MATAIO, 15

O LE MATAUPU XV.

O le sese o le au faresaio. O le vavega i mea e ‘ai.

1Ona o mai ai lea ia Iesu o tusiupu ma faresaio mai Ierusalema, ua faapea mai, 2Se a le mea ua soli ai e ou soo le uputuu a ē anamua? auā ua le fafano o latou lima pe a latou aai. 3A ua tali atu ia, ua faapea atu ia te i latou, Se a le mea ua soli ai e outou foi le poloaiga a le Atua i a outou uputuu? 4Auā ua poloai mai le Atua, ua faapea mai, Ia e ava i lou tamā ma lou tinā; i le ma lea, O lē upu leaga i le tamā po o le tinā, ia fasiotia lava ia. 5A ua outou fai mai, Ai se fai ane i le tamā po o le tinā, ai se mea ua ia te au e aoga ia te oe, o le taulaga lea; 6ona le toe ava lea o ia i lona tamā po o lona tinā. Ua faapea ona outou faaleaogaina le poloaiga a le Atua i a outou uputuu. 7O outou tagata pepelo, e tatau lava ia te outou le valoaga a Isaia, ua faapea mai, 8Ua faalatalata mai ia te au lenei nuu i o latou gutu, ma vivii mai ia te au i oo latou laugutu, a o latou loto ua taumamao ia te au. 9E tapuai fua mai i latou ia te au i lo latou fai ma mataupu o poloaiga a tagata. 10Ona valaau atu lea o ia i le motu o tagata, ua fetalai atu ia te i latou, Faalogo mai ia, ma ia outou lagona. 11E le o le mea ua tuu i le gutu e leaga ai le tagata, a o le mea e sau mai le gutu, o lea ua leaga ai le tagata. 12Ona o mai ai lea o ona soo ia te ia, ua fai mai ia te ia, Ua e silafia ea ua tiga le au faresaio i lo latou faalogo i lea upu? 13A ua tali atu ia, ua faapea atu, O laau uma e lei totōina e lo‘u Tamā o i le lagi, e liaiina ia. 14Tuu pea ia i latou, o tauaso i latou e ta‘ita‘i i e ua tauaso; afai foi e ta‘ita‘iina le tauaso e le tauaso, ona la pauu uma ai lea i le lua. 15Ona tali mai ai lea o Peteru, ua faapea mai ia te ia, Ia e faamatala mai ia te i matou lena faataoto. 16Ona fetalai atu ai lea o Iesu, Tou te le āu lagona foi ea e outou? 17Tou te le āu iloa ea, o mea uma ua tuu i le gutu, ua oo ia i le manava, ona lafoaiina lea i le māliuga? 18A o mea e sau mai le gutu, ua alu ae ia mai le loto, o mea ia e leaga ai le tagata. 19Auā e alu ae mai le loto o le manatu leaga, o le fasioti tagata, ole mulilua, o le faitaaga, o le gaoi, o le molimau pepelo, ma le upu leaga. 20O mea ia e leaga ai le tagata; a o le ‘ai ma lima e lei fafano, e le o lea e leaga ai le tagata.

21Ua maliu ese Iesu i lea mea, ona oo atu ai lea o ia i le laueleele o Turo ma Saitonu. 22Faauta foi, o le fafine o Kanana ua sau mai lea lava itu, ua alaga mai ia te ia, ua faapea mai, Le Alii e, le alo o Tavita, ia e alofa mai ia te au; ua leaga lava la‘u tama teine i le temoni ua i ai. 23A ua leai se upu na ia tali atu ai ia te ia. Ona o mai ai lea o ona soo, ua aioi mai ia te ia, ua faapea mai, Ia e tuuina atu ia te ia e alu, auā ua mulimuli mai o ia, ma alaga mai ia te i tatou. 24A ua tali atu ia, ua faapea atu, E lei auina mai a‘u i nisi, a e tau lava o mamoe o le aiga o Isaraelu ua le iloa. 25Ona sau ai lea o ia, ua ifo ia te ia, ua faapea mai, Le Alii e, ia e fesoasoani mai ia te au. 26Ona tali atu ai lea o ia, ua faapea atu, E le tatau ona ave le mea e ‘ai a le fanau, ma lafo i ulī. 27Ona fai mai ai lea o ia, Le Alii e, e moni a oe; auā foi ua aai e ulī o momoi mea ua pauu i laulau a o latou tāula. 28Ona tali atu ai lea o Iesu, ua faapea atu ia te ia, Funa e, ua tele lou faatuatua; e pei o lou manao, ia faapea lava ona faia ia te oe. Ona malolo ai lea o lana tama teine i lea lava itu aso.

29Ua maliu ese Iesu i lea mea, ona oo atu ai lea o ia e lata ane i le vai o Kalilaia; ua maliu ae i le mauga, ua nofo ai i lalo. 30Ona o mai ai lea ia te ia o le motu o tagata e toatele, ua ia te i latou o e pipili, o e tauaso, o e gūgū, o e mumutu, atoa ma nisi e toatele, ua latou tuu atu ia i latou i vae o Iesu; ona faamalolo ai lea e ia o i latou. 31Ona taufaiofo ai lea o le motu o tagata ina ua latou iloa atu o e sa gūgū ua tautala, o e sa mumutu ua atoatoa, o e sa pipili ua savavali, o e sa tauaso foi ua vaai; ona latou vivii atu ai lea i le Atua o Isaraelu. 32Ona valaau atu ai lea o Iesu i ona soo, ua faapea atu, Ou te alofa atu i le motu o tagata, auā o le aso tolu lenei o tatou nonofo ma i latou, e leai foi ni a latou mea e ‘ai. Ou te le mafai ona tuuina atu ia te i latou e ō mātelaina, ne‘i latou lailoa i le ala. 33Ona fai mai ai lea o ona soo ia te ia, Tatou te maua ifea ea i le vao ni areto e tele, ina ia maoona ai le motu o tagata ua toatele naua? 34Ona fetalai atu ai lea o Iesu ia te i latou, E fia ea ni a outou areto? Ona latou fai mai ai lea, E fitu, ma nai i‘a lāuiti. 35Ona fetalai atu ai lea o ia i le motu o tagata ia latou taooto i lalo; 36ona tago ai lea o ia i areto e fitu ma i‘a, ua faafetai, ma tofitofi, ona avatu ai lea e ia i ona soo, ona avatu ai lea e le au soo i le motu o tagata. 37Ona aai ai lea o i latou uma lava, ua maoona; ua latou fu‘e foi i toe ‘aiga, ua tutumu ai ete e fitu. 38O i latou foi na aai e toafagaafe o tane, a e lei faitaulia fafine ma tama iti. 39Ua tuuina atu e ia le motu o tagata e ō, ona maliu ae ai lea o ia i le vaa, ua alu atu i le nuu o Makatala.

Currently Selected:

MATAIO, 15: SOV

Highlight

Copy