ÀfaꞋa 12

Bɔ me paa nkɨà àtsəa bɔb enɨ

1È li ngu àfɨꞋa ngaa, Elɔ̀d bùꞋ me ghɔɔ àbəꞋa bòt chɔsì ako. 2Tà li ngɨ̀ bɔ sɔɔbe a Jimsì wanyɨ Jɔ̌n mbùŋè. 3Mbɨ̀Ꞌɨ̀ ta bùŋe atò me ko ànəa ngaa a bɔ̀ Bèjuê la, tà mè ngɨ̀ bɔ baãaã a Pità (Àyaa a li ngɨ ane èli bu bɔ li ngua njɨ̀a èpà̧ wu bɔ̀ɔ ntɔ nê èpǎ̧ bled kà wua nkɔ̀Ꞌɔ la). 4Bɔ baãaã a Pità ale ndzi atò a tèfȩ mbɔ̂ ngɨ̀ bèshujà bakwì bakwì e me baabe atò ane èlaã bekwì. Elɔ̀d ghɨ̀ ale, me kwàꞋte nê, bɔɔ jɨ èpǎ̧ Màntsea a ègwet yea saꞋa atò a kètsìà banɔ̧̀.

5Mbɨ̀Ꞌɨ̀ Pità wu a tèfȩ la, bòt chɔsì e me ntsàꞋta Mbɔ̧ɔ̧mà àtsə atò kwàꞋ ànyaꞋne.

Bɔ tsì a Pità a tèfȩ

6È li ngu ètsəꞋ wu ètsəꞋ àa tsi Elɔ̀d naa tsǐ a Pità esaꞋa atò la, tà wu a kètsìà bèmbaabà babe tà nɔ̀ŋkè me li la. Bɔ kùùle atò ane fȩ tebe ngà èsele ane bèmbaabà bu babe la. Bèmbaabà ko e bɔ̂ ngu a ètsəê lob tèfȩ yu bɔ tɨ̧ɨ̧te la. 7KwàꞋ àfɨꞋa mbɔŋ, wantu̧ Lefɨ̀Ꞌ saꞋ abot, èkaꞋà ko e bùꞋ me beꞋe a lob tèfȩ yu. Wantu̧ wu nyiꞋtè a Pità ane èkwȩ tò, ndɔ̀ke atò, mbɔ̂ è shu abua tò nê, “Lɔ̀Ꞌɔ a si kwàla.” Fȩ tu bɔ nɨŋ nkùùle èbu Pità la, te bê ndòòtê.

8Wantu̧ wu mè nê, “Nèète nkùùlè nkànda yê mbɔ̂ nkwà̧aã gùb tê.” Pità ghɨ̀ wuê mbɨ̀Ꞌɨ̀ wantu̧ wu è shu la. Tà mè nê, “MàꞋà taꞋà ndǐ mbɨ̧̀ yê mbɔ̂ nkùŋè am.” 9Pità kuŋe atò, bɔ dzə a lob tèfȩ yu. Bɔ me ghà ale, Pità mɨ̀ɨ̀tè nê wu àtsə ye ye la. Tà kà lem nko nê àghɨa wantu̧ Mbɔ̧ɔ̧mà wu ghɨ̀ la a wu ayaã. 10Bɔ tsè àdzìꞋa màmbaaba mbì, mè ntsè àyea kwèn. Bɔ tsě èdziꞋ baa, bɔ̀ kɨꞋɨ ane ètsələèꞋ wu bɔ ghɨ ane ètɨ̧ɨ̧na àa ntsèa nga àpfəèà nɨ̧ yu la, bɔ̀ me ko, ètsələèꞋ wu e tsɔꞋɔ zìa ndzìꞋne bɔ dzəè nga àbȩ. Mbɨ̀Ꞌɨ̀ bɔ̀ɔ ngȩ̀ȩ̀nà nchua nga a alu̧ la, Pità me ko, tà kà tsi ndzè wantu̧ Lefɨ̀Ꞌ wu.

11ÀfɨꞋa mbɔŋ, Pità ko àghɨa a ghɨ̂ ngɨ ane zi la, mbɔ̂ nê, “Ye am e wàa ka mâ koê nê ànəê yaa wu nkûŋ la. Mbɔ̧ɔ̧mà è tsàà wantu̧ vi nê tà kɨꞋɨ ntsì am àbu fɔ̧̀ Elɔ̀d nè mènəè mu Bèjuê aà wua ntàŋka e ghɨ̌ ane yaã la.”

