LUKA, 9

O LE MATAUPU IX.

Ua aauina atu e Iesu ana aposetolo e tala‘i i le malo o te Atua.

1Ua faapotopotoina e ia ona soo e toasefulu ma le toalua, ua tuu atu ia te i latou le mana ma le pule i temoni uma, ma ia faamalolo i ma‘i. 2Ua aauina atu i latou e ia e tala‘i i le malo o le Atua, e faamalolo foi i e mamai. 3Ua fetalai atu foi o ia ia te i latou, Aua tou te ave se mea i le malaga, po o tootoo, po o se taga, po o mea e ‘ai, po o se tupe, aua foi ne‘i tailua ofu tino. 4O se fale foi tou te ulu atu i ai, ia nonofo ai i le tou o ai lava. 5Ai se lē talia outou, a outou o ese i lea aai, ia tūtū atu le eleele i o outou vae, e fai ma molimau ia te i latou. 6Ua latou o atu, ona faataamilo ai lea i lea aai ma lea aai e folafola le tala lelei, ma faamalolo i ma‘i i mea uma.

7Ua faalogo le tupu o Herota i mea uma ua faia e ia, ona fememeai lea o ia, ina ua fai mai nisi, Ua tu mai Ioane i e ua oti; a o isi, 8Ua faaali mai Elia; a o isi. Ua toe tu mai le tasi o le au perofeta anamua. 9A ua fai ane Herota, Na ou vavaeeseina le ulu o Ioane; a o ai lenei ua ou faalogo ai i mea faapena? Ua manao o ia i le fia vaai ia te ia.

10Ua toe foi mai le au aposetolo, ma faamatala mai ia te ia mea uma ua latou faia; ona ave lea o ia ia te i latou, ua ō na o i latou i se mea gaogao o le nuu, o Petesaita le igoa. 11Ua iloa e le motu o tagata, ona latou mulimuli atu lea ia te ia; ona talia lea o i latou e ia, ua fetalai foi ia te i latou i le malo o le Atua, ma faamalolo i e na fia faamaloloina. 12Ua taugagaifo le la, ona o mai lea ia te ia o le toasefulu ma le toalua, ua fai mai. Ia e tuuina atu le motu o tagata, ina ia latou o atu i aai ma faoa aai ua latalata mai, e api ai, ma maua ai mea e ‘ai; auā o le mea gaogao ua tatou i ai nei. 13A ua fetalai atu ia ia te i latou, Ia outou avane ni mea e ‘ai mā latou. Ona latou fai mai lea, E leai ni a tatou mea, na o areto e lima gafua, ma i‘a e lua lau; se‘i iloga matou te o e faatau ni mea e ‘ai mā lenei nuu uma. 14Auā o i latou pe toalima gaafe o tane. Ua fetalai atu ia i ona soo, Ia outou fai atu ia te i latou ia taooto i vasega, e taitoalimagafulu. 15Ua latou faapea lava ona fai, ma fai atu ia te i latou uma ia taooto i lalo. 16Ona tago ai lea o ia i areto e lima gafua, ma i‘a e lua lau, ua tepa ae i le lagi, ua faafetai, ma tofitofi, ua avatu i ona soo, latou te laulau atu ai i le motu o tagata. 17Ua latou aai, ua maoona uma lava; ona fu‘e lea o a latou toe ‘aiga, ua tumu ato e sefulu ma le lua i fāsi mea.

18Ua tatalo toatasi o ia; sa faatasi ma ia ona soo; ona fesili atu lea o ia ia te i latou, ua faapea atu, Se a le upu a tagata ia te au po o ai? 19Ua latou tali mai, ua faapea mai, O Ioane le papatiso; a o isi, o Elia; a o isi, Ua toe tu mai le tasi o le au perofeta anamua. 20Ua fetalai atu ia ia te i latou, A o outou na, se a la outou upu ia te au nei po o ai? Ona tali mai lea o Peteru, ua faapea mai, O oe o le Keriso o le Atua. 21Ona vavao atu lea o ia ia te i latou, ua fetalai atu, ne‘i ta‘uta‘ua lea mea i se tasi; ua faapea atu, 22E tatau ona tiga le Atalii o le tagata i mea e tele, ma ia lafoaiina e toeaina, ma faitaulaga sili, ma le au tusiupu, ia fasiotia foi; e faatuina foi o ia i le aso tolu. 23Ua fetalai atu ia i tagata uma, A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i aso fai soo, i le mulimuli mai ai ia te au. 24Auā ai sē fia faasaogalemuina lona ola, e māumau ai ia te ia; a o lē faamāumau i lona ola ona o a‘u, e faasaoina e ia. 25Auā se a le aoga i le tagata pe afai na te maua le lalolagi uma, a e faamāumau e ia ia ia, pe lafoaiina? 26Auā ai se mā ia te au ma a‘u upu, e mā foi ia te ia le Atalii o le tagata, pe a sau o ia i lona mamalu, ma lo le tamā, ma le au agelu paia. 27E moni, ou te fai atu ia te outou, o loo tutū mai nisi iinei, e le oo ia te i latou le oti, seia latou vaaia le malo o le Atua.

28Ua mavae nei upu, po ua po valu, ona ave lea e ia o Peteru, ma Ioane, ma Iakopo, ua maliu ae i le mauga e tatalo. 29O loo tatalo ia, a ua liua ona fofoga, ua pa‘epa‘e ma pupula tele mai ona ofu. 30Faauta foi, ua tautala ma ia o tagata e toalua, o Mose ma Elia i laua, 31o e na faaali mai ma le pupula; ua latou fetautalatala‘i i lona maliu o le a faaiuina i Ierusalema. 32A ua moe gagase Peteru ma e ua faatasi ma ia; ua latou ala, ona latou iloa lea o lona pupula, ma tagata e toalua e ua tutu faatasi ma ia. 33Ua oo ina la o ese ia te ia, ona fai mai lea o Peteru ia Iesu, Le Alii e, e lelei ina tatou nonofo iinei; matou te faia foi ni fale apitaga se tolu; mo oe le tasi, mo Mose le tasi, mo Elia foi le tasi; ua le iloa e ia le mea ua ia fai atu ai. 34O loo fai mai ia mea, a e oo mai le ao, ma ufitia i latou; ua latou matatau ina a oo mai le ao. 35Ona oo mai lea o le siufofoga mai le ao, ua faapea mai, O lo‘u Atalii pele lena; ia outou faalogo ia te ia. 36Ua mavae atu le siufofoga, ona iloa mai lea na o Iesu. Latou te lei gagana lava, e lei ta‘u atu foi i se tasi i ia ona aso se mea e tasi o mea ua latou vaai i ai.

37O le taeao ua latou o ifo ai i le mauga, ona fetaiai lea ma ia o le motu o tagata e toatele. 38Faauta foi, ua alaga mai le tasi mai le motu o tagata, ua faapea mai, Le a‘oa‘o e, ou te aioi atu ia te oe, e te silasila mai i lo‘u atalii; auā o ia lo‘u atalii toatasi. 39Faauta foi, ua pue ia te ia e le agaga, ona alaga loa lea, ma faataafiti ia te ia, ma ua fāuā lona gutu, ua tu‘i fulifuli ia te ia, toe ina le alu ese ia te ia. 40Na ou aioi atu foi i ou soo ia latou tuli ia te ia i fafo; a ua le mafai lava ia te i latou. 41Ua tali atu Iesu, ua faapea atu, Le tupulaga lē faatuatua ma le faapiopio, ou te i ai ia te outou, ma onosai ia te outou seia afea? Ina au mai ia lou atalii iinei. 42O loo sau ia, a e lafotu ma faataafiti ia te ia e le temoni. Ona vavao lea e Iesu i le agaga leaga, ma ua faamalolo i le tama, ma toe tuu atu ia te ia i lona tamā. 43Ua latou matuā ofo uma i le vavega o le Atua. O loo ofo i latou uma i mea uma na faia e Iesu, ona fetalai atu lea o ia i ona soo, 44Ia outou matuā faalogologo i nei upu, auā o le a tuuina atu le Atalii o le tagata i lima o tagata. 45A ua le iloa e i latou lea upu, ua lilo ia te i latou, o lea na latou le lagona ai lea mea; ua latou matatau foi e fesili ia te ia i lea upu.

46Ua tupu le finauga ia te i latou, po o ai so latou e sili. 47Ua silafia e Iesu le manatu o latou loto, ona tago lea o ia i le tama itiiti, ma faatu ia te ia i ona tafatafa. 48Ua fetalai atu o ia ia te i latou, Ai sē talia lenei tama itiiti i lo‘u igoa, ua talia a‘u e ia; ai sē talia foi a‘u, ua talia e ia le na auina mai a‘u; auā o le aupito itiiti ia te outou uma, e sili lava ia. 49Ona fai mai lea o Ioane, ua faapea mai, Le Alii e, na matou iloa le tasi na ia tulia temoni i lou suafa; ona matou vavao lea ia te ia, auā ua ia le mulimuli mai ia te i tatou. 50Ona fetalai atu lea o Iesu ia te ia, Aua tou te vaoia; auā o le lē ‘au ese ia te i tatou, e ‘au faatasi lea ma i tatou.

51Ua oo atu i ona po e siitia ai o ia, ona matuā faasaga atu lea o ia a maliu atu i Ierusalema; 52ua aauina atu e ia nisi e muamua atu i le feau; ua latou o atu ma afe i le tasi aai o Samaria e sauni ai mo ia. 53A ua le talia o ia e i latou, auā ua faasaga atu lana malaga i Ierusalema. 54Ua iloa e ona soo o Iakopo ma Ioane, ona la fai mai lea, Le Alii e, pe e te finagalo, ma te fai atu ia alu ifo le afi mai le lagi, ia fano ai i latou, pei ona faia e Elia? 55A ua fāliu o ia, ma aoai ia te i laua, ua faapea atu, E le iloa e oulua le uiga o oulua loto; 56auā e lei sau le Atalii o le tagata e faaumatia le ola o tagata, a ia faaolaina. Ona latou o atu lea i le tasi aai.

57Ua latou o i le ala, ona fai mai lea o le tasi ia te ia, Le Alii e, ou te mulimuli atu ia te oe i mea uma e te maliu atu i ai. 58Ona fetalai atu ai lea o Iesu ia te ia, E fai lua o alope, e fai foi mea e momoe ai manu felelei; a o le Atalii o le tagata, e leai se mea e moe ai o ia. 59Ua fetalai atu ia i le tasi, Ina mulimuli mai ia ia te au. A ua fai mai o ia, Le Alii e, tuu mai ia ia te au, se‘i ou alu e muai tanu i lo‘u tamā. 60A ua fetalai atu Iesu ia te ia, Ina tuu pea ia i e ua oti e tanu i o latou tagata oti; a o oe, e te alu ma tala‘i atu le malo o le Atua. 61Ua fai mai foi le tasi, Le Alii e, ou te mulimuli atu ia te oe; a ia tuu mai ia te au, se‘i ou muai faamavae i lo‘u aiga. 62Ua fetalai atu Iesu ia te ia, O lē tago lona lima i le suotosina, ma tepa i tua, e le tatau ia i le malo o le Atua.

Currently Selected:

LUKA, 9: SOV

Highlight

Copy