ÀfaꞋa 13

Fo Kèfə laa Bànabasì bɔ̂ Sɔ̂l ntù̧ àwɔb

1BèndàꞋàtɔŋ nè bènyɨꞋtà èngǎ̧ Mbɔ̧ɔ̧mà e li ngu ayɔɔ bòt chɔsì bu àpfəèà nɨ̧ yu è wu Antìɔ̀k la. Bòt ngaa li ngu Bànabasì, nè Simiòn (wu bɔ̀ le wua ntɔ̀ atò nê wòt kèfen la), nè Lusiɔ̀s (wu tà lè dzəa àpfəè yu è wu Silenè la), nè Manèn (wu tà li ntsə àpfəa fɔ̧̀ Elɔ̀d la), nè Sɔ̂l. 2Mbɨ̀Ꞌɨ̀ bɔ̀ɔ ntsèka kà jɨ èghɨjɨ mè ntsàꞋta Mbɔ̧ɔ̧mà la, Fo Kèfə shu abua yɔb nê “Bɨ̀ tsàa a Bànabasì bɔ̂ Sɔ̂l bɔ̀ ghǎ me ghɨ̌ àfàꞋ yaa mâ nɔ̀ŋe abua yɔb la.” 3Bɔ mè ntsàꞋte a Mbɔ̧ɔ̧mà kà jɨ èghɨjɨ, mbɔ̂ nɔ̀ŋè èbu bɔb àtsə ayɔb ntsàà àwɔb bɔ me ghǎ.

Ntu̧ Ntsɔ̧̀ àlaꞋ a Sȩplùs

4Mbɨ̀Ꞌɨ̀ Fo Kèfə è tu̧u̧ a Bànabasì bɔ̂ Sɔ̂l la, bɔ chu nga àpfəèà nɨ̧ yu è wu Sèlesìà la. Bɔ gha abot, bɔ nyi a èbem ànkànuꞋ nga àlaꞋ Sȩplùs yu a èbem èdzî la. 5Bɔ ghà tê bɔ̀ nyi àpfəèà nɨ̧ yu è wu Sàlamì la, bɔ làꞋ èngǎ̧ Mbɔ̧ɔ̧mà a èbem lobte tò. Bɔ me gha ale nɨa Jɔ̌n Mak nê tà ghǎ me tɨŋe awɔb.

6Bɔ lɔꞋɔ àbâ àlaꞋ və, nga àpfəèà nɨ̧ Pafɔ̀s, nkwene ane wòt Juê kǒ tàa ndùta tèkaŋtsə, èlen tò wu Ba-Yesò la. Wòt ngaa me fɨta shua nê ye wu ndàꞋàtɔŋ Mbɔ̧ɔ̧mà. 7Tà li ngu shu̧ gɔvanɔ̀ wu abàꞋ və la. Èlen gɔvanɔ̀ wu li ngu Segiɔs Pàɔlùs, è wu wòt tà taꞋa bɔ èyì la. Gɔvanɔ̀ mbɔŋ tɔ a Bànabasì bɔ̂ Sɔ̂l nê bɔ̀ kɨꞋɨ ndàꞋa èngǎ̧ Mbɔ̧ɔ̧mà yè zə. 8Ka wòt tèkàŋ wu bɔ̀ɔ ntɔ atò ane ndɨ̧ Glɨ̂k nê Èlimàs la me kɨ ekele a gɔvanɔ̀ wu nê mbɨ̀Ꞌɨ̀ tà zì èntɨ̧ɨ̧ vi ane Yesò. 9AfɨꞋa mbɔŋ, Fo Kèfə è lù̧u̧ a èntɨ̧ɨ̧ Sɔ̂l wu èlen tò ko le wu Pɔ̂l la. Tà bê ntsìte àghɨ azi ane wòt tèkàŋ wu, 10mbɔ̂ nê, “À wu waã Satàn. À wu wɔ̀mbù̧ àghɨ a ntsɔ̧̀ àgème. Èbɨ̀Ꞌte èŋɔꞋte mènəè e lu̧u̧ a èbèm lê. Àa ntsèka nyɔ̀Ꞌtà mènəè Mbɔ̧ɔ̧mà mu è wu nkûŋ la ezi ane àfɨte. 11Mbɔ̧ɔ̧mà nàà ghɨɨle awê. Àghɨ ayê aà leme tê aa tseke ka tsi ndzě èdziꞋ ane àfɨ̀Ꞌ àko.”

