Mata 7
7
Maɗàh seriya à azladza anik à gəl aw
(Luka 6.37-38,41-42)
1“Kaɗahaw seriya à azladza anik à gəl aw, ŋgaha Zəzagəla aŋa maɗahakulla seriya à gəl suwaŋ aw. 2Kà uwana Zəzagəla adàɗahakulla seriya à gəl, kalkal bokuba uwana kaɗahàwwàŋ à azladza anik, adàzəɓay daram uwana kazəɓaw kagurawla azladza anik bay! 3Kà mana kanərəzay kəsaf uwana la yewdi aŋa deda aŋak la awtày, ama kak kanəŋa magol tsakuɗ tsakuɗ uwana la aŋak la awtày aw ma? 4Kakay kagoɗiya à deda aŋak: Sàk à gi, gəzəɓ à ka kəsaf uwaga la adi ala, tsa kak la magol tsakuɗ tsakuɗ la yewdi ma? 5Kak masla magolla dza, zə̀ɓ tsakuɗ tsakuɗ uwaga la adi ala dadàŋ, ŋgaha kadànəŋla lela kà aŋa mazəɓ aŋa deda aŋak!”
6“Kavàw tatak tsiɗaŋaga à azlakəda aw, kà aŋa magolla à akul ala afaɗ à gəl kà makohàh akul ala aw, kafàw slərkodzka aŋkul à azlanamzi aw à huma à gay aŋa mahabəŋ ala aw.”
Nàvàw ŋgaha tadàv akul
(Luka 11.9-13)
7“Nàvàw ŋgaha kadàɓəzawwal; yàhàw ŋgaha kadàɓəzawwal, zàlàhàwwàŋ ŋgaha tadàpəzl akul gamagày. 8Kəla dza uwana anavay aɓəzal, dza uwana ayahay aɓəzal, ŋgaha dza apəzl gamagày à dza uwana azalahay. 9Dza la ahəŋ la tataka aŋkul av akur à bəzi aŋha à baŋa anaval kà kaf takay? 10Awma avàl ma bebi à baŋa anaval kà kilfi ay? 11Iyay, akul azlamawisiga nəma, ama kasəlaw mavày tatak delga à azlabəza aŋkul, ŋgaha ma asa à məraka Baba aŋkul uwana la zagəla ay? Aɗuwa à akul la mav tatak delga à azladza uwana tanaval tatak!”
12“Uwana asa à akul azladza anik taɗahakulaŋ kà, akul babay kà ɗahàwwàŋ kiya uwaga à azladza bay suwaŋ, kiya uwaga à uwana mapəhay aŋa Musa apəhay la azlawakità aŋa azlaməna mapəh à atà gay à ahàl là abà kà mapahay à azladza.”
Gamagày slərkuts kutsga
(Luka 13.24)
13“Gàw à gay la gamagày slərkutskutsga! Kà uwana baŋŋaga uwanay kà, gamagày butu gà, ama adala dza kà à mazila, azladza aŋuvaw la tetəvi uwatà la tsəh. 14Ama slərkutskutsga uwanay kà gamagày zlazlaɗaga, ama masla la uwana adala dza à sifa à abà, ama azladza kà dəŋ la tetəvi uwatà la ama aw!”
Masəl ahàf kà la mayyay aŋha la vok
(Luka 6.43-44)
15“Ɗahàw haŋkəli kà azlaməna mapəh à atà gay à ahàl fida gà. Kà uwana tatsa à waŋ à slaka aŋkul la mapəhla vok aŋatà ala bokuba azlatuwaŋ, ama la huɗ gà kà azlakəda fəta. 16Kadàsəlaw atà kà la maɗehəŋ aŋatà la vok. Tadəzl mayyay matavəruk la atàk la vok aw, ŋgaha babay tadəzl gudəv la mazləɓ la vok aw. 17Ahàf delga avày mayyay delga, ahàf mawisiga avày mayyay mawisiga babay. 18Ahàf delga aslala vok aŋa mayyi mawisiga aw, ŋgaha ahàf mawisiga aslala vok aŋa mayyi delga aw. 19Kəla ahàf uwana ayyi delga aw kà, tahərats à ahəŋ, taduwal à akàl à tsəh. 20La kità babay kà, kadàsəlaw azlaməna mapəh à atà gay à ahàl figa gà la maɗehəŋ aŋatà la abà gesina.”
Gəsəl akul bà kà tetuwa aw
(Luka 13.25-27)
21“Azlauwana, ‘Sufəl, Sufəl!’, tagoɗ à gi, la uwana tadàda à makoray aŋa Zəzagəla gesin pəra aw, ama azlauwana taɗehəŋ tatak uwana asa à Baba gulo uwana la zagəla. 22Mok uwana mavakay aŋa seriya adàzlaŋalay, aŋuvaw tadàgoɗ à gi ‘Sufəl, Sufəl, la sləm aŋak la uwana məzahà gay Zəzagəla à azladza, la sləm aŋak la uwana məkuɗə̀kàh azlamasasəɗok mawisiga, la sləm aŋak la uwana məɗahàhà azlanadzipo aŋuvaw aw uwa?’ 23Kiya uwaga gədàgoɗ à atà: Tetuwa gəsəl akul aw, zàw vok la slaka gulo, akul uwana kaɗahàw tsakana!”#Mahabay 6.8
Azlagày səla
(Luka 6.47-49)
24“Dza uwana atsəna gay uwana gəpə̀h, ŋgaha af uwaga à ahəŋ, masla kà kalkal la dza haŋkəli gà, uwana aŋal gày aŋha à təhus à afik. 25Iyaw adzəkà masuway, ahənà à mukwà à afik, afaɗ aɗə̀ɗ la ndzəɗa, ama gày akalàh à ahəŋ aw, kà uwana matatukway aŋha kà aga kà la təhus la afik. 26Ama kəla dza uwana atsəɓ sləm à gay uwanay gədapəhay la abanay, ŋgaha atsəna uwaga aw kà, gəgagazləla kà la dza kusoŋu gà, uwana aŋal gày aŋha kà à wuyyaŋ à afik. 27Iyaw adzəkà masuway, ahənà à mukwà à afik, afaɗ aɗə̀ɗ la ndzəɗa, ŋgaha gày atə̀ɗ à ahəŋ gərim, matəɗ à ahəŋ aŋha kà panàhhà.”
Maslay aŋa Yesu
28Mok uwana Yesu adakəɗ gəl à matapla gay aŋha à azladza kà, maham à ahəŋ dza gesina kà ləv aval à atà à gay, kà tsəhay matapla aŋha uwana atapàtàla. 29Kà uwana masla kà atàpàtàla kà bokuba azlaməna mapàhla wakità seriya aŋatà ala aw, ama apə̀hàtàla kà la maslay aŋha.
Currently Selected:
Mata 7: mfh
Highlight
Share
Copy
Want to have your highlights saved across all your devices? Sign up or sign in
©2019, Wycliffe Bible Translators Inc. All rights reserve.