NGÛGÎ 7

Stibini eetheteera

1Mûthînjîri ûra mûnene wa Ngai aûria Stibini, “Mantû mamu i ma mma?”

2Stibini aacookia auga, “Aruayia na babaaba, thikîîriani mbwîre! Ngai wa mwago eebonaniirie kîrî kîûyûyû gîetû, Îburaîmu, warî Mesopotamia mbere ya athaamîra Arani, 3amwîra, ‘Thaama kwenu ûtige antû beenu ûthi nthîgûrû îra ngaakwonia!’#Kîambîrîria 12:1

4“Îburaîmu aathaama nthîgûrû îra baatûîre ya Karindea aathi aatûûra Arani. Îthe agûkua aathaama aaya aatûûra gûkû bûtûîre îîndî. 5Îndî Ngai ataamwaa nwa îkînya rîmwe rîa nthîgûrû îno rîtuîka rûgai rwake. I wîrane aamwere amwîra akamwaa îtuîke yake na rûrîîyo rwake, kinya weegua kagiita gaku Îburaîmu ataarî akûgîa na kaana. 6Ngai aamwîrire ûûgû, ‘Antû ba rûrîîyo rwaku bagaatuîkithua nkombo nthîgûrû îngeni barûthîrwe mantû maathûûku mîanka magana mana. 7Naani, Ngai, ingaakaanûkia babu bakaabatuîkithia nkombo. Rîru mbarute gûntû gûku baangonge barî aaga.’#Kîambîrîria 15:13-14 8Ngai aarîîkanîîre na Îburaîmu, aatuîkithia rûtaano rwano rwa kîrîîkanîro gîku. Kwoogu Îburaîmu agûciara Isaka amûtaana arî na ûkûrû bwa ntugû inyanya. Nyumaani Isaka n'we aaciara Njakubu, Njakubu aaciara nthaka îkûmi na ciîrî, biûyûûyû bira bietû îkûmi na biîrî.

9“Biûyûûyû bibu bieegua Njosebu rûriitho. Bamwendia athi gûtuîka nkombo nthîgûrû ya Miisiri, îndî Ngai naarî amwe n'we. 10Amûruta kûnyamaaruani kûra kunthe aanyamaaragua. Amwaa ûûme na aatûma akenia Baraû, mûnene wa Miisiri. Mûnene amûtuîkithia ngabana wa Miisiri na mûrûngamîîri wa nyomba yake.

11“Ikwarî na yûûra rîînene mûno gûku nthîgûrû ya Miisiri yonthe na ya Kaanani. Kwagîa kînyamaara kîînene mûno. Biûyûûyû bietû biaga irio. 12Njakubu akwîgua ikwarî na ngano Miisiri, aatûma biûyûûyû bietû bithi kûthûgûra rîrî îgiita rîa mbere kûthi Miisiri. 13Bakûthi kûthûgûra rîa maîrî Njosebu eemenyithania kîrî aruagina. Baraû aamenya aruagina babu ba Njosebu. 14Njosebu aatûmana kîrî îthe, Njakubu, na antû baao bara bangî baaya Miisiri. Bonthe baarî antû mîrongo mûgwanja na bataano. 15Kwoogu, Njakubu baathaamîra Miisiri. Naagu i noogo aakuîrîîre. Na wana kinya biûyûûyû bira bingî bietû nwa noogo biakuîrîîre. Îndî 16mîîrî yao yairirwe Cekemu, baathikwa nthikooni ira Îburaîmu aagûrîrîte aana ba Amoori mbia igana ûna.

17“Kagiita karî akubî kara Ngai augîîte akaingia wîrane bûra eerire Îburaîmu, weegua antû beetû bara baarî Miisiri ibaarî bakwingîa. 18Mûnene ûngî ataiyî Njosebu na antû baao aatuîka mûnene wa Miisiri. 19Mûnene ûyu aacegeera antû beetû abanyamaaria. Auga bateeyage tûgenke twao twaciarwa kaingo tûkua.