KwàꞋ àfɨꞋa mbɔŋ, ndzěmtsə te kwen àghɨ a Èlimàs tè tà me ghȩ̀ȩ̀na nkɨ̀a wòt kǒ taa baãaã àbu azi enyɨꞋte èlu̧ la. 12Mbɨ̀Ꞌɨ̀ gɔvanɔ̀ wu ye àghɨa a ghɨ̀ la, tà zì èntɨ̧ɨ̧ vi ane Yesò, mè ndzè na èngǎ̧ Mbɔ̧ɔ̧mà mbɔŋ bɔ làꞋa abua zi àfɨꞋa ngaa la e ghe la.

Ntu̧ Ntsɔ̧̀ a Antìɔ̀k a Pìsidìà

13Pɔ̂l bɔ̂ bòt bi e li ndɔ̀Ꞌɔ a Pafɔ̀s, ntu̧ a èbem ànkànuꞋ nga a Pegà, a èbem àlaꞋ a Pàmfilìà. Me ghà ale, Jɔ̌n Mak è sà àwɔb ngwènè a Jèlusalèm. 14Bɔ lɔ̀Ꞌɔ a Pegà nga a Antìɔ̀k a èbem Pìsidìà. È wu àliapfəè a Bèjuê bɔ gha a lob Mbɔ̧ɔ̧mà yɔb ntsèke a si. 15Bɔ̀ tɔ mbɨ̧te Musì, nè àkata bèndàꞋàtɔŋ Mbɔ̧ɔ̧mà, bòt àtsəa lob Mbɔ̧ɔ̧mà Bèjuê e tsàà ntu̧ abua yɔb nê, “Bɔnyɨ ba baa nkɨà nê bɨ̀ làꞋa èngà̧ abua bòt baa, na bɨ bɔ èngà̧ e kɨɨte awɔb la.”

16Pɔ̂l lɔ̀Ꞌɔ a si ndèbtè èbu bi nê bɔ̀ buŋ, mbɔ̂ mbùꞋ me làꞋa.

“Bɔnyɨ bɔ̧ bòt Izəèlȩê nè bòt kà wu Bèjuê bɔ̀ɔ ngùꞋta Mbɔ̧ɔ̧mà la, bɨ̀ zə! 17Mbɔ̧ɔ̧mà bòt ba bòt Izəèlȩê li ndàà bètǎt nyaꞋ ba, ngɨ̀ bɔ yaã àfɨꞋa bɔ li ngua ntsèkâ mbɨ̀Ꞌɨ̀ bègɨ̧̀ àlaꞋ a Ejìb la. Mbɔ̧ɔ̧mà li mè nɨ̀ ngule mètàŋ mi ntsì àwɔb àlaꞋ və, 18bɔ me ghɨ̀ mènəè kà kuêꞋ, ka tà bɔ̂ nkùùle èntɨ̧ɨ̧ vi ntsèke bɔ̂ tò ba ane èngùꞋ èghem yekwì àbâ àlaꞋ àyuube. 19Tà li ndììme èlaꞋ besà̧à̧mbe a si Kenǎn, ŋǎ si yu abua bòt bi, 20ane èngùꞋ ènkɨ̀ yekwì nè èghem yetà̧â̧.

“Àli a me wu, tà mè me ŋa bèkěm be me baãaã àlaꞋ tè ngà ngu àfɨ̀Ꞌ yu tà lè ŋa awɨ̧ a Samùèl wu tà lè wu ndàꞋàtɔŋ tò la. 21Bɔ li bɔ̀ biite a fɔ̧̀, Mbɔ̧ɔ̧mà è ŋa àwɔb a Sɔ̂l waã Kish, wòt àndǎ̧ Benjamèn, nê tà wu fɔ̧̀ wɔb ane èngùꞋ èghem yekwì. 22Mbɔ̧ɔ̧mà li ntsì atò ndzɔ̀Ꞌɔ a Dàbid ane fɔ̧̀, mbɔ̂ nê, ‘Mâ ye nê Dàbid waã Jesì wu wòt màa nkɔ̀ŋkà la. Tà wu wòt tàa ghɨ̀ àghɨa màa nkɨà la.’

23“E li ngu wòt àndǎ̧ Dàbid Mbɔ̧ɔ̧mà li ntsì nê tà kɨꞋɨ ngu Mpemnà bòt Izəèlȩê mbɨ̀Ꞌɨ̀ ye li nkàꞋ la. Ŋut wu Yesò à. 24Yesò li me bùꞋu àfàꞋ àzi, Jɔ̌n bɨ̀ a mbì, ndàꞋ èngǎ̧ Mbɔ̧ɔ̧mà abua waa waa àlaꞋ a Izəèlȩê nê, bɔ̀ waꞋa mènəè kàbɔ̀ŋ mɔb, bɔ̀ zì àwɔb a èdzî. 25Jɔ̌n li tà tsiꞋa nkɨ epaa àfàꞋ àzi, tà bììte bòt bu nê, ‘Bɨ mɨɨtè nê è ngu wà à? E ntsě wòt wu bɨ chɨ̀Ꞌà la. ChaꞋ, e ntsě tòà. E mbakà lem nkùꞋ wòt tàa ko etsǐ gùbtsə a èka tò la.’

