ÀfaꞋa 5

Ànàniàs bɔ̂ Sàfilà

1Ka a li à ka wuê a èlɨ̀ waa ane wòt kǒ èlen tò lè wu Ànàniàs la, bɔ̂ vi vi Sàfilà. Bɔ̂ tò e li mbɔ̀ àdziꞋa si yɔb fɨ̧̀ɨ̧̀nè nɨ èkab. 2Bɔ fɨ̧̀ɨ̧̀ne ale, bɔ̂ vi vi elàŋkè ndò̧ àbəꞋa èkab wu ka mbɔ̂ ŋa àbəèꞋ abua bɔntu̧ Yesò.

3Pità bììte a Ànàniàs nê, “Ànàniàs, ghǎ ghɨ̂ ka a ghɨ̀ Satàn nyi a èntɨ̧ɨ̧ wê, tè ngɨ̀ à làꞋà mèfà̧ abua Fo Kèfə, kwat tè ndò̧ àbəèꞋ ane èkab wu bɨ fɨ̧̀ɨ̧̀nè àdziꞋa si yu nɨŋ la à? 4Ka è lè wu yê ka aa fɨ̧̀ɨ̧̀ne à? Mbɨ̀Ꞌɨ̀ à fɨ̧̀ɨ̧̀nè tê ndɔ̀Ꞌ la, èkab mbɔŋ à nɨ la, wu èkab wê. Ale, àghɨ yu a ghɨ̂ ka à kwàꞋte a èntɨ̧ɨ̧ wê ngɨ̀ èwuu ànəê ya la wu ghà à? À kà laꞋà àfɨte abua wɔ̀bȩ̂, à laꞋa abua Mbɔ̧ɔ̧mà.”

5Mbɨ̀Ꞌɨ̀ Ànàniàs è zə ànəê yaa la, tà bê ndèbe a si kwàꞋ afɨꞋa mbɔŋ mpfəè tê fi. Bòt bàgème bɔ zə àghɨa a ghɨ̀ la, e bɔ̀ɔ̂ kwàꞋ ànyaꞋne. 6Bɔtèsà ko e lɔꞋ àbȩ nkɨ̀Ꞌɨ̂ nyi a lob ndèbte àpfəꞋte atò a èbem ndǐtsə ŋèꞋe nɨŋ ngà ntuê.

7Nyèm te me tsě mbɔ̀ŋè tetat, vi tò kɨ̀Ꞌɨ̂ àzi. Mbɔ̂ me kɨꞋɨ ale tà kà ko àghɨa a ghɨ̀ la. 8Pità è bììte atò nê, “Shu am, eyaa wu ètsəkab wu bɨ lu̧ wê e fɨ̧̀ɨ̧̀nè àdziꞋa si yu nɨŋ la à?”

Vi tò wu bɨ̧̀ɨ̧̀nê nê, “Oò, wu wùà.”

9Ale, Pità è bììte atò nê, “Ghǎ ghɨ̂ ka bɨ lu̧ wê e kwàꞋtè nê bɨa fɨte Fo Mbɔ̧ɔ̧mà à?” Mbɔ̂ mè shu abua tò nê, “Bòt bu bɔ nɨ lu̧ wê ngà ntuê la, bɔ kɨꞋɨ tê ngu a ètsələèꞋ. Bɔɔ ŋeꞋe awê àfɨ̀Ꞌ yaa enɨ ghǎ etu mɨ̧̂.”

10Mbɨ̀Ꞌɨ̀ Pità shu ale la, tà bê ndèbe a si kwàꞋ afɨꞋa mbɔŋ a mbì tò mpfəè àzi mɨ̧̂. Bɔtèsà bu àbȩ la e bê mè nyi a lob ndzě ndɨ tà pfə tê fi la, ŋèꞋe atò nɨŋ ngà ntuê a ngèt lu̧ tò wu. 11Bòt chɔsì bàgème nè waa waa tà zə àghɨa a ghɨ̀ la, e bɔ̀â kwàꞋ ànyaꞋne.

