MAREKO, 15
15
O LE MATAUPU XV.
O le faasatauroina o Iesu.
1Ua ao, ona taupulepule loa lea o le au ositaulaga sili, atoa ma toeaina, ma le au tusiupu, ma le taupulega uma, ua latou noanoa ia Iesu, ma ta‘ita‘i atu ia te ia, ma tuuina atu ia Pilato. 2Ona fesili mai lea o Pilato ia te ia, O oe ea e le tupu o tagata Iutaia? Ona tali atu lea o ia ia te ia, ua faapea atu, O lea lava. 3Ua momoli foi ia te ia e le au ositaulaga sili i mea e tele. 4Ona toe fesili mai lea o Pilato ia te ia, ua faapea mai, E te le tali mai lava ea? Faauta i le tele o mea ua latou molimau ai ia te oe. 5A ua le tali atu e Iesu sina upu; o le mea lea ua ofo ai Pilato.
6O lea tausamiga ma lea tausamiga, ua ia tatalaina atu ai ia te i latou se tasi pagota, latou te fai ane ai. 7Sa i ai le tasi ua igoa ia Parapa, ua noatia faatasi ma e na fouvale ma ia, e na fasioti tagata i le fouvale sa fai. 8Ona alalaga atu ai lea o le motu o tagata, ma fai atu, ina ia faia e ia ia te i latou, faapei ona masani ai o ia. 9Ona tali atu lea o Pilato ia te i latou, ua faapea atu, Tou te loto ea ina ia ou tatalaina atu ia te outou le tupu o tagata Iutaia? 10Auā ua na iloa o le mataua na tuuina atu ai o ia e le au ositaulaga sili. 11A o le au ositaulaga sili, ua latou faaoso i le motu o tagata, ina ia tatalaina mai e ia o Parapa ia te i latou, a e tuu pea Iesu. 12Ona toe tali atu ai lea o Pilato ia te i latou, ua faapea atu, Se a foi se mea tou te loto i ai ou te faia ia te ia e ta‘ua te outou o le tupu o tagata Iutaia? 13Ona latou toe alalaga ai lea, Ina faasatauro ia ia te ia. 14Ona fai atu lea o Pilato ia te i latou, Se a foi se mea leaga ua na faia? A ua atili ai ona latou alalaga, Ina faasatauro ia ia te ia. 15Ua loto Pilato e faalotomălie i le motu o tagata, ua ia tatalaina atu ai Parapa ia te i latou; ua uma ona sasaina o Iesu e ia, ona ia tuuina atu lea o ia ia faasatauroina.
16Ona ta‘ita‘iina atu lea o ia e le ‘au i le maota, o le maota lea o le alii, ua latou faapotopotoina foi le ‘au uma. 17Ona latou faaofu lea ia te ia i le ofu pāuli, ma latou taataai laau tuitui ua fai a‘i le pale, ua faapaleina ai o ia. 18Ona latou alolofa mai lea ia te ia, ua faapea mai, Talofa le tupu o tagata Iutaia. 19Ua latou ta foi i lona ao i le u, ma feanu ia te ia, ma tootuli ma ifo ia te ia. 20Ua uma ona latou faatauemu ia te ia, ona latou toeseina lea o le ofu pāuli ia te ia, ma faaofu ia te ia i ona lava ofu; ona latou ta‘ita‘i atu lea ia te ia ia faasatauroina o ia. 21Ua alu ane le tasi tagata, o Simona le Kurene, ua sau mai le vao, o le tamā foi o ia o Alesana ma Rufo, ona latou faataunau lea ia te ia, ina ia ave e ia o lona satauro. 22Ua latou ave foi ia te ia i Kolokota, o lona uiga pe a faamatalaina, O le mea o i ai le ulupoo; 23ona latou avane lea ia te ia le uaina ua fefiloi ma le muro, e inu ai; a ua le talia e ia. 24Ua uma ona latou faasatauroina o ia, ona latou tufatufa lea i ona ofu, ma fai ai le vili, e iloa ai le mea a le tagata. 