20“Îgîîtaani rîru i rîo Musa aaciarirwe. Kaarî kaana kaathongi mûno meethooni ma Ngai. Agûciarwa, aciari baake bamwitha nyomba yao bantû a mîeri îthatû. 21Akwithûrwa nyomba, mwarî wa Baraû amûthûkia amûrera ta mwana wake. 22Musa aathoomithua mantû mara monthe Amiisiri baathoomaga, aûmea. Aatuîka muntû wa îgweta kuumania na mîgambo îra aaragia na mantû mara aarûthaga.

23“Musa arî na mîanka mîrongo îna, aathûgaania kûthi kûriûngîra antû baao ba Isiraeri. 24Akûthi oona ûmwe wao agîturwa i Mûmiisiri. Musa aathi gûtunyûkia muntû wao. Akîrîithia aûraga Mûmiisiri. 25Aathûgaanagia ûtakîîgua antû baao ibaamenyaga atî Ngai akîmûtûmîra akabakûûra, îndî na bo bataaciûkîrwa bamenya ûgu. 26Rûûni rwa ntugû înu, Musa eethîra Aisiraeri baîrî bakîrûaga. Musa aacûûgia kûbeeguithania. Abaûria, ‘Anga bûtirî ta muntû na mûruagina, itû aba. I mbi bûkûrûîra?’ 27Ûra aacûîrîrîte ûra ûngî ûgîti aatindîka Musa. Amûûria, ‘N'ûû agûtuîkithîîtie mûnene wetû ûtûgambithia? 28Nûbangîîte kûmbûraga ta bûra ûraûragire Mûmiisiri ûra îgoro?’#Kuuma 2:13-14 29Musa akwîgua ûgu aatoorooka, auma nthîgûrû înu. Aathi gûtûûra nthîgûrû yeetagwa Mindiani. Arî noogo aagûrana aaciara nthaka ciîrî.

30“Nyuma ya mîanka mîrongo îna, Musa arî rwanda rwa Kîrîma gîa Sinaî mûraîka aaria n'we rûrîrîmbî rwa mwanki rûgîakanaga gakandooni. 31Musa akwona ûgu, aarigara mûno. Athiîte akubî kwona bwega, eegua kayû ka Mwathani gakîaria n'we gakiugaga, 32‘I niû Ngai wa biûyûûyû bienu, Ngai wa Îburaîmu, Isaka na Njakubu!’#Kuuma 3:6 Musa aatua kwinaina n'ûguaya, na ataûmîîria kinya kûraitha noogo. 33Mwathani amwîra, ‘Ruta iraatû magûrû n'ûntû bantû agu ûrûngi i bantû aatheru. 34Indîîkîîtie kwona bûra antû baakwa bakûnyamaarîra Miisiri na imbîgîîtue bûra bagûkaya bûgana. Ndauma îgûrû mbûyîîte kûbakûûra. Kwoogu ka ngûtûme Miisiri.’#Kuuma 3:5, 7-8

35“Musa wooyu nwa we ûra antû baao baarî bakûmûrega bakîmûûragia, ‘N'ûû agûtuîkithîîtie mûnene wetû ûtûgambithia?’#Kuuma 2:14 Musa n'we Ngai aatûmire kîrî antû baake atuîka mûtongoria na mûkûûri wao kuumania na ûteethio bwa mûraîka ûra aariirie n'we gakandooni. 36N'we aarutire Aisiraeri ûkombooni bwa Miisiri akîonanagia magegania na akîringaga biama—barî Miisiri, bakîringa Îria Rîtuune, na bakûrûkîîrîîte rwanda kagiita ka mîanka mîrongo îna. 37I Musa wooyu eerire Aisiraeri, ‘Ngai akabûthuurîra kîroria kuuma wakîrî biû, wata bûra aanthuurire.’#Kûririkanania Maathana 18:15 38Na nwa Musa wooyu eethîranîrîtwe i biûyûûyû bietû rwanda. Na nwa we mûraîka aariirie n'we Kîrîmaani gîa Sinaî, rîra eerwe biugo bia mwoyo, bira aatwere.

