RUKA 23

Yiesû airwa kîrî Piraatû

(Math. 27:1-2; 11-14; Mko. 15:1-5; Njo. 18:28-38)

1Gîkundi gîa antû bonthe bara baagambithagia Yiesû bamwira kîrî Piraatû. 2Bamûthitanga bauga, “Twîthîîre muntû ûyû akîrutana antû mantû mataagîrîte akîbeeraga batikaarûnge ûgooti kîrî Kaisaarî. Na ariugaga we n'we Kîrîstû, na i mûnene.”

3Piraatû aûria Yiesû, “I woû mûnene wa Ayaundi?”

Yiesû amwîra, “Nwa ta ûgu wauga.”

4Piraatû eera *athînjîri bara banene ba Ngai na kîrîndî kîra kîîngî, “Niû ntikwona mabîtia mara muntû ûyû arûthîîte.”

5Bonthe baakinyîîria mantû mamu na inya mûno bauga, “Mantû mara arutanîîte antû ba Njundea yonthe imareeteete thîîna. Aanjîîrie mantû mamu Gariiri na îîndî nwa mo mama areeteete naaga.”

Yiesû airwa kîrî Eronde

6Piraatû akwîgua ûgu, aûria, “Ka muntû ûyû arî wa kuuma Gariiri?” 7Akwîrwa Yiesû aarî wa kuuma rûteere rûra rwathagwa n'Eronde, auga nairwe kîrî Eronde n'ûntû Eronde naarî Njerusaremu kagiita gaku.

8Eronde akwona Yiesû aakena mûno n'ûntû kuumania na bûra eegîîtue, kwa îgiita rîîraaya neendeete mûno kwona Yiesû akîringa kîama. 9Yiesû akwirwa kîrî we, Eronde amûûria biûria biingî. Îndî Yiesû aarega kûmûcookeria. 10*Athînjîri bara banene ba Ngai na aarimû ba watho beethîrana agu baatuîrîîra Yiesû na taka. 11Eronde na acikaarî baake baanyûrûnta Yiesû bamûbûthîîria. Bamwîkîra nguo ya goro îndaaya. Eronde auga acookue kîrî Piraatû. 12Kuuma ntugû înu, Eronde na Piraatû baatuma ûcoore n'ûntû ibaameneene mbereeni.

Yiesû aagiitîrwa îgamba aûragwe

(Math. 27:15-26; Mko. 15:6-15; Njo. 18:39-19:16)

13Piraatû eeta *athînjîri bara banene ba Ngai, atongoria, na antû bonthe. 14Abeera, “Bûndeeteere muntû ûyû bwauga nakûrutanaga antû mantû mataagîrîte, îndî nkûmûûria wana biû bûrî oogo, ntiroona mabîtia mara arûthîîte kîrî mantû mara bûmûthitangîrîte. 15Na wana kinya Eronde atiroona mabîtia maake. I ntûma auga nacookue kîrî tiû. Gûtirî bu muntû ûyû arûthîîte bûra bûûmba gûtûma aûragwa. 16Kwoogu nkauga aringwe ibooko mmûrekeerie athi.” [17Rîonthe kagiita ga kîatho gîa *Pasaka gaakinya, bwarî wîthîre mûgwate ûmwe athaûragwe.]#23:17 Mabuku mamwe ma Kîîngiriki matirî mûstaarî ûyû.

18Antû bonthe baugîîria bauga, “Naûragwe! Baraba nathaûrwe!” (19Kûrî kagiita gîtuma gîaûkîîte taûni ya Njerusaremu. Baraba n'we eengîîre antû baagoma, na aarî mûûragani. Na gîku i kîo gîatûmîîte agwatwa athaîkwa nceera.)

20Piraatû aaria na antû kaîrî akîenda kûrekeeria Yiesû. 21Îndî antû baugîîria bauga, “Mwambe! Mwambe!”

22Rîa mathatû, Piraatû abaûria, “Ka muntû ûyû arûthîîte mabîtia marîkû? Ntikwona bûra arûthîîte bûra bûûmba gûtûma aûragwa! Kwoogu nkauga aringwe ibooko mmûrekeerie athi.”

23Îndî amwe noogu kîrîndî kîathi na mbere na kuugîîria na inya mûno gîkiugaga Yiesû nambwe. Baacookeeria ûgu kaîrî na kaîrî, mwanka Piraatû eetîgîîria. 24Piraatû aagiitîra Yiesû îgamba kûringana na bûra antû beendaga. 25Aathaûra ûra antû baugire n'we bakwenda abathaûrîra, ûra aathaîkîîtwe atûmîîte antû baûkia gîtuma, mûûragani. Rîru aanenkanîra Yiesû kûringana na bûra antû beendaga.

Yiesû aambwa

(Math. 27:32-44; Mko. 15:21-32; Njo. 19:17-27)

26Acikaarî bathiîte kwamba Yiesû baarîîkana na muntû eetagwa Simioni aumîîte mûndaani. Baathûkia mûtharaba wa Yiesû bamûkamatithia arî nyuma yake. Simioni aarî wa kuuma gûntû gweetagwa Kureni.