12Tà ko àghɨa a ghɨ ane zi la, tà gha a lob Màlià nyɨ̌ Jɔ̌n Mak. Bòt nyaŋ li ngu abot və ntsàꞋte a Mbɔ̧ɔ̧mà. 13Pità è lùꞋte ètsələèꞋ nàbȩ̂, waàvi àfàꞋ lob və kǒ, èlen tò wu Lodà la kɨꞋɨ etsɔꞋɔ. 14Tà kɨꞋɨ ale me zə, àtɔŋ yu wu àtɔŋ Pità, ànəa ngaa a bɔ atò tè tà lùùlà ngwènè a lob, kà lem ntsɔ̀Ꞌɔ ètsələèꞋ wu. Tà ghà shu nê Pità wu àbȩ tà tɨ̧ɨ̧ la.

15Bɔ shu abua tò nê “À be”, ka tà me shu wuê shu nê wu nkûŋ. Ale, bɔ tsiꞋi bɨ̀ɨ̀le nê, “Naa wu wantu̧ Mbɔ̧ɔ̧mà tò.”

16Mbɨ̀Ꞌɨ̀ bɔ̀ɔ ndàꞋà ale la, Pità me luꞋte ètsələèꞋ wuê luꞋte. Bɔ me ghɨ̀ tê ntsɔꞋ me ko, ndze a Pità, ànəa ngaa a bê ntsè àwɔb. 17Tà mɨ̀Ꞌtè àbu azi nê bɔ̀ ka tsi ndàꞋ, mbɔ̂ shu awɔb ndɨ Mbɔ̧ɔ̧mà è ghɨ̂ ka ntsì àvi a tèfȩ la. Mbɔ̂ mè nê, “Bɨ̀ shu a Jimsì bɔ̂ bɔnyɨ ba ko bu nê, mâ dzəè a tèfȩ tu.” Mbɔ̂ ngà adzìꞋa tsa.

18AfɨꞋa ètsəꞋ e tsi la, àtsəa bèmbaabà bu a bê mbɨ ane àghɨa a ghɨ ane Pità la. 19Elɔ̀d zə ànəa ngaa nê bɔ̀ kɨ atò, ka bɔ kɨ kekaŋ. Tà mè mbììte bèmbaabà bu àdziꞋa Pità è ghà la bɔ̀ ka shu, tà nê bɔ bùŋè àwɔb a nkub.

Mbɨ̀Ꞌɨ̀ mènəè maa e tsè la, Elɔ̀d è lɔ̀Ꞌɔ a Jùdià ngà ntsèke ane àfɨ̀Ꞌ àko àpfəèà nɨ̧ yu è wu Sìsalìà la.

Èvə Elɔ̀d

20Elɔ̀d li taꞋa tsoo ane bòt Tȩê nè Sidɔ̀n. Ale, bɔ gha ane ènɔ̧̂ nê bɔ gha eye atò. Bɔ me bùꞋu, mbɨ̀ ngɨ̀ Blatùs wu tà wù àtsəa ntɔꞋ la ye nè nɔ̀b, bɔ ghà abua Elɔ̀d nê bɔ̂ tò ba è làŋkè laŋke, nkàà na àlaꞋ ayɔb àa nɨ̀a èghɨjɨ ne abua bòt àlaꞋ a Elɔ̀d la.

21Àlia bɔ kàꞋà la a tseke tê nkùꞋ, Elɔ̀d zì ndìte lèfɔ̧̀ ti ngà ntsèke a ègwet atɨ̧ lèfɔ̧̀ zi, mbɔ̂ ndàꞋ èngà̧ abua bòt bu. 22Bòt bu e lete èngùŋ nê “Eyaa ntsě wɔ̀bȩ̂ ndàꞋà. Tàà ndàꞋà mbɨ̀Ꞌɨ̀ a mbɔ̧ɔ̧mà.” 23KwàꞋ àfɨꞋa mbɔŋ, wantu̧ Mbɔ̧ɔ̧mà kǒ ghɨ̀ àghɔ̧ a baãaã atò nkàà nê, tòà zìambɔŋ è nɨ mèngùꞋte è wu ghà ne abua Mbɔ̧ɔ̧mà la. Bèwâm be kwele atò tè tà pfə.

24Mbɨ̀Ꞌɨ̀ tà pfə la, èngǎ̧ Mbɔ̧ɔ̧mà e me tsəa ngà wuê nè mbì adzìꞋ àgème.

25AfɨꞋa mbɔŋ, Bànabasì bɔ̂ Sɔ̂l e paà àghɨa bɔ̀ le wua ngà e ghɨ̌ a Jèlusalèm la, mbɔ̂ nkua akwèn. Me kua ale, nɨa Jɔ̌n wu bɔ li ngua ntɔ atò nê Mak la, bɔ̂ tò ba e kua nɔ̂.

Currently Selected:

ÀfaꞋa 12: mnf

Highlight

Copy