Mariko 3

Jesu anahoza mut'u siku ya Sabato

Math'ayo 12:9-14; Luka 6:6-11

1 # 2:27-28 Gonya kaheri siku mwenga iriyokala ni siku ya Sabato, Jesu achangira kahi za sinagogi na mumo mukikala muna mut'u mwenye mukono wa kuholoza. 2Bai hakikala hana Mafarisayo mario were manamala chausa cha kumushithakira Jesu, kwa vizho makilolera maone chamba andamuhoza yo siku ya Sabato, makamushithaki. 3Jesu akimwambira ye mut'u ariyeholoza mukono, “Ungarara ho kahikahi hedu.” 4Gonya Jesu akiauza o Mafarisayo akiamba, “Vidze kisheria ni hiro ririro ni karakara kuhendwa siku ya Sabato? Vidze ni kuhenda madzo hedu mai? Ni kuthizha hedu ni kwalaga?” Ela makinyamala zii! 5Jesu akialola o Mafarisayo kuno atsukirwe, akidzalwa ni kigondzi kwa ut'u wa kukosa mbazi kwao. Gonya akimwamba ye mut'u, “Goloza wo mukonowo hedu.” Akiugoloza nawo ukiuyat'o kare. 6#Joh 5:16, 18Ndo ao Mafarisayo machambola na machendathunganana na at'u a Herode kupanga mandizhomwalaga Jesu.

Ngororoki ya at'u inamuthuwa Jesu

7Bai Jesu hamwenga na anafundzie makiahaukira na machenda ko ziya ra Galilaya. Vikara arihokala anenda, ngororoki bomu ya at'u ikimuthuwa. At'u aa, angine mambola Galilaya, jimbo ra Judea, 8na mudzi wa Jerusalemu, na jimbo ra Idumea, na kuvuka muho wa Jorodani. Angine mambola viv̱alo zha Tiro na Sidoni. Ao osi mamudzirira kwa kukala masikira go arigokala akigahenda Jesu. 9Kwa ut'u wa wo muminyano wa o at'u anji, Jesu walagiza o anafundzie mamuikire dau thithe ili asihoshwe ni at'u. 10Were adzahoza akongo anji, ndo anji angine mariokala k'amadima, makihendza makukume hatha mamugut'e kwamba mahole nao. 11#1:24; 5:7; Math' 8:29; Luk 4:34, 41; 8:28Na yoyosi ariyepagawa ni p'ep'o arihomona Jesu, wagolomokwa na akigwa mbereze akipiga k'ululu na kuamba, “Uwe ndiwe Mwana wa Mulungu.” 12#1:34; Luk 4:41Ela Jesu akiakokot'era sana masihende akamanywa iye ni h'ani.

Jesu anatsagula ahumwi kumi na airi

Math'ayo 10:1-4; Luka 6:12-16

13Bada ya gago Jesu akikwera dzulu murimani, na akiaiha aryahu arioahendza nao machenda ho arihokala. 14Na gonya akitsagula kumi na airi na akiahendya makale ahumwie na makale hamwenga naye. Kidza aahume kwendahubiri, 15na makale na wadimi wa kumboza at'u p'ep'o. 16#Mahe 1:13; Joh 1:40-44Gaga ndo madzina ga o kumi na airi mariotsagulwa ni Jesu: Simoni ambaye Jesu wamup'a dzina ra P'et'ero, 17Jakobu na Johana, ana a Zebedayo ambao Jesu waaiha Boanerige, ambaro manaye ni “Ana a kigwaragwara,” 18Anderea, Filipu, Bath'olomayo, Math'ayo, T'omasi, Jakobu mwana wa Alifayo, Th'adayo, Simoni Muhehezi, 19na Juda Isikariote ariye nde ariyekudzamusaliti Jesu.

Jesu ana nguvu kumushinda Belizebuli

Math'ayo 12:22-32; Luka 11:14-23; 12:10

20Arihogonya kuatsagula o ahumwie, achangira nyumbani. Bai ngororoki bomu ya at'u ikimwenderera kaheri, hatha Jesu na anafundzie k'amapatire mwanya wa kurya chakurya. 21#3:31; Joh 7:5Ndo at'u a kwao marihosikira makiuka kwendamugwira, makiamba, “Ana vilalu.” 22#Math' 9:34; 10:25Nao alimu a Sheria mariombola Jerusalemu maamba, “Ana Belizebuli#3:22 Belizebuli ni dzina ringine ra Shethani. na anamboza p'ep'o kwa zo nguvu za iye mubomu wa p'ep'o.” 23Bai Jesu akiambira o at'u makundzumanyike, gonya akiambira kwa mafumbo akiamba, “Vidze Shethani anadima kumwamboza Shethani mwandziwe? 24Ts'i at'ue makidzigazha makundi-makundi gahehago, ts'i iyo k'aindatoa. 25Na mudzi ukigazhika na at'ue makikala k'amagwirana milomo, be mudzi uwo k'aundatoa. 26Na Shethani akidzipinga na kudzigazha mwenye, k'andatoa, uwo ndo undokala mwishowe. 27#Isa 49:24K'akuna mut'u adimaye kungira kahi za nyumba ya mut'u mwenye nguvu na kumuhoka vit'uzhe hasiho kumufunga ye mwenye kwandza. Niamufunge kwandza ndo adime kumuhoka zho vit'uzhe. 28Namwambira ujeri wenye, anadamu mandasamehewa dambi zosi na kila kufuru mandiyonena. 29Ela mut'u andiyemukufuru Roho Mweri, k'ana musamaha bule, andakala adzahenda dambi ya kare na kare.” 30#Joh 7:20Jesu wanena vivi kwa kukala angine were madzamwamba ana p'ep'o.

Mameye Jesu na nduguze Jesu

Math'ayo 12:46-50; Luka 8:19-21

31 # 3:21 Gonya mameye na nduguze Jesu a kilume makidza. Makiima ko ndze ya yo nyumba, makihuma mut'u akamwihe Jesu. 32Wo muthunganano wa at'u mariokala makeresi, na madzamudengereka makimwamba Jesu, “Lola mameyo na nduguzo manakumala ko ndze.” 33Jesu akiadzigidzya akiamba, “M'ama na ndugu zangu ni hio?” 34Gonya akialolat'o o mariokala makeresi, kumudengereka, akiamba, “Aa be ndo m'ama na ndo ndugu zangu! 35#Math' 6:10Kwani ahendaye mahendzo ga Mulungu, nde m'ama na nde ndugu yangu.”

Currently Selected:

Mariko 3: nyf

Highlight

Copy