FAATAOTO, 7
7
O LE MATAUPU VII.
O togafiti a le fafine mulilua.
1Lo‘u atalii e, ia e tausi a‘u upu, ma e teu a‘u poloaiga ia te oe. 2Ia e tausi a‘u poloaiga, e te ola ai, ma a‘u tulafono e pei o lou tamatamaimata; 3ia e fusi ai i ou tamatamai lima; ia e tusi ai i le papa o lou loto; 4ia e fai atu i le poto, O oe o lo‘u tuafafine; ma ia e ta‘ua le atamai, o lou aiga lea. 5Ina ia leoleo ia te oe ai le fafine ese, o le fafine ese na te faaoleole i ana upu. 6Auā o le faamalama o lo‘u fale na ou vaavaai atu ai i le mea faamataupega; 7ona ou vaai atu ai lea i e faigofie; na ou iloa ua i taulelea le tasi tama, ua leai sona mafaufau; 8na ui ane o ia i le ala e lata ane i le fetaulaigāala e nofo ai le fafine; na ia alu ane i le ala i lona fale, 9i le segisegi, i le afiafi, i le tulua o po, i le pouliuli; 10faauta foi, na fetaiai ma ia le fafine ua ofu i le ofu o le fafine talitane, ua ia te ia foi le loto pepelo; 11ua leoleoa o ia, ma le vaogata; ua le nofo tumau ona vae i lona fale. 12Se itu aso ua i fafo, se itu aso ua i malae; na te lamalama foi e lata ane i fetaulaigāala uma lava. 13Na ia pue atu foi ia te ia, ma sogi ia te ia ua mata faalemā; ma ua faapea atu ia te ia, 14Ua ia te au taulaga faafetai; o le aso nei, ua ou avatu ai mea na ou tauto ai; 15o le mea lea na ou sau ai e faafetaiai ia te oe; e saili lava ia te oe, ua ou maua foi oe. 16Ua fofola lo‘u moega i ie afu, o le ie pulepule mai Aikupito. 17Ua ou luluina lo‘u moega i le muro, ma aloe, ma le kinamomi; 18sau ia, ina ta faamalilie i le alofa, seia oo i le taeao, ia ta fiafia lava i le fealofani. 19Auā e le i ai la‘u tane i lona fale; ua alu o ia i le malaga mamao. 20Ua alu ma ia le taga tupe; e sau o ia i lona aiga i le masina e faatoa vaaia.
21Na ia faasese ia te ia i le tele o ana togafiti; na ia tosina o ia i ona laugutu faaoleole. 22Ua mulimuli loa o ia ia te ia, e pei o le povi ua alu a fasia; e pei o le vale ua alu i le aoaiga o noanoaga; 23seia ati le u i lona ate; e pei ona faavave atu le manu i le mailei; na te le iloa ua saunia lea e mate ai o ia.
24O lenei, la fanua e, ia outou faalogo mai ia te au; ia uai mai o outou taliga i upu a lo‘u gutu; 25aua ne‘i afe lou loto i ona ala; aua ne‘i e sese atu i ona magāala. 26Auā e toatele ua lafotuina e ia ua manunua; o e malolosi lava o i latou uma e ua fasiotia e ia. 27O lona fale, o le ala i seoli lea, e alu ifo ai i ana o le oti.
Currently Selected:
FAATAOTO, 7: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
