TITO, 3
3
O LE MATAUPU III.
O mea e a‘oa‘oina atu, ma mea e le a‘oa‘oina atu.
1Ia e faamanatu atu ia i latou ia latou usiusitai i alii sili ma faipule, ia gauai i alii, ia nofo sauniuni foi i latou i galuega lelei uma lava, 2aua ne‘i upu leaga i se tasi, aua ne‘i faamisa, a ia faapalepale, ma ia faaali atu le agamalu uma i tagata uma lava. 3Auā o i tatou foi, sa vālea i tatou anamua, ma faalogogata, ma faaseseina, sa auauna i tu‘inanau ma mea eseese e fiafia ai, sa nonofo ma le loto leaga ma le mataua, sa inosia ma feitagai. 4A ua faaalia mai le agalelei ma le alofa i tagata o lo tatou Faaola le Atua, 5ona faaola mai ai lea o ia ia i tatou, e le ona o galuega o i le amiotonu sa tatou faia, a e tusa ma lona lava alofa i le faataeleina i le toefuataiina ma le faafouina e le Agaga Paia, 6ua na faamaligi tele mai i luga ia i tatou, ona o Iesu Keriso lo tatou Faaola; 7ina ia ta‘uamiotonuina i tatou i lona lava alofa tunoa, ia fai i tatou ma suli e tusa ma le faamoemoe i le ola e faavavau. 8O le upu moni lena ou te loto foi ina ia e matuā faamalosi atu i ia mea, ina ia naunau i latou o e ua faatuatua i le Atua ona ia faia galuega lelei; e lelei lava ia mea ma aoga i tagata. 9A ia taumamao ma sailiga valea ma tala tupuga, ma le femisaiga, ma le fefinauaiga i la le tulafono; auā o upu le aoga ia ma le faatauvaa. 10O le tagata na te faatupu le fevaevaeaiga ia e ‘alo ese ia te ia pe a uma atu ia te ia le aoaiga e atu tasi pe atu lua; 11auā ua iloa o le tagata faapena ua liliueseina lava o ia, ma ua agasala, ua faasalaina o ia e ia.
12A ou auina atu ia te oe o Aretima, po o Tuiko ia e faataalise ona sau ia te au i Nikopoli; auā ua tonu lo‘u manatu ou te nofo ai i le tausaga maalili. 13Ia e matuā fesoasoani i le malaga a Sena le a‘oa‘o tulafono, atoa ma Apolo, ina ia le mativa i laua i se mea e tasi. 14Ia a‘oa‘oina foi o latou uso ia faia e i latou galuega lelei e maua ai mea aoga, ina ne‘i le fua mai i latou. 15O i latou uma lava o ia te au o loo alolofa atu i latou ia te oe; ua ou alofa atu ia i latou o e alolofa mai ia te i matou i le faatuatua. Ia ia te outou uma lava le alofa tunoa. Amene.
Currently Selected:
TITO, 3: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
