtè ntsìꞋi mbɨ̀Ꞌɨ̀ èsi wantu̧ Mbɔ̧ɔ̧mà.

Currently Selected:

ÀfaꞋa 6: mnf

Highlight

Copy