ISAIA, 40

O LE MATAUPU XL.

O upu faamafanafana i tagata o le Atua.

1Ia outou faamafanafana, ina faamafanafana atu ia outou i lo‘u nuu, ua fetalai mai ai lo outou Atua. 2Ia outou faamatalaloto ia Ierusalema, ma outou alalaga ia te ia, ua iu ona po o lona tiga, ua tauia lana amioletonu; auā ua na maua faalua mai le lima o Ieova le taui ona o ana agasala uma. 3O le leo o le ua alaga i le vao, Ina teuteu ia outou le ala o Ieova; ia outou faalauleleia le ala tele i le vao lafulafua mo lo tatou Atua. 4O vanu uma e faaeaina ia; o mauga uma ma mea maupuepue e faamaulaloina ia; o mea faafatiatamai e fai ma mea faalaugatasi ia, ma mea gaoa e fai ma mea laulelei. 5Ona faaalia mai ai lea o le pupula o Ieova e vāaia lava e tagata uma faatasi; auā ua fetalai mai ai le fofoga o Ieova. 6Ua fai mai le leo, Ina alaga ia. Ona fai atu lea o ia, Se a ea se upu ou te alagaina? O tagata uma o le mutia i latou, ma lo latou lelei uma, e tusa lea ma le fuga o le vao; 7e magumagu le mutia, e toulu le fuga; auā o le mānava o Ieova ua agi mai i ai; e moni, o le mutia lava le nuu. 8E magumagu le mutia, e toulu le fuga; a o le afioga a lo tatou Atua, e tumau lea e faavavau. 9Alu ae i le mauga maualuga, o oe lē au mai le tala lelei ia Siona; ia matuā leo tele, o oe lē au mai le tala lelei ia Ierusalema; ia leo tele, aua le fefe; fai atu i aai o Iuta, Faauta i lo outou Atua. 10Faauta, e afio mai le Alii o Ieova ma le malosi, e pule lona aao mo ia; faauta, ua ia te ia lana taui, ua i ona luma le totogi o lana galuega. 11Na te leoleoina lona lafu e pei o le leoleo mamoe; na te sapaia tamai mamoe i ona lima, ma tauave i latou i lona fatafata; na te ta‘ita‘i filemu i mamoe ua fananau. 12O ai ea ua na fuatia le sami i lona alofilima, ma na fuatia le lagi i le āga, ma na fuatia le eleele o le lalolagi i le fua faaofuofu; ua na fuatia mauga foi i le fua, ma mauga iti i le fua faatautau? 13O ai ea ua fuatia le atamai o Ieova? o ai foi se tagata e pulega faatasi ma ia, ua na a‘oa‘oina o ia? 14O ai ea se na la filifili faatasi ma ia, ma na a‘oa‘o ia te ia, ma na a‘oa‘o ia te ia i le ala o le faamasinoga; ma na a‘oa‘o ia te ia ia poto ai, ma na faailoa ia te ia le ala o le faautauta? 15Faauta o atu nuu e tusa i latou ma si mea e sisina ifo nai le pakete; e faatatauina i latou e pei o le efuefu i le fua faatautau; faauta, na te siitia nuu tu tai e peiseai sina mea ninii lava. 16E le lava foi Lepanona ina mu a‘i le afi; ma manu o i ai, e le lava ai se taulaga mu. 17O atu nuu uma peiseai ua leai i ona luma; ua matuā leai lava i latou i lona manatu, ma ua matuā faatauvaa lava. 18O lenei, tou te faatusa le Atua ia te ai? se a foi se faatusa tou te faatusaina ai o ia? 19O le tufuga na te gaosia le tupua uamea, ma lē fai mea uamea na te ufiufi ai i le auro; na te gaosia filifili ario. 20O le ua mativa i taulaga na te filifilia se laau e le pala; na te sailia sana tufuga poto, ia na faia se tupua e le maluluina. 21Tou te le iloa ea? Tou te lei faalogo ea? E lei ta‘uina atu ea ia te outou mai le amataga? Tou te lei lagona ea mai le faavaeina o le lalolagi? 22O ia lē tietie i luga o le faataaliolio o le lalolagi, a o e nonofo ai e tutusa i latou ma sē; o ia lē fofola le lagi e pei o se ie manifinifi; na te faamafolafolaina ai foi e pei o se fale ie e nofo ai. 23Na te liua alii ia leai; o faamasino o le lalolagi ua faia i latou e ia e tusa ma se mea faatauvaa. 24Ua le totōina lava i latou, ua le luluina lava ni o latou fua, ua le mau aa lava i le eleele lo latou pogai; ua na ona ulafia i latou e ia, ona mamago ai lea o i latou, e avea foi i le afā e pei o le tagutugutu o saito. 25O lenei, po o ai ea tou te faatusa i ai a‘u? po o ai foi ma te tutusa? ua fetalai mai ai le Paia. 26Se‘i tetepa ae i luga, ma outou vaai, po o ai ea ua na faia nei mea? Na te ta‘ita‘iina mai a latou ‘au ua faitauina; na te valaau ia te i latou uma i o latou igoa; ona o le tele o lona malosi ma lona mana tele; e leai so latou e le iloa. 27Iakopo e, se a le mea e te fai ane ai? Isaraelu e, se a le mea e te faapea ai, Ua lilo lo‘u ala ia Ieova, ua tuua foi lo‘u faamasinoga e lo‘u Atua? 28E te le iloa ea? E te lei faalogo ai ea? O le Atua o le vavau, o Ieova o le na faia tuluiga o le lalolagi, e le vaivai o ia, e le tigaina foi, e le masuesueina lona mafaufau. 29Na te avatua le malosi i e ua vaivai; a o e ua leai se malosi, na te faatuputele i ai le malosi. 30E vaivai ma tigaina tama matutua; o taulelea foi, e pauu lava i latou; 31a o e faatalitali ia Ieova, e toe faafouina lo latou malosi; latou te sii ae apaau e pei o aeto; latou te femoei, a e le vaivai; latou te savavali, a e le tigaina.

Currently Selected:

ISAIA, 40: SOV

Highlight

Copy