Tèwuute ènəê kà ye fɨ̀Ꞌ

12Bɔntu̧ Yesò bu e li ntàꞋa ghɨ̀ tèwuute ènəê kà ye fɨ̀Ꞌ nɨŋ nyɨ̀Ꞌte mètàŋ Mbɔ̧ɔ̧mà, mè ngɨ̀ ngɨŋa ènəê a kètsìà bòt. Bòt bu bɔ zì mèntɨ̧ɨ̧ mɔb ane Yesò la, e li ngua mbù̧ù̧tà ane ènɔ̧̂ wemɔꞋ adzìꞋ yu a mbì lob nɨ̧ Mbɔ̧ɔ̧mà a Jèlusalèm bɔ̀ le wua ntɔ nê wu ètsələèꞋ Fɔ̧̀ Sàlemun la. 13Bòt e li mbatè ngua shua nê bòt Yesò ba wu bòt ntsɔ̧̀ ale, ka bɔ ghɨ̀ bɔ̀ bu̧u̧ta, wòt tsa ka bê nkwèꞋnê ane yɔb. 14Ka àfɨ̀Ꞌ a tsekè me wu, mbâ̧tsə nè bèzi e taꞋa zì mèntɨ̧ɨ̧ mɔb ane Tǎt wa, tè nkwèꞋnê ènɔ̧̂ bòt bu. 15Bɔntu̧ Yesò bu e li ngɨ̀ tèwuute ènəê kà ye fɨ̀Ꞌ tè bòt e tsiꞋa ŋeꞋa bèngo̧o̧na bɔb ngà nɔ̀ŋà a ègwet tèku̧tsə nè bèmatà a balu̧. Me ghɨ̀ ale, ngua nkɨà mbɨ̀Ꞌɨ̀ Pità me tsě, àlɨ̀ŋkè atò a kà̧ ntsè a ègwet àbəèꞋ àyɔb, mbɨ̀Ꞌɨ̀ ebə awɔb. 16Bòt nyaŋ e li ndɔꞋɔ a èpfəè bu a ngèt àpfəèà nɨ̧ a Jèlusalèm la, ŋèꞋe bòt àghɔ̧ bɔb nè bòt fote kàbɔ̀ŋ tèa ŋǎ awɔb ngoꞋ la, nkɨ̀Ꞌɨ̂ bɔ bə awɔb bàgème.

Bɔ zì bɔntu̧ Yesò a ngoꞋ

17ÀfɨꞋa mbɔŋ àtsəa bèntsìà mèpɨ̧̀ Mbɔ̧ɔ̧mà nè bèshu̧ bi bu be li ngu a ènɔ̧̂ Bèsadùsiì la, e me ghòꞋnè bɔntu̧ Yesò bu tè nê bɔ ghɨ ànəê. 18Bɔ shu ale mbà̧à̧ àwɔb àfɨꞋa ngaa ngà nkȩ̀ adzìꞋa bɔ̀ɔ nkȩ̀à bòt bɔ ghɨ̀ mènəè kàbɔ̀ŋ la. 19ÈtsəꞋ ngaa wantu̧ kǒ Mbɔ̧ɔ̧mà tsàà la kɨ̀Ꞌɨ̂ ntsɔ̀Ꞌɔ ètsələèꞋ lob tèfȩ yu, ngɨ̀ bɔntu̧ bu e dzəè nga àbȩ. Mbɔ̂ shu abua yɔb nê, 20“Bɨ̀ ghǎ a èbem lob nɨ̧ Mbɔ̧ɔ̧mà a Jèlusalèm, shu wòt ègème abot ànəa mèmpème fi maa.”

21Bɔntu̧ bu e zə ànəa wantu̧ Mbɔ̧ɔ̧mà wu è shu la, ètsəꞋ e tsi, bɔ ghà a èbem lob nɨ̧ Mbɔ̧ɔ̧mà a Jèlusalèm, mbùꞋ me làꞋa èngǎ̧ tò wu.

