LUKA, 24

O LE MATAUPU XXIV.

O le toe tu o Iesu nai e ua oti.

1O le uluai aso o le vaisapati, ua latou o atu ai i le tuugamau i le tafa o ata, ua ave mea manogi na latou saunia, o isi foi fafine sa faatasi ma i latou. 2Ua iloa e i latou ua fulieseina le maa nai le tuugamau; 3ona latou ulu atu lea i totonu, a e lei iloa le tino o le Alii o Iesu. 4Ua fememeai i latou i lenei mea, faauta foi, ua tutū mai ia te i latou tagata e toalua ua oofu i ofu pupula. 5Ua matatau i latou, ua punou foi o latou mata i le eleele, ona la fai mai lea ia te i latou, Se a le mea tou te saili ai le ua soifua i e ua oti? 6E le o iinei o ia, a ua tu; ia outou manatu i lona fetalai atu ia te outou, ina o i Kalilaia o ia, 7ua faapea atu, E tatau ona tuuina atu o le Atalii o le tagata i lima o tagata agasala, ma ia faasatauroina, ma toe tu mai i le aso tolu. 8Ona latou manatu ai lea i lana fetalaiga. 9Ua latou toe foi mai nai le tuugamau, ona latou faamatala mai lea o ia mea uma i le toasefulu ma le toatasi, atoa ma i latou uma. 10O Maria foi le Makatala, ma Ioana, ma Maria le tinā o Iakopo, ma i latou uma sa ia te i latou, o i latou ia e na faamatala mai ia mea i le au aposetolo. 11Ua latou manatu foi i a latou upu e peiseai se talanoaga; latou te lei talitonu foi ia te i latou. 12A ua tu i luga Peteru, ua momo‘e i le tuugamau; ua punou foi, ua iloa e ia o ie ua tuu faatasi; ona alu ai lea o ia, ua ofo i le mea ua faia.

13Faauta foi, ua ō le toalua o i latou i lea aso i le aai, o Emau le igoa, o lo la va ma Ierusalema e onogafulu o setatio. 14Sa fetautalatala‘i i laua i ia mea uma ua faia. 15Ua la fetautalatala‘i, ma fesueai, ona faalatalata mai ai lea o Iesu, ua o faatasi ma i laua. 16A ua punitia o laua mata, o lea ua le iloa ai o ia e i laua. 17Ua fetalai atu ia ia te i laua, O a ea ia upu ua oulua felafolafoai ai, o oulua o savavali, ma ua mata faanoanoa? 18O le tasi o i laua e igoa ia Kaleopa, ua tali mai ia te ia, ua faapea mai, Pe na o oe ea lē āumau i Ierusalema ma le le iloa o mea ua tutupu ai i ona po nei? 19Ona fetalai atu lea o ia ia te i laua, O a mea? Ona la fai mai ai lea ia te ia, O mea ia Iesu le Nasareta, o le perofeta lea sa malosi i mea na na faia, atoa ma ana upu i luma o le Atua ma le nuu uma; 20na tuuina atu foi o ia e le au faitaulaga sili ma o tatou faipule, ia faasalaina o ia ia oti, ma ua latou faasatauroina o ia. 21Sa matou faamoemoe foi, o ia lava o le a togiolaina Isaraelu; a e le gata i ia mea uma, o lona aso tolu le asō talu ona faia o na mea. 22A ua matou ofo lava i nisi fafine o i matou sa i le tuugamau i le tafa o ata; 23e lei iloa e i latou lona tino, a ua latou o atu, ma faapea atu, ua iloa e i latou agelu na faaali mai, e na fai mai, ua soifua o ia. 24O isi foi o matou, na latou o i le tuugamau, ua faapea foi ona iloa e i latou, pei ona fai mai ai o fafine; a e lei iloa e i latou o ia. 25Ona fetalai atu lea o ia ia te i laua, O tagata valea, ma loto faigata ona talitonu i mea uma ua fai mai ai e le au perofeta. 26E le tatau ea ona tiga o le Keriso i mea faapena, i le oo ai o ia i lona mamalu? 27Ona faamatala ai lea e ia ia te i laua o mea ua tusia ia te ia i Tusi uma, ua amata mai ia Mose atoa ma le au perofeta uma. 28Ua latou faalatalata atu i le aai ua latou o i ai; a o ia ua aga atu peiseai a alu loa. 29A ua la pulunaunau ia te ia, na faapea mai, Tatou te nonofo ma i maua nei; auā ua taugagaifo le la, ua lata i le afiafi. Ona ulufale atu lea o ia, latou te nonofo. 30Ua taoto ia e taumafa faatasi ma i laua, ona tago ai lea i le areto, ua faafetai, ua tofitofi, ma avatu ia te i laua. 31Ona pupula ai lea o laua mata, ua la iloa o ia; a ua mou o ia nai ia i laua. 32Ona la fetautalatala‘i lea, E lei mu ea o ta loto i totonu ia i taua, ina ua fetalai o ia ia te i taua i le ala, ina ua faamatala mai foi e ia o Tusi ia te i taua? 33Ua la tutu i luga i lea lava itu aso, ua toe foi atu ai i Ierusalema, ua maua atu foi e i laua o le toasefulu ma le toatasi ua faapotopoto faatasi ma e na ia i latou; 34o faapea mai i latou, E moni, ua toe tu le Alii, ua faaali foi o ia ia Simona. 35O i laua foi ua la faamatala atu mea na faia i le ala, mona ua iloa foi o ia e i laua ina o tofitofi le areto.

36O tautalatala i latou i nei mea, a a ua tu mai Iesu lava i o latou luma, ua fetalai atu ia te i latou, Ia outou manuia. 37Ua fefefe i latou, ua matuā matatau lava, fa te i latou o le agaga ua latou vaaia. 38Ua fetalai atu foi o ia ia te i latou, Se a le mea ua outou atuatuvale ai? se a foi e tutupu ai masalo i o outou loto? 39Ia outou vaavaai mai i o‘u lima ma o‘u vae, auā o a‘u lava lenei; ia outou tagotago mai ia te au, ma ia vaavaai mai; auā o le agaga e leai sona aano ma ni ivi, pei o a‘u nei ua outou vaavaai i ai. 40Ua uma ona fetalai atu, ona faaali atu ai lea e ia ia te i latou o ona lima ma ona vae. 41A o lei talitonu i latou ona ua olioli, ma ua ofo, ua fetalai atu ia ia te i latou, O iina ea ni a outou mea e ‘ai? 42Ona latou avatu ai lea ia te ia se fāsi i‘a tunu, ma se fāsi melikerio. 43Ua tago ia i ai, ma taumafa ai i o latou uma. 44Ua fetalai atu ia ia te i latou, O upu ia na ou fai atu ai ia te outou, ina o ou ia te outou; e tatau ona taunuu o mea uma ua tusia ia te au i le tulafono a Mose, ma le au perofeta, ma salāmo. 45Ona tatalaina lea o ia o latou loto, ina ia latou lagona ai Tusi. 46Ua fetalai atu foi o ia ia te i latou, Ua faapea ona tusia, e faapea foi ona tatau ina tiga o le Keriso, ma toe tu nai e ua oti i le aso tolu; 47ina ia tala‘iina foi le salamo ma le faamagaloina o agasala i nuu uma i lona igoa, e amata mai i Ierusalema. 48O molimau foi outou i nei mea. 49Faauta foi, ou te auina mai ia te outou le na folafolaina e lo‘u Tamā; a ia outou nonofo i le aai o Ierusalema, seia maua e outou le mana mai lugā.

50Ua ave e ia ia te i latou i tua, ua oo lava i Petania; ona sisii ai lea o ona aao, ma faamanuia ia te i latou. 51Ua oo ina o faamanuia e ia ia te i latou, ona te‘a ese lea o ia ia te i latou, ua siitia i le lagi. 52Ua latou ifo ia te ia, ona toe foi mai lea i Ierusalema ma le olioli tele; 53sa i le malumalu i latou e le aunoa, o latou o vivii ma faafetai atu i le Atua. Amene.

Currently Selected:

LUKA, 24: SOV

Highlight

Copy