26“Bɔnyɨ bɔ̧, bòt àndǎ̧ Abàlàghâm, nè bòt kà wu Bèjuê a si ŋàa bɔ̀ɔ nguꞋta a Mbɔ̧ɔ̧mà la, bɨ̀ zə. Ntu̧ mèmpème kàlìà yaa wu abua ya. 27Bòt bu a Jèlusalèm la nè bɔɔjuŋ bɔb e li bɔ̀ ka ko nê Yesò wu wòt tàa ŋàa mèmpème kàlìà la. Bɔ̀ ka lem nko mèngà̧ mu bɔ̀ɔ ntɔ a èbem àkatè bèndàꞋàtɔŋ Mbɔ̧ɔ̧mà àliapfəè Bèjuê àgème la. Ka mbɔ̂ ngɨ̀ mèngà̧ mu bèndàꞋàtɔŋ Mbɔ̧ɔ̧mà è le wua ndàꞋà la è te, ndɨ̀ wu bɔ li mbuŋe a Yesò la. 28Bɔ li bɔ̀ ka lem mbɔ̀ ngule lə bɔ̀ɔ nɨ ghɨ̌ bɔɔ bùŋe a Yesò la, mbɔ̂ ŋwèèlè wuê a Pȩlèt nê tà bùŋe atò. 29AfɨꞋa bɔ paa mènəè ègème Àkata Mbɔ̧ɔ̧mà a làꞋà ane tò la, bɔ shuke atò a ègwet mbasa wu ngà ndzi a èbem èsî. 30Ka Mbɔ̧ɔ̧mà è yù̧ù̧me atò, 31tà nyɨ̀Ꞌte avi ane èli nyaŋ bua bòt bu bɔ̂ tò ba e li ngȩȩne a Galìlî nga a Jèlusalèm la. Bòt ngaa ka bɔ̀ɔ shua bòt Izəèlȩê àghɨa bɔ̀ le ye mè nkoê ane Yesò la.

32“Ba wu a si ŋàa e tsɔ̀te Ntu̧ Ntsɔ̧̀ e laꞋ ànəê yu Mbɔ̧ɔ̧mà li shu abua bètǎt nyaꞋ ba nê yea ghɨ̀ la. 33Tà ghɨ̀ abua ya bàa bɔ̧ bɔb a mànju̧u̧me a Yesò mbɨ̀Ꞌɨ̀ bɔ shɨ a èbem Àkata Mèkù̧ la:

‘À wu Waã am;

Mâ tsiꞋi Tǎt wè laane.’

34Eyaa wu ànəa Mbɔ̧ɔ̧mà li ndàꞋ ndɨ yèa yu̧u̧me a Yesò tè taa baka tsi fi a èbem èsî la,

‘Maà ŋa awɨ̧ ngule èlɔ̂t wu

e ndi nkàꞋ abua Fɔ̧̀ Dàbid la.’

35Mbɨ̀Ꞌɨ̀ tà shu ayea ko nè àdzìꞋ la nê,

‘BetsiꞋa à kà saŋ ngule waã wè

tà fi a èbem èsî.’

36“Dàbid li ngɨ̀ àfàꞋa Mbɔ̧ɔ̧mà li shu nê tà ghɨa la azi nè àfɨ̀Ꞌ, ndi mpfə bɔ tu atò a ngèt bètǎt nyaꞋ tò, tà fì. 37Ka wòt wu Mbɔ̧ɔ̧mà li njù̧ù̧me atò la li tà kà fî.

38“Bɔnyɨ bɔ̧, bɨ̀ ko nkûŋ nê, èngà̧ waa bɔ̀ɔ ndàꞋà nê Mbɔ̧ɔ̧mà naa li waꞋa a kàbɔ̀ŋ bòt la, e wua nkàà àghɨa Yesò ghɨ̀ la. 39Bɨ ko nê, waa waa tà zǐ èntɨ̧ɨ̧ vi ane Yesò la, Mbɔ̧ɔ̧mà naa waꞋa a kàbɔ̀ŋ tò, è wù àghɨa mbɨ̧te Musì te li tè ka wu ko e ghɨ̌ la. 40Bɨ̀ me ko awɨ̧ mbɨ̀Ꞌɨ̀ mènəè maa bèndàꞋàtɔŋ Mbɔ̧ɔ̧mà e li shuê la ghɨ ane yɨ̧. Bɔ li nê,

41‘Bɨ̀a wu bɨa ngwȩȩta Mbɔ̧ɔ̧mà la,

bɨ̀ ye! Bɨ̀ chɨŋka mpfəèꞋte!

