SEFANAIA, 3
3
O LE MATAUPU III.
O le aoaiga ia Ierusalema; o le manuia atali.
1Oi talofa i le aai fouvale ma le leaga, o le aai saua! 2Na ia le faalogo i le leo; na ia le talia le aoaiga; na ia le faatuatua ia Ieova, na ia le faalatalata atu i lona Atua. 3O ona alii sili i totonu ia te ia o leona fetagisi i latou; o ona faamasino o luko o le afiafi i latou; ua latou le paagugu ni ivi i le taeao. 4O ana perofeta o tagata mitamita vale i latou ma le faa‘ole‘ole; o ana ositaulaga ua latou soli le malumalu, ua latou soli le tulafono. 5O Ieova le amiotonu o loo i totonu ia te ia; e le faia e ia se amioletonu; o lea taeao ma lea taeao na te faamalamalama mai ai lana faamasinoga, e le aunoa lava; a o le tagata amioletonu na te le iloa mā. 6Ua ou faaumatia nuu ese; ua faatafunaina o latou ‘olo; ua ou faagaogaoina o latou malae, ua leai se ui ai; ua faaumatia a latou aai, ua le i ai se tagata, ua leai foi se mau ai. 7Na ou fai atu, Tau ina e mata‘u mai ia te au, ia e talia le aoaiga, ona le faaumatia ai lea o le mea e mau ai o ia, e le oo foi se mea e tasi ua ou faasalaina atu ai ia te ia; a ua latou ala tulai, ua latou fai ia leaga a latou mea uma ua fai.
8O lenei, ia outou faatalitali ia te au, o loo fetalai mai ai Ieova, ia oo i le aso ou te tulai atu ai i le vete; auā ua tonu ia te au e faapotopotoina nuu ese, e aofia lava malo; ina ia sasaa atu i luga ia i latou lo‘u ita, o lo‘u ita tele uma lava; auā e faaumatia le lalolagi uma i le afi o lo‘u fuā. 9Auā o ona po ia ou te liliu atu ai i nuu o le gagana lelei, ina ia latou valaau uma lava i le suafa o Ieova, ma auauna ia te ia ma le loto gatasi. 10O i tala atu o vaitafe o Aitiope e au mai ai le taulaga ia te au e o‘u tagata o ole mai, o le afafine lava o o‘u tagata ua faasalalauina. 11O lea aso e te le mā ai ona o sau amioga e tasi ua e fouvale ai ia te au; auā o ona po ia ou te aveeseina ai i totonu ia te oe o i latou o ia te oe o e mitamita faamaualuga; ona e le toe faamaualuga ai lea i lo‘u mauga paia. 12Ou te faatotoe i totonu ia te oe o le nuu agamalu ma le mativa, latou te faatuatua foi i le suafa o Ieova. 13O e totoe o Isaraelu latou te le faia amioletonu, latou te le tala pepelo foi; e le iloa foi i o latou gutu le laulaufaiva faa‘ole‘ole; a e latou te aai, ma taooto, e leai foi se faamatau mai.
14Le tama fafine a Siona e, ia e pese. Isaraelu e, ia e alaga; le tama fafine a Ierusalema e, ia e fiafia, ma olioli lava ma le loto atoa. 15Ua faaolaina e Ieova au sala, ua na aveeseina le na fai oe ma ona fili; o le Tupu o Isaraelu, o Ieova, o loo i ai o ia i totonu ia te oe, e te le toe iloa ai se malaia. 16O lea aso o le a faapea atu ai i Ierusalema, Aua e te fefe; Siona e, aua ne‘i vaivai ou lima. 17O Ieova lou Atua i totonu ia te oe o l? malosi ia; na te faaolaina; e olioli o ia ia te oe ma le fiafia; o lona alofa e le fetalai ai o ia; e olioli lava o ia ia te oe ma le ofo fiafia. 18Ou te faapotopotoina i latou ua faanoanoa ona o tausamiga, (o ou tagata i latou,) ua mafatia i le luma ona o ia. 19Faauta, o ona po ia ou te faatiga ai ia te i latou uma o e faasaua ia te oe; ou te faaolaina foi le ua setusetu, ou te faapotopotoina foi le ua tulia, ou te avatu foi ia te i latou le viiga ma le igoa i nuu uma lava sa faamāina ai i latou. 20O ona po ia ou te au mai ai outou, o ona po foi lava ou te faapotopotoina ai outou; ou te avatu ai lava ia te outou le igoa ma le viiga i nuu uma o le lalolagi, pe a ou faafoisia la outou tafeaga, o outou o vaai i ai, o loo fetalai mai ai Ieova.
Currently Selected:
SEFANAIA, 3: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