Àtsəa bèntsìà mèpɨ̧̀ Mbɔ̧ɔ̧mà bɔ̂ bòt bi e tɔ bɔɔjuŋ Bèjuê nê bɔ̀ kɨꞋɨ, bɔ̀ɔ wu bɔ̀ wu bòt èsaꞋa la è tseke a si, nkwàꞋtè àghɨa bɔ̀ɔ ghɨ̌ ane bɔntu̧ bu la. Bɔ kɨꞋɨ tê bɔ tseke a si, bɔ tsàà bòt ko nê bɔ̀ gha ngɨ̀ bɔ̀ tsì bɔntu̧ bu a lob fȩ̀ nɨŋ nkɨ̀Ꞌɨ̂. 22Bɔkefen bu e ghà a lob tèfȩ yu, bɔ̀ ka tsi ndze bɔntu̧ bu a èbèm. Ale, bɔ kua akwèn ngà shu abua bòt èsaꞋa bu nê, 23“Ba ghà ale, me ko bɔ nèètè nkȩ̀ mètsələèꞋ lob tèfȩ yu, bèmbaabà bàgème e mè ngua abot. Ka àfɨꞋa ba tsɔꞋɔ mètsələèꞋ mu la, ba ka tsi ndze bòt bu a èbèm.” 24AfɨꞋa tǎt bèmbaabà lob nɨ̧ Mbɔ̧ɔ̧mà a Jèlusalèm, nè bɔɔjuŋ ayɔɔ bèntsìà mèpɨ̧̀ Mbɔ̧ɔ̧mà e zə ànəê yaa la, a bê ntsè àwɔb tè bɔ tsiꞋi me màkè nê kò ghǎ a ghɨ̂ ane bɔntu̧ bu leꞋ?

25Bɔ bele màkà ale, wòt kǒ nyi a lob, shu abua yɔb nê, “Bɨ̀ zə. Bòt bu bɨ̀ li ndzì àwɔb a tèfȩ la e wu a èbem lob nɨ̧ Mbɔ̧ɔ̧mà a Jèlusalèm kwàꞋ àfɨ̀Ꞌ yaa ndàꞋà èngǎ̧ Yesò.” 26Tǎt bèmbaabà wu lɔꞋɔ àfɨꞋa mbɔŋ nɨ bòt bi bɔ gha nɨ bɔntu̧ bu nɨŋ nkɨ̀Ꞌɨ̂ ka bɔ̀ ka baãaã awɔb ane ètɨ̧̂, nkàà nê bɔ li ngua mbɔ̀ɔ̂ mbɨ̀Ꞌɨ̀ ènɔ̧̂ bòt bu abot la a temte awɔb ane àti.

27Bèmbaabà bu e ghɨ̀ ale, nɨ bɔntu̧ bu nkɨ̀Ꞌɨ̂ ntsia awɔb a mbì èsaꞋa wu, àtsəa bèntsìà mèpɨ̧̀ Mbɔ̧ɔ̧mà a ŋȩte awɔb. 28Nê, “Ba li bà ka səèŋkè ètû̧ bɨ̧ nê bɨ̀ ka tsi ndàꞋà èngà̧ ane èlen mbê waa à? Bɨ ye àghɨa bɨ ghɨ̀ la à? Bɨ ghɨ̀ èngǎ̧ wɨ̧ e saŋe a Jèlusalèm ègème tè waa waa zə. Bɨ kɨ zì èvə tò àtsəa ya à?”

29Pità bɔ̂ bɔntu̧ ko bu e bɨ̀ɨ̀lè nê, “Ba bɔ̂ ndɨ bàa ghɨ ànəa Mbɔ̧ɔ̧mà shu la. BetsiꞋa bà ka sa àyea tò, ngɨ̀ wuê àyea wɔ̀bȩ̂. 30Bɨ li ngù̧ù̧te a Yesò a mbɨ̧̀ mbasa mbùŋe atò, ka Mbɔ̧ɔ̧mà bètǎt ba yu̧u̧mè atò. 31Mbɔ̧ɔ̧mà li ndɔke atò ntsìà àbâ àbualu̧ azi mbɨ̀Ꞌɨ̀ Fɔ̧̀ nè Mpemnà. Tà li ndɔ̀ke atò mbɨ̀Ꞌɨ̀ eŋa bòt Izəèlȩê èlu̧ bɔ̀ɔ kubte ane mènəè kàbɔ̀ŋ mɔb yea waꞋa a kàbɔ̀ŋ wɔb mɨ̧̂. 32Ba Fo Kèfə ba e ye, mè nkoê mènəê maa. Mbɔ̧ɔ̧mà è tsàa Fo zi yaa abua bòt bu bɔ̀ɔ ndzəèa tò la.”