25O le itu aso e tolu na latou faasatauro ai ia te ia. 26Ua tusia foi le tusi i le mea na molia ai o ia, O LE TUPU O TAGATA IUTAIA, 27Ua latou faasatauro foi faatasi ma ia tagata fao mea e toalua; o le tasi i lona itu taumatau, ma le tasi i lona itu tauagavale. 28Na taunuu ai le Tusi, ua faapea, Na faitauina o ia faatasi ma pagotata. 29O i latou foi na ui ane, ua latou upu leaga ia te ia, ma lialiai o latou ulu, ua faapea mai, Ue! o oe na o lē lepeti le malumalu, ma toe faia i aso e tolu, 30ina faaola ia oe ia te oe, ma alu ifo i le satauro. 31Ua faapea foi le au ositaulaga sili ua faatauemu i latou faatasi, atoa ma le au tusiupu, ua faapea ane, Na ia faaolaina isi tagata, na te le mafaia ona faaola o ia ia te ia. 32Ina alu ifo nei lava le Keriso, le tupu o Isaraelu, i le satauro, tatou te iloa ai, ma tatou talitonu ai. O e na faasatauroina foi faatasi ma ia, ua la upu leaga ia te ia.
33Ua oo i le itu aso e ono, ona pogisa uma ai lea o le nuu, ua oo lava i le itu aso e iva. 34O le itu aso e iva foi ua alaga ai Iesu, ua leo tele, ua faapea atu, Eloi, Eloi, lama sapatani? o lona uiga pe a faamatalaina, Lo‘u Atua e, lo‘u Atua e, se a le mea ua e tuulafoai mai ai a‘u? 35Ua faalogo ai nisi o e na tutū mai, ona latou faapea ane ai lea, Faauta, o loo valaau atu o ia ia Elia. 36Ona momo‘e lea o le tasi, ma fufui le omomi i le vineta, ua tuu i luga i le pito laau, ma faainu ia te ia, ua faapea atu, Tuu pea ia; se‘i tatou iloa pe sau Elia e ave ifo ia te ia.
37Ua alaga Iesu ua leo tele, ona to ai lea o lana mānava. 38Ona saeluaina lea o le ie puipui o le malumalu, ua amata ifo i luga, ua oo lava i lalo. 39O le ta‘ita‘i o le toaselau, o le na tu atu i ona luma, ua iloa e ia ua faapea ona alaga o ia, ona to lea o lana mānava ona faapea atu ai lea o ia, E moni, o le Alo o le Atua lenei tagata. 40Sa i ai foi fafine o matamata mamao mai, sa i ai foi ia te i latou o Maria le Makatala, ma Maria le tinā o Iakopo le itiiti ma Iose, atoa ma Salome; 41o e na mulimuli atu ia te ia ina o i Kalilaia o ia, ma auauna ia te ia; atoa ma isi fafine e toatele, o e na o ae faatasi ma ia i Ierusalema.
42Ua oo i le afiafi, (auā o le aso e sauni ai lea, o le aso lea i tua atu o le sapati), 43ua alu ane ai Iosefa le Arimataia, o le tasi faipule sili, o ia foi sa faatalitali i le malo o le Atua, ua faamalosi o ia ona alu atu ia Pilato, ma faanoi atu ai i le tino o Iesu. 44Ona ofo lea o Pilato ina ua vave maliu o ia; ua na valaau atu foi i le ta‘ita‘i o le toaselau, ma fesili atu i ai, po o ua leva lona maliu. 45Ua iloa e ia i le ta‘ita‘i o le toaselau, ona avatu ai lea o le tino ia Iosefa. 46Na taulia foi e ia le ie lino, ua ave ifo foi ia te ia, ona aui lea i le ie lino, ua tuu foi ia te ia i le tuugamau na foa i le papa, ona fuli ane lea o le maa i le gutu o le tuugamau. 47Ua vaavaai foi Maria le Makatala, ma Maria le tinā o Iose i le mea na tuuina ai o ia.
Currently Selected:
MAREKO, 15: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