39“Îndî biûyûûyû bietû bateendaga kûmwathîkîra. Baamûregire bauga i kaaba bagacooka Miisiri. 40Beera Arûni, ‘Tûrûthîre ngai ira igaatûtongoreeria rûgendooni n'ûntû tûtiiyî bûra Musa ûra aatûrutire Miisiri akarire.’#Kuuma 32:1, 23 41Kwoogu beerûthîra ngai îkari ta kayaû bamîrutîra kîgongwana, baakeneera gîntû gîa kûrûtha na njara ciao. 42Ngai aatigana na bo. Abarekeeria baromba nthata cia îgûrû, wata bûra kwandîkîîtwe mabukuuni ma iroria kwerwa,

‘Antû ba Isiraeri, ibwanthînjîîre nyamû

na bwandutîra îgongwana rwanda

kagiita ka mîanka mîrongo îna?

43Bwakamatire îrema rîa ngai Moreki

na mûbuanaano wa ngai wenu wa nthata, Rebani,

birî ngai cienu cia mîbuanaano.

N'ûntû bwa ûgu, inkaabûtuîkithia atae Mbabironi.’#Amos 5:25-27

44“Biûyûûyû bietû bakûrûkîîrîîte rwanda ibaarî na îrema rîa kwonania Ngai arî amwe na bo. Îrema rîru rîarûngamagua wabûra Musa oonetue i Ngai. 45Biûyûûyû bietû ibiarî na rîo bagûkinya Kaanani batongorereetue i Njocua. Mîgongo îra beethagîra, Ngai naamîngatagia bakathûkia nthîgûrû inu igatuîka ciao. Na wana kinya îgiita rîa Ndaundi nwa baarî na îrema rîru. 46Ndaundi naakeniirie Ngai. Aûria Ngai wa Njakubu amwîtîgîîrie amwakîre bantû a gûkara. 47Îndî i Soromoni aamwakîîre nyomba.

48“Îndî Ngai ûra arî îgûrû mûno atikaraga nyomba cia gwakwa n'antû, wata bûra kîroria kîaugire,

49‘Mwathani ariuga, “Îgûrû i gîtî gîakwa kîa ûnene

na nthîgûrû n'ûkinyo bwa magûrû maakwa.

I nyomba mbi bûûmbakîra, i kû bûkuuga nkarage?

50Anga ti niû mbûmbîîte into bibi bionthe?” ’ ”#Isaaya 66:1-2

51“Biû bûûmîîtie biongo mûno. Nkoro cienu ciûyûri wîrirîîria na bûûrîrîtie matû mûno. Bûtuatîîtie biûyûûyû bienu, bûkararagia Kîrundu Ûmûtheru rîonthe. 52Anga kûrî kîroria biûyûûyû bienu bitaanyamaaria? Biaûragire bara baaroririe tene babeera mantû ma kûûya kwa ûra mwagîru, naabi nyumaani bwamûnenkanîra aûragwa, 53na ingî nwa biû bweerirwe watho gûkûrûkîîra kîrî araîka, îndî amwe na ûgu bûtaabuathîkîra.”

Stibini aûragwa na maiga

54Akîama bakwîgua ûgu, baamuntwa i nkoro, baathûûra mûno. 55Stibini naûyûrîîtwe i Kîrundu Ûmûtheru. Aacûûba îgûrû oona mwago wa Ngai na Yiesû arî rûteere rwa ûrîo rwa Ngai. 56Eera akîama babu, “Cûûbaani bwone! Inkwona îgûrû rîrugûkîîte na Mwana wa Muntû arî rûteere rwa ûrîo rwa Ngai.”

57Akîama baûkia gîtuma, bainga matû. Bonthe baumbuthûkania na Stibini 58bamûruta taûni kaingo bamûûraga na maiga. Babu baarî bamûûrage baaruta nguo îra ndaaya#7:58 Baarutire nguo îra beekagîra îgûrû rîa îra îngî. Na baarutire kaingo baûmba kûgera maiga bwega îtakûbatanga. baiga bantû mûthaka eetagwa Saûrû aarûngi.

59Bakîmûringangaga na maiga, Stibini aaromba auga, “Mwathani Yiesû, thûkia mwoyo wakwa!” 60Aaturia maru auga na inya, “Mwathani, ûtikaabatarîre meeyia mama.” Stibini akuuga ûgu, aakua. Mûthaka ûyu eetagwa Saûrû naagwatanîîre na antû babu.

Currently Selected:

NGÛGÎ 7: thk

Highlight

Copy