33AfɨꞋa bòt èsaꞋa bu e zə èngǎ̧ waa la, mèsi mɔb fen bɔ tsoo kwàꞋ ànyaꞋne tè me kɨ e ghɨ̌ bɔɔ bùŋè bɔntu̧ Yesò bu. 34Ka wòt Falèsiì kǒ ane yɔb, èlen tò wû Gàmalìà, tàa nyɨ̀Ꞌta mbɨ̧te Musì, bɔ mè ntaꞋa wua nkùkta atò la, lɔ̀Ꞌɔ a si a kètsìà èsaꞋa wu, ŋȩ nê, bɔ̀ nɨ bɔntu̧ bu nga àbȩ. 35Mbɔ̂ shu abua bòt èsaꞋa wu nê, “Bòt Izəèlȩê, bɨ̀ nɨ àfɨ̀Ꞌ àyɨ̧ ane àghɨa bɨ kɨ ghɨ̌ ane bòt baa la. 36È li ndɔ̀Ꞌ ngu àfɨ̀Ꞌ àko, Tìodà kǒ lɔ̀Ꞌ me fɨta shua nê, ye wu wòt nɨ̧, tè bòt mbɔ̀ŋè ènkɨ̀ yekwì e kuŋe atò. AdzìꞋ me wù̧ù̧ne, bɔ kɨ̧ɨ̧mè atò, bòt tò bu bàgème e taatè, èngǎ̧ tò wu e mî. 37Àfɨ̀Ꞌ a mè me wu, Judàs kǒ tà lè wu wòt àbâ àlaꞋ a Galìlî la mè ndɔ̀Ꞌ àzi àfɨ̀Ꞌ yu bɔ le wua mpà̧à̧ bòt la. Ènɔ̧̂ bòt e nkuŋe atò mɨ̧̂, ka bɔ tsekè tè nkɨ̧̀ɨ̧̀me atò, bòt tò bu e taatè. 38È wu ale, ane ayaa àfɨ̀Ꞌ yaa la, mâ shu̧u̧te awɨ̧ nê, bɨ̀ ka ngɨ̀ àghɨ ane bòt baa. Bɨ̀ sà àwɔb nkàà nê, àfàꞋ yaa bɔ fàꞋà la, è wu àghɨa wɔ̀bȩ̂ è taŋke la, ko à ka tseke a. 39Mbə è wu àghɨa Mbɔ̧ɔ̧mà taŋke la, ko betsiꞋa bɨ̀ ka tsokè. Bɨ me kɨ e ghɨ̌ ale, ko bɨa ye nê, bɨ wua nua a Mbɔ̧ɔ̧mà zìambɔŋ.”

Gàmalìà làꞋ ale bòt èsaꞋa wu e bɨ̧ɨ̧nè nkɨ̀à yu tà ŋa abua yɔb la.

40AfɨꞋa mbɔŋ, bɔ tɔ bɔntu̧ Yesò bu a lob, ngɨ̀ bɔ nèètè shu̧u̧ awɔb, mbɔ̂ mè səèŋkè ètû̧ bɔb nê, ko mbɨ̀Ꞌɨ̀ bɨ lɔ̀Ꞌ àlia mè ndàꞋà èngà̧ ane èlen Yesò. Bɔ ghɨ̀ ale, mbɔ̂ sà àwɔb.

41Bɔntu̧ bu e sà lob èsaꞋa yu me ghȩ̀ȩ̀na ngùꞋtà awɔb nê, Mbɔ̧ɔ̧mà ye nê bɔ kùꞋù èbe bɔ̀ɔ jɨ àkù ane èlen Yesò la. 42E bùꞋu àfɨꞋa ngaa eghǎ ne mbì, bɔ me ghà àli àgème a èbem lob nɨ̧ Mbɔ̧ɔ̧mà a Jèlusalèm nè èpfəè bòt, ndàꞋà mè ntsɔ̀tà Ntu̧ Ntsɔ̧̀ nê Yesò wu Fɔ̧̀ wu Mbɔ̧ɔ̧mà li ndzɔꞋ etsàà la.

Currently Selected:

ÀfaꞋa 5: mnf

Highlight

Copy