Nkàà nê àghɨa màa ngɨ̀à àli ayɨ̧ la,

wu àghɨa wòt màà ngaꞋtè nyɨꞋte awɨ̧

ko bɨ̀ ka bɨ̧ɨ̧ne la a.’ ”

42Mbɨ̀Ꞌɨ̀ Pɔ̂l bɔ̂ Bànabasì e sà lob Mbɔ̧ɔ̧mà Bèjuê me ghǎ la, bòt bu e kàꞋ àwɔb nê bɔɔ li a nkàb àliapfəè yɔb bɔ mè nkɨ̀Ꞌɨ̂ ndàꞋ èngǎ̧ Mbɔ̧ɔ̧mà abua yɔb. 43Bɔ̀ taate abot bòt e me ghǎ, Bèjuê nyaŋ nè bòt kà wu Bèjuê bɔ kubtè me wùꞋte a Mbɔ̧ɔ̧mà kùŋè a Pɔ̂l bɔ̂ Bànabasì. Bɔntu̧ bu e laꞋ abua yɔb nê, bɔ̀ me baãaã èngǎ̧ Mbɔ̧ɔ̧mà ngà wuê nè mbì ngȩ̀ȩ̀ne a èten ntsɔ̧̀ tò.

44È li mè ngu àliapfəè, bòt bàgème àpfəè və e bù̧ù̧tè ezə èngǎ̧ Mbɔ̧ɔ̧mà. 45Mbɨ̀Ꞌɨ̀ Bèjuê e ye ènɔ̧̂ bòt bu la, bɔ tsiꞋi me làꞋa ane ghòꞋnà, shua mènəè kàbɔ̀ŋ, ngèbtâ ànəê àgème Pɔ̂l nàa shua la.

46Ale, Pɔ̂l bɔ̂ Bànabasì e bê mpàa ndàꞋ kà bɔɔ̀. “À nyɨꞋtè nê bà bɨa ndàꞋ èngǎ̧ Mbɔ̧ɔ̧mà abua yɨ̧. Ka ndɨ̀ wu bɨ tu̧ èngǎ̧ wu la, bɨ̀ ka meè nɨ awɨ̧ mbɨ̀Ꞌɨ̀ bòt betsiꞋa bɔ̀ ka bɔ mèmpème kàlìà la, baa sà àwɨ̧ etsiꞋi eghǎ me tsɔ̀te ntu̧ yaa abua bòt kà wu Bèjuê. 47Ale, eyaa wu mbɨ̧ Mbɔ̧ɔ̧mà è ŋa abua ya la,

‘Mâ tsàà awê nê à wu mbɨ̀Ꞌɨ̀

èkaꞋà abua bòt kà wu Bèjuê.

Nê nyɨꞋte alu̧ mèmpème kàlìà

abua bòt ngɔ̀ŋ yaa ègème.’ ”

48AfɨꞋa bòt kà wu Bèjuê e zə ayaa la, mèntɨ̧ɨ̧ mɔb bɔ̀ŋ, bɔ wùꞋtè èngǎ̧ Mbɔ̧ɔ̧mà. AfɨꞋa mbɔŋ, bòt bu Mbɔ̧ɔ̧mà è làà àwɔb nê bɔɔ li ebɔ mèmpème kàlìà la, e zì mèntɨ̧ɨ̧ mɔb ane Yesò.

49Èngǎ̧ Mbɔ̧ɔ̧mà e ghȩȩne a èdzìꞋ àgème àbâ àlaꞋ və. 50Ka Bèjuê e tsòkè ètsə bɔɔjuŋ bu àpfəèà nɨ̧ və la, fɔ̀ɔ̀lè ne bèzi kekweelè bu kà wu Bèjuê bɔ̀ɔ nkùkta Mbɔ̧ɔ̧mà la. Bɔ bùꞋ me kɨ̀ŋe a Pɔ̂l bɔ̂ Bànabasì tè fəè àwɔb àlaꞋ və. 51Bɔntu̧ bu e yò àbeb àpfəè və ntsì ane èka bɔb, me gha Èkonìòm. 52Bɔkatè Yesò bu a Antìɔ̀k la e me wùꞋtè àwɔb, Fo Kèfə lû̧ a mèntɨ̧ɨ̧ mɔb.

Currently Selected:

ÀfaꞋa 13: mnf

Highlight

Copy