SAKARIA, 5
5
O LE MATAUPU V.
O le tusi ua lele, ma le efa.
1Ona ou toe tepa ae lea ma ou iloa, faauta, o le tusi taai ua lele. 2Ua ia fai mai ia te au, O le a ea ua e iloa? Ona ou fai atu lea, Ua ou iloa le tusi taai ua lele; o lona umi, o kupita e luafulu, o lona lau e sefulu kupita ia. 3Ua fai mai o ia ia te au, O le faafano lenei o le a alu atu i le fogāeleele uma lava; auā e taitasi uma o e gaoi ma tafia o ia ai lenei mea, e pei o le tusi; e taitasi uma foi o e tauto ma tafia o ia ai le mea nei, e pei e le tusi. 4Ua fetalai mai Ieova o ‘au, Ou te aumaia; e oo atu lava ia i le fale o le gaoi, ma le fale o le ua tauto pepelo i lo‘u igoa; e tumau ai i totonu o lona fale, ma faaumatia ai ona laau ma ona maa.
5Ua alu ane foi le agelu na ma tautala, ua fai mai o ia ia te au, Ia e tepa i luga, ma e vaai, po o le a lena o loo alu atu. 6Ua ou fai atu, O le a lena? Ua fai mai o ia, O le efa lena o loo alu atu; ua fai mai foi o ia, O lona tino mai lena i le nuu uma. 7Faauta foi, o le taleni o pulu ua siitia; o le fafine foi lenei o loo nofo i totonu o le efa. 8Ua ia fai mai foi, O le amio leaga lenei; ona ia lafotuina lea o ia i totonu o le efa, ma na lafo le fua pulu i le gutu o le efa.
9Ua ou tepa foi i luga, ona ou iloa lea, faauta, o fafine e toalua na o atu; ua i ai foi le matagi i o la apaau; auā sa ia te i laua o apaau, pei o apaau o le kasita; ua la siitia le efa i le va o le lalolagi ma le lagi. 10Ona ou fai atu lea i le agelu na ma tautala, Po o fea la te ave i ai le efa? 11Ona fai mai lea o ia ia te au, O le a ave ina ia fai se fale mōna i le nuu o Senara; e faatu ai, ma faamau ai i lona lava taele.
Currently Selected:
SAKARIA, 5: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