27Antû baingî mûno baathingata Yiesû. Kîrî bo ikwarî na eekûrû baamûrîragîra barî na kwîthikîîra kûûnene. 28Yiesû aûndûka eera eekûrû babu, “Biû eekûrû ba kuuma Njerusaremu bûtikaandîrîre. Îîrîrîreeni bwingwa na bûkîrîra aana beenu! 29Îgiita rîgaakinya rîra antû bakauga ‘I baathaarime eekûrû bara bataagîa na twana. I baathaarime bara bataagîa na twana twa gwonkia!’ 30Îgiita rîru, kûrî antû bakeera irîma, ‘Tûthiîkeeni!’ Na bangî beere tûrîma, ‘Tûguîkîreeni!’ 31Ûkoona i muntû ûmwagîru akûnyamaara ûûgû rî, î bara batarî baagîru bakaanyamaara bûgana ata?”#23:31 Kîîngirikiini kwandîkîîtwe: Ûkoona barîrûtha ûûgû mûtî ûrî ûmwîthî rî, î waûma?

32Ikwarî na atunyani baîrî baathiîte kûûragwa Yiesû akîûragwa. 33Bagûkinya bantû eetagwa ‘Kîîndî gîa kîongo’ baamba Yiesû na atunyani babu baîrî oogo. Mûtunyani ûmwe aarî rûteere rwa ûrîo, ûyu ûngî rwa ûmotho.

34Yiesû aarombera bara baamwambire auga, “Barekere, Baaba! Batikûmenya bûra bakûrûtha.” Acikaarî baathûkia nguo cia Yiesû bairingîra kuura boona nguo îra muntû agaacinda, athi n'yo.

35Kîrîndî kîarûngama kîîthaîra mantû. Atongoria ba Ayaundi baanyûrûnta Yiesû bauga, “Naroonokagia bara bangî. Taneebonokie ingî weegua n'we Kîrîstû ûra athuurîîtwe i Ngai.”

36Acikaarî bakînyûrûnta Yiesû wana bo baathi bamûkundia ndibei yarî na gana. 37Bamwîra, “Teebonokie ingî weegua ûrî Mûnene wa Ayaundi!”

38Îgûrû rîa kîongo kîa Yiesû agu mûtharabaani ibaaringaringîrîte kabaaû kaandîkîîtwe, “ûyû i mûnene wa ayaundi.”

39Ûmwe wa atunyani babu aaruma Yiesû amwîra, “Anga ti woû Kîrîstû? Aabu ûteebonokie ûgîtwonokia na tiû!”

40Mûtunyani ûyu ûngî aagondokera ûyu wa mbere akîmûkaania. Amûûria, “Woû ka ûtagûkuthûka Ngai wana weegua twagiitîrwa îgamba bûmwe n'we? 41Rîetû tiû twagiitîrwa kûringana na bûra tûrûthîîte. Îndî we gûtirî ûthûûku arûthîîte.”

42Mûtunyani ûyu wa baîrî eera Yiesû, “Wakinya ûneneeni bwaku, ûndirikane!”

43Yiesû amwîra, “Îmunthî ga ngûkwîra, ûkeegua ûrî amwe naani îkenero.”#23:43 Kana: Ga ngûkwîra, ûkeegua ûrî amwe naani îkenero îmunthî.

Yiesû aakua

(Math. 27:45-56; Mko. 15:33-41; Njo. 19:28-30)

44Kwanjîîria ta mûthenya gatî mwanka thaa kenda, mwindu waruma nthîgûrû înu yonthe. 45Gîtambaa kîra kîagaanîîtie nyomba ya Ngai gîatembûkana maita maîrî.#23:45 Ndeni ya nyomba ya Ngai ikwarî na gîtambaa kîagaanîîtie kanyomba kara katheru mûno na nyomba îra îngî. 46Yiesû aagondoka na inya mûno auga, “Baaba, ndaiga mwoyo wakwa ûmenyeeriini bwaku”#Cabuurî 31:5 Akuuga ûgu, aanyaarûka.

47Mûtongoria wa acikaarî akwona bûra gwakarîkire aakumia Ngai. Auga, “Na mma muntû ûyû araarî ûmwagîru!”

48Antû bonthe bara beethîreene oogo bakîona bûra gûgaakarîka bakwona ûgu beenûka bakîringaringaga ibara biao i kîîthikîîro. 49Antû bonthe bara baiyeene na Yiesû na eekûrû bara baamûthingatîîte kuuma Gariiri baacûûbîîrîîtie barûngi gataaria.

Yiesû aathikwa

(Math. 27:57-61; Mko. 15:42-47; Njo. 19:38-42)

50Ikwarî na muntû eetagwa Njosebu wa kuuma gataûni ka Arimathea, gîteere kîa Njundea. Aarî muntû ûmwega na ûmwagîru. 51Aakaraga eeteereete kûûya kwa ûnene bwa Ngai. Aarî ûmwe wa akîama, îndî we ateetîganîîria na mûbango wa akîama bara bangî wa kûûraga Yiesû. 52Muntû ûyu aathi kîrî Piraatû amwîra amwîtîgîîrie athûkie mwîrî wa Yiesû akauthike. 53Njosebu aambûra mwîrî wa Yiesû, acuoga na nkûngû. Aukamata aathûngîria nthikooni yenjîîtwe rwaraani rwa iiga. Nthiko înu îtaathikîîtwe muntû ûngî. 54Kwarî ntugû ya Ncumaa,#23:54 Ncumaa yarî ntugû îra Ayaundi beethuuranagîra n'ûntû bwa Sabatû. na *Sabatû nîarî akubî kwanjîîria.

55Eekûrû bara baathingatîîte Yiesû kuuma Gariiri baathiyania na Njosebu. Boona nthiko na mwîrî wa Yiesû ûmaamîîtue ku. 56Rîru baacooka mûciî baathuuranîra mîtaa na maguta ma gwaka mwîrî wa Yiesû. Ntugû ya Sabatû baanogoka n'ûntû i bu bwarî watho.

Currently Selected:

RUKA 23: thk

Highlight

Copy