RUKA 16
16
Ngerekano ya mûrûngamîîri atarî mwîtîgua
1Yiesû eera arutwa baake, “Gîtonga kîmwe ikîarî na mûruti ngûgî aamûrûngamîîrîîte into biake. Îgiita rîmwe antû baathi beera gîtonga gîku bûra mûrûngamîîri ûyu eenyangagia into biake. 2Mwene into amwîta amûûria, ‘N'ata nkwîgua antû bakiuga nûkûrûtha? Ndîenda ûndeetera mûtaratara wa bûra ûtûmangîrîte mbia n'ûntû kuuma îmunthî ngûgî yaku îkûthira.’
3“Mûrûngamîîri ûyu eebûûria, ‘N'ata nkûrûtha îîndî n'ûntû mûnene wakwa nakûmbuuta ngûgî? Ntiûmba kûrîma, na i nthoni mûno kûthi nkîrombaga ta nkîa.’ 4Îthûgaania rîamûûyîîra, auga, ‘Nkûmenya bûra nkaarûtha kaingo antû batua kûngwataga ûgeni mîciî yao ndabuutwa ngûgî.’
5“Eeta eerandû ba mûnene wake bonthe wakîra ûmwe kagiita gaake. Aûria wa mbere, ‘N'îrandû rîgana ata ûrî na rîo?’
6“Amwîra, ‘Ndî na ndebe îgana rîmwe cia maguta.’
“Mûrûngamîîri ûyu amwîra, ‘Thûkia karataati kara gakwonania îrandû rîaku ûkare nthî na mpwî wandîke ndebe mîrongo îtaano.’
7“Aacooka aûria mwîrandû ûngî, ‘Î woû n'îrandû rîgana ata ûrî na rîo?’
“Mwîrandû ûyu amûcookeria amwîra, ‘Ndî na nkunea îgana cia ngano.’
“Mûrûngamîîri ûyu amwîra, ‘Thûkia karataati kara gakwonania îrandû rîaku wandîke mîrongo înana.’
8“Mûnene eera mûrûngamîîri ûyu ataarî mwîtîgua akûrûtha bwega amwe na ûgu, n'ûntû bwa gûtûmîra maûûme maake gwîteethia. Antû ba kîînthîgûrû ibaiyî gûtûmîra maûûme maao rîra bakûrûtha mantû nkûrûki ya antû bara barî na ûmenyo bwa Ngai. 9Na ga nkûbwîra teethagiani antû na ûtonga bwenu bûtume ûcoore, kaingo ûtonga bwenu bwathira bûkaathookua gîkarooni gîa tene na tene.”
10“Muntû ûra mwîtîgua na tûmantû tûniini, wana maanene i mwîtîgua na mo. Îndî ûkeegua muntû ti mwîtîgua na tûmantû tûniini, wana maanene ti mwîtîgua na mo. 11Arîo rî, ûkeegua bûtaûmba kûmenyeera into bia nthîgûrû, n'ûû akaabwîtîgia abûnenkere ûtonga bwa mma bwa îgûrû? 12Na ûkeegua bûtiûmba kûmenyeera into bia itha, n'ûû akaabûnenkera into bienu bio biongwa?
13“Gûtirî mûruti ngûgî aûmba kwathîkîra anene baîrî. Nwa mwanka amene ûmwe eende ûyu ûngî, kana eerute gûtûmîkîra ûmwe arege kwîgua ûyu ûngî. Bûtiûmba gûtûmîkîra Ngai na bûtûmîkîra ûtonga.”
Watho na ûnene bwa Ngai
(Math. 11:12-13)
14*Abarisai bakwîgua ûgu, baanjîîria kûthekeera Yiesû n'ûntû ibeendeete mbia. 15Yiesû abeera, “Biû bwîtuîkithagia antû beega kaingo bwonwa n'antû, îndî Ngai naiyî mathûgaania meenu. Mantû mara antû boonaga marî meega, Ngai amoonaga marî maathûûku.
