NGÛGÎ 8

Kûnyamaarua gwa eetîgîri

1Kuuma ntugû înu Stibini aûragirwe eetîgîri bara baarî Njerusaremu baanjîîria kûnyamaarua mûno. Banyagaarania bonthe baathi bwa Njundea na Samaria, tatiga atûmwa bonka. 2Antû bamwe baakuthûkaga Ngai baathûkia kiimba gîa Stibini baathika, baakara na kîeba kîînene. 3Saûrû aatua kûthîînia eetîgîri. Aathiyaga wakîra mûciî akabaruta nyomba bonthe, aka na arûme akabathaîkithia.

Ntheto îmbega yatambua nthîgûrû ya Samaria

4Eetîgîri babu bakûnyagaarania baathiire bagîtûmagîîria kiugo gûntû na gûntû. 5Ûmwe wao eetagwa Piripû aathi taûni ya Samaria aatûmîîria mantû ma Kîrîstû. 6Antû baingî beegua bwega mantû mara Piripû aaragia. Na wabathikîîrîîtie iboonaga biama bira aaringaga. 7Piripû neengatagia irundu biingî biithûûku bikauma kîrî bara beegagua barî na bio. Aabiîngatagia bikauma bigîkayaga na inya. Na nooriirie bionje biingî na ithua biingî. 8Ikwarî na gîkeno kîînene taûni înu.

Simioni na biama biake

9Taûniini înu ikwarî na muntû eetagwa Simioni. Aaringaga biama akarigaria antû ba Samaria, akîboonagia aarî muntû wa gîtûmi. 10Bonthe baanene na baaniini ibaamwîtîgîîtie. Baugaga, “Ûyû n'we inya ya Ngai îra yîtagwa inya înene.” 11Baamwîtîgîîtie n'ûntû naabarigarîîtie na biama bibu aaringaga kwa îgiita rîraaya. 12Antû bagwîtîgia ntûmwa îra Piripû aabatûmîîrie îgûrû rîa ûnene bwa Ngai na mantû ma Yiesû Kîrîstû, baabaatithua bonthe, aka na arûme. 13Simioni wana we eetîgia. Akûbaatithua aatua kûthiyanagia na Piripû. Akwona biama biinene na iriga bira Piripû aaringaga, aarigara mûno.

14Atûmwa bara baarî Njerusaremu bakwîgua antû ba Samaria ibeetîgîîre kiugo kîa Ngai, baatûma Petûrû na Njoana noogo. 15Petûrû na Njoana bakûûya baarombera eetîgîri babu kaingo beewa Kîrundu Ûmûtheru 16n'ûntû Kîrundu Ûmûtheru ataarî akûbeendamîîra. Îndî ibaarî bakûbaatithua kwa riîtwa rîa Mwathani Yiesû. 17Kwoogu, Petûrû na Njoana babaigîîra njara. Bonthe baagîa na Kîrundu Ûmûtheru.

18Simioni akwona atûmwa baigîîra antû njara baagîa Kîrundu Ûmûtheru, eenda kwaa Petûrû na Njoana mbia. 19Abeera, “Mpaani inya înu na niû kaingo ûra nkaigîîra njara agîa Kîrundu Ûmûtheru.”

20Petûrû amûcookeria amwîra, “Ûraûra na mbia ciaku, n'ûntû ûrîthûgaania wagûra kîewa kîa Ngai na mbia. 21Ûtirî ûmwe wetû ngûgîîni îno n'ûntû nkoro yaku îtigûkenia Ngai. 22Kwoogu îrire ûthûûku bûbû na ûrombe Ngai akûrekere îthûgaanio rîru ûrî na rîo nkorooni, rîîthûûku. 23Ndîgûcûûba ûgu nkoona ûrî na rûriitho mûno na ûtaîtwe i meeyia.”

24Simioni eera Petûrû na Njoana, “Ndomberaani Mwathani bûrî biû ntikoone ûntû nwa bûmwe bwa mamu bwambîîra.”

25Petûrû na Njoana beeyana ûkûûyî bwao kîrî antû baatûmîîria kiugo kîa Mwathani. Bakûthiria baacooka Njerusaremu wabagîtûmagîîria taûni inyingî cia Samaria.

Piripû na Mwethiopia

26Mûraîka wa Ngai aaria na Piripû amwira, “Îndama na barabara îra yumîîte Njerusaremu yakûrûkîîra rwanda îthiîte Gasa.” 27Piripû eendamîîte n'yo oona Mwethiopia ûmwe aarî ûmûkabe eenûkîîte aumîîte Njerusaremu kûromba Ngai. Aarî mûrûngamîîri wa mbia cia Kandaki, mûka ûra aathanaga nthîgûrû înu. 28Mwethiopia ûyu aakamatîîtwe i nkaarî ya mbaraathi akîthoomaga îbuku rîa kîroria Isaaya. 29Kîrundu eera Piripû, “Îthi nkaarîîni îîra.”

30Piripû augia rwîro amûgwatagwata. Eegua mûnene ûyu akîthooma îbuku rîa kîroria Isaaya. Piripû amûûria, “Nûgûciûkîrwa i bûra ûkûthooma?”

31Mûnene ûyu amûûria, “N'ata mbûmba gûciûkîrwa ntarî na muntû wa gûntaûrîra?” Eera Piripû atwe nkaarîîni bakare n'we.

32Gîcuncî kîa *Maandîko Maatheru kîra aathoomaga kîaugaga,

“Aatongoreerue ta ng'ondu îthiîte kûthînjwa,

ta kagondu kamaarîîrîîte gakîenjwa guaya,

ataatumûra kanyua.

33Aarûthîîrwe mantû ma îgi na ûmma bûtaathingatwa.

Gûtirî we auga naiyî nciarwa ciake

n'ûntû ntugû ciake cia aaga nthîgûrû iciathirire.”#Isaaya 53:7-8

34Mwethiopia ûyu aûria Piripû, “Ingûkûûria, n'ûû kîroria gîkwarîîria aaga? I kîo kîongwa kana i muntû ûngî?” 35Piripû aanjîîria rwaria rwake na gîcuncî gîku, amwîra ntheto îmbega îgûrû rîa Yiesû.

36Bathiîte baakinya bantû kwarî na rûûyî. Mwethiopia eera Piripû, “Ene, I rûûrû rûûyî. Ga kûrî kîo kîûmba kûndigîîria ntikaabaatithue?”

[37Piripû amwîra, “Bunka gwîtîgîîtie na nkoro yaku yonthe nwa ûbaatithue.”

Mwethiopia eera Piripû, “Ingwîtîgia Yiesû Kîrîstû i Mwana wa Ngai.”]#8:37 Mabuku mamwe ma Kîîngiriki matirî mûstaarî ûyû. 38Mwethiopia auga nkaarî îrûngamue. Baathûngîra rûûyîîni na Piripû. Piripû amûbaatithia. 39Bakuuma rûûyîîni, Kîrundu wa Mwathani aathûkia Piripû. Mwethiopia ataamwona kaîrî. Aathi na mbere na rûgendo rwake akeneete. 40Piripû eebona arî taûni yeetagwa Asotas. Aanjîîria gûtûmîîria oogo, aathi na mbere agîtûmagîîria ntheto îmbega taûni cionthe mwanka aakinya taûni yeetagwa Kaisaria.

Currently Selected:

NGÛGÎ 8: thk

Highlight

Copy