16“*Watho bwa Musa na mabuku ma iroria maarutanirwe mwanka rîra Njoana Mûbaatithania aayire. Na kuuma Njoana akûûya, ntheto îmbega ya ûnene bwa Ngai nwa îtûmagîîrua wana îmunthî. Îgiitaani rîrî tûrî na rîo antû barîthûngîra ûneneeni bwa Ngai na taka.#16:16 Kana: antû barîrûa na ûnene bwa Ngai na inya mûno. 17I ûûthû îgûrû na nthîgûrû kûtherekeria bikaûra kîrî gatemwa nwa kamwe kaniini ka watho kûûra.
18“Muntû ûra acookagia mûka akagûra ûngî, muntû ûyu neegagua akîthûngîîra. Na muntû ûra agûraga mûka ateetwe i mwene, wana we neegagua akîthûngîîra.”
Gîtonga na Racaarû
19Yiesû eeyana ngerekano îngî. Auga, “Ikwarî na gîtonga kîmwe gîekagîra nguo cia goro mûno, na igîakenagîîra kûrîyaga irio biega ntugû cionthe. 20Na ikwarî na nkîa îmwe yeetagwa Racaarû. Yaûyûrîîtwe mwîrî i maronda na yareetagwa îgatigwa mwîrîgaani wa gîtonga gîku ntugû cionthe. 21Nkîa înu nîeendaga mûno kûrûmua nwa tûng'enyûrû tûra twagwîyaga rîra gîtonga gîku gîkîrîa. Kurû ciayaga ciamwîthîra agu ikamûcûnacûna maronda.
22“Gwakarîkire ûgu, nkîa înu yakua. Îgûkua araîka bamîkamata yathi gûkara amwe na Îburaîmu. Gîtonga kîo gîgûkua kîathikwa, kîathi îcamaarîro. 23Kîrî îcamaarîro ikîanyamaaraga mûno. Kîaraitha îgûrû kîoona Îburaîmu arî kûraaya bakaranîîrîîte amwe na Racaarû. 24Gîtonga gietana kîauga, ‘Itû aba, Îburaîmu baaba, mbîgua kîao! Tûma Racaarû ûmwîre atombeke mûthia wa kaara gaake rûûyîîni aaye aandurie rûrîmî, n'ûntû nkwinya i kîrîrîmbî gîkî.’
25“Îburaîmu amwîra, ‘Mwana wakwa, ririkana nwonire mawega monthe rîra warî mwoyo Racaarû akîonaga thîîna, îndî îîndî nagûkena ûkînyamaara. 26Na kaîrî, aaga gatîgatî keenu naati kûrî na nkurunga înene mûno bûra gûtarî muntû aûmba kuuma naaga tûrî aaya naagu bûrî, kana auma naagu bûrî aaya naaga tûrî.’
27“Gîtonga gîku kîamwîra, ‘Weegua i bu gûkari ûgu, itû aba, tûma Racaarû mûciî kwa baaba, 28athi akaanie aruayia batikaarûthe mantû ta mara ndarûthaga baaya kûthûngîra kînyamaaraani ta gîkî.’
29“Îburaîmu amwîra, ‘Aruanyûkwe barî na maandîko ma Musa na ma iroria, ibathoome babaathîkîre.’
30“Gîtonga kîamwîra, ‘T'ûgu itû, Îburaîmu baaba, nwanga gûkooneka muntû aumîîte kîrî bara bakuû akathi kîrî bo, rîru i rîo beerira.’
31“Îburaîmu amwîra, ‘Ûkeegua batithikîîria baathîkîra maandîko ma Musa na ma iroria batiitindanîra na kwîrira wana muntû akariûka akauma kîrî bara bakuû.’ ”
Currently Selected:
RUKA 16: thk
Highlight
Share
Copy
Want to have your highlights saved across all your devices? Sign up or sign in
© 2019, Bible Translation